1, 2. Náa numuu rí náa Biblia naʼthí rí muʼthá nindxu̱u̱ xóo mbá aguʼ rá.

NÁKHA tsiguʼ 1871 náa Estados Unidos nikha phú mba̱a̱ xáná xóó rí na̱nguá ndiyáá kayuʼ. Mbégu̱ʼ xúgi̱ nikháñun itháan rí mbá 1,200 xa̱bu̱ ga̱jma̱a̱ nitsikhá mbá 2,000 millones ixi̱. Ndiéjunʼ nirígá rá. Nuthi rí chíʼgíʼ aguʼ nigájnuu náa tren bi̱ nanújngun náa xaná rúʼko̱. Rígi̱ naʼni marmáʼáan a̱jkiu̱lú rí naʼthí Santiago 3:5: “¡Mbá chíʼgíʼ aguʼ maʼngo̱o̱ matsikhá mbá xáná mba̱a̱!”. Náa numuu rí niʼthí Santiago rígi̱ rá.

² Santiago niʼthí rí ra̱ju̱nlú nindxu̱u̱ xóo aguʼ (Sant. 3:6). Gi̱jyooʼ ra̱ju̱nluʼ nandoo gáʼthúu̱n rí nandoo nuʼthálu. Xó má aguʼ ma̱ndoo maʼni gachúu wéñuʼ, ma̱ngaa rí nuʼthálu ma̱ndoo maʼni gawúunʼ eʼwíínʼ. Lá rúʼko̱ eyoo gáʼthúu̱n rí xándoo muʼthá nimbá ráʼ. Na̱nguá. Lá ragájkhun rí tseniʼñáʼ rajmulu aguʼ i̱ndó numuu rí gamíi muʼni gawúunʼ eʼwíínʼ ráʼ. Rí nuʼni nugíʼ najmulú májánʼ. Mbá xkri̱da, ma̱ndoo majmulúʼ mu muʼni májáánʼ ganitsu, magigáanʼ o mu mambiʼyulú. Xúʼko̱ káʼnii, náa Biblia naʼsngáa rí nuʼthá ma̱ndoo maʼni gawúunʼ wéñuʼ o mambáñun eʼwíínʼ (Prov. 18:21). Ikha jngó gíʼmaa mbuʼyáá májánʼ rí gúʼthá. Mbá xkri̱da, ma̱ndoo majmulúʼ mu mbuʼyamajkuíí Jeobá ga̱jma̱a̱ mu mumbáñun eʼwíínʼ (Sal. 19:14).

3. Á mu nandulúʼ muxnún tsiakii eʼwíínʼ, ndiéjunʼ eyóoʼ mbuʼyáá rá.

³ Jeobá nixnúlú rí ma̱ndoo muʼthá rí nundxa̱ʼwa̱míjna̱ ga̱jma̱a̱ rí nakumulú, tséʼniuu á mu ga̱jma̱a̱ ajngáa o señas. Xú káʼnii gándoo  gájmulu regalo rígi̱ mu muxnún tsiakii eʼwíínʼ rá. (Atraxnuu Santiago 3:9, 10.) * Ndayóoʼ mbuʼyáá nguáná gúʼthá, ndiéjunʼ gúʼthá ga̱jma̱a̱ xú káʼnii gúʼthá.

4. Nguáná dí ragíʼmaa muʼthá rá.

⁴ Náa Biblia naʼthí dí rígá “mbiʼi dí xárata” (Ecl. 3:7). Rígi̱ nandoo gáʼthúu̱n dí rígá mbiʼi dí ragíʼmaa muʼthá. Mbá xkri̱da, índo̱ eʼwíínʼ kuwa ruthi, xúʼthá mu musngájma gamajkhu (Job 6:24). Índo̱ nduʼyáá mbá dí ragíʼmaa mudxawíín eʼwíínʼ, ragíʼmaa muʼthá (Prov. 20:19). Ga̱jma̱a̱ índo̱ mbáa naʼthúlúʼ mbá rí tsínigulú, ragíʼmaa makiʼnáanʼlú ga̱jma̱a̱ xuʼthalu nimbá (Sal. 4:4).

