1. Ndiéjunʼ niʼni mbáa ángel bi̱ nimbáxu̱u̱ májánʼ ga̱jma̱a̱ Jeobá rá.

NIXTÁA mbáa ángel bi̱ nákha ginii nimbáxu̱u̱ ga̱jma̱a̱ Jeobá. Mú mbá mbiʼi niniguʼ rí xa̱bu̱ numbaaʼ mbuyamajkuíí ikhaa ki xóo Dios. Numuu rí tániñuʼ randxaʼwáminaʼ xúʼko̱, ni̱jkha̱nú nikudaminaʼ aʼkhá (Sant. 1:14, 15). Táʼnimbo̱o̱ náa Jeobá ga̱jma̱a̱ nirtaximínáʼ “anu ri minduhua” (Juan 8:44). Tséʼyáá xú káʼnii mbiʼyuu nákha xóó naʼnimbo̱o̱, mú rí xúgi̱ nuxna mbíʼílú Satanás.

2, 3. Náa numuu rí bi̱ gíʼdoo sia̱nʼ náa Jeobá nagumbiʼyuu “Satanás”, “Gixa̱a̱”, “a̱bu̱nʼ” ga̱jma̱a̱ “xujkhú wéñiʼ” ráʼ.

² Satanás nindxu̱u̱ bi̱ gíʼdoo wéñuʼ sia̱nʼ náa Jeobá ga̱jma̱a̱ náa xa̱bu̱ numbaaʼ. Náa Biblia nambáyulúʼ mbuʼyáá dí ikhaa nindxu̱u̱ ra̱májáánʼ wéñuʼ. Naxná mbiʼyuu Satanás, rí nandoo gáʼthúu̱n “Opositor”. Naxná mbiʼyuu xúʼko̱ numuu rí ikhaa nawiyuʼ kaʼyoo Xa̱bu̱ Ñajunʼ ndrígio̱o̱ Jeobá ma̱ngaa naxmínaʼ ga̱jma̱a̱ ikhaa. Satanás tsíyoo rí maʼtáñajunʼ Jeobá.

³ Náa Revelación 12:9, xa̱bu̱ bi̱ sia̱nʼ bugi̱ Jeobá naxná mbiʼyuu  “Gixa̱a̱”. Náa numuu rá. Numuu dí rúʼko̱ nandoo gáʼthúu̱n “Calumniador”, o xóo mbáa bi̱ naʼthí rí minduwaʼ ga̱jma̱a̱ numún eʼwíínʼ. Ga̱jma̱a̱ Satanás niʼni gámaa Jeobá rí nindxu̱u̱ mbáa bi̱ naʼninduwaʼ. Ma̱ngaa nagumbiʼyuu “a̱bu̱nʼ bi̱ phú ikhaa o a̱bu̱nʼ wayuu” numuu rí nijmiuu mbáa a̱bu̱nʼ mu maʼnindu̱wa̱ʼ Eva. Ga̱jma̱a̱ nagumbiʼyuu “xujkhú wéñiʼ” numuu rí nindxu̱u̱ xóo mbáa xujkhú mbiiʼ ga̱jma̱a̱ naʼni gínáanʼ. Ikhaa tsíyoo rí Jeobá maʼngo̱o̱ maʼnimbánuu rí nikudaminaʼ maʼni. Ma̱ngaa nandoo maʼni gámbíin xúgínʼ xa̱bi̱i̱ Dios.

4. Ndiéjunʼ gúʼyáá náa artículo rígi̱ rá.

⁴ Xúʼko̱ kaʼnii, Satanás nindxu̱u̱ bi̱ gíʼdoo sia̱nʼ náa Jeobá ga̱jma̱a̱ náa xuajñu. Ikhaa nandoo rí muniʼñáaʼ ruʼni ñajunʼ Jeobá. Ikha jngó náa Biblia naʼthúlúʼ: “Uyahuamijna hueñuʼla, muri su sjŋaʼla su ñajunʼ guixa, ica ñajunʼ xuri endiʼ su ŋgarigo randxajua rido ndayaʼ su micu” (1 Ped. 5:8). Náa artículo rígi̱ gúʼyáá ajtsú numuu rí gíʼmaa muñeumíjna̱ náa Satanás.

