1. Ndiéjunʼ nirígá náa Jerusalén nákha tsiguʼ 66 rá. (Atayáá timbá xtiʼkhu.)

NÁKHA tsiguʼ 66 mbáa oficial bi̱ xtáa Roma bi̱ nigumbiʼyuu Floro niʼni kúwáʼ mba̱a̱ mbújkha̱a̱ náa templo ndrígóo Jerusalén. Judíos nikiʼníin wéñuʼ rí asndu niradíin soldados bi̱ kuwa náa Roma ga̱jma̱a̱ nixuximi̱jna̱ náa xuajen rúʼko̱. Ní táʼni ajtsú igu̱nʼ, gobernador romano Cestio Galo niruguamáʼáan xuajen gajmíi̱n 30,000 soldados. Judíos bi̱ nixuximi̱jna̱ nirkaʼumijná náa templo. Mbá nacha̱ soldados niguánu náa xtátsí rí wíji̱ rexa̱a̱. Xa̱bu̱ bi̱ kuwa ikhí nimiñun wéñuʼ. Á mu ikháánʼ niraxtaa ikhí, xú ga̱ku̱ma̱ʼ rá.

2. a) Ndiéjunʼ gíʼmaa muni̱ cristianos índo̱ gúyáá rí kuguamáʼáan Jerusalén rá. b) Xú káʼnii nindoo nigájnun náa xuajen xá.

² Tsiguʼ kidíiʼ, Jesús niʼthún xa̱bi̱i̱ ndiéjunʼ gárígá. Niʼthún: “Rido guyala xuajin ri nijuguamaʼan nini soldado, aʼkue guyala ri niganu-ma ri mamba xuajin ruʼkue. Aʼkue ri tsi majuhua naʼ mbayu Judea, agañu mago naʼ juba; tsi juhua naʼ aun xuajin ruʼkue, agañu” (Luc. 21:20, 21). Mú á mu xuajin kuguamáʼáan, xú kaʼnii gándoo gagajnún xá. Jesús niʼthí rí tiempo rúʼko̱ maʼni̱i̱ chíʼgíʼ o mawi̱ji̱i̱ (Mat. 24:22). Ga̱jma̱a̱ rúʼko̱ rí nirígá. Mbá nacha̱, romanos nigúun. Xúʼko̱ nindoo rí cristianos munimbu̱ún  rí niʼthí Jesús ga̱jma̱a̱ rí magañún náa kúbá. * Nákha tsiguʼ 70, romanos nitangi̱i̱n náa Jerusalén, ga̱jma̱a̱ rí xúgi̱, nini gámbáa xuajen. Mú xúgínʼ bi̱ ninimbu̱ún rí niʼthí Jesús nikáwíin.

3. a) Ndiéjunʼ rí inuu muguaʼnii rá. b) Ndiéjunʼ gúʼthá náa artículo rígi̱ rá.

³ Inuu má muguaʼnii xúʼko̱ kaʼnii. Ndiéjunʼ rá. Rí “mapu-mba gaʼko mariga”, dí nda̱a̱ tsu̱ma̱ gági̱ʼdu̱u̱. Garmáʼáan a̱jkiu̱lú rí índo̱ Jesús niʼthún discípulos rí marigá náa Jerusalén ga̱jma̱a̱ rí ikhiin gíʼmaa muni, ma̱ngaa nindoo gáʼthi rí gárígá mbiʼi xúgi̱ (Mat. 24:3, 21, 29). Nákha timbá siglo, cristianos bi̱ ninindxu̱ún jmbiin nikáwíin índo̱ niguma gámbáa Jerusalén. Rí mbiʼi xúgi̱, “xabu su pu-mbaʼjin” makáwíin náa maguma gámbáa numbaaʼ ndrígóo Satanás (atraxnuu Rí huasjŋgajma Juan 7:9, 13, 14). Á mu nandulúʼ makáwáanʼ, gíʼdoo wéñuʼ numuu makru̱ʼu̱lú dí naʼthí náa Biblia marigá. Náa artículo rígi̱ muʼthá ga̱jma̱a̱ numuu rí inuu marigá ga̱jma̱a̱ ndiéjunʼ rí gáʼyóóʼ muʼni.