5. Xú káʼnii esngajmáá Jeobá rí nuxnáalu núma̱aʼ numuu rí nandoo nuʼthá rá.

⁵ Mú nguáná májánʼ má rí muʼthá (Ecl. 3:7). Mbá xkri̱da, ma̱ndoo muʼthá índo̱ nandulúʼ muʼni mba̱a̱ Jeobá, muxnún tsiakii eʼwíínʼ o muʼthá rí nakumulú ga̱jma̱a̱ rí ndayúlú (Sal. 51:15). Xúʼko̱ nunsgajmáá Jeobá rí nuxnáalu núma̱aʼ numuu rí nandoo nuʼthá. Índo̱ mbáa bi̱ nambáxulúʼ májánʼ gajmiúlú namínáanʼ mbá rí gíʼdoo numuu, ikháanʼ najmulú májánʼ.

6. Ndíjkha rí gíʼdoo numuu mbuʼyáá nguáná gíʼmaa muʼthá rá.

⁶ Ndíjkha rí gíʼdoo numuu mbuʼyáá nguáná gúʼthá rá. Proverbios 25:11 naʼthí rí mbá ajngáa májánʼ náa phú mbiʼi rí ndayóoʼ nindxu̱u̱ xóo mbá manzana dí oro dí grígu náa nigumaratáá ga̱jma̱a̱ plata. Ndiéjunʼ eyoo gáʼthúu̱n rígi̱ rá. Manzanas dí oro nindxu̱u̱ mitsaan wéñuʼ. Mú á mu nugrígu náa niguma májáánʼ ga̱jma̱a̱ plata, makujmaa itháan mitsaan. Xúʼko̱ má kayuʼ, á mu nandulúʼ rí ajngáa dí nuʼthálu mambáñun eʼwíínʼ, gíʼmaa mbuʼyáá májánʼ mbiʼi rí muʼthálu. Guʼyáá mbá xkri̱da rí nasngájma rúʼko̱.

7, 8. Xú káʼnii ndiyaridáá xkri̱da ndrígóo Jesús a̱ngiu̱lú bi̱ kuwa náa Japón rá.

⁷ Á mu nuʼthá índo̱ dí rakaʼyoo, mbáa xa̱bu̱ xakru̱ʼu̱u̱n o xúnimbu̱ún rí gúʼthún (atraxnuu Proverbios 15:23). * Mbá xkri̱da, nákha marzo tsiguʼ 2011, mbá gaʼxma ga̱jma̱a̱ índo̱ nigájnuu lamáa niʼni gámbóo mbaʼa xuajen ndrígóo Japón. Nikháñun itháan rí 15,000 xa̱bu̱. Mbaʼin Testigos nikháñun a̱ngiu̱ún ga̱jma̱a̱ bi̱ nimbáxu̱u̱n gajmiún, mú nindúún mumbañún bi̱ kuwa mijngii ga̱jma̱a̱ Biblia. Maski ajndu xúʼko̱, mbiʼi rúʼko̱ tuthuun ga̱jma̱a̱ numuu rí magabiín bi̱ nikháñun. Náa numuu rá. Numuu rí ikhí mbaʼin xa̱bu̱ ni̱ndxu̱ún budistas ga̱jma̱a̱ tséyáá wéñuʼ rí naʼthí náa Biblia. Ikha jngó a̱ngiu̱lú i̱ndó nithúún ajngáa rí maʼni̱i̱ a̱jkiu̱ún ga̱jma̱a̱ nithúún náa numuu rí numíniʼ xa̱bu̱ bi̱ nuni dí májánʼ.