5, 6. a) Araxná xkri̱da rí nasngájma rí ángeles guáʼdáá wéñuʼ tsiakii. b) Náa numuu rí naʼthí náa Biblia rí Satanás ma̱ndoo magudíin xa̱bu̱ rá.

⁵ Ángeles guáʼdáá wéñuʼ tsiakii (Sal. 103:20). Itháan najmañún ga̱jma̱a̱ itháan gújkuíínʼ ki xóo ikháanʼ. Ángeles bi̱ ni̱ndxu̱ún jmbiin najmún tsiakii ndrígu̱ún mu muni rí májánʼ. Mbá xkri̱da, nákha wajyúúʼ, mbáa ángel nigudíin mbá mbruʼun mbá 185,000 soldados bi̱ guáʼdáá sia̱nʼ. Rí maguma rúʼko̱ mingíjyúuʼ gáʼyoo mbáa xa̱bu̱ ga̱jma̱a̱ gakhii wéñuʼ gúyáá soldados (2 Rey. 19:35). Imbo̱o̱ mbiʼi, mbáa ángel niguwíin apóstoles ndrígio̱o̱ Jesús náa guʼwá e̱jua̱nʼ. Nimbáʼtoo xkrugua, niguwíin apóstoles ga̱jma̱a̱ nirugua̱a̱ mbu̱júu̱ rí asndu túyáá bi̱ nuñewa̱a̱n (Hech. 5:18-23).

⁶ Xó má eʼyáá, ángeles bi̱ ni̱ndxu̱ún jmbiin najmún tsiakii ndrígu̱ún mu muni rí májánʼ. Mú Satanás najmuu tsiakii ndrígóo mu maʼni dí ra̱májánʼ. Ga̱jma̱a̱ ikhaa gíʼdoo wéñuʼ tsiakii. Ikha jngó náa Biblia naxná mbiʼyuu “tsi naʼtañajun” ga̱jma̱a̱ “dios” náa numbaaʼ rígi̱ (Juan 12:31; 2 Cor. 4:4). Ma̱ngaa naʼthí rí “guiʼdo siaqui ri magudin su xabu” (Heb. 2:14). Rígi̱ tsíyoo gáʼthi rí nagudíin xa̱bu̱. Mú, náa numuu rí náa Biblia naʼthí rí ma̱ndoo magudíin xa̱bu̱ rá. Timbá, numuu rí ikhaa naʼni rí xa̱bu̱ maguiñunʼ kuyamijná ga̱jma̱a̱ mugi̱ʼdu̱u̱n. Raga̱jma̱, numuu rí Adán ga̱jma̱a̱ Eva nixudami̱jna̱ aʼkhá ga̱jma̱a̱ numuu ikhaa, ikha jngó xúgiáanʼ nuxuʼdámíjná aʼkhá ma̱ngaa nakháñulú (Rom. 5:12). Ikha jngó Jesús naʼthí rí Satanás nagudíin xa̱bu̱ (Juan 8:44). Nduʼyáá májánʼ rí Satanás gíʼdoo wéñuʼ tsiakii.

7. Araxná xkri̱da rí na̱ʼkha̱ náa Biblia rí nasngájma rí xa̱bu̱ wéñiʼ guáʼdáá tsiakii.

⁷ Índo̱ tsímbayíí Satanás ma̱ngaa má tsimbañúún bi̱ nagún ki̱dxu̱ʼ. Tikhun bi̱ nagún ki̱dxu̱ʼ Satanás ni̱ndxu̱ún xa̱bu̱ wéñiʼ, bi̱ ni̱ndxu̱ún ángeles bi̱ tsénimbu̱ún (Rev. 12:3, 4). Náa Biblia na̱ʼkha̱ mbaʼa xkri̱da dí nasngájma rí ikhiin guáʼdáá itháan tsiakii ki xóo ikháanʼ ga̱jma̱a̱ ma̱ndoo muni rí mumiʼnííʼ wéñuʼ (Mat. 8:28-32; Mar. 5:1-5). Xámbumulú rí Satanás gajmíi̱n xa̱bu̱ wéñiʼ guáʼdáá tsiakii (Mat. 9:34). I̱ndó maʼngulú muʼni gajmiúlú ga̱jma̱a̱ tsiakii ndrígóo Jeobá.