4. Xú káʼnii gági̱ʼdu̱u̱ índo̱ marigá majphú mba̱a̱ gaʼkhu rá.

⁴ Rí majphú mba̱a̱ gaʼkhu magi̱ʼdu̱u̱ índo̱ gaguma gámbáa xúgíʼ religión rí minduwaʼ. Náa Biblia naxná mbiʼyuu rí minduwaʼ “Babilonia ri ñajunʼ xuajen apa, ri su rudun su guʼju xŋaʼjun” (Rí huasjŋgajma Juan 17:5-7). Náa numuu rí nambriguii ga̱jma̱a̱ mbáa a̱ʼgú xngaʼun o bi̱ nagujuamínaʼ rá. Numuu rí xa̱bu̱ ede̱ bi̱ kuwa náa religión rúʼko̱ na̱nguá ninindxu̱ún jmbiin náa Dios. Na̱nguá embayíí Jesús ga̱jma̱a̱ Reino ndrígóo, rí nuni numbañún Xa̱bu̱ Ñajunʼ náa numbaaʼ rígi̱. Ma̱ngaa nuni gaʼduunʼ mbaʼa kiʼsngáa rí na̱ʼkha̱ náa Biblia mu muguaʼdáá itháan tsiakii. Ikhiin tseni mba̱a̱ Dios xóo gíʼmaa maʼni xóo eni bi̱ kaxtaʼwíin (2 Cor. 11:2; Sant. 1:27; Rev. 14:4). Mú, tsáa gáʼni gámbáa xúgíʼ religión dí ragájkhun rá. Náa Biblia naʼthí rí mani̱ndxu̱u̱ ‹gu̱wa̱ʼ chi̱ji̱ʼ› ndrígóo “xujkhú xáná” maña̱ʼ. Xujkhúʼ bugi̱ nandoo gáʼthúu̱n Naciones Unidas, ga̱jma̱a̱ gu̱wa̱ʼ chi̱jyu̱ʼ nandoo gáʼthúu̱n xúgínʼ Xa̱bu̱ Ñajunʼ bi̱ numbayíí organización rúʼko̱. Náa Biblia naʼthí rí Jeobá maʼni rí ikhiin muni gámbáa xúgíʼ religión dí ragájkhun (atraxnuu Revelación 17:3, 16-18).

5, 6. Náa numuu eʼyáá rí índo̱ maguma gámbáa religión dí ragájkhun xákhañun xúgínʼ bi̱ nagún ikhí rá.

⁵ Índo̱ maguma gámbáa religión dí ragájkhun, lá makhañún xúgínʼ bi̱ nagún ikhí ráʼ. Na̱nguá. Xú káʼnii eʼyáá rá. Numuu rí náa Biblia naʼthíriya rí tikhun xa̱bu̱ ede̱ muni asndu xóo nimbá miʼtsú takuwa náa religión rí minduwaʼ, rúʼko̱ nindoo gáʼthi gaʼyee Zacarías índo̱ niʼtáriyaʼ rí mbáa bi̱ xtáa náa religión rí minduwaʼ maʼthí: “‹Na̱nguá ni̱ndxu̱ʼ gaʼyee. Ni̱ndxu̱ʼ mbáa xa̱bu̱ bi̱ naʼdu náa mbaaʼ, numuu rí mbáa xa̱bu̱ numbaaʼ nigiʼdúún asndu nákha chíʼgiúnʼ›. Ga̱jma̱a̱ mbáa maraxu̱u̱: ‹Náa numuu tima tsinaʼ rígi̱ náa xpajpaʼ rá.› Ga̱jma̱a̱ ikhaa maʼthí: ‹Tsinaʼ rúʼko̱ ni̱ndxu̱u̱ índo̱ nixnuʼ náa guʼwún bi̱ nambáxuʼ gajmíi̱nʼ›” (Zac. 13:4-6).

⁶ Ndiéjunʼ gagiʼnuu xuajñu Dios índo̱ gaguma gámbáa religión rá. Jesús niʼthí: “Xi numu ri taxtriga mbiʼi riuʼun, asjndo nimba xabo maxajriyaʼ xuʼkue-no, indo numu ri gajma numu tsi huaxtaʼhuin maxtriga mbiʼi riuʼun” (Mat. 24:22). Mbiʼi rí nikuwa timbíi̱n cristianos, Jeobá niʼni rí índo̱ maguma gámbáa Jerusalén mawiji̱. Rúʼko̱ niyambáá rí magañún bi̱ ‹kaxtaʼwíin›. Mbiʼi rí  kuwáanʼ, xúʼko̱ má gárígá. Jeobá xániñuʼ rí Xa̱bu̱ Ñajunʼ muni gámbíin bi̱ ‹kaxtaʼwíin›. Mu mañewu̱u̱n xuajñu, maʼni rí mawiji̱ timbá dí marigá náa majphú mba̱a̱ gaʼkhu. Nda̱wa̱á rí gájngoo rígi̱ marigá tsímáá nguáthá mbiʼi.