⁸ Jesús ndiʼyoʼ nguáná gáʼthi ga̱jma̱a̱ nguáná xáʼthi (Juan 18:33-37; 19:8-11). Mbá miʼtsú niʼthún xa̱bi̱i̱: “Xo guʼdoʼ-güeñoʼ ri matanʼla, pero naxaʼngo akianʼla mudxahuin xi matanʼla” (Juan 16:12). A̱ngiu̱lú bi̱ kuwa náa Japón ndiyaridáá Jesús ga̱jma̱a̱ niguaʼti̱i̱n mbá mbiʼi mu mutún xa̱bu̱ ga̱jma̱a̱ numuu rí magabiín bi̱ nikháñun. A̱jma̱ tsiguʼ tikhu rí nigájnuu lamáa nixnaxi̱ tratado Lá ma̱ndoo matangi̱i̱n makuwá mbu̱júu̱ xa̱bu̱ bi̱ nikháñun ráʼ. Mbaʼin nindrigú ga̱jma̱a̱ niʼni̱i̱ a̱jkiu̱ún rí naʼthí ikhí. Ma̱ngaa gíʼmaa mundxaʼwami̱jna̱ náa xa̱bu̱ ga̱jma̱a̱ rí enimbu̱ún náa kuwáanʼ. Mú xúʼko̱ mbuyáá nguáná gúʼthún.

9. Nguáná ma̱ngaa gáʼyóoʼ muguaʼthi̱i̱n nákha xóó tséʼtá rá.

⁹ Náa imbo̱o̱ gáʼyóóʼ muguaʼthi̱i̱n rá. Mbá nindxu̱u̱ índo̱ mbáa naʼthúlúʼ mbá rí tsínigulúʼ. Á mu nuriʼña̱a̱ nacha̱, mbáa muʼthá mbá  rí nda̱wa̱á magaʼwíínʼ a̱jkiu̱lúʼ. Ikha jngó, ginii gíʼmaa muraximíjna̱: “Lá nindxu̱u̱ mbá rí gíʼdoo numuu rí mbaʼyóoʼ mata tsiakii ráʼ.” Á mu ragíʼdoo wéñuʼ numuu, mbáa xáʼyóoʼ má muʼthá. Mú á mu nduʼyáá rí ndayóoʼ muʼtámíjná gajmiúlú xa̱bu̱, itháan májánʼ rí muguaʼthi̱i̱nlu asndu índo̱ gáʼni̱i̱ a̱jkiu̱lúʼ (atraxnuu Proverbios 15:28). * Náa imbo̱o̱ dí mbaʼyóoʼ muguaʼthi̱i̱n rí muʼthá, nindxu̱u̱ índo̱ nandulúʼ muʼthúún bi̱ kuwa náa guʼwúlú mu muniʼniiʼ Jeobá. Nákha xóó tséʼthun, gaʼngo̱o̱ a̱jkiu̱lúʼ, gundxaʼwáá májánʼ e̱dxu̱luʼ rí gúʼthún ga̱jma̱a̱ guʼyáá nguáná kúwi̱i̱n itháan xawii mudxawíín.

10. a) Náa numuu rí gíʼmaa mundxaʼwáá májánʼ edxu̱lúʼ rí gúʼthá rá. b) Náa biʼyaa rí xándoo muʼthá nditháan bi̱ ni̱ndxu̱lú cristianos rá.

¹⁰ Rí muʼthá ma̱ndoo mambáñun wéñuʼ eʼwíínʼ o maʼni gawúunʼ wéñuʼ. Ikha jngó ndayóoʼ mundxaʼwáá májánʼ edxu̱lúʼ rí gúʼthá (atraxnuu Proverbios 12:18). * Mbaʼin xa̱bu̱ ni̱ndxu̱ún ra̱míjínʼ ga̱jma̱a̱ najmún ajngáa mu muni gawúunʼ eʼwíínʼ, xóo mbá chídí rí a̱jma̱ rawunʼ o flecha (Sal. 64:3). Rígi̱ najmañún náa películas ga̱jma̱a̱ rí na̱ʼkha̱ náa televisión. Mú, bi̱ ni̱ndxu̱lú cristianos nimbá miʼtsú tséʼta ajngáa gujkhuʼ o dí raʼkhí, asndu má índo̱ nuʼni xnduʼwá. Rí muʼthá ajngáa xnduʼwá na̱nguá nindxu̱u̱ ra̱májánʼ, mbáa asndu maʼni itháan mitsaan rí muʼtámijna. Mú ragíʼmaa muʼthá rí maʼni gawúunʼ o mutsijmáa mbáa mú xúʼko̱ eʼwíínʼ munduʼwa. Náa Biblia naʼthí dí ragíʼmaa majmulúʼ ajngáa dí ra̱májánʼ o ajngáa xkawiiʼ, gíʼmaa muʼthá ajngáa rí mambáñún ga̱jma̱a̱ rí maxnún tsiakii eʼwíínʼ (Efes. 4:29, 31).