8. a) Ndiéjunʼ eyoo Satanás rá. (Atayáá timbá xtiʼkhu.) b) Ndiéjunʼ rí etayáá ikháánʼ dí nasngájma rí numbaaʼ rígi̱ naʼni gínáanʼ xó má eʼni Satanás rá.

⁸ Satanás ra̱ʼkhá tháán eʼni gínáanʼ. Xó má ndiʼyáá náa kutriga̱ a̱jkhu̱ náa artículo rígi̱, náa  Biblia naʼthí rí ikhaa nindxu̱u̱ xóo mbáa i̱ndi̱íʼ bi̱ nandxaʼwá numuu rí naxkidxu̱u̱ wéñuʼ. Ikhaa xtáa raʼtáñajunʼ náa numbaaʼ rí kuwaanʼ, mú xóó tsígiʼmuu, nandoo itháan (1 Juan 5:19). Satanás ma̱ngaa nandoo maʼnimbáti̱gi̱i̱n bi̱ kaxtaʼwíin bi̱ xóó naguanún náa tsu̱du̱u̱ Ku̱ba̱ʼ ga̱jma̱a̱ “iʼhuinʼ mugu” (Juan 10:16; Rev. 12:17). Ikha jngó naʼni rí mixkhún bi̱ phú ni̱ndxu̱ún cristianos asndu nákha siglo timbá.

9, 10. a) Xú káʼnii Satanás nigíʼ maʼnimbáti̱ga̱a̱ xuajen Israel rá. b) Náa numuu rí nindoo maʼni gámbáa xuajen Israel rá. c) Xú káʼnii ku̱mu̱u̱ Gixa̱a̱ índo̱ mbáa xa̱bi̱i̱ Jeobá nakudaminaʼ mbá aʼkhá mba̱a̱ rá.

⁹ Mbáa i̱ndi̱íʼ bi̱ naxkidxu̱u̱ tsigáwiinʼ a̱jkiu̱u̱n kaʼyoo bi̱ mikhu̱u̱. Xúʼko̱ má kaʼnii, Satanás tsegáwiinʼ a̱jkiu̱u̱n índo̱ naʼni gíníin xa̱bu̱. Gundxaʼwamíjna̱ xú káʼnii Satanás niʼni gíníin xa̱bu̱ náa xuajen Israel. Ikhaa niʼngo̱o̱ niʼni rí israelitas xóo Zimrí muxudami̱jna̱ aʼkhá rí mubúnʼ gajmiún gu̱ʼu̱ ga̱jma̱a̱ xóo Guehazí rí mbayá mbá rí rakáʼyoo. Rígi̱ niʼni marigá wéñuʼ tsingíná. Satanás nidxuu wéñuʼ índo̱ niʼngo̱o̱ niʼni rígi̱ (Núm. 25:6-8, 14, 15; 2 Rey. 5:20-27).

¹⁰ Náa numuu rí nindoo maʼni gámbóo xuajen Israel rá. Numuu rí ndiʼyoo rí náa xuajen rúʼko̱ gáʼkha̱ Mesías. Ga̱jma̱a̱ ndaʼyoo rí Mesías maʼni gámbáa ikhaa, ma̱ngaa masngájma rí Jeobá kaʼyoo maʼtáñajunʼ (Gén. 3:15). Satanás táʼndoo rí Jeobá maʼndoo kaʼñúún israelitas, ikha jngó niʼni xúgíʼ xó má niʼngo̱o̱ mu ikhiin makiéʼkhun. Ikhaa tagáwinʼ a̱jkiu̱u̱n kaʼyoo David índo̱ nikudaminaʼ aʼkhá ga̱jma̱a̱ mbáa a̱ʼgu̱. Ma̱ngaa tagáwinʼ a̱jkiu̱u̱n kaʼyoo Moisés índo̱ nindáti̱go̱o̱ rí maxtáa náa Ku̱ba̱ʼ rí niʼthí Jeobá maxná. Satanás nadxuu wéñuʼ índo̱ mbáa xa̱bi̱i̱ Dios nakudaminaʼ mbá aʼkhá mba̱a̱. Ikhú natsijmaa Jeobá (Pro. 27:11).