7, 8. a) Ndiéjunʼ gáʼyóóʼ muʼni índo̱ gáwi̱ji̱ rí maguma gámbáa religión rá. b) Mbiʼi rúʼko̱, náa numuu rí manindxu̱lúʼ mixtiʼkuáanʼ náa eʼwíínʼ xa̱bu̱ rá.

⁷ Mbiʼi rí marigá tsímáá mbaʼyóoʼ musngajmá á mu gajkhun nandulúʼ kuʼyáá Jeobá. Mbaʼin xa̱bu̱ mbuyáaʼ rí makáwíin “náa agoo itsí mba̱ʼu̱ dí rígá náa kúbá”, nandoo gáʼthúu̱n organización dí rígá náa numbaaʼ rígi̱ (Rev. 6:15-17). Mú ikháanʼ mbuʼyáaʼ rí makáwáanʼ náa Jeobá. Lá gíʼmaa muguaʼthi̱i̱n rí mbaʼin xa̱bu̱ mani̱ndxu̱ún xa̱bi̱i̱ Jeobá ráʼ. Na̱nguá. Náa Jerusalén, índo̱ niwi̱ji̱ timbá rí marigá, mbaʼin xa̱bu̱ judiós tánindxu̱ún cristianos. Ikhiin bi̱ ni̱ndxu̱ún má cristianos ninimbu̱ún náa Jesús ga̱jma̱a̱ nigájnun náa xuajen rúʼko̱. Xúʼko̱ má kayuʼ índo̱ gaguma gámbáa xúgíʼ religión mawi̱ji̱i̱, xúguaʼthi̱i̱n rí mbaʼin mani̱ndxu̱ún cristianos gajkhun. Ikhú mbiʼi xa̱bi̱i̱ Jeobá musngájmalu rí nandulúʼ kuʼyáá ga̱jma̱a̱ numbañún bi̱ kaxtaʼwíin (Mat. 25:34-40).

⁸ Ga̱jma̱a̱ ndiéjunʼ gárígá mbiʼi rúʼko̱ rá. Na̱nguá eʼyáá májánʼ. Mú mbáa maʼni mingíjyúuʼ xú káʼnii makuwáanʼ ga̱jma̱a̱ mbaʼyóoʼ muʼni gínámijná. Náa xuajin Jerusalén, cristianos ndiyóoʼ magajnún náa guʼwún ga̱jma̱a̱ nikuwa mingíjyúuʼ wéñuʼ mu magún rakáwíin (Mar. 13:15-18). Ikha jngó gíʼmaa muraxi̱míjna̱: “Lá xtáá xawii mu mandáti̱go̱ʼ tikhuu rí gúʼdoo ráʼ. Lá nandoo mani asndu ndiéjunʼ mu mani̱ndxu̱ʼ jmbii náa Jeobá ráʼ.” Atatsaʼwáminaʼ rí mbiʼi rúʼko̱ i̱ndió ikháanʼ guʼyamajkuíí Jeobá asndu ndiéjunʼ dí gárígá, xó má niʼni gaʼyee Daniel (Dan. 6:10, 11).

9, 10. a) Ndiéjunʼ ajngáa guʼtáraʼa índo̱ garigá majphú mba̱a̱ gaʼkhu rá. b) Ndiéjunʼ gúni bi̱ guáʼdáanʼlu sia̱nʼ rá.

⁹ Índo̱ gárígá majphú mba̱a̱ gaʼkhu, ní xúʼtáraʼa “ajnga ri majan” ndrígóo reino. Mbiʼi rí muʼtáraʼa ninújngoo gáʼni. Ma̱ʼkha̱nú fin (Mat. 24:14). Xámiñulu índo̱ gúʼthá mbá dí magíʼnun xúgínʼ xa̱bu̱. Mbáa ajngáa rígi̱ mani̱ndxu̱u̱ rí numbaaʼ ndrígóo Satanás inuu mambáa. Náa Revelación 16:21 naʼthí rí xa̱bu̱ mbuyáá ajngáa rígi̱ xóo eʼtsí mba̱ʼu̱ wéñuʼ ga̱jma̱a̱ muta wéñiʼ Dios.

