RÍ KAYÁ EDXU̱U̱ NÁA INUU I̱YI̱I̱ʼ | XÚ KÁʼNII EʼYOO DIOS GUERRA RÁ.
Dios ga̱jma̱a̱ guerras nákha siglo timbá
Ninindxu̱u̱ mbá xuajen rí nijma gínáa wéñuʼ. Xó má xa̱bu̱ nákha wajyúúʼ, judíos bi̱ nikuwa nákha siglo timbá, mbáa nitajkháan wéñuʼ mu munda̱ʼa̱a̱ Dios rí maʼni káwíin náa xa̱bu̱ ñajunʼ romanos. Ikhú nikujmaa Jesús ga̱jma̱a̱ tikhun niraximíjná a mu ikhaa ganindxu̱u̱ Mesías bi̱ nijuiʼthá ma̱ʼkha̱. Mbaʼin niguaʼti̱i̱n rí ikhaa “maʼtsihuin xabo xuajin Israel” náa majñuʼ Roma (Lucas 24:21). Mú raʼkháa i̱ndó tárígá rí nindúún, ma̱ngaa nákha tsiguʼ 70 soldados romanos nini gámbáa Jerusalén ga̱jma̱a̱ templo.
Náa numuu rí Dios taxmínaʼ numún judíos xó má niʼni nákha wajyúúʼ rá. O náa numuu tániñúnʼ muxmijná xá. Lá niriʼkhu̱u̱ xóo nindxa̱ʼóo edxu̱u̱ Dios ga̱jma̱a̱ numuu guerra rá. Na̱nguá, rí phú nixtiʼkhuu nindxu̱u̱ rí xú káʼnii judíos nimbáxu̱u̱n gajmiún Dios, numuu rí túnimbu̱ún dí Jesucristo ninindxu̱u̱ Mesías (Hechos 2:36). Ikha jngó Dios táʼndoo gáʼñun ga̱jma̱a̱ nánguá ninindxu̱u̱ xuajen dí niraʼwíí ikhaa (Mateo 23:37, 38).
Dios nánguá niñewu̱u̱n xuajen Judá ga̱jma̱a̱ Ku̱ba̱ʼ rí Dios niʼthí maxnún. Ikha jngó judíos na̱nguá xóo muthi rí Dios xtáa gajmiún índo̱ nagún náa guerra. Xó má niʼtáriyaʼ Jesús, Dios nánguá nixtáa ga̱jma̱á nindxu̱u̱ xuajen Israel ga̱jma̱a̱ numuu má rúʼko̱ nánguá nimbáñun. Rí xúgi̱ Dios maxtáa ga̱jma̱á ni̱ndxu̱ún i̱mba̱ xuajen, rí náa Biblia naxná mbiʼyuu “Israel ndrígóo Dios” (Gálatas 6:16; Mateo 21:43). Mbá grupo náa kúwi̱i̱n cristianos bi̱ Dios niraʼwíin ninindxu̱u̱ Israel ndrígóo Dios. Ikha jngó nákha siglo timbá nijuiʼthun: “Xúgi̱ nindxa̱laʼ xuajñu Dios” (1 Pedro 2:9, 10).
Á mu rí xúgi̱ Cristianos ninindxu̱ún xuajñún Dios, lá niʼni káwíin náa xa̱bu̱ romanos ga̱jma̱a̱ nixmínaʼ ga̱jma̱a̱ numún xáʼ. Lá niniñúúnʼ rí ikhiin muxmijná gajmiún bi̱ nuni gíníi xáʼ. Na̱nguá, náa numuu rá. Xó má ndiʼyáá náa timbá artículo náa naʼthí ga̱jma̱a̱ numuu guerra ndrígóo Dios, i̱ndó ikhaa eʼthí nguánáa gágun náa guerra. Nákha siglo timbá, Dios taxmínaʼ ga̱jma̱a̱ numún cristianos ní má taniñún muxmijná náa nimbá guerra. Nakujmaa kaʼwu dí raʼkháa mbiʼi rúʼko̱ rí Dios maʼni gámbáa dí mixkawiʼ wéñuʼ ga̱jma̱a̱ rí naguma gíníi.