11. Náa numuu rí Satanás nigruiga̱ tsáʼkhá náa inuu Sara rá.

¹¹ Satanás niwiyuʼ kaʼñúún itháan xa̱bu̱ náa  ma̱ʼkha̱ Mesías. Mbá xkri̱da, garmáʼáan a̱jkiu̱lú rí nirígá índo̱ Jeobá niʼthúu̱n Abrahán rí maʼga̱nú mani̱ndxu̱u̱ ‹mbá xuajen mba̱a̱› (Gén. 12:1-3). Índo̱ Abrahán ga̱jma̱a̱ Sara nikuwa náa Egipto, rey bi̱ xtáa náa xuajen rúʼko̱ ni̱jkha̱ kayáa Sara mu mbayáa. Mú Jeobá niʼnikríyaʼ (atraxnuu Génesis 12:15, 17). Xúʼko̱ kayuʼ nirígá ga̱jma̱a̱ imba̱a̱ rey bi̱ xtáa náa xuajin Guerar nákha xóó tséxtáa Isaac (Gén. 20:1-7). Lá Satanás niʼni dí reyes bugi̱ manigu̱nʼ kuyáá xáʼ. Náa Biblia tséʼthi. Mú garmáʼáan a̱jkiu̱lú rí Sara niniñuʼ xúgíʼ rí gíʼdoo numuu náa xuajin Ur mu maʼga̱ gáxtáa náa guʼwá xtíin. Mbáa Satanás nindoo maxnúu mbaʼyoo dí ra̱ʼkhá tháán mitsaan kúwi̱i̱n reyes ga̱jma̱a̱ maʼni rí maniñaʼ ajmbio̱o̱ xúʼko̱ má Jeobá ma̱ngaa. Satanás ra̱ʼkhá tháán nindoo rí mandáti̱go̱o̱ rí náa ikhaa ma̱ʼkha̱ Mesías. Na̱nguá nixmiéjunʼ nditháan á mu maniñaʼ ajmbio̱o̱ Sara, o rí maʼni gachíminaʼ ma̱ngaa rí maniñuʼ rambáxu̱u̱ ga̱jma̱a̱ Jeobá. ¡Ra̱ʼkhá tháán naʼni gínáanʼ Satanás!

12, 13. a) Ndiéjunʼ niʼni Satanás índo̱ nigumaa Jesús rá. b) Xú káʼnii eʼñún Satanás jiáma bi̱ nuni ñajunʼ Jeobá rí mbiʼi xúgi̱ rá.

¹² Jesús nixtáa mba̱yu̱ʼ tsiguʼ nda̱wa̱á. Satanás táʼyoo rí ada̱ bugi̱ mitsiʼyáa wéñuʼ. Ikhaa ndiʼyoo rí na̱ʼkha̱ náa goʼwóo Abrahán ga̱jma̱a̱ maʼga̱nú mani̱ndxu̱u̱ Mesías. Ma̱ngaa, Jesús maʼni gámbóo xúgíʼ rí niʼni Gixa̱a̱ (1 Juan 3:8). Lá nindxa̱ʼóo edxu̱u̱ Satanás rí migínáa wéñuʼ ada̱ bi̱ maxíyáa xáʼ. Na̱nguá. Ikhaa taxmiéjunʼ náa biʼyaa rí májánʼ ga̱jma̱a̱ dí ra̱májánʼ. Rí niʼni, nicho̱o̱ wéñuʼ mu maxíyáa Jesús. Ndiéjunʼ niʼni xá.