¹⁰ Índo̱ gúdxuun ajngáa rí gakhii wéñuʼ bi̱ guáʼdáá sia̱nʼ náa ikháanʼ, ndiéjunʼ gúni xá. Ezequiel niʼtáriyaʼ ndiéjunʼ gundxaʼwamíjna̱ mbaʼin xa̱bu̱ náa mbaʼa xuajin mba̱ʼu̱ rí nagumbiʼyuu Gog ndrígóo Magog: “Ma̱ngaa mato̱ʼo̱ʼ náa ku̱ba̱ʼ náa nda̱wa̱a̱ tsáa eñawu̱u̱n. Ma̱ʼkhá náa xa̱bu̱ bi̱ na̱nguá guáʼdáá xkujndu, bi̱ kuwa tsímáá, bi̱ kuwa náa nda̱a̱ xtátsí ga̱jma̱a̱ na̱nguá gíʼdoo xkrugua ní má ixi̱ rí nagi̱da̱ʼ náa xkrugua”. Xó má niʼtáriyaʼ Ezequiel, Gog ma̱ndoo maʼni xkujndu gajmíi̱n xa̱bi̱i̱ Dios ga̱jma̱a̱ maguguiin, numuu rí mbaʼñún xóo mbá “xuajin rí niguma gámbáa náa kuwa xa̱bu̱ mbu̱júu̱, ga̱jma̱a̱ rí xa̱bu̱ kuwa jnduʼ náa xuajen mba̱ʼu̱, bi̱ nuraxi̱i̱ rí muguaʼdáá wéñuʼ ga̱jma̱a̱ muguaʼdáá i̱ʼwáʼ, bi̱ kuwa náa tapo̱o̱ ku̱ba̱ʼ” (Ezeq. 38:10-12). Xa̱bi̱i̱ Dios makuwá náa “tapo̱o̱ ku̱ba̱ʼ”, xóo muʼthá, xúgínʼ xa̱bu̱ numbaaʼ mbuyáá rí ikhiin ni̱ndxu̱ún mixtiʼkhun náa eʼwíínʼ xa̱bu̱. Gog ma̱ndoo maʼni gíníi bi̱ kaxtaʼwíin ga̱jma̱a̱ bi̱ numbañún.

11. a) Ndiéjunʼ eyóoʼ mbuʼyáá ga̱jma̱a̱ rí maʼga̱ rarígá índo̱ marigá majphú mba̱a̱ gaʼkhu rá. b) Xú káʼnii gúni xa̱bu̱ bi̱ guáʼdáá sia̱nʼ índo̱ gúyáá tsinaʼ mekhuíí rá.

¹¹ Ndiéjunʼ garigá nda̱wa̱á rá. Náa Biblia  naʼthí rí marigá mbaʼa rí mbuʼyáá, mú tséʼthi xú káʼnii gáʼga rarígá. Mbáa tikhuu mbríguu má ganújngoo. Índo̱ Jesús niʼthí ga̱jma̱a̱ numuu fin náa numbaaʼ ndrígóo Satanás, niʼthí: “Mariga seña naʼ idu akaʼ, gajma naʼ idu gunʼ, gajma naʼ idun aʼguan. Xoma naʼ numba rigueʼ mapu-mba gaʼko maguaʼda xabo, tsiangua mba jañi gaʼne akuin xabo rido mudxahuin ri nundxaʼhua mar, gajma iya ri nambuxu. Asjndo makamindun ngami xabo, rido gundxaʼhuamijna ri mapu-gake ri mariga naʼ tsudu mba xugui numba, numu ri asjndo tsiake ri riga mikui maʼban. Aʼkue ri mbuya Ade Xabo maʼka naʼ dun gajma tsiake ri guiʼdo, jame pu-mba gloria jaye gaʼka” (Luc. 21:25-27; atraxnuu Marcos 13:24-26). Ndiéjunʼ nindxu̱u̱ tsinaʼ rúʼko̱ rá. Lá nindxu̱u̱ mbaʼa rí makujmaa mekhuíí ráʼ. Mbáa xúʼko̱. Mbaʼyóoʼ rí muguaʼthi̱i̱n mu mbuʼyáá. Mú tséʼniuu má ndiéjunʼ gánindxu̱u̱ tsinaʼ rígi̱, nduʼyáá rí bi̱ guáʼdáá sia̱nʼ náa Dios mamiñún wéñuʼ índo̱ gúyáá.

