Nda̱wa̱á náa numbaaʼ maʼni itháan gamíi ga̱jma̱a̱ numuu aʼkhún xa̱bu̱. Lá maniñuʼ Dios rí xa̱bu̱ mutañajunʼ má xúʼko̱ ráʼ. Na̱nguá. Xó má ndiʼyáá, nacha̱ má Dios maʼni gámbíin Xa̱bu̱ Ñajunʼ ga̱jma̱a̱ maʼni gámbáa tsingíná rí kuwáanʼ rumíniʼ ga̱jma̱a̱ numún ikhiin. Bi̱ Niʼni Ku̱ba̱ʼ ga̱jma̱a̱ bi̱ niʼnii xa̱bu̱ nandoo mbuʼyáá náa mbiʼi gáʼni rígi̱. Xú káʼnii eʼthúlú rígi̱ dí gíʼdoo wéñuʼ numuu xá.

Atatsaʼwáminaʼ rí ndayóoʼ magajnáaʼ mi̱dxu̱ʼ. Rí gíʼmaa matani ginii, atayáá náa mapa ga̱jma̱a̱ atraxi xú káʼnii nindxu̱u̱ náa mi̱dxu̱ʼ. Nda̱wa̱á rí nadxuʼ má náa kamba̱a̱, natayáá rí nambánii ga̱jma̱a̱ mapa xóo ikha rí naxnáʼ. Rúʼko̱ naʼni ma̱ta̱ya̱a̱ rí xtaa mijngii náa nandaʼ mi̱dxu̱ʼnú. Xó má mbá mapa, Dios nixnúlú Biblia rí nindxu̱u̱ Ajngá rawunʼ. Ikhí naʼthí rí marigá náa xúgíʼ numbaaʼ índo̱ inu ma̱ʼkha̱ fin. Xó má ejkha̱ ranújngoo mbiʼi, nduʼyáá rí narígá náa numbaaʼ nambánii ga̱jma̱a̱ xó má eʼthí náa Biblia. Rúʼko̱ naʼni mbuʼyáá gajkhun rí fin gíʼ itháan mijngii mámbá mbiʼi.

Náa Biblia naʼthí rí nákha xóó tséʼkha̱ fin marigá mbá tiempo rí ní xátanga̱a̱ marigá mbu̱júu̱ náa numbaaʼ rígi̱. Tiempo rúʼko̱ xa̱bu̱ numbaaʼ mbuyáá mbaʼa rí marigá rí nimbá miʼtsú túyáá. Guʼyáá xú káʼnii nindxu̱u̱ tikhuu rígi̱.

1. XKUJNDU DÍ RÍGÁ NÁA XÚGÍʼ TSU̱DU̱U̱ NUMBAAʼ Mbá rí kiʼtáriyaʼ na̱ʼkha̱ náa Evangelio ndrígóo Mateo náa capítulo 24 naʼthí ga̱jma̱a̱ numuu mbá tsinaʼ rí xú káʼnii gárígá. Náa rí kiʼtáriyaʼ rígi̱ naʼthí rí tsinaʼ magi̱ʼdu̱u̱ mambanúu índo̱ rí inuu “mambáa xúgíʼ dí xtáa rarígá náa numbaa”, mbá tiempo rí mambáa índo̱ gáʼkha̱ “fin” (versículos 3 ga̱jma̱a̱ 14). Tikhuu dí marigá mani̱ndxu̱u̱ guerra mba̱ʼu̱, ewiʼ, gaʼxma náa xúgíʼ numbaaʼ, marigá dí ra̱májánʼ wéñuʼ, ní xáʼndun kuyamijná ga̱jma̱a̱ dí religión muni nduwaʼ (versículos 6 asndu 26). Xúʼko̱, mámbá rígi̱ narígá má asndu nákha wajyúúʼ. Mú maʼga̱nú marigá xúgíʼ índo̱ inuu ma̱ʼkha̱ fin. Ma̱ngaa, mambriguii ga̱jma̱a̱ ajtsú rí kiʼtáriyaʼ rí mbuʼyáá.

