“Bi̱ tsíjma̱ñuu naʼnimbo̱o̱ xúgíʼ rí nutháán”
“Skágunʼ nindxu̱u̱ bi̱ nimbá miʼtsú tsíguxnuu periódico, mu itháan bi̱ naʼnimbo̱o̱ má xúʼko̱ rí naʼthí.” (August von Schlözer, historiador ga̱jma̱a̱ escritor alemán [1735-1809])
NAʼNI itháan rí a̱jma̱ ciento tsiguʼ, xa̱bu̱ bugi̱ niʼthí rí xándoo matanimbaaʼ xúgíʼ rí naʼthí náa periódico. Ikháá má rígá rí mbiʼi xúgi̱. Xándoo muʼnimbulúʼ xúgíʼ rí naʼthí náa Internet. Ga̱jma̱a̱ numuu xúgíʼ tecnología rí narígá xúgi̱, xúgíʼ mbiʼi rígá mbaʼa rí muraxnuu. Mbaʼa rí na̱ʼkha̱ ikhí nindxu̱u̱ gajkhun ga̱jma̱a̱ nayambáá, mú ma̱ngaa mbaʼa nindxu̱u̱ minduwaʼ ga̱jma̱a̱ migamíi. Ikha jngó ndayóoʼ muñeumíjna̱. Índo̱ mbáa xa̱bu̱ nagíʼdu̱u̱ najmuu Internet, mbáa nandxaʼwáminaʼ rí mbá noticia nindxu̱u̱ gajkhun numuu rí kama náa Internet o numuu rí mbáa bi̱ nambáxu̱u̱ ga̱jma̱a̱ nikuʼma. Mbáa asndu maʼnimbo̱o̱ historia rí tsírígá kayuʼ. Mú náa Biblia naʼthí: “Mbáa bi̱ tsíjma̱ñuu naʼnimbo̱o̱ xúgíʼ rí nutháán, mu bi̱ najmañuu ndaʼyoo náa ejkha̱” (Proverbios 14:15).
Xa̱bu̱ bi̱ tsíjma̱ñuu naʼnimbo̱o̱ xúgíʼ rí nutháán, mú bi̱ najmañuu i̱ndó naʼnimbo̱o̱ á mu ndaʼyoo rí gajkhun nindxu̱u̱. Náa Internet rígá wéñuʼ historias ga̱jma̱a̱ noticias rí na̱jkha̱nú najmaʼnuʼ wéñuʼ, mú ragájkhun nindxu̱u̱. Ndiéjunʼ gándoo gúʼni mu nimbáa xáʼni nduwánʼ rá. Guraximíjná: “Náa nigúxnuu historia rúʼko̱ rá. Lá nigúxnuu náa mbá ináa rí najmaʼnuʼ bi̱ nuthi rí gajkhun, o náa mbá ináa náa nuniraʼmáʼ asndu ndiéjunʼ má rí eñún dxe̱ʼ. Lá na̱ʼkha̱ historia náa rí tsijmaʼnuʼ ráʼ. Lá nisngajma náa ináa rí naʼthí rí gajkhun rí minduwaʼ nindxu̱u̱ historia rúʼko̱ ráʼ.” * Guñeumíjnalú (Proverbios 7:7). Á mu rí nuraxnuu mbá rí mingíjyúuʼ matanimbaaʼ, mbáa minduwaʼ nindxu̱u̱. Ga̱jma̱a̱ á mu rí na̱ʼkha̱nú mbá mensaje náa naʼthí numuu mbáa xa̱bu̱ rá. Guraximíjna̱: “Tsáa lá eyoo rí xúgínʼ xa̱bu̱ mudxawíín noticia rúʼko̱ rá. Náa numuu rí mbáa maʼndoo rí mamidxu̱u̱ noticia rúʼko̱ rá.”