12, 13. a) Ndiéjunʼ gáʼni Jesús índo̱ gáʼkha̱ “gajma tsiake ri guiʼdo, jame pu-mba gloria” rá. b) Ndiéjunʼ gúni xa̱bi̱i̱ Dios mbiʼi rúʼko̱ rá.

¹² Ndiéjunʼ gáʼni Jesús índo̱ gáʼkha̱ “gajma tsiake ri guiʼdo, jame pu-mba gloria” rá. Maʼni tsajkurámiinʼ bi̱ gánindxu̱ún jmbiin náa Dios ga̱jma̱a̱ maxnún castigo bi̱ tánindxu̱ún jmbiin (Mat. 24:46, 47, 50, 51; 25:19, 28-30). Xú káʼnii gáʼnii rígi̱ xá. Ikhaa má niʼthí: “Rido gaʼka Ade Xabo naʼ gloria drigo, gajmi mba xuguinʼ ángel tsi kaʼun, aʼkue ri maguiʼi naʼ Xili gloria drigo. Maguimbun mba xuguinʼ xabo tsi juhua naʼ inu mbamba numba naʼ inu Ika, jame maxpiʼtin maʼne huajin, xo eʼne huaxtu tsi naguhuin borrego naʼ majñu tsutun. Naʼ nijñu mujunʼ gaʼneʼndunʼ borrego, indo tsutun tsi maniñuʼ  naʼ nijñu xtiyuʼ” (Mat. 25:31-33). Rígi̱ nandoo gáʼthúu̱n rí manda̱ʼa̱a̱ cuenta náa xúgínʼ xa̱bu̱. Á mu ndaʼyoo rí mbáa xa̱bu̱ na̱nguá nindxu̱u̱ jmbii, maʼthí rí nindxu̱u̱ “tsu̱jtuunʼ” ga̱jma̱a̱ maʼthúu̱n rí mandáti̱ga̱a̱ kámuu mbiʼi. Mú á mu ndaʼyoo rí mbáa xa̱bu̱ ninindxu̱u̱ jmbii, maʼthí rí nindxu̱u̱ mbáa “mugu̱” ga̱jma̱a̱ maniñuʼ rí maxtáa kámuu mbiʼi (Mat. 25:46).

¹³ Náa Biblia naʼthí rí índo̱ “tsu̱jtuunʼ” gúyáá rí mandáti̱gi̱i̱n, ‹mumbiyaʼ ngínún› (Mat. 24:30). Ga̱jma̱a̱ ndiéjunʼ gúni bi̱ kaxtaʼwíin ga̱jma̱a̱ eʼwíínʼ xa̱bi̱i̱ Dios rá. Muni rí niʼthí Jesús: “Rido aguiʼdu rariga mba xugui ruʼkue, guxuxi idxaʼla, guyaxila mbuya. Ninguiyu-ma ri miʼtsihuiñaʼla” (Luc. 21:28).

14, 15. a) Ndiéjunʼ gárígá nda̱wa̱á rí magíʼdu̱u̱ xkujndu Gog ndrígóo Magog rá. b) Ndiéjunʼ eyoo gáʼthúu̱n índo̱ rí Biblia naʼthí rí Jesús magímbíin “tsi niraʼhuin” rá.

