1. Ndiéjunʼ niʼni Manóah índo̱ niʼdxuun rí magiʼdaa mbáa ada̱ rá.

MANÓAH ga̱jma̱a̱ a̱ʼgiu̱u̱ ninindxu̱ún israelitas. Ikhiin nindxa̱ʼwa̱míjna̱ rí nditháan xándoo muguaʼdiin e̱ji̱n. Mú mbóo mbiʼi mbáa ángel nisngájmaminaʼ náa a̱ʼgiu̱u̱ Manóah ga̱jma̱a̱ niʼthúu̱n mbá ajngáa májánʼ, rí magiʼdaa mbáa ada̱. Índo̱ ikhaa niʼthúu̱n ajmbio̱o̱, Manóah ra̱ʼkhá tháán nidxuu. Mú ma̱ngaa nindxa̱ʼóo edxu̱u̱ rí maguaʼdáá ñajunʼ muni. Nákha ikhú, mbaʼin israelitas nuni dí raʼkhí. Xú káʼnii gáʼni Manóah ga̱jma̱a̱ a̱ʼgiu̱u̱ mu musngáá aʼdiún maʼni ñajunʼ Jeobá ga̱jma̱a̱ maʼndoo kaʼyoo xá. Manóah nindo̱ʼo̱o̱ Jeobá rí makuʼmaa mbu̱júu̱ ángel mu maʼthúún xú káʼnii gúní mbaja̱a̱ ada̱ (Juec. 13:1-8).

2. Ndiéjunʼ ñajunʼ guáʼdáá xa̱bu̱ bi̱ guáʼdiin e̱ji̱n, ga̱jma̱a̱ ndiéjunʼ gambáñun munimbaníí ñajunʼ rúʼko̱ rá. (Atayáá ma̱ngaa kúgumaʼá “ E̱jña̱ʼ bi̱ itháan gíʼdoo numuu marasngúún”.)

² Á mu ikháánʼ xtaʼdiin e̱ji̱n, mbáa nakruaʼaʼ májánʼ xú káʼnii nikumu̱u̱ Manóah. Ikháánʼ mangáán xtaʼdáá ñajunʼ rúʼko̱ rí marasngúún e̱jña̱ʼ mu muni ñajunʼ Jeobá ga̱jma̱a̱ maʼndún kuyáá (Prov. 1:8). Ndiéjunʼ gambáyaʼ mu matanimbaníí ñajunʼ rúʼko̱ rá. Mbóo rí gíʼdoo wéñuʼ numuu rí Munigajmaa mbá guʼwáanʼ mu mbuyamajkuíí Jeobá mámbá xmáná. Rúʼko̱ gámbáyaʼ mu marasngúún e̱jña̱ʼ ga̱jma̱a̱ numuu Jeobá  ma̱ngaa ga̱jma̱a̱ numuu Biblia (atraxnuu Deuteronomio 6:6-9). * Mú káʼnii imbo̱o̱ gámbáyaʼ rá. Xkri̱da májánʼ rí niniñuʼ Jesús. Gajkhun má rí ikhaa na̱nguá nigiʼdiin e̱ji̱n, mú bi̱ guáʼdiin e̱jñún ma̱ndoo majmañún wéñuʼ rí xú káʼnii Jesús niʼsngúún xa̱bi̱i̱. Náa artículo rígi̱ gúʼyáá rí Jesús nisngájmun rí nindoo kaʼñún ga̱jma̱a̱ rí ninindxu̱u̱ xa̱bu̱ gua̱ba̱ʼ. Ma̱ngaa rí nikro̱ʼo̱o̱ xú káʼnii nikumu̱ún ga̱jma̱a̱ ndiʼyoo xú káʼnii gambáñun. Ma̱ngaa mbuʼyáá xú káʼnii gándoo gúʼyaridáá rí niʼni.

3. Náa numuu rí xa̱bi̱i̱ Jesús ndiyáá májánʼ rí ikhaa nindoo kaʼñún xá.

³ Jesús niguʼwun maʼthúún xa̱bi̱i̱ rí nandoo kaʼñún (atraxnuu Juan 15:9). * Ma̱ngaa nixtáa mba̱yu̱ʼ gajmíi̱n (Mar. 6:31, 32; Juan 2:2; 21:12, 13). Raʼkháa i̱ndó bi̱ naʼsngúún ninindxu̱u̱ ikhaa, ma̱ngaa nimbáxu̱u̱ gajmíi̱n. Ikha jngó xa̱bi̱i̱ Jesús ndiyáá májánʼ rí nindoo kaʼñún. Xú káʼnii gándoo matayaridáá Jesús ikháánʼ rá.