XÁTAXUʼMÁ XÚGÍʼ MENSAJE RÍ NA̱ʼKHA̱NÚ NÁA INAʼ
Índo̱ tikhun xa̱bu̱ nundrigú mensajes náa na̱ʼkha̱ noticia, mbá nacha̱ nuxuʼma náa bi̱ nambáxu̱u̱n gajmiún. Nuxuʼmá maski ajndu tséyáá á mu gajkhun nindxu̱u̱ ga̱jma̱a̱ tsindxaʼwa̱a̱ edxu̱ún rí á mu maʼni gawúunʼ eʼwíínʼ. Mbáa i̱ndó nandún makujmiin itháan o nandún manindxu̱ún timbíi̱n bi̱ muxna noticia (2 Samuel 13:28-33). Mú gíʼmaa muñeumíjna̱. Tsíyulú muʼni gawíínʼ mbáa xa̱bu̱ o muʼthá numáá mbá organización.
Náa numuu rí tikhun xa̱bu̱ nuxuʼma noticias rí asndu tséyáá ginii á mu nindxu̱u̱ gajkhun rá. Numuu rí tsíñún munimbáti̱ga̱ mbiʼi mu mbuyáá á mu gajkhun nindxu̱u̱. Mbáa muthi: “Bi̱ nambáxuʼ gajmíi̱nʼ ma̱ndoo mbuyáá á mu gajkhun nindxu̱u̱ noticia”. Mú mbáa ikhiin na̱nguá má eguapiin (Efesios 5:15, 16). Ikha jngó, á mu ikháánʼ tsítayáá á mu gajkhun nindxu̱u̱ rí mataxuʼmá, garmáʼáan a̱jkia̱nʼ ajngáa rígi̱: “Xárata á mu minduwaʼ nindxu̱u̱”.
Májánʼ rí muraximíjna̱lú: “Lá naguʼunʼ makuʼmá má xúʼko̱ mensaje ráʼ. Lá ndiyóoʼ manda̱ʼa̱ rí muni mba̱a̱ a̱jkiu̱ún kuyoʼ numuu rí nikuʼmá mbá mensaje dí ragájkhun ráʼ. Lá nindo̱ʼo̱ʼ mbáa rí maniʼñúʼ rakuʼmá mensaje inuu ráʼ.” Á mu bi̱ nambáxulú gajmiúlú guáʼdáá Internet, ma̱ndoo mbuyáaʼ rí nandún ikhiin. Tséyóoʼ mundrigú mbaʼa correos rí naʼthí ajngáa xnduʼwá, fotos o videos. Ma̱ngaa, ragíʼmaa muxuʼmá discursos rí nigixi̱i̱ ga̱jma̱a̱ rí nigumaraʼmáʼ. * Itháan májánʼ rí mámbáa gáʼnigajmaa ga̱jma̱a̱ numuu mbá tema, mbayáaʼ versículos rí na̱ʼkha̱ náa Biblia náa mbá artículo o maʼnirataminaʼ rí maʼthí náa reunión.
Atatsaʼwáminaʼ májánʼ nákha xóó tsítaxuʼma mbá mensaje
Ndiéjunʼ gíʼmaa muʼni á mu nduʼyáá náa Internet mbá nduwaʼ ga̱jma̱a̱ numún bi̱ nutaraʼa numuu Jeobá rá. Ní xuraxnuu ga̱jma̱a̱ xúʼnimbuluʼ rí naʼthí. Xúxuʼmá náa inún eʼwíínʼ xa̱bu̱, numuu rí xúʼko̱ i̱ndó muʼni mamidxu̱u̱ nduwaʼ. Ga̱jma̱a̱ á mu naʼni maxmiéjunlu rí niraxnulú, gunda̱ʼa̱a̱ Jeobá rí maxnúlú ikha ga̱jma̱a̱ guʼtámíjná gajmiúlú mbáa ndxájulú bi̱ najmañuu (Santiago 1:5, 6; Judas 22, 23). Xáʼniulu tsiánguá á mu nuthi rí nduwaʼ ga̱jma̱a̱ numulú. Ma̱ngaa nithi ga̱jma̱a̱ numuu Jesús. Ga̱jma̱a̱ ikhaa niʼthí rí xa̱bu̱ muni gíníi cristianos ga̱jma̱a̱ muthi rí minduwaʼ (Mateo 5:11; 11:19; Juan 10:19-21). Á mu najmañulúʼ nundxa̱ʼwáá májánʼ edxu̱lúʼ, mbuʼyáá á mu mbáa xtáa raʼthí rí minduwaʼ ga̱jma̱a̱ numulúʼ o nagíʼ maʼni nduwiinʼ eʼwíínʼ (Proverbios 2:10-16).