¹⁴ Ndiéjunʼ gárígá nda̱wa̱á rí gági̱ʼdu̱u̱ xkujndu God ndrígóo Magog náa xuajñu Dios rá. Náa Biblia naʼthí rí Jesús “majungüinʼ ángel drigo tsi mundi iʼmbi, muguimbun tsi niraʼhuin naʼ mba ako iko guiña naʼ ndambarigo raun miku, asjndo naʼ ndambarigo imba raun miku” (Mar. 13:27; Mat. 24:31). Ndiéjunʼ eyoo gáʼthúu̱n ajngáa rígi̱ rá. Tsíyoo gáʼthúu̱n rí bi̱ kaxtaʼwíin maxtaʼwíin mbiʼi má rúʼko̱. Ga̱jma̱a̱ tsíyoo gáʼthúu̱n rí bi̱ kaxtaʼwíin bi̱ xóó naguanún náa tsu̱du̱u̱ Ku̱ba̱ʼ mudrigú sello rí iwáá kayuʼ mbiʼi má rúʼko̱. Sello rí iwáá kayuʼ mudrigú índo̱ inuu magi̱ʼdu̱u̱ marigá majphú mba̱a̱ gaʼkhu (Mat. 13:37, 38; Rev. 7:1-4). Ndiéjunʼ eyoo gáʼthúu̱n índo̱ naʼthí náa Biblia rí Jesús magímbíin “tsi niraʼhuin” rá. Nandoo gáʼthúu̱n rí Jesús maxnún rí mudaaʼ bi̱ kaxtaʼwíin bi̱ xóó naguanún náa tsu̱du̱u̱ Ku̱ba̱ʼ ga̱jma̱a̱ maʼga̱a̱ kagu̱u̱n mekhuíí (1 Tes. 4:15-17; Rev. 14:1). Rígi̱ marigá nda̱wa̱á rí gági̱ʼdu̱u̱ xkujndu Gog ndrígóo Magog (Ezeq. 38:11). Ikhú, xó má niʼthí Jesús, “Aʼkue ri mambiʼin tsi jmbun, asjndo xo ri mbiʼi [a̱jkha̱ʼ] naʼ ri naʼtañajun Tateʼ” (Mat. 13:43). *

¹⁵ Mbaʼin xa̱bu̱ nakumu̱ún rí Jesús mata̱nga̱a̱ xóo xa̱bu̱ mu maʼtáñajunʼ náa tsu̱du̱u̱ Ku̱ba̱ʼ ga̱jma̱a̱ rí Jesús maʼga̱a̱ kagu̱u̱n mekhuíí xóo xa̱bu̱. Lá rúʼko̱ rí maguaʼniin bi̱ kaxtaʼwíin bi̱ xóó naguanún náa tsu̱du̱u̱ Ku̱ba̱ʼ ráʼ. Na̱nguá, numuu rí náa Biblia naʼthí rí Jesús mata̱nga̱a̱ mu xúyáá xa̱bu̱. Naʼthí rí ma̱ʼkha̱ “tsudu dun mikui” ga̱jma̱a̱ “makujma seña drigo Ade Xabo mikui” (Mat. 24:30). Ma̱ngaa náa Biblia naʼthí rí ‹xuwiʼ ga̱jma̱a̱ eʼdi na̱nguá xóo mata̱ʼa̱a̱n náa reino ndrígóo Dios› “xuhuiʼlu ri kuʼya riguiʼ xaxo ataʼjala naʼ naʼtañajunʼ Dios”. Mú xú gáʼga kiʼdiin mekhuíí bi̱ kaxtaʼwíin bi̱ xóó naguanún náa tsu̱du̱u̱ Ku̱ba̱ʼ rá. Náa Biblia naʼthí rí ginii ndayóoʼ rí maxtiʼkhu̱u̱n mbá nacha̱, xóo índo̱ natrugua̱a̱ ga̱jma̱a̱ natambaʼtaa idaʼ, índo̱ gawan iwáá trompeta” (atraxnuu 1 Corintios 15:50-53). * Ikha jngó, bi̱ kaxtaʼwíin bi̱ ni̱ndxu̱ún jmbiin bi̱ xóó kuwa náa tsu̱du̱u̱ Ku̱ba̱ʼ maʼga̱ kiʼdiin mbóó jnduʼ mekhuíí mbá nacha̱ xóo espíritu.

16, 17. Ndiéjunʼ eyóoʼ marigá wapháá nákha xóó tsínigu̱nʼ Aʼdá múgú rá.