4. Xú káʼnii gándoo matasngajmún e̱jña̱ʼ rí nandaʼ xtañún rá. (Atayáá timbá xtiʼkhu.)

⁴ Gaguʼwaanʼ marathu̱u̱n e̱jña̱ʼ rí nandaʼ xtañún ga̱jma̱a̱ atasgájmuu rí guáʼdáá wéñuʼ numúú náa ikháánʼ (Prov. 4:3; Tito 2:4). Náa Australia, mbáa xa̱bi̱i̱ Jeobá bi̱ nagumbiʼyuu Samuel naʼthí rí índo̱ ikhaa chíʼgíʼ, anu̱u̱ naguxnuu xúgíʼ mbruʼun Libro ga̱jma̱a̱ numuu Biblia ga̱jma̱a̱ nariʼña̱a̱ graxe̱ rí gíʼdoo, ndayáraʼaa ga̱jma̱a̱ na̱ʼkhu̱ chítúʼ. Índo̱ ninújngoo tsiguʼ, Samuel niguanúu tsiánguá índo̱ niʼdxuun rí anu̱u̱ ndija̱a̱ náa mbá guʼwá náa na̱nguá eguʼwún mbuyaraʼamijná ga̱jma̱a̱ ni má tséʼphu̱ chítu̱ún. Mú anu̱u̱ niʼni mbá tsiakii mu masngájmuu rí nandoo kaʼyoo wéñuʼ. Rúʼko̱ nimbáyúu Samuel mu maxtáa tsímáá ga̱jma̱a̱ mbaʼyoo rí anu̱u̱ nandoo kaʼyoo. Ga̱jma̱a̱ nájmi̱i̱n niguánu nimbáxu̱u̱n májánʼ. Á mu ikháánʼ naguʼwanʼ marathu̱u̱n e̱jña̱ʼ rí nandaʼ xtañún, ikhiin makumún xó má Samuel. Ikhá jngó, atsu chítúnʼ ga̱jma̱a̱ ayáriʼin, ma̱ngaa atríyaʼ awan mu maratamíjná, matatsiʼtsu ga̱jma̱a̱ maratsíin gajmiáanʼ.

5, 6. a) Ndiéjunʼ niʼni Jesús ga̱jma̱a̱ numún xa̱bi̱i̱ rá. b) Xú káʼnii gíʼmaa muxprigún e̱jñún xa̱bu̱ rá.

⁵ Jesús niʼthí: “Xúgínʼ bi̱ nandoʼ ka̱ñu̱u̱n naxprígún” (Rev. 3:19). * Xú káʼnii nixprígun Jesús xa̱bi̱i̱ rá. Mbá xkri̱da, ikhaa ndiʼyoo rí guáʼdáá mbá xkujndu numuu rí nagiʼdu̱u̱n má xúʼko̱ mu mbuyáá tsáa bi̱ itháan gíʼdoo numuu. Ikha jngó nixprígun mbaʼa nuthu. Mú ndiyáaʼ náa ma̱ndoo ga̱jma̱a̱ náa mbi̱ʼi̱i̱ maxprígún ga̱jma̱a̱ májánʼ (Mar. 9:33-37).