11. Ndiéjunʼ gambáyulú mu majmulúʼ má xúʼko̱ ajngáa rí májánʼ ga̱jma̱a̱ rí naxná tsiakii rá.

¹¹ Jesús niʼthí rí “naguma naʼ aun akuin xabo, ika-ma igriyoʼ raun” (Mat. 12:34). Rígi̱ nandoo gáʼthúu̱n dí ajngáa rí nuʼthá nasngájma rí gíwanʼ náa a̱jkiu̱lúʼ. Á mu náa a̱jkiu̱lúʼ gíwanʼ rí nandulúʼ kuʼñúún xa̱bu̱, majmulúʼ má xúʼko̱ ajngáa rí májánʼ ga̱jma̱a̱ rí naxná tsiakii.

12. Ndiéjunʼ imbo̱o̱ gambáyulú mu muxkamaa ajngáa rí májánʼ índo̱ gúʼthá rá.

¹² Salomón ninindxu̱u̱ mbáa rey bi̱ ndaʼyoo wéñuʼ, mú ndiyóoʼ mandxa̱ʼóo wéñuʼ edxu̱u̱ mu maʼnirámáʼ ajngáa rí májánʼ ga̱jma̱a̱ rí maʼni̱i̱ a̱jkiu̱lú (Ecl. 12:9, 10). Rígi̱ naʼsngúlúʼ rí ndayóoʼ mbá tsiakii mu muxkamaa ajngáa rí májánʼ índo̱ muʼthá. Ndiéjunʼ gambáyulú muxkamaa rá. Ma̱ndoo majmañulúʼ ajngáa nuxi̱ʼ índo̱ nuraxnulú Biblia ga̱jma̱a̱ i̱yi̱i̱ʼ ndrígúlú. Ga̱jma̱a̱ á mu tseniʼnúʼ mbá ajngáa, ma̱ndoo mbuʼyáaʼ ndiéjunʼ eyoo gáʼthúu̱n. Ma̱ngaa ma̱ndoo mbuʼyaridáá Jesús. Ikhaa niʼthí rí Jeobá niʼsngóo mu maʼthí má xúʼko̱ ajngáa rí naxná tsiakii ga̱jma̱a̱ rí mambáñun xa̱bu̱ bi̱ numíniʼ (Is. 50:4). Ma̱ngaa, gíʼmaa mundxaʼwamíjna̱ xú káʼnii gúyáá eʼwíínʼ rí gúʼthá (Sant. 1:19). Ma̱ndoo muraximíjna̱lú: “Á mu natha rígi̱, xú káʼnii gákro̱ʼo̱o̱ i̱mba̱a̱ xa̱bu̱ rá. Xú káʼnii gakumu̱u̱ xá.”