¹⁶ Índo̱ 144,000 makuwá mekhuíí, lá ma̱ndoo marigá gitsigúnʼ ndrígóo Aʼdá múgú ráʼ. (Rev. 19:9.) Xóó na̱nguá. Ginii gíʼmaa marigá imbo̱o̱. Garmáʼáan a̱jkiu̱lú rí Gog magíʼdu̱u̱ xkujndu náa xuajñu Dios nákhi xóó kúwi̱i̱n bi̱ kaxtaʼwíin náa tsu̱du̱u̱ Ku̱ba̱ʼ  (Ezeq. 38:16). Ndiéjunʼ gúʼni índo̱ gági̱ʼdu̱u̱ xkujndu rúʼko̱ rá. Náa Biblia naʼthí: “Xáʼyóoʼ muxmijná mbiʼi rígi̱. Guguajún náa kaʼyala, guguajún wíí ga̱jma̱a̱ gu̱ya̱a̱ xú káʼnii Jeobá gáʼni káwáanʼ”. Ma̱ngaa naʼthí: “Xámiñalaʼ. Gájtsii gagajnálá náa ikhiin, ga̱jma̱a̱ Jeobá maxtáa ga̱jma̱á nindxa̱laʼ” (2 Crón. 20:17). Xó má ndiʼyáá, Nda̱wa̱á rí gági̱ʼdu̱u̱ xkujndu Gog, bi̱ kaxtaʼwíin bi̱ xóó naguanún náa tsu̱du̱u̱ Ku̱ba̱ʼ maʼga̱ kiʼdiin mekhuíí. Ndiéjunʼ gárígá nda̱wa̱á rá. Rí huasjŋgajma Juan 17:14 naʼthí rí bi̱ guáʼdáá sia̱nʼ náa xuajñu Dios “muxnamijni jmiñi su Aʼda Mugu”. Mú náa texto rígi̱ xóó naʼthí rí Aʼdá Múgú gajmíi̱n “su huaraʼhuinlu jma ri su nendxaʼjun Dios, ga iquin ñajunʼ su caramiʼ ri jmbun” maʼngu̱u̱n muni gajmiún. Ikha jngó Jesús gajmíi̱n 144,000 reyes náa mekhuíí munikríyaaʼ xuajñu Dios náa tsu̱du̱u̱ Ku̱ba̱ʼ.

¹⁷ Índo̱ gárígá Armagedón maguma mba̱a̱ mbiʼyuu Jeobá (Rev. 16:16). Bi̱ gánindxu̱ún “tsu̱jtuunʼ” mambíin. Dí ra̱májánʼ mambáa náa tsu̱du̱u̱ Ku̱ba̱ʼ ga̱jma̱a̱ mbaʼin wéñuʼ xa̱bu̱ makáwíin. Nda̱wa̱á rí gájngoo Armagedón, ikhú rí ma̱ndoo manigúnʼ Aʼdá múgú, xó má eʼtáriyaʼ náa námbáa i̱yi̱i̱ʼ ndrígóo Revelación (Rev. 21:1-4). * Jeobá ma̱ndoo kaʼñúún ga̱jma̱a̱ maxnún i̱ʼwáʼ rí májánʼ bi̱ gakáwíin náa tsu̱du̱u̱ Ku̱ba̱ʼ. Kuaʼthi̱i̱nlú mbanda̱ʼkho mbiʼi rígi̱ rí mitsaan wéñuʼ (atraxnuu 2 Pedro 3:13.)

18. Ndiéjunʼ gíʼmaa muʼni xúgi̱, rí nduʼyáá rí inuu marigá rá.

¹⁸ Rí xúgi̱ rí nduʼyáá rí inuu marigá, ndiéjunʼ gíʼmaa muʼni rá. Apóstol Pedro nixnúlú xtágabu rí mundxaʼwamíjna̱lú xú káʼnii xa̱bu̱ gíʼmaa manindxu̱lúʼ. Ndayóoʼ makuwáanʼ mikaʼwu, maʼndulú kuʼyáá Dios ga̱jma̱a̱ manindxu̱lúʼ jmbii náa ikhaa, xambumulú rí nánguá eyóoʼ mba̱yu̱ʼ “mbiʼi ndrígóo Jeobá”. Pedro ma̱ngaa niʼthí: “A̱ngui̱nʼ bi̱ nandoʼ ka̱ya̱la, numuu rí kuwa ruguaʼti̱i̱n xúgíʼ rígi̱, guni mbá tsiakii mu ikhaa maxkamáanʼ mikaʼwáanʼ ga̱jma̱a̱ nda̱a̱ aʼkhála ga̱jma̱a̱ makuwáanʼ tsímáá” (2 Ped. 3:11, 12, 14). Ikha jngó, guʼyamajkuíí Jeobá rí xundawamíjna̱ ga̱jma̱a̱ kiʼsngáa dí ragájkhun ga̱jma̱a̱ gumbáyíí má xúʼko̱ rey Jesucristo, bi̱ naxná rí tsímáá.