⁶ Ikháánʼ nandaʼ xtañún e̱jña̱ʼ, ikha jngó natayáá dí gíʼmaa mataxprígún. Á mu nuni mbá dí raʼkhí, nguáná má mayambáá rí i̱ndó marathu̱u̱n náa numuu dí ra̱májánʼ nini xúʼko̱ kaʼnii. Mú, á mu rúʼko̱ na̱nguá embáñún xá. (Prov. 22:15.) Atani xóo niʼni Jesús. Araxnún má xúʼko̱ ikha, araxnún xtágabu ga̱jma̱a̱ ataxprígún, índo̱ gátani rígi̱ xákiʼnán. Atayáaʼ náa májánʼ ga̱jma̱a̱ náa mbi̱ʼi̱i̱ gándoo gátaxprígún ga̱jma̱a̱ májánʼ. Náa Sudáfrica, mbáa xa̱bi̱i̱ Jeobá bi̱ nagumbiʼyuu Elaine narmáʼáan a̱jkiu̱ún xú káʼnii anu̱u̱ ga̱jma̱a̱ ru̱dúu̱ nixpriguíí. Ikhiin nitháán má xúʼko̱ ndiéjunʼ guáʼthi̱i̱n rí ikhaa maʼni. Mbá xkri̱da, nutháán rí á mu ikhaa tséʼnimbo̱o̱, muxnáá castigo. Ga̱jma̱a̱ nda̱wa̱á nunimbaníí rí ethi muni. Mú nutháán má xúʼko̱ náa numuu rí nuxnáá castigo ga̱jma̱a̱ nimbá miʼtsú tuxpriguíí índo̱ ikhiin nakasngañúnʼ. Ga̱jma̱a̱ numuu rígi̱ ndiʼyoo rí ikhiin nindúún kuyáá wéñuʼ.

7, 8. a) Ndiéjunʼ nijmañún xa̱bi̱i̱ Jesús rí xóo niʼtájkháan ikhaa xá. b) Índo̱ ikháánʼ garatajkháan náa inún e̱jña̱ʼ, xú káʼnii gándoo marasngúún makumún kuyáá Jeobá xá.

⁷ Índo̱ Jesús inuu murugua̱a̱ ga̱jma̱a̱ muxiyáa niʼthí rígi̱: “Abba, Anu̱ʼ, ikháánʼ rí mbá xúgíʼ ma̱ndoo matani; atiengaa náa ikhúúnʼ copa rígi̱. Mú raʼkháa xóo eyoʼ ikhúúnʼ, maguma rí nandaʼ ikháánʼ” (Mar. 14:36). * Ndiéjunʼ nijmañún xa̱bi̱i̱ Jesús rí xóo niʼtájkháan xá. Mbáa ikhiin nijmañún rí maski ajndu ikhaa nindxu̱u̱ mbáa xa̱bu̱ bi̱ ragíʼdoo aʼkhá, nindo̱ʼo̱o̱ rí mambáyúu Anu̱u̱. Ma̱ngaa nijmañún rí ikhiin gíʼmaa mani̱ndxu̱ún gua̱bi̱nʼ ga̱jma̱a̱ mbuyáaʼ rí Jeobá mambáñun.

⁸ E̱jña̱ʼ ma̱ndoo majmañún wéñuʼ índo̱ ikháánʼ naratájkáan inún ikhiin. Rígi̱ tsíyoo gáʼthi rí ikháánʼ i̱ndó naratájkáan mu marasngúún rí muni. Mú índo̱ ikháánʼ naratájkháan inún ma̱ndoo marasngúún e̱jña̱ʼ makumún kuyáá Jeobá. Xú káʼnii rá. Xátanda̱ʼa̱ i̱ndó ga̱jma̱a̱ numún ikhiin, atanda̱ʼa̱ ga̱jma̱a̱ numaʼ mangáán. Náa xuajin Brasil, mbáa ndxájulú bi̱ mbiʼyuu Ana naʼthí rí índo̱ anu̱u̱ ga̱jma̱a̱ ru̱dúu̱ niguáʼdáá xkujndu, ninda̱ʼa̱a̱ Dios rí mambáñun má xúʼko̱. Mbá xkri̱da, índo̱ xiʼñúnʼ Ana niʼniún nandii, anu̱u̱ ga̱jma̱a̱ ru̱dúu̱ ninda̱ʼa̱a̱ Jeobá rí maxnún tsiakii ga̱jma̱a̱ ku̱ma̱ mu muraʼwíí májánʼ rí muni. Niniñaʼ náa Dios xúgíʼ xkujndu ndrígu̱ún asndu rí itháan mingíjyúuʼ. Rígi̱ niʼni rí Ana majmañuu maku̱mu̱u̱ kaʼyoo Jeobá. Ikháánʼ mangáán ma̱ndoo matani xúʼko̱ kaʼnii índo̱ garatajkháan gajmiáanʼ e̱jña̱ʼ. Mbá xkri̱da, atanda̱ʼa̱a̱ Jeobá rí xámiñaʼ mu marataráʼaa mbáa xa̱bu̱ bi̱ xtáa mijngii náa xtaa o mu matanda̱ʼa̱a̱ xa̱bu̱ náa natiejunʼ rí maniñaʼ mi̱dxu̱ʼ náa asamblea. Ikhú e̱jña̱ʼ mbuyáá rí ikháánʼ naku̱ma̱ʼ xtayáá Jeobá ga̱jma̱a̱ xúʼko̱ má gúni mangiin.

