1, 2. a) Náa minaʼ ndiyamajkuíí Jeobá xa̱bi̱i̱ nákha wajyúúʼ rá. b) Ndiéjunʼ nindxa̱ʼwáminaʼ Jesús ga̱jma̱a̱ numuu templo dí rígá náa Jerusalén rá. c) Ndiéjunʼ gúʼyáá náa artículo rígi̱ rá.

XA̱BI̱I̱ Dios guáʼdáá má xúʼko̱ náa magimbíin. Mbá xkri̱da, mbáa Abel nixnáxi̱ tsigijñaʼ náa Jeobá náa mbá altar (Gén. 4:3, 4). Noé, Abrahán, Isaac, Jacob, ga̱jma̱a̱ Moisés mangiin nini altar (Gén. 8:20; 12:7; 26:25; 35:1; Éx. 17:15). Ma̱ngaa Jeobá niʼthún israelitas rí muni mbá guʼwá xtúgua náa mbuyamajkuíí (Éx. 25:8). Ga̱jma̱a̱ nda̱wa̱á niʼthún muni mbá templo (1 Rey. 8:27, 29). Índo̱ israelitas nigájnun náa Babilonia nigi̱ʼdi̱i̱ nigimbúun náa sinagogas (Mar. 6:2; Juan 18:20; Hech. 15:21). Ga̱jma̱a̱ timbíi̱n cristianos nigimbúun náa guʼwá (Hech. 12:12; 1 Cor. 16:19). Rí mbiʼi xúgi̱ xa̱bi̱i̱ Jeobá nagimbáanʼ mu muʼni mba̱a̱ Dios náa mbaʼa Guʼwá náa nagimbáanʼ dí rígá náa xúgíʼ numbaaʼ.

² Jesús ndiʼyamajkuu wéñuʼ templo ndrígóo Jerusalén. Índo̱ xa̱bi̱i̱ ndiyáá rí nindoo kaʼyoo wéñuʼ templo, nirmáʼáan a̱jkiu̱ún rí naʼthí náa mbá salmo: “Asjndo nando gambun ri nangajoʼ guʼhuaʼ” (Juan 2:17; Sal. 69:9). Guʼwá náa nagimbáanʼ na̱nguá nindxu̱u̱ ‹goʼwóo Jeobá›, xó má ninindxu̱u̱ templo (2 Cró. 5:13; 33:4). Mú ndayóoʼ mbuʼyamajkuíí numuu rí ikhí nagimbáanʼ mu mbuʼyamajkuíí Dios. Náa artículo rígi̱ mbuʼyáá rí eʼthí náa Biblia  rí xú káʼnii gándoo gúʼni índo̱ guʼgua̱ náa nagimbáanʼ, xú gúñewa̱a̱n ga̱jma̱a̱ xú káʼnii gúyambáá mu maguma i̱ʼwáʼ Guʼwá náa nagimbáanʼ. *

3-5. a) Ndiéjunʼ nindxu̱u̱ Guʼwá náa nagimbáanʼ rá. b) Xú gíʼmaa mbuʼyáá reunión ndrígúlú rá.

³ Náa Guʼwá nagimbáanʼ nindxu̱u̱ kiejunʼ náa nduʼyamajkuíí Dios. Ikháanʼ nduʼyáá rí reunión nindxu̱u̱ mbá regalo ndrígóo Dios. Náa numuu rá. Numuu rí nambáyulúʼ mu mambáxulúʼ itháan májánʼ gajmiúlú. Ma̱ngaa, náa organización ndrígóo Jeobá naxnúlú tsiakii ga̱jma̱a̱ naʼsngúlúʼ rí ndayúlú. Xúgíʼ ku̱ma̱ rí nundrígú náa reunión ñajunʼ xóo ganitsu rí naxná Jeobá ga̱jma̱a̱ Jesús mámbá xmáná. Nindxu̱u̱ mba̱a̱ wéñuʼ gamajkhu rí ikhiin mutulú rí mudrigáanʼ náa “mésuún” (1 Cor. 10:21).

⁴ Jeobá naʼthúlúʼ náa Biblia rí gíʼmaa mu̱ʼgua̱ reunión mu mbuʼyamajkuíí ga̱jma̱a̱ muxnamíjná tsiakii (atraxnuu Hebreos 10:24, 25). * Numuu rí nduʼyamajkuíí Jeobá, tsíyulú mandáti̱gu̱lú reunión, i̱ndó á mu ndayóoʼ wéñuʼ. Nusngajmá gamajkhu índo̱ nuʼniratamijná mu muxuxí ñawúnlú (Sal. 22:22).