2. MANDÁTI̱GA̱ DÍ MAGUMA RÍ MÁJÁNʼ Náa Biblia naʼthí rí índo̱ gáʼni “iwáá mbiʼi” náa numbaaʼ xkawiiʼ rígi̱ maʼga̱ randáti̱ga̱a̱ dí maguma rí májánʼ. Ikhí nuraxnuu rí xa̱bu̱ “maʼndún kuyamijná i̱ndó ikhiin, manigunʼ wéñuʼ mbújkha̱a̱, majñekún, muxuximijna, mutinumáá Dios, xúnimbúu̱n kuñún anún, asndu núma̱aʼ xúxnáa, xúni rí jmbu, xáʼndun kuñún a̱ngiu̱ún, xaʼndún gunimbaníí xkujndu, munitsudúún eʼwíínʼ, xúñewa̱a̱n rí muni, manindxu̱ún xóo xujkhú xáná, xáʼndun guni rí májánʼ, muninduwiinʼ eʼwíínʼ, xudxun rí marathu̱u̱n, raʼkháá tháán gunimbamijna, itháan maʼndún muni rí nanigunʼ ikhiin ki xóo rí nandoo Dios” (2 Timoteo 3:1-4). Gajkhun má dí rígi̱ na̱nguá nindxu̱u̱ nuxi̱ʼ, mú índo̱ gáʼni “iwáá mbiʼi” maʼga̱ raʼni itháan gakhi̱i̱. Mbiʼi rúʼko̱ “maʼni mbiʼi gakhi̱i̱ ga̱jma̱a̱ maʼni mingíjyúuʼ makuwáanʼ”. Lá naku̱ma̱ʼ rí xúʼko̱ eni xa̱bu̱ rí mbiʼi xúgi̱ ráʼ.

3. NIGUÁMBÁA NUMBAAʼ Náa Biblia naʼthí rí Dios maʼni gámbíin bi̱ “ninigambala ri numbaʼ” (Rí huasjŋgajma Juan 11:18). Ndiéjunʼ eyoo gáʼthi rí niguámbáa numbaaʼ rá. Ikhaa má xóo mbiʼi rí nixtáa Noé. Náa Biblia naʼthí: “Ga̱jma̱a̱ Dios bi̱ gajkuwin ndiʼyoo rí ku̱ba̱ʼ niguámbáa, ga̱jma̱a̱ náa ku̱ba̱ʼ ndijoo rí tséjmaa. Dios ndiʼyoo ku̱ba̱ʼ ga̱jma̱a̱, ¡atayáá!, niguámbáa”. Ikha jngó, Dios niʼthúu̱n Noé ga̱jma̱a̱ numún xa̱bu̱ buʼko̱: “Mani gámbíin ga̱jma̱a̱ ku̱ba̱ʼ” (Génesis 6:11-13). Lá natayáá rí kuwáanʼ náa numbaaʼ rí mámbá mbiʼi naʼni itháan xkawiʼ ráʼ. Ga̱jma̱a̱ raʼkháa i̱ndó rúʼko̱, xúgi̱ nakujmaa rí nimbá miʼtsú tárígá: Ajua̱nʼ rí nuni xa̱bu̱ maʼngo̱o̱ maʼni gámbáa ku̱ba̱ʼ ga̱jma̱a̱  maʼni gámbíin xúgínʼ xa̱bu̱. Ma̱ngaa xa̱bu̱ kuwa runi gámbáa Ku̱ba̱ʼ i̱mba̱ núthu: Mañúú mañúú kuwa runi gámbáa xúgíʼ rí naʼni makuwáanʼ: Giñánʼ, lamáa, ga̱jma̱a̱ i̱ʼwáʼ dí rígá náa numbaaʼ.

Atatsaʼwáminaʼ rígi̱: Lá maʼngo̱o̱ xa̱bu̱ maʼni gámbíin xúgínʼ xa̱bu̱ nákha 100 tsiguʼ tsudií ráʼ. Na̱nguá. Mú rí xúgi̱ maʼngo̱o̱. Numuu dí rígá mbaʼa ajua̱nʼ ga̱jma̱a̱ rí nichúu wéñuʼ numbaaʼ nasngájma rí maʼngo̱o̱. Rígáa xa̱bu̱ tséʼngo̱o̱ gáʼyoo dí gamíi mambáa numbaaʼ ga̱jma̱a̱ rí tséjmañuu majmuu májánʼ tecnología. Ra̱ʼkhá tháán májánʼ rí na̱nguá gajkuáa ñawúunʼ Ku̱ba̱ʼ. Dios naʼthí rí maʼni gámbíin xa̱bu̱ bi̱ ra̱míjínʼ bi̱ nandún gúni gámbáa Ku̱ba̱ʼ.

4. MBÁ CAMPAÑA MU MIʼTÁRAʼA XÚGÍʼ NUMBAAʼ Imbo̱o̱ rí naʼtáriyaʼ náa Mateo rí marigá mbá ñajunʼ rí magiʼdoo itháan numuu: “Jame miʼtaraʼa apa ajnga ri majan nuxiʼ numu ri naʼ-tañajun mba xuguinʼ xabo gentil, aʼkue ri mariguo” (Mateo 24:14). Campaña mani̱ndxu̱u̱ mixtiʼkhu wéñuʼ ki xóo rí nuni náa guʼwá ndxajkun mámbá tsiguʼ. Maʼthí ga̱jma̱a̱ numuu mbá ajngáa kiejunʼ: “Ajnga ri majan nuxiʼ numu ri naʼ-tañajun mba xuguinʼ xabo”. Xú káʼnii religión xtáa raʼni majmaʼnuʼ ajngáa rí májánʼ ndrígóo Reino náa “xuguinʼ xabo” numbaaʼ rá.