9. a) Xú káʼnii niʼsngúún Jesús xa̱bi̱i̱ mani̱ndxu̱ún gua̱bi̱nʼ ga̱jma̱a̱ rí mumbañún eʼwíínʼ rá. b) Á mu ikháánʼ ni̱ndxa̱ʼ xa̱bu̱ gua̱ba̱ʼ ga̱jma̱a̱ natambáñun eʼwíínʼ, ndiéjunʼ gúní e̱jña̱ʼ rá.

⁹ Jesús niʼsngúún xa̱bi̱i̱ mani̱ndxu̱ún gua̱bi̱nʼ ga̱jma̱a̱ mumbañún eʼwíínʼ. Xú káʼnii niʼsngúún  xá. Ga̱jma̱a̱ xkri̱da ndrígóo (atraxnuu Lucas 22:27). Tsiakii rí niʼni Jesús niʼni ga̱jma̱a̱ numuu Jeobá ma̱ngaa mu mambáñun eʼwíínʼ. Ga̱jma̱a̱ xa̱bi̱i̱ nijmañún muni ikháá kayúʼ. Mangáán ma̱ndoo marasngúún e̱jña̱ʼ ga̱jma̱a̱ numuu xkri̱da rí gátaʼgíʼ. Atatsaʼwáminaʼ ga̱jma̱a̱ numuu mbáa xa̱bi̱i̱ Jeobá bi̱ nagumbiʼyuu Debbie ga̱jma̱a̱ ajmbio̱o̱, Pranas. Ikhiin guáʼdiin a̱jmi̱i̱n e̱jñún, ga̱jma̱a̱ ikha kayá edxu̱u̱ náa congregación. Debbie naʼthí rí ikhaa tákiʼnáa nimbá miʼtsú ga̱jma̱a̱ numuu rí Pranas xtáa itháan náa congregación. Ikhaa ndiʼyoo májánʼ rí ajmbio̱o̱ maxtáa náa goʼwóo índo̱ ikhiin gáʼñúnʼ (1 Tim. 3:4, 5). Ndiéjunʼ nimbáñun e̱ji̱i̱n xkri̱da ndrígu̱ún Debbie ga̱jma̱a̱ Pranas rá. Pranas naʼthí rí e̱ji̱i̱n nikuwa tsímáá ma̱ngaa nimbáxu̱u̱n májánʼ gajmiún xúgínʼ a̱ngiu̱lú. Ga̱jma̱a̱ nindúún muyambáá má xúʼko̱ náa asambleas, rí mbiʼi xúgi̱ xúgínʼ ikhiin nuni káxi̱ ñajunʼ Jeobá. Á mu ikháánʼ ni̱ndxa̱ʼ xa̱bu̱ gua̱ba̱ʼ ga̱jma̱a̱ nandaʼ matambáñun eʼwíínʼ, e̱jña̱ʼ mbuyaridáá rí natani.

10. Ndiéjunʼ niʼni Jesús índo̱ xa̱bu̱ bi̱ kuwa náa Galilea nijngruigu̱u̱n ruyáaʼ xá.

¹⁰ Jesús ninindxu̱u̱ jmbii ga̱jma̱a̱ niʼngo̱o̱ ndiʼyoo ndiéjunʼ endxaʼwamíjna̱ xa̱bu̱ (Juan 2:25). Ikha jngó raʼkháa i̱ndó ndiʼyoo ndiéjunʼ eni xa̱bu̱ ma̱ngaa nikro̱ʼo̱o̱ náa numuu rí xúʼko̱ eni. Mbá xkri̱da, mbóo mbiʼi xa̱bu̱ bi̱ kúwi̱i̱n náa Galilea nijngruigu̱u̱n ruyáaʼ Jesús (Juan 6:22-24). Mú ikhaa ndiʼyoo rí ikhiin kuwa ikhí mu munda̱ʼa̱a̱ ganitsu raʼkháa mu mudxawíín rí gáʼthi. Ikha jngó nixprígún ga̱jma̱a̱ májánʼ xa̱bu̱ buʼko̱, ma̱ngaa niʼthún rí eyóoʼ muni mu muriʼkhumijná (atraxnuu Juan 6:25-27).