¹³ Índo̱ rey Herodes niʼdxuun rí “rey drigun judío” nigumaa, nikiʼnáa wéñuʼ ga̱jma̱a̱ nindoo maxíyáa (Mat. 2:1-3, 13). Ikha jngó nikuʼma rí muradíin xúgínʼ bi̱ guáʼdáá a̱jma̱ tsiguúnʼ o itháan majkhinʼ náa xuajen Belén ga̱jma̱a̱ náa xuajen dí rígá mbájndi (atraxnuu Mateo 2:13-18). Jesús nikríyaʼ ikhú. Mú, ndiéjunʼ eʼthúlú ga̱jma̱a̱ numuu Satanás rá. Rí xa̱bu̱ numbaaʼ na̱nguá guáʼdáá numún ní má e̱ji̱n. Satanás nindxu̱u̱ xóo mbáa i̱ndi̱íʼ bi̱ nandxaʼwá. Xambumulúʼ rí ikhaa naʼni gínáanʼ wéñuʼ.

14, 15. Xú káʼnii eʼninduwiinʼ xa̱bu̱ Satanás rá.

¹⁴ Jeobá nindxu̱u̱ mbáa Dios bi̱ nandoo kaʼyulúʼ wéñuʼ (1 Juan 4:8). I̱ndó rí nandoo naʼni Satanás mu xa̱bu̱ xúnimbu̱ún náa Dios, nindxu̱u̱ rí naʼninduwiinʼ. Xú káʼnii eʼni xá. Naʼni rí xa̱bu̱ ‹xúyáaʼ Dios›. Xóo muʼthá, rí xúyáá rí nda̱ñúnʼ mambaxúún gajmiún Dios (Mat. 5:3). Gixa̱a̱ naʼninduwiinʼ mbaʼin xa̱bu̱ mu xájmañún rí gajkhun ga̱jma̱a̱ numuu Dios (2 Cor. 4:4).

¹⁵ Satanás ndaʼyoo rí Jeobá nandoo rí mixnáá gamajkhu i̱ndó ikhaa (Éx. 20:5). Ikha jngó naʼninduwiinʼ xa̱bu̱ ga̱jma̱a̱ religión dí ragájkhun. Naniguʼ wéñuʼ índo̱ naʼngo̱o̱ naʼni rí xa̱bu̱ mbuyamajkún bi̱ nikháñun, dí rígá náa numbaaʼ, xujkhúʼ ga̱jma̱a̱ i̱ʼwáʼ, mú raʼkháa Jeobá. Bi̱ nuni rúʼko̱ nakumún rí Dios nanigu̱ʼ, mú rí nakumún ga̱jma̱a̱ rí nduyamajkuíí na̱nguá gíʼdoo numuu. Mbiʼi rí nixtáa gaʼyee Isaías nirígá ikhaa má kayúʼ gajmiún israelitas. Jeobá nigíʼ mambáñun índo̱ niʼthí dí religión dí ragájkhun nindxu̱u̱ xóo ganitsu dí ra̱májánʼ. Niʼthún rí ndaa numuu muni numáá ganitsu rí xambáñun. Ga̱jma̱a̱ niʼthí xóó: “Gudxuun rí gáthalá, ga̱jma̱a̱ guphu rí májánʼ” (Is. 55:2).

16, 17. a) Náa numuu rí Jesús niʼthúu̱n Pedro: “¡Arraxo jani naʼ inuʼ guejio Guixa!”. b) Xú káʼnii egíiʼ maʼni nduwáanʼlú Satanás rá.