⁵ Á mu nuʼni rí májánʼ náa reunión ga̱jma̱a̱ nuñewa̱a̱n Guʼwá náa nagimbáanʼ, nusngajmálú rí nduʼyamajkuíí Dios. Nandulúʼ rí eʼwíínʼ muthi rí májánʼ ga̱jma̱a̱ mbiʼyuu Jeobá ga̱jma̱a̱ xóo rí nuʼni, rí kama náa Guʼwá nagimbáanʼ (atayáá ma̱ngaa náa 1 Rey. 8:17).

6. Ndiéjunʼ ethi tikhun xa̱bu̱ bi̱ nigún náa Guʼwá nagimbáanʼ rá. (Atayáá timbá xtiʼkhu.)

⁶ Xa̱bu̱ nduyáá rí nduʼyamajkuíí wéñuʼ Guʼwá náa nagimbáanʼ. Mbá xkri̱da, mbáa xa̱bu̱ bi̱ na̱ʼkha̱ náa Turquía niʼthí rí niniguʼ wéñuʼ rí náa Guʼwá nagimbáanʼ mikaʼwu wéñuʼ ga̱jma̱a̱ na̱nguá katooʼ. Ma̱ngaa rí xúgínʼ kuguwunʼ májánʼ xtíñún ma̱ngaa niraxi̱i̱ ga̱jma̱a̱ gamajkhu. Xa̱bu̱ buʼko̱ nigíʼdu̱u̱ ni̱jkha̱ náa xúgíʼ reunión ga̱jma̱a̱ nijngúun iyááʼ. Náa mbá xuajin mba̱a̱ Indonesia nini mbá Guʼwá náa magimbíin. A̱ngiu̱lú nithúún xa̱bu̱ bi̱ kuwa mijngii náa kúwi̱i̱n, alcalde ga̱jma̱a̱ iʼwíínʼ Xa̱bu̱ Ñajunʼ mu mbuyáá guʼwá. Alcalde niniguʼ rí niguma májánʼ wéñuʼ guʼwá ga̱jma̱a̱ náa ixi̱ ri̱ʼi̱. Ikhaa niʼthí rí xú káʼnii mikaʼwu náa nagimbáanʼ naʼthí májánʼ ga̱jma̱a̱ numuu fe ndrígúlú.

7, 8. Xú káʼnii esngajmá náa Guʼwá nagimbáanʼ rí nduʼyamajkuíí Jeobá rá.

⁷ Jeobá nindxu̱u̱ bi̱ naʼthúlúʼ mu̱ʼgua̱ reunión. Ga̱jma̱a̱ ikhaa ndaʼyamajkuu wéñuʼ xtíñúlúʼ ga̱jma̱a̱ xóo eʼni índo̱ rí kuwaanʼ ikhí. Ikha jngó nandulúʼ muʼni awáán náa xúgíʼ rí muʼni. Ragíʼmaa muʼgíiʼ xtángoo rí ma̱ndoo ga̱jma̱a̱ rí xándoo miʼni náa reunión. Mú ma̱ngaa ragíʼmaa muʼni xóo eʼni índo̱ kuwáanʼ náa guʼwúlú. Jeobá nandoo rí xúgínʼ bi̱ nagún náa Guʼwá nagimbáanʼ makuwáanʼ májánʼ. Mú tsíyulú muʼni nimbá rí xasngájma gamajkhu. Ikha jngó tséʼgíʼ xtíin rí tseʼgui̱i̱ ga̱jma̱a̱ rí tsekujmaa májánʼ. Ma̱ngaa na̱nguá exuʼmá mensajes, ni má tseʼtamíjná gajmiúlú eʼwíínʼ, ni má tsephiʼtsulú ga̱jma̱a̱ tseʼwanlú nimbá náa reunión. Ma̱ngaa, xa̱bu̱ nutún ga̱jma̱a̱ nuxprigún e̱jñún rí xágañún ga̱jma̱a̱ xútsíin náa Guʼwá nagimbáanʼ (Ecl. 3:1).

⁸ Na̱jkua̱ náa Guʼwá nagimbáanʼ mu mbuʼyamajkuíí Jeobá ma̱ngaa najmañulúʼ numuu ikhaa. Ikha jngó na̱nguá eʼtsilú, na̱nguá egujualú índo̱ kuwáanʼ náa Guʼwá nagimbáanʼ (atayáá ma̱ngaa náa Nehemías  13:7, 8). Garmáʼáan a̱jkiu̱lú rí índo̱ Jesús ndiʼñún tikhun xa̱bu̱ bi̱ kuwa rugujua̱ náa templo, nikiʼnáa wéñuʼ ga̱jma̱a̱ nixkawíin (Juan 2:13-17).

9, 10. a) Ndiéjunʼ eni xa̱bi̱i̱ Jeobá mu muyambáá maguma Guʼwá náa nagimbáanʼ rá. b) Ndiéjunʼ rí nakujmaa rá. c) Xú káʼnii eyambáá organización ndrígóo Jeobá náa congregación bi̱ na̱nguá guáʼdáá wéñuʼ mbújkha̱a̱ rá.

⁹ Mbaʼin wéñuʼ xa̱bi̱i̱ Jeobá nuñajunʼ gakhi̱i̱ wéñuʼ mu muni Guʼwá náa nagimbáanʼ náa xúgíʼ tsu̱du̱u̱ numbaaʼ. Ikhiin nunigáxi̱i̱ ga̱jma̱a̱ nuni májáánʼ Guʼwá náa nagimbáanʼ asndu tsíruma nditháan. Xúʼko̱ nandoo naguma mbá witsu Guʼwá nagimbáanʼ mámbá mbiʼi náa gu̱wa̱ʼ nítsu tsiguʼ rí ninújngoo. Rí mbá xúgíʼ niguma itháan rí 28,000 guʼwá rúʼko̱.

¹⁰ Náa Biblia naʼthí rí bi̱ guáʼdáá wéñuʼ gíʼmaa mumbañún bi̱ na̱nguá guáʼdáá wéñuʼ (atraxnuu 2 Corintios 8:13-15). Ikha jngó organización ndrígóo Jeobá najmiuu xa̱bi̱i̱ bi̱ nandún muyambáá ga̱jma̱a̱ mbújkha̱a̱ rí nuxna xúgínʼ mu maguma i̱ʼwáʼ Guʼwá náa nagimbáanʼ náa ndayóoʼ itháan. Ga̱jma̱a̱ numuu rígi̱ niguma mbaʼa Guʼwá náa nagimbáanʼ mu majmúún congregación bi̱ na̱nguá guáʼdáá wéñuʼ mbújkha̱a̱.

11. a) Ndiéjunʼ ethi tikhun a̱ngiu̱lú ga̱jma̱a̱ numuu Guʼwá nuxi̱ʼ náa egimbíin rá. b) Xú káʼnii ku̱ma̱ʼ índo̱ natatsaʼwáminaʼ náa a̱ngiu̱lú bugi̱ rá.

¹¹ Náa Costa Rica niguma mbá Guʼwá náa nagimbáanʼ káaʼ migiñuʼ mbiʼi. A̱ngiu̱lú nuthi rí Guʼwá náa nagimbíin nindxu̱u̱ mbá rí kuaʼti̱i̱n wéñuʼ. Nuxna̱a̱ núma̱aʼ Jeobá, organización ndrígóo ga̱jma̱a̱ a̱ngiu̱lú. Nuxna̱a̱ wéñuʼ núma̱aʼ ga̱jma̱a̱ kuwa tsímáá numuu rí nikhanun regalo rígi̱ rí nixná Jeobá. Xúgiáanʼ nadxulú índo̱ nduʼyáá rí a̱ngiu̱lú nuxna̱a̱ núma̱aʼ Jeobá ga̱jma̱a̱ rí naʼni numún ikhiin. Ga̱jma̱a̱ nadxulú wéñuʼ índo̱ nduʼyáá rí xúgínʼ a̱ngiu̱lú guáʼdáá mbá Guʼwá náa magimbíin. Nakujmaa kaʼwu rí Jeobá naʼni tsajkurámuuʼ náa naguma Guʼwá náa magimbáanʼ. Índo̱ naguma mbá guʼwá nuxi̱ʼ, itháan mbaʼin xa̱bu̱ nagún náa reunión mu majmañún rí naʼsngáa Jeobá (Sal. 127:1).