Rí phú numuu rí niguma ináa ndrígu̱ún bi̱ nutaraʼa numuu Jeobá náa jw.org, rí miʼtáraʼa “ajnga ri majan nuxiʼ numu ri naʼ-tañajun mba xuguinʼ xabo”. Na̱ʼkha̱ i̱yi̱i̱ʼ rí naʼthí ga̱jma̱a̱ numuu rígi̱ náa mbá 700 ajngáa. Tsíin ni̱ndxu̱ún bi̱ nuni itháan tsiakii mu mutún eʼwíínʼ xa̱bu̱ ga̱jma̱a̱ numuu Reino ndrígóo Dios rá. Nákha xóó tsírígá Internet, bi̱ nutaraʼa numuu Jeobá najmaʼnuʼ má numuu rí nutaraʼa ajngáa rí májánʼ ndrígóo Reino. Asndu nákha tsiguʼ 1939, náa mámbá revista Bi̱ Nayejngoo na̱ʼkha̱ ajngáa rígi̱: “Naʼtáraʼa numuu Reino ndrígóo Jeobá”. Ga̱jma̱a̱ mbá libro rí naʼthí ga̱jma̱a̱ numuu religiones naʼthí rí “mbá nacha̱ najuiʼtaraʼa náa xúgíʼ numbaaʼ rí nda̱a̱ rí embriguii ga̱jma̱a̱”. Mbá rí gíʼdoo numuu náa ajngáa rí májánʼ rí nutaraʼa xa̱bi̱i̱ Jeobá rí Reino ndrígóo Dios ma̱ʼkha̱ kayóo fin náa numbaaʼ rígi̱ rí xkawiiʼ wéñuʼ.

Lá ni̱dxu̱ʼnú nitayáá ikháánʼ xúgíʼ rí kiʼtáriyaʼ náa artículo rígi̱ ráʼ. Asndu nákha 100 tsiguʼ, revista rígi̱ naʼthí rí e̱ʼkha̱ rarígá náa xúgíʼ numbaaʼ,  ga̱jma̱a̱ bi̱ nuraxnuu nduyáá rí nambánuu tsinaʼ rígi̱ náa iwáá mbiʼi. Mú maski ajndu rígá mbaʼa prueba, kuwa bi̱ tsénimbu̱ún rígi̱, nuthi dí ragájkhun rí na̱jkha̱ raʼni itháan mixkawiʼ náa xúgíʼ numbaaʼ. Nuthi rí xúgi̱ rígá mbaʼa enii xú muʼdxawíín noticia, ikha jngó nduʼyáá dí rígá mbaʼa xkujndu ki xóo nákha wajyúúʼ. Maski ajndu xúʼko̱, mbaʼin xa̱bu̱ nduyáá itháan prueba rí kuwaanʼ mbá tiempo kiejunʼ.

Mbá prueba nuxkamaa rí nithi mbá grupo científicos nákha tsiguʼ 2014 náa i̱yi̱i̱ʼ The Bulletin of the Atomic Scientists náa Consejo de Seguridad de las Naciones Unidas. Naʼthí ga̱jma̱a̱ numuu xkujndu dí muraʼníí xa̱bu̱ náa xúgíʼ numbaaʼ, científicos nithi: “Índo̱ ninixu mbá estudio ga̱jma̱a̱ numuu xkujndu rígi̱, ni̱jkuánúxu ndi̱ya̱a̱ rí migamíi marigá mbá gaʼkhu mba̱a̱ náa xa̱bu̱ ga̱jma̱a̱ numuu xúgíʼ tecnología rí naguma”. Rígi̱ naʼni mbuyáá itháan mbaʼin wéñuʼ xa̱bu̱, ga̱jma̱a̱ bi̱ nuni i̱yi̱i̱ʼ rígi̱ ma̱ngaa bi̱ nuraxnuu i̱yi̱i̱ʼ rígi̱, rí kuwaanʼ iwáá mbiʼi ga̱jma̱a̱ rí fin na̱ʼkha̱ má mijngii. Mú nda̱a̱ numuu rí mamiñúlúʼ. Gíʼmaa rí maʼdxulú. Náa numuu eʼthá rígi̱ rá. Numuu rí ma̱ndoo makáwáanʼ.