RÍ KAYÁ EDXU̱U̱ NÁA INUU I̱YI̱I̱ʼ
Xú káʼnii eʼyoo Dios guerra rá.
Mbaʼin xa̱bu̱ nundxaʼwamíjna̱ rí Dios ndaʼyoo májánʼ dí marigá guerra numuu dí nákha wajyúúʼ nikuʼmiin xa̱bi̱i̱ mú magún náa tikhuu guerra, xó má e̱ʼkha̱ raʼthí náa Biblia. Mú, xa̱bu̱ nduyáá dí Jesucristo, a̱ʼdióoʼ Dios, niʼsngúún xa̱bi̱i̱ rí maʼndún kuñún xa̱bu̱ sia̱nʼ (Mateo 5: 43, 44). Ikha jngó nundxaʼwamíjna̱ dí nirígá mbóo mbiʼi rí Dios niriʼkhu̱u̱ xóo endxa̱ʼóo edxu̱u̱ ga̱jma̱a̱ xúgi̱ tsíyoo gáʼyoo nimbá guerra.
Á mu xúʼko̱, lá Dios naniñuʼ marigá guerra rá. O na̱nguá dxe̱ʼ. Á mu ikhaa naniñuʼ, tsáa embáyúu xúgi̱ náa nuxmijná xá. Rí ma̱ta̱ya̱a̱ xóo gáxti̱ʼña̱a̱ graxe̱ rígi̱ gáʼni xóo gátatsaʼwaminaʼ ikháánʼ ga̱jma̱a̱ numuu guerra. Mbá xkri̱da, á mu natayáá rí Dios raʼkháa i̱ndó naniñuʼ marigá guerra ma̱ngaa xtáa náa nuxmijná náa xtaa ikháánʼ mbáa matatsaʼwamínáʼ dí guerra rúʼko̱ májánʼ ga̱jma̱a̱ dí maʼngala muxmijná. Mú a mu natayáá rí Dios xtáa gajmíi̱n xa̱bu̱ sia̱nʼ rá. Lá matriʼkuíí xóo natatsaʼwáminaʼ ikháánʼ ga̱jma̱a̱ numuu guerra ráʼ.
Mú rígá imbo̱ʼ. Rí ma̱ta̱ya̱a̱ ndiéjunʼ endxa̱ʼwáminaʼ Dios ga̱jma̱a̱ numuu guerra ma̱ndoo mariʼkhu̱u̱ xóo tatsaʼwáminaʼ ga̱jma̱a̱ numuu Dios. Náa numuu eʼthá rígi̱ rá. Xúʼko̱, xó má mbaʼin wéñuʼ xa̱bu̱, ikháánʼ mangáán nitamíniʼ ga̱jma̱a̱ numuu guerra, maʼnda̱ʼ ma̱ta̱ya̱a̱ a mu Dios gíʼdoo aʼkhúun, á mu ikhaa naniñuʼ marigá ga̱jma̱a̱ a mu rí ikhaa asndu naʼni dí mumíniiʼ ga̱jma̱a̱ numuu guerra. O mbáa natraximínáʼ á mu naxmiéjunʼ eni bi̱ numíniiʼ ga̱jma̱a̱ numuu rúʼko̱.
Maguanáʼ tsiánguá índo̱ gáta̱ya̱a̱ rí e̱ʼkha̱ raʼthí náa Biblia dí nditháan tsémbanii ga̱jma̱a̱ rí niʼthá nángii. Ma̱ngaa, naʼthí rí Dios nditháan tsériʼkhuu xóo endxa̱ʼóo edxu̱u̱ ga̱jma̱a̱ numuu tema rígi̱. Guʼyáá ndiéjunʼ eʼthí náa Biblia ga̱jma̱a̱ numuu ndiéjunʼ nindxa̱ʼwáminaʼ Dios ga̱jma̱a̱ numuu guerra nákha wajyúúʼ ma̱ngaa índo̱ Jesucristo nixtáa náa tsu̱du̱u̱ Ku̱ba̱ʼ. Rí mbuʼyáá rígi̱ gambáyulú makru̱ʼu̱lú ndiéjunʼ endxa̱ʼwáminaʼ Dios rí nuxmijná xa̱bu̱ rí mbiʼi xúgi̱, ma̱ngaa mbuʼyáá á mu nda̱wa̱á marigá xóó guerra.