Timbíi̱n cristianos ndiyóoʼ muguaʼthi̱i̱n dí maʼga̱nú mbiʼi rí Dios maxmínaʼ ga̱jma̱a̱ numún, xó má ndiyóoʼ muguaʼthi̱i̱n xa̱bi̱i̱ nákha wajyúúʼ. Asndu índo̱ gáʼga̱nú mbiʼi rúʼko̱, na̱nguá xóo mugi̱ʼdi̱i̱ guerra gajmiún xa̱bu̱ bi̱ sia̱nʼ numuu rí Dios tséniñunʼ. Jesucristo taʼthun xa̱bi̱i̱ rí magún náa guerra, ikhaa niʼthí mbájmbu ga̱jma̱a̱ numuu rígi̱: “Gaʼne akianʼla-juñu tsi najiʼni-juyaʼla, gunitsakuramila tsi nutan xkahuiyaʼla, guñula ri majan tsi tsiñu guyaʼla. Gunila tsakun numu tsi nutan xkahuiyaʼla jame nuxkahuiñaʼla” (Mateo 5:44). Índo̱ niʼtáriyaʼ rí soldados romanos matu̱ʼu̱u̱n náa Jerusalén, Jesús niʼthún rí xuxmijná, itháan májánʼ rí magañún ga̱jma̱a̱ rúʼko̱ má nini (Lucas 21:20, 21).
Ma̱ngaa, apóstol Pablo niʼniráma: “Xágutangáanʼ muniu̱u̱n dí ra̱májánʼ bi̱ niʼniala dí ra̱májánʼ, xuguáʼdala sia̱nʼ; numuu rí kiʼniraʼmáʼ: ‹Ikhúúnʼ kaʼyoʼ manda̱ʼa̱a̱ cuenta; ikhúúnʼ gani numa̱a̱, eʼthí Jeobá›” (Romanos 12:19). Pablo xtáa raʼthí ga̱jma̱a̱ numuu rí Dios má niʼthí mba̱yu̱ʼ tsiguʼ kidíiʼ, xó má eʼkha raʼthí náa Levítico 19:18 ga̱jma̱a̱ Deuteronomio 32:35. Ndiʼyáá má rí Dios nixmínaʼ ga̱jma̱a̱ numuu xuajñu nákha wajyúúʼ náa xa̱bu̱ sia̱nʼ. Índo̱ Pablo niʼthí mbu̱júu̱ʼ ajngáa rígi̱, nákha siglo timbá nasngájma rí Dios táriʼkhuu xóo e̱dxaʼwóo edxu̱u̱ ga̱jma̱a̱ numuu guerra; xóo muʼthá, ndiʼyoo xóo mbá rí ma̱ndoo maʼni mú mañewu̱u̱n xa̱bi̱i̱ ga̱jma̱a̱ mú maʼni gámbóo dí xkawiʼ wéñuʼ ga̱jma̱a̱ rí naguma gíníi. Xó má nirígá nákha wajyúúʼ, Jeobá má gáʼthi nguánáa garigá guerra ga̱jma̱a̱ tsáa gáʼga náa guerra.
Nakujmaa kaʼwu dí Dios tániñúnʼ timbíi̱n cristianos magún guxmijná, ga̱jma̱a̱ rí mbiʼi xúgi̱, lá rígá mbá grupo náa tsu̱du̱u̱ ku̱ba̱ʼ rí Dios nambáyúu mú maʼga̱ náa mbá guerra ráʼ. Lá ni̱jkha̱nú má mbiʼi rí Dios maxmínaʼ ga̱jma̱a̱ numún xa̱bi̱i̱ ráʼ. Ndiéjunʼ endxa̱ʼwáminaʼ Dios ga̱jma̱a̱ numuu guerra dí narígá xúgi̱ rá. Náa imbo̱o̱ artículo gáxti̱ʼña̱a̱ graxe̱ rígi̱.