13. Ndíjkha rí gíʼdoo numuu majmulúʼ ajngáa dí ramiʼskoo rá.

¹³ Gíʼdoo numuu rí índo̱ gúʼthálu majmulu ajngáa dí ramiʼskoo. Mu mbuʼyáá náa numuu, guʼyáá mbá xkri̱da. Xa̱bu̱ israelitas nijmún trompetas mú muthi rí ndayóoʼ. Mbá rí ikhaa nindxu̱u̱ rí muthúún xa̱bu̱ xuajen rí magimbíin. I̱mba̱ numuu nindxu̱u̱ rí muthúún soldados rí magún guxmijná gajmiún xa̱bu̱ sia̱nʼ. Á mu rí trompeta na̱nguá ewan kaʼwu, soldados ma̱ndoo majngawi̱i̱n. Xúʼko̱ má káʼnii nindxu̱u̱ rí muʼthá ma̱ngaa. Náa Biblia naʼthí rí gíʼmaa muʼthá ajngáa dí ra̱mingíjyúuʼ makru̱ʼu̱lú. Á mu na̱nguá, mbáa xa̱bu̱ majngawi̱i̱n o xakru̱ʼu̱u̱n. Mú maski ajndu nuʼthá kaʼwu,  gíʼmaa muñewa̱a̱n rí xúʼthá ajngáa dí ra̱májánʼ o rí tsesngájma gamajkhu (atraxnuu 1 Corintios 14:8, 9). *

14. Xú káʼnii xkri̱da nisngájma Jesús rí niʼthí má xúʼko̱ ajngáa dí ramiʼskhoo rá.

¹⁴ Jesús niʼthí má xúʼko̱ ajngáa dí ra̱mingíjyúuʼ makru̱ʼu̱u̱n eʼwíínʼ. Gundxaʼwamíjna̱ náa discurso rí nuraxnulú náa capítulos 5 asndu 7 ndrígóo Mateo. Ikhaa tájmuu ajngáa rí tséʼyóoʼ ga̱jma̱a̱ rí miʼskhoo mú xa̱bu̱ maguanún tsiánguá. Ma̱ngaa táʼni gawúunʼ nimbáa ga̱jma̱a̱ ajngáa rí niʼthí. Ikhaa niʼthí rí gíʼdoo wéñuʼ numuu, mú nijmuu má xúʼko̱ ajngáa ramiʼskhoo. Mbáa xkri̱da, náa discurso rígi̱ niʼsngúún xa̱bi̱i̱ dí ragíʼmaa maxmiéjunʼ ga̱jma̱a̱ numuu rí gúphu mámbá mbiʼi. Mu magiwa̱nʼ má xúʼko̱ a̱jkiu̱ún rí niʼsngúún, niʼthún rí mbuyáá xú káʼnii Jeobá naxnitsunʼ ñu̱ʼu̱. Ga̱jma̱a̱ nda̱wa̱á niraxu̱u̱n: “¿A raʼka ihua guiʼdo numaʼla ikanʼla xo ri ikin-ra?” (Mat. 6:26). Ga̱jma̱a̱ ajngáa dí ramiʼskhoo rígi̱ nixnúún tsiakii ma̱ngaa niʼsngúún mbá ikha rí gíʼdoo wéñuʼ numuu.

15. Ndíjkha rí ndayóoʼ majmulúʼ ajngáa gua̱ba̱ʼ índo̱ nuʼthá rá.

¹⁵ Xó má ndiʼyáá, gíʼmaa mundxaʼwamíjna̱ májánʼ rí gúʼthá, mú ma̱ngaa mundxaʼwamíjna̱lú xú káʼnii gúʼthá. Xa̱bu̱ ninigu̱nʼ mudxawíín rí niʼthí Jesús numuu rí ikhaa nijmuu ajngáa gua̱ba̱ʼ mu maʼthí (Luc. 4:22). Á mu rí ikháanʼ najmulú ajngáa gua̱ba̱ʼ índo̱ nuʼthá, xa̱bu̱ maʼndún mudxawíín ga̱jma̱a̱ maʼga̱nú asndu náa a̱jkiu̱ún (Prov. 25:15). Ndiéjunʼ gambáyuluʼ mu muʼthá ajngáa gua̱ba̱ʼ rá. Rí mbuʼyamajkún eʼwíínʼ ga̱jma̱a̱ rí mbuʼyáá xóo eku̱mún. Rúʼko̱ rí niʼni Jesús. Mbá xkri̱da, índo̱ ndiʼyoo rí xa̱bu̱ nuni mbá tsiakii mu muxkamaa Jesús ga̱jma̱a̱ mudxawíín rí gáʼthi, ikhaa nigáwiinʼ a̱jkiu̱u̱n ga̱jma̱a̱ “aʼkue ri mbaʼa ini  ri niguiʼdu niʼsjngun” (Mar. 6:34). Ga̱jma̱a̱ i̱mba̱ miʼtsú índo̱ rí xa̱bu̱ nitháán dí raʼkhí, ikhaa na̱nguá nitanga̱a̱ maʼthún xó má ikhiin nitháán (1 Ped. 2:23).