11. a) Ndiéjunʼ rí gámbáyaʼ ma̱ta̱ya̱a̱ á mu gajkhun nanigu̱nʼ mutaraʼa e̱jña̱ʼ rá. b) Xú káʼnii gándoo gátani mu manigu̱nʼ e̱jña̱ʼ mutaraʼa rá.

¹¹ Gajkhun má rí ikháánʼ na̱nguá ni̱ndxa̱ʼ jmbii ní má xándoo ma̱ta̱ya̱a̱ ndiéjunʼ endxaʼwamíjna̱ e̱jña̱ʼ. Mú ma̱ndoo mataniminaʼ makruaʼaʼ náa numuu eni xúʼko̱ kaʼnii. Mbá xkri̱da, mbáa na̱dxu̱ʼ gajmiáanʼ e̱jña̱ʼ náa narataráʼa. Mú, atraximinaʼ: “Náa numuu egún gutaraʼa xá. Mbáa ikhiin i̱ndó guáʼthi̱i̱n nguánáa gáratsi rí eñún. Á mu na̱dxu̱ʼnú natayáá rí e̱jña̱ʼ tsénigunʼ mutaraʼa, ataniminaʼ rí ikhiin manigu̱nʼ mutaraʼa. Araxnún dí ra̱mingíjyúuʼ muni mu makumún rí guaʼdáá numún mangiin índo̱ nagún gutaraʼa.

12. a) Ndiéjunʼ niʼthún xa̱bi̱i̱ Jesús rá. b) Náa numuu ndiyóoʼ maʼthúún Jesús xúgíʼ rúʼko̱ xa̱bi̱i̱ rá.

¹² Ma̱ngaa rígá imbo̱o̱ rí xú káʼnii Jesús nimbáñun xa̱bi̱i̱. Ikhaa ndiʼyoo rí á mu mbáa nakiéʼkhun mbá miʼtsú, nda̱wa̱á ma̱ndoo maʼni imbo̱o̱ dí itháan raʼkhí o asndu mbóo aʼkhá rí mitsaʼkhúun wéñuʼ. Ikha jngó niʼthún xa̱bi̱i̱ rí muñeumíjna̱ wéñuʼ. Mbá xkri̱da, ikhiin ndiyáá dí ragíʼmaa mubúnʼ gajmiún xa̱bu̱. Mú Jesús niʼthún ndiéjunʼ gáʼni rí muxudamijna̱ náa aʼkhá rúʼko̱. Niʼthún rí á mu mbáa xa̱biya̱ ndaʼyoo má xúʼko̱ mbáa a̱ʼgu̱ bi̱ raʼkháa a̱ʼgiu̱u̱ numuu rí nandoo mabóoʼ ga̱jma̱a̱, xtáa má rakudaminaʼ aʼkhá ga̱jma̱a̱ náa “aun akuin”. Ga̱jma̱a̱ nixnúún xtágabu rígi̱: “Xi idaʼ majanʼ eʼne ri marakan, atriyaʼ, atada” (Mat. 5:27-29). Náa numuu ndiyóoʼ maʼthúún Jesús xúgíʼ rúʼko̱ xa̱bi̱i̱ rá. Numuu rí xa̱bu̱ bi̱ kuwa ikhú nubúnʼ wéñuʼ gajmiún eʼwíínʼ ga̱jma̱a̱ nduyáá teatro náa nakujmaa rí nubúnʼ o nuthi ajngáa rí  mitsaga wéñuʼ. Numuu rí Jesús nindoo kaʼñún xa̱bi̱i̱, niʼthún rí gunitsíngumi̱jna̱ náa xúgíʼ rí maʼni muxudamijna̱ aʼkhá.

13, 14. Xú káʼnii gándoo gátambáñun e̱jña̱ʼ mu xúni̱ gagimijnáa ga̱jma̱a̱ dí xkawiʼ rá.

