Lá nitraximínáʼ rígi̱ ráʼ. Á mu xúʼko̱, raʼkháa i̱ndó ikháánʼ nitraxi rígi̱. Mbaʼin xa̱bu̱ náa xúgíʼ numbaaʼ nandún mbuyáá xú káʼnii gáxti̱ʼña̱a̱. Lá ma̱ndoo muxkamaa ráʼ.

Mbaʼin wéñuʼ xa̱bu̱ nuthi rí ma̱ndoo. Náa numuu rá. Numuu dí nixkamaa rí náa Biblia nariʼña̱a̱ májánʼ wéñuʼ graxe̱ rúʼko̱. Lá nandaʼ ma̱ta̱ya̱a̱ ndiéjunʼ eʼsngáa ráʼ. Mbáa manigua̱ʼ musngááʼ ga̱jma̱a̱ numuu Biblia bi̱ nutaraʼa numuu Jeobá rí asndu xúrumán. *

Mbaʼin xa̱bu̱ namiñun munigajmaa Biblia, tikhun nuthi rí tsíguapiin, rí miʼskhaa wéñuʼ o tsíñún rí miʼsngúún. Mú, tikhun xa̱bu̱ niriyaʼ awan mu munigajmaa Biblia. Rígi̱ rí nithi tikhun xa̱bu̱.

• “Ni̱jkhá náa guʼwá ndxajkun ndrígu̱ún católico ga̱jma̱a̱ ndrígu̱ún protestantes, náa templo sij, náa monasterio budista ga̱jma̱a̱ asndu ninigajmaa Teología náa universidad. Mú táxtiʼña̱a̱ mbaʼa graxe̱ ndrígóʼ. Ikhú mbáa a̱ʼgu̱ bi̱ ni̱ndxu̱u̱ testigo niʼdu̱u̱ xkrugoʼ. Niniguʼ wéñuʼ rí niriʼña̱a̱ ga̱jma̱a̱ Biblia graxe̱ ndrígóʼ, ikha jngó nigruígú mbá curso rí niʼthí maxnúʼ.” (Gill, Inglaterra.)

• “Nigúʼdoo mbaʼa graxe̱ ga̱jma̱a̱ numuu rí xóo makuwaanʼ, mú xóo rí nariʼña̱a̱ pastor bi̱ xtáa náa guʼwá ndxájkiunʼ tséʼni manimboʼ. Mú, mbáa bi̱ naʼtaraʼa numuu Jeobá nijmuu i̱ndó Biblia mu mariʼña̱a̱ xúgíʼ graxe̱ ndrígóʼ. Índo̱ niraxuʼ á mu nandoʼ manigajmaa itháan ni̱thu̱u̱n rí ma̱ndoo.” (Koffi, Benín.)

• “Nindoʼ mba̱yo̱o̱ ndiéjunʼ eguáʼnii bi̱ nikháñun. Niku̱mu̱ʼ rí ikhiin ma̱ndoo muniulúʼ dí raʼkhí, ga̱jma̱a̱ niraximínáʼ ndiéjunʼ eʼthí náa Biblia. Ikha jngó nigíʼdu̱u̱ ninigajmaa Biblia ga̱jmu̱ʼ mbáa bi̱ nambáxuʼ bi̱ ni̱ndxu̱u̱ xa̱bi̱i̱ Jeobá.” (José, Brasil.)

• “Nigíʼdu̱u̱ ninigajmaa Biblia, mu tákroʼoʼ nditháan. Mbá mbiʼi, bi̱ nutaraʼa numuu Jeobá niguwaʼ náa goʼwóoʼ ga̱jma̱a̱ nithu̱nʼ ndiéjunʼ eyoo gáʼthún mbaʼa rí kiʼtáriyaʼ náa Biblia. Rúʼko̱ niʼni manigu̱ʼ itháan.” (Dennize, México.)

• “Naraximínáʼ á mu gajkhun rí Dios naxmiéjunʼ kaʼyoʼ. Ikha jngó nitajkáan náa Dios bi̱ niʼni Biblia. I̱mba̱ néjtsuu, bi̱ nutaraʼa numuu Jeobá niguwaʼ gúyoʼ ga̱jma̱a̱ nigíʼdu̱u̱ ninigajmaa Biblia gajmíi̱nʼ ikhiin.” (Anju, Nepal.)

Xúgíʼ rí nithi nayambáá ga̱jma̱a̱ ajngáa rígi̱ rí niʼthí Jesús: “Gagi kuwa bi̱ nduyáá rí ndañúnʼ mbuyáaʼ Dios” (Mateo 5:3). Xúgiáanʼ nandulúʼ makuwa gagi, ga̱jma̱a̱ i̱ndó Dios ma̱ndoo maxnúlúʼ ikha rí ndayóoʼ mu muxkamaa. Xú káʼnii rá. Rígi̱ muxkamaa náa Biblia.

Xú káʼnii gándoo gáta̱ya̱a̱ ikháánʼ rí naʼthí náa Biblia rá. Xú káʼnii gámbáyaʼ rá. Guʼyáá rígi̱.