16, 17. a) Xú káʼnii gúʼyaridáá Jesús índo̱ nuʼthúún bi̱ kuwa náa guʼwúlú ga̱jma̱a̱ bi̱ nambáxulúʼ gajmiúlú rá. (Atayáá timbá xtiʼkhu.) b) Araxná mbá xkri̱da xú káʼnii mbáa niʼthí ajngáa gua̱ba̱ʼ.

¹⁶ Xúgiáanʼ nandulúʼ kuʼñúún wéñuʼ bi̱ kuwa náa guʼwúlú ga̱jma̱a̱ bi̱ nambáxulúʼ májánʼ gajmiúlú. Mú numuu rí nambáxulúʼ gajmiúlú, mbáa makumulúʼ rí xáʼyóoʼ muñewa̱a̱n rí xóo guʼtámijna gajmiúlú ikhiin. Mbáa asndu nguáná muʼthá ajngáa rí maʼni gawúunʼ. Mú gundxaʼwamíjna̱ náa Jesús. Ikhaa nisngájma má xúʼko̱ gamajkhu náa inún bi̱ nambáxu̱u̱ gajmíi̱n. Índo̱ tikhun rí ikhiin nigiʼdu̱u̱n ga̱jma̱a̱ numuu tsáa gíʼdoo itháan numuu, ikhaa nijmuu ajngáa gua̱ba̱ʼ mu maxprigun. Asndu nigíʼ mbá xkri̱da ndrígóo mbáa ada̱ mú mambáñun muriʼkumijná (Mar. 9:33-37). Náa congregación, bi̱ kuya̱ edxu̱u̱ gíʼmaa mbuyaridáá Jesús ga̱jma̱a̱ muxna xtágabu ga̱jma̱a̱ ajngáa gua̱ba̱ʼ (Gál. 6:1).

¹⁷ Á mu rí mbáa naʼthúlúʼ mbá ajngáa rí naʼnigawúnlu, gíʼmaa muriʼña̱a̱ ga̱jma̱a̱ ajngáa gua̱ba̱ʼ (Prov. 15:1). Guʼyáá rí nigíʼnuu mbáa a̱ʼgu̱ bi̱ naʼni mbaja̱a̱ mbáwíi mbáa a̱ʼdióo dxámá. Dxámá bugi̱ xtáa raʼni nguʼwáá dí raʼkhí. Mbá mbiʼi, mbáa ndxájulú a̱ʼgu̱ ndiʼyoo ga̱jma̱a̱ nindoo maxnúu tsiakii ru̱dúu̱ dxámá. Ikha na̱nguá nindoo maʼni gawúunʼ, niʼthúu̱n: “¡Ra̱ʼkhá tháán migíná rí tájmáán garasngáá májánʼ a̱ʼdiáa!”. Nákha xóó tsíriʼña, nindxa̱ʼwáminaʼ ga̱jma̱a̱ niʼniminaʼ rí xákiʼnáa. Ga̱jma̱a̱ nda̱wa̱á niriʼña̱a̱ májánʼ ma̱ngaa rí xóó maʼniminaʼ mu maʼsngóo a̱ʼdióo. Ga̱jma̱a̱ numuu rí májánʼ niriʼña̱a̱ nimbáxu̱u̱n má xúʼko̱. Ma̱ngaa, dxámá niʼdxuun rí niʼthí ru̱dúu̱. Índo̱ ndiʼyoo dí ru̱dúu̱ tandxaʼwáminaʼ rí ndíí nindxu̱u̱ dí naʼsngóo, ikhaa niniñuʼ raʼni dí ra̱májánʼ, nijngúun iyááʼ ga̱jma