¹⁶ Satanás ma̱ndoo maʼninduwiinʼ xa̱bi̱i̱ Dios  bi̱ wájun jmbu. Mbá xkri̱da, guʼyáá rí nigíʼnuu Jesús índo̱ niʼthún xa̱bi̱i̱ rí inuu má makhañúu. Pedro nindoo kaʼyoo wéñuʼ Jesús rí niʼthúu̱n dí raʼkháa mbiʼi maxmiéjunʼ. Mú Jesús niʼthúu̱n: “¡Arraxo jani naʼ inuʼ guejio Guixa!” (Mat. 16:22, 23). Náa numuu rí niʼthúu̱n xúʼko̱ káʼnii xá. Numuu rí Jesús ndiʼyoo rí ndayóoʼ makhañúu mu maʼni káwíin xa̱bu̱ numbaaʼ ga̱jma̱a̱ masngájma rí Satanás naʼninduwaʼ. Ninindxu̱u̱ mbá mbiʼi rí nigiʼdoo wéñuʼ numuu. Na̱nguá ninindxu̱u̱ mbóo mbiʼi rí xaxmiéjunʼ. Mbáa Satanás manigu̱ʼ wéñuʼ á mu Jesús na̱nguá xtáa xawii.

¹⁷ Náa numbaaʼ xkawiʼ rígi̱ nánguá guanúu mba̱yu̱ʼ mbiʼi. Ikha jngó kuwáanʼ náa mbá mbiʼi kiejunʼ. Mú Satanás nandoo rí xaxmiéjunlú ga̱jma̱a̱ makuwaanʼ gagi náa numbaaʼ rígi̱. Nandoo makumulúʼ rí tígo̱o̱ xóó mba̱yu̱ʼ wéñuʼ mu matumuu mbiʼi o rí xáʼga̱nú marigá. Mú rúʼko̱ nindxu̱u̱ minduwaʼ. Gakuwaanʼ xawii ga̱jma̱a̱ xambumulú rí kuwaanʼ iwáá mbiʼi (Mat. 24:42).

18, 19. a) Ndiéjunʼ eyoo Satanás muʼnimbulúʼ rá. b) Xú káʼnii embáyuluʼ Jeobá rá.

¹⁸ Satanás ma̱ngaa nandoo makumulú rí Jeobá tsíyoo kaʼyulúʼ ga̱jma̱a̱ rí xáʼni mba̱a̱ a̱jkiu̱u̱n kaʼyulúʼ. Mú ma̱ngaa rígi̱ nindxu̱u̱ minduwaʼ. Náa Biblia naʼthí: “Dios na̱nguá ni̱ndxu̱u̱ ra̱májáánʼ mu mambumuu ñajunʼ rí nunila ga̱jma̱a̱ rí nisngajmá rí nanga̱jua̱la ku̱ya̱a̱ mbiʼyuu índo̱ nini ñajunʼ” (Heb. 6:10). Xóo eʼyáá. Jeobá ndaʼyoo rí gíʼdoo numuu xúgíʼ rí nuʼnilú ga̱jma̱a̱ numuu (atraxnuu 1 Corintios 15:58). Mu dí phú gajkhun, Jeobá tsíyoo gáʼyoo Satanás ga̱jma̱a̱ xáʼni mba̱a̱ a̱jkiu̱u̱n kaʼyoo. Ikha jngó xuniʼñámi̱jna̱ rí Gixa̱a̱ maʼninduwaanʼ.

¹⁹ Náa artículo rígi̱ ndiʼyáá rí Satanás gíʼdoo wéñuʼ tsiakii, naʼni gínáanʼ ga̱jma̱a̱ nandoo maʼni nduwáanʼ. Mú maʼngulú muʼni gajmiúlú numuu rí Jeobá nambáyulúʼ. Náa Biblia naʼthúlúʼ ga̱jma̱a̱ numuu tsáʼkhá ndrígóo Satanás mu makuwáanʼlu xawii (2 Cor. 2:11). Mú raʼkháa i̱ndó ndayóoʼ mbuʼyáá xú káʼnii nindxu̱u̱ tsáʼkhá ndrígóo ma̱ngaa ndayóoʼ muʼni gaʼduunʼ. Ikha jngó náa Biblia naʼthí: “Guguajún jti̱i̱n Gixa̱a̱, ga̱jma̱a̱ ikhaa gátsingunʼ náa ikháanʼ” (Sant. 4:7). Náa imbo̱o̱ artículo gúʼyáá xú káʼnii gúʼni gaʼduunʼ ajtsú tsáʼkhá ndrígóo Satanás.