Tikhun nundxa̱ʼwa̱míjna̱ rí na̱nguá xóo matanimbaʼ rí xa̱bu̱ magabiín. Apóstol Pablo tandxaʼwáminaʼ xúʼko̱ kaʼnii, ikhaa niʼthí: “Á mu i̱ndó náa vida rígi̱ kuaʼti̱i̱n Cristo, phú migínáanʼ ni̱ndxu̱lú náa xúgínʼ xa̱bu̱. Mú rí xúgi̱, Cristo ni̱ga̱bi̱i̱ náa xa̱bu̱ bi̱ nikháñun, bi̱ ni̱ga̱bi̱i̱ ginii náa xúgínʼ bi̱ nunuʼ náa nikháñun” (1 Corintios 15:19, 20). Pablo ndiʼyoo rí gajkhun magabiín xa̱bu̱ bi̱ nikháñun. Xú káʼnii ndiʼyoo xá. Numuu rí Jesús nigabi̱i̱ má (Hechos 17:31). * Ikha jngó Pablo nixná mbiʼyuu Jesús “bi̱ ni̱ga̱bi̱i̱ ginii”, numuu rí ikhaa nituxi̱i̱ ginii mu maxtáa kámuu mbiʼi. Numuu rí Jesús nindxu̱u̱ timbáa bi̱ nigabi̱i̱, makuwá eʼwíínʼ bi̱ magabiín nda̱wa̱á.

Rígá imbo̱o̱ numuu rí nandoo mbuʼyáá rí magabiín bi̱ nikháñun: Jeobá Dios, “su seʼninduhuaʼ” (Tito 1:2). Ikhaa nimbá miʼtsú táʼninduwaʼ ga̱jma̱a̱ xáʼga̱nú maʼni. Ikha jngó, lá naku̱ma̱ʼ rí Dios makudaminaʼ rí maʼnigabiín xa̱bu̱, masngájma rí gíʼdoo tsiakii maʼni, mú xáʼnimbánuu ajngóo xáʼ. Na̱nguá xóo mundxaʼwamíjna̱ xúʼko̱ kaʼnii.

Rí nandoo kaʼyulúʼ Jeobá, naʼniuu maʼnigabiín xa̱bu̱. Job niraxu̱u̱: “Á mu mbáa xa̱bu̱ [...] nakháñuu, lá ma̱ndoo maxtáa mbu̱júu̱ xáʼ. Ikháánʼ matandxaʼoʼ ga̱jma̱a̱ ikhúúnʼ mariʼñaʼ. Numuu rí ikháánʼ nandaʼ wéñuʼ matani rígi̱” (Job 14:14, 15). Job ndiʼyoo gajkhun rí Anu̱u̱ mekhuíí nandoo wéñuʼ maʼnigabi̱i̱. Lá xóó nandoo Dios maʼnigabiín xáʼ. Náa Biblia naʼthí: “Ikhúúnʼ ni̱ndxu̱ʼ Jeobá; tsiriʼkuminaʼ” (Malaquías 3:6). Dios nandoo má xúʼko̱ rí maʼnigabiín bi̱ nikháñun mu makuwá gagi. Rúʼko̱ nandún xúgínʼ xa̱bu̱ bi̱ nikháñun e̱jñún. Ra̱ʼkhá tháán  májánʼ rí Dios raʼkháa i̱ndó nandoo makuxi̱ín xa̱bu̱ ma̱ngaa gíʼdoo tsiakii (Salmo 135:6).

Jeobá nixnúu tsiakii A̱ʼdióo mu maʼnigabiín xa̱bu̱ bi̱ nikháñun, rígi̱ maʼni makuwá gagi bi̱ nindáti̱gi̱i̱n a̱ngiu̱ún. Ma̱ngaa Jesús naniguʼ maguma rúʼko̱. Xú káʼnii eʼyáá rá. Nákha xóó tseʼnigabi̱i̱ Lázaro bi̱ nambáxu̱u̱ ga̱jma̱a̱, Jesús “nimbiyaʼ” índo̱ ndiʼyoo rí numíniʼ a̱ngui̱i̱n gajmíi̱n bi̱ nambáxu̱u̱ májánʼ (Juan 11:35). Imbo̱o̱ miʼtsú, índo̱ ndiʼyoo rí mbáa a̱ʼgú xuáʼa̱ niʼnimbáti̱ga̱a̱ a̱ʼdióo bi̱ i̱mba̱wíí, “pu-niñahuin akuin-jaʼyo, aʼkue niʼthúu̱n: Maxatambiyaʼ”. Núkhu niʼniga̱bi̱i̱ dxámá (Lucas 7:13). Rí naʼthí gi̱jyooʼ najmañulúʼ rí Jesús nagawúnʼ índo̱ nakháñuu mbáa xa̱bu̱. Ikha jngó, ¡ra̱ʼkhá tháán gagi gáxtáa índo̱ rí tsingíná maʼni̱i̱ gagi índo̱ gakuxi̱ín xa̱bu̱ bi̱ nikháñun!

Lá nikháñu mbáa bi̱ xtayáá ráʼ. Mbáa natatsaʼwáminaʼ rí á mu mbáa nakháñuu nánguá ma̱ʼkha̱a̱. Mú Dios ma̱ndoo makuxi̱ín ga̱jma̱a̱ nixnúu ñajunʼ rúʼko̱ A̱ʼdióo. Garmáʼáan a̱jkia̱nʼ rí Dios nandoo rí ikháánʼ maraxtaa ikhí mu madríguíin a̱ngia̱nʼ. Atatsaʼwáminaʼ rí xtaa ratríyaʼ awan rí gátani nda̱wa̱á gajmiáanʼ ikhiin, náa nimbá miʼtsú xutangaumijná.

Lionel, bi̱ niʼthá ga̱jma̱a̱ numuu, eʼthí: “Índo̱ mbáa niʼthúunʼ rí magabiín xa̱bu̱, niʼniuʼ mingíjyúuʼ manimboʼ ga̱jma̱a̱ niku̱mu̱ʼ rí naʼninduwúnʼ. Mú nda̱wa̱á ndi̱yo̱o̱ náa Biblia rí gajkhun nindxu̱u̱. ¡Ra̱ʼkhá tháán eyoʼ mba̱yo̱o̱ mbu̱júu̱ xiʼñúʼ!”.

Lá nandaʼ ma̱ta̱ya̱a̱ itháan ráʼ. Bi̱ nutaraʼa numuu Jeobá maʼdxúún rí musngajmaʼ ga̱jma̱a̱ Biblia xú káʼnii eyáá rí magabiín bi̱ nikháñun. *