GUʼYAMAJKHÚN EʼWÍÍNʼ
Ma̱ngaa ndayóoʼ muñewa̱a̱n rí xúʼthá rí niʼdxawíín ga̱jma̱a̱ numún a̱ngiu̱lú. Maski ajndu gajkhun nindxu̱u̱, mbáa xáʼni májánʼ rí muʼthúún eʼwíínʼ (Mateo 7:12). Mbá xkri̱da, rí muʼthá dí ra̱májánʼ ga̱jma̱a̱ numún eʼwíínʼ masngájma rí tsíyulú kuʼñúún ga̱jma̱a̱ xámbáyuu nimbáa (2 Tesalonicenses 3:11; 1 Timoteo 5:13). Ma̱ngaa, mbáa tikhuu noticias ragíʼmaa muʼdxawíín. Á mu mbáa nandoo maʼthí ga̱jma̱a̱ numuu ikhaa, mbá dí ragíʼmaa mudxawíín eʼwíínʼ ikhaa gíʼmaa mbaʼyoo nguáná gáʼthi ga̱jma̱a̱ xú káʼnii gáʼthi. Á mu nuʼtáriyaʼ wapháá, musngajmá rí na̱nguá eʼyamajkhuíí ga̱jma̱a̱ muʼni gawíínʼ wéñuʼ.
Rí mbiʼi xúgi̱, noticias namidxu̱u̱ nacha̱ wéñuʼ. Tikhuu nindxu̱u̱ gajkhun ga̱jma̱a̱ nambáyulúʼ, mú i̱ʼwáʼ nindxu̱u̱ minduwaʼ. Xambumaʼ rí á mu ikháánʼ nataxuʼmá mensaje náa inuu mbáwíi xa̱bu̱, ikhaa ma̱ndoo makuʼma náa inún xúgínʼ xa̱bu̱ mbégu̱ʼ xúgi̱. Ikha jngó itháan májánʼ rí xúxuʼmá xúgíʼ rí e̱ʼkha̱nú náa inulú náa xúgínʼ bi̱ nambáxulú gajmiúlú. Maski ajndu Biblia naʼthí rí á mu nandulúʼ kuʼñúún eʼwíínʼ maʼni rí muʼnimbulúʼ, gíʼmaa muñeumíjna ga̱jma̱a̱ xakumulú rí xúgíʼ mensaje nindxu̱u̱ gajkhun (1 Corintios 13:7). Ma̱ngaa, ragíʼmaa muʼnimbulúʼ minduwaʼ rí nuthi ga̱jma̱a̱ numuu organización ndrígúlú ma̱ngaa náa a̱ngiu̱lú. Garmáʼáan a̱jkiu̱lú rí xa̱bu̱ bi̱ nunikuma̱a̱ ga̱jma̱a̱ nuthi rí nduwaʼ kuwa ruyaridáá Satanás, “numu ri anu ri minduhua ñajunʼ” (Juan 8:44). Ikha jngó guñeumijna wéñuʼ ga̱jma̱a̱ xúgíʼ rí nundrígú mámbá mbiʼi. Xambumulú rí naʼthí náa Biblia: “Bi̱ tsijmañu manindxu̱u̱ skágunʼ, mú bi̱ ndaʼyoo rí maʼni marigu ku̱ma̱ xóo corona náa edxu̱u̱” (Proverbios 14:18).