¹³ Ikháánʼ gíʼmaa matie̱wu̱u̱n e̱jña̱ʼ mu xuni nimbá rí Jeobá naguiyuʼ kaʼyoo. Ga̱jmá eʼni xúgi̱ numuu rí asndu e̱jín majkhinʼ migamíi mbuyáá náa timii xa̱bu̱ bi̱ nda̱a̱ xtíñún o i̱ʼwáʼ xtiʼkhu rí mitsaga wéñuʼ. Xú káʼnii gándoo gatiewu̱u̱n e̱jña̱ʼ rá. Gíʼmaa marathu̱u̱n dí ra̱májánʼ mbuyáá náa timii xa̱bu̱ bi̱ nda̱a̱ xtíñún. Mú raʼkháa i̱ndó rúʼko̱. Atraximinaʼ: “Lá nduyáá e̱ji̱nʼ náa numuu rí migamíi wéñuʼ mbuyáá náa timii xa̱bu̱ bi̱ nda̱a̱ xtíñún ráʼ. Ndiéjunʼ gáʼniuu maʼndún mbuyáá xá. Lá nuthu̱nʼ ga̱jma̱a̱ numuu xúgíʼ rí naguaʼnii xáʼ. Á mu nandún mbuyáá náa timii xa̱bu̱ bi̱ nda̱a̱ xtíñún, lá maguwáʼ gúthunʼ xáʼ.” Maski ajndu majkhinʼ e̱jña̱ʼ ma̱ndoo marathu̱u̱n: “Á mu mbóo mbiʼi nataxkamaa náa Internet náa nagájnún xa̱bu̱ bi̱ kuwa rubúnʼ ga̱jma̱a̱ naʼniaʼ ma̱ta̱ya̱a̱, arathúnʼ. Xámiñaʼ ga̱jma̱a̱ xaxmiéjuanʼ, ikhúúnʼ nandoʼ mambáyaʼ”.

¹⁴ Índo̱ ikháánʼ gatraʼwíí xú káʼnii gátani gagiminaʼ, atatsaʼwáminaʼ májánʼ xú káʼnii nindxu̱u̱ xkri̱da rí gátatsiʼñáaʼ mbuyáá e̱jña̱ʼ. Xa̱bu̱ bi̱ niʼthá ga̱jma̱a̱ numuu náa kutriga̱ 9 eʼthí rí xa̱bu̱ ma̱ndoo mutún mbaʼa wéñuʼ e̱jñún, mú e̱ji̱n muni rí gúyáá rí xtáa raʼni anu̱ún. Á mu ikháánʼ natraʼwíí ajmúú, películas ga̱jma̱a̱ libro rí tséʼkha̱ rí mitsaga, mbáa xúʼko̱ má gúní e̱jña̱ʼ ma̱ngaa (Rom. 2:21-24).

15, 16. a) Náa numuu natayáá gajkhun rí Jeobá mambáyaʼ matanimbanuu e̱jña̱ʼ rá. b) Ndiéjunʼ gúʼyáá náa imbo̱o̱ artículo rá.

¹⁵ Ndiéjunʼ nirígá índo̱ Manóah nindo̱ʼo̱o̱ Jeobá rí mambáyúu maʼni mbaja̱a̱ a̱ʼdióo xá. “Dios bi̱ gajkhun niʼdxuun aʼwóo Manóah” (Juec. 13:9). Ikha jngó mangáán natayáá rí gajkhun Jeobá maʼdxun rí naratájkáan ga̱jma̱a̱ mambáyaʼ matanimbánii e̱jña̱ʼ. Ikhaa gámbáyaʼ mu matasngajmún rí nandaʼ xtañún, rí ni̱ndxa̱ʼ mbáa xa̱bu̱ gua̱ba̱ʼ ga̱jma̱a̱ nakruaʼaʼ náa numuu xúʼko̱ eni.

¹⁶ Mú Jeobá raʼkháa i̱ndó mambáyaʼ matanimbanuu e̱jña̱ʼ índo̱ ikhiin majkhinʼ. Ikhaa mambáyaʼ má xúʼko̱ índo̱ e̱jña̱ʼ gáʼga ranuu. Náa imbo̱o̱ artículo gúʼyáá xú káʼnii gándoo ikháánʼ matayaridáá Jesús ga̱jma̱a̱ matasngajmún e̱jña̱ʼ bi̱ nagún ranuu rí nandaʼ xtañún, rí ni̱ndxa̱ʼ xa̱bu̱ gua̱ba̱ʼ ga̱jma̱a̱ nakruaʼaʼ rí nuni. Xúʼko̱ ma̱ndoo marasngúún e̱jña̱ʼ muni ñajunʼ Jeobá.