12. Xú káʼnii gándoo gúyambáá mu maguma i̱ʼwáʼ Guʼwá náa magimbáanʼ rá.

¹² Xú káʼnii gándoo gúyambáá mu maguma i̱ʼwáʼ Guʼwá náa magimbáanʼ rá. Tikuáanʼ ma̱ndoo muyambáá mu maguma, ga̱jma̱a̱ xúgiáanʼ ma̱ndoo muxná mbújkha̱a̱ mu miʼni numáá xúgíʼ rí ndayóoʼ. Á mu nuʼni xúgíʼ rí nandoo mu muyambáá, makuwáanʼ itháan gagi. Ga̱jma̱a̱ rí itháan gíʼdoo numuu rí muxnáá gamajkhu Dios. Nandulúʼ mbuʼyaridáá xkri̱da ndrígu̱ún xa̱bi̱i̱ Dios bi̱ nikuwa nákha wajyúúʼ. Ikhiin nixna mbújkha̱a̱ ga̱jma̱a̱ xúgíʼ a̱jkiu̱ún mu muni náa mbuyamajkuíí Jeobá (Éx. 25:2; 2 Cor. 9:7).

13, 14. Xó má eʼthí náa Biblia, náa numuu rí gíʼmaa muniʼñáaʼ kaʼwu náa Guʼwá nagimbáanʼ ga̱jma̱a̱ xáʼni katooʼ rá.

¹³ Jeobá nindxu̱u̱ mikaʼwii wéñuʼ, ga̱jma̱a̱  nandoo rí makuwáanʼ jnduʼ. Ikha jngó gíʼmaa muʼni mikaʼwu náa Guʼwá nagimbáanʼ ga̱jma̱a̱ na̱nguá katooʼ (atraxnuu 1 Corintios 14:33, 40). Mu manindxu̱lúʼ kaʼwáanʼ xóo Jeobá ndayóoʼ rí mundxaʼwamíjna̱lú rí kaʼwu, rí xóo nuʼni ga̱jma̱a̱ rí xóo eʼyamajkuíí. Ma̱ngaa ikháanʼ gíʼmaa rí muʼna (Rev. 19:8).

¹⁴ Á mu nuʼni kaʼwi̱i̱ náa Guʼwá nagimbáanʼ, asndu na̱nguá majthi̱ʼ muʼthúún xa̱bu̱ maguwáʼ reunión. Ga̱jma̱a̱ ikhiin mbuyáá rí gajkhun nandulúʼ makuwáanʼ náa mbá numbaaʼ nuxi̱ʼ kaʼwu. Ma̱ngaa mbuyáá rí nduʼyamajkuíí mbáa Dios bi̱ mikaʼwii wéñuʼ bi̱ maʼni̱i̱ mitsaan Ku̱ba̱ʼ (Is. 6:1-3; Rev. 11:18).

15, 16. a) Náa numuu rí nguáná mingíjyúuʼ rí maguma kaʼwi̱i̱ náa Guʼwá nagimbáanʼ rá. b) Náa numuu rí ndayóoʼ muniʼñáaʼ mikaʼwu rá. c) Xú káʼnii rígá awan mu maguma kaʼwi̱i̱ rá. d) Ndiéjunʼ gándoo muʼni xúgiáanʼ rá.

¹⁵ Nguáná maʼni mingíjyúuʼ rí maguanúu kaʼwu náa nagimbáanʼ. Náa numuu rá. Numuu rí mixtiʼkhu endxaʼwamíjna̱ xa̱bu̱ ga̱jma̱a̱ numuu rí mikaʼwu. Tikhun kuwa náa rígá yujndaʼ ga̱jma̱a̱ xngacha̱ʼ. Eʼwíínʼ na̱nguá guáʼdáá mba̱ji̱nʼ iyaʼ o i̱ʼwáʼ rí majmúún mu muni kaʼwi̱i̱. Ma̱ngaa xóo niniáanʼ ma̱ndoo maʼni rí mundxaʼwamíjna̱ mixtiʼkhu. Mú tséʼniuu asndu náa má kuwáanʼ, rí ekumún xa̱bu̱ náa kuwaanʼ, gíʼmaa muguaʼdáá mikaʼwu Guʼwá náa nagimbáanʼ ga̱jma̱a̱ rí xáʼni katooʼ. Náa numuu rá. Numuu rí ikhí nduʼyamajkuíí Jeobá (Deut. 23:14).

¹⁶ Á mu nandulúʼ maʼni kaʼwu náa Guʼwá nagimbáanʼ, ndayóoʼ rí muʼnimbánii awan dí rígá mu maguma kaʼwi̱i̱. Bi̱ kuya̱ edxu̱u̱ nuniratáá awan rígi̱ ga̱jma̱a̱ nduyáá dí marigá rí majmaa. Ma̱ngaa nuxnún ikha a̱ngiu̱lú rí xúgíʼ maguma kaʼwi̱i̱ májánʼ. Rígá tikhuu rí ndayóoʼ maguma kaʼwi̱i̱ índo̱ námbá mámbá reunión mú rígá tikhuu rí tséyóoʼ má wéñuʼ. Xúgiáanʼ ma̱ndoo muyambáálú mu maʼni kaʼwu náa Guʼwá nagimbáanʼlú.

17, 18. a) Ndiéjunʼ gándoo majmañulúʼ ga̱jma̱a̱ numún xa̱bi̱i̱ Jeobá nákha wajyúúʼ rá. b) Náa numuu rí gíʼmaa muʼni̱i̱ má xúʼko̱ Guʼwá náa nagimbáanʼ rá.

¹⁷ Xa̱bi̱i̱ Jeobá bi̱ nikuwa nákha wajyúúʼ nini̱i̱ má xúʼko̱ templo ndrígu̱ún. Mbá xkri̱da, rey Jehoás nikuʼmiin ndxajkun ndrígóo Judá rí muni̱i̱ templo ga̱jma̱a̱ mbújkha̱a̱ rí nixna xa̱bu̱ xuajin (2 Rey. 12:4, 5). Itháan rí 200 tsiguʼ nda̱wa̱á, rey Josías ma̱ngaa nijmuu mbújkha̱a̱ rí nixna xa̱bu̱ xuajin mu maguma̱a̱ templo (atraxnuu 2 Crónicas 34:9-11). * Ndiéjunʼ gándoo gájmañúlúʼ ga̱jma̱a̱ numuu rígi̱ rá. Rí mangáanʼ kaʼyulúʼ muʼni̱i̱ Guʼwá náa nagimbáanʼ, asndu ndiéjunʼ má rí gáʼyóóʼ maguma̱a̱.

¹⁸ Tikhuu sucursales ndiyáá rí náa xuajin náa kuwa na̱nguá eguma̱a̱ guʼwá mba̱ʼu̱ ga̱jma̱a̱ dí rígá ikhí. Ma̱ngaa, nguáná numuu rí nguéjmi̱i̱n xa̱bu̱ nduyáá xóo muni ga̱jma̱a̱ rí na̱nguá guáʼdáá mbújkha̱a̱ mu muni̱i̱ rí nichúu. Mú á mu tséʼni̱i̱ Guʼwá náa nagimbáanʼ índo̱ ndayóoʼ, maʼchúu itháan. Ga̱jma̱a̱ xa̱bu̱ bi̱ gúyáá mundxaʼwamíjna̱ dí raʼkhí ga̱jma̱a̱ numulúʼ. Ikha jngó gíʼmaa rí muʼnimi̱jna̱lú mu maguma májáánʼ má xúʼko̱ Guʼwá náa nagimbáanʼ. Xúʼko̱ muʼni mba̱a̱ Jeobá ga̱jma̱a̱ xájmulú náa rakáʼyoo mbújkha̱a̱ rí nuxna a̱ngiu̱lú.

19. Ndiéjunʼ gátani ikháánʼ mu matasnga̱jmá gamajkhu náa Guʼwá nagimbáanʼ rá.

¹⁹ Textos rí ndiʼyáá náa artículo rígi̱ nambáyulúʼ musngajmá gamajkhu náa Guʼwá nagimbáanʼ. Garmáʼáan a̱jkiu̱lú rí xúgíʼ Guʼwá náa nagimbáanʼ ndrígóo Jeobá, raʼkháa ndrígóo mbáa xa̱bu̱ o mbá congregación. Á mu nduʼyamajkuíí Jeobá mbuʼyamajkuíí reunión ga̱jma̱a̱ Guʼwá náa nagimbáanʼ ndrígóo Reino. Ma̱ngaa muxná ga̱jma̱a̱ gagi mbújkha̱a̱ mu maguma i̱ʼwáʼ Guʼwá náa magimbáanʼ ga̱jma̱a̱ muʼni mbá tsiakii rí maʼni kaʼwu ga̱jma̱a̱ rí xáʼchúu. Ikha jngó guʼyaridáá xkridoo Jesús ga̱jma̱a̱ gusngajmá rí nduʼyamajkuíí náa nuʼni mba̱a̱ Jeobá (Juan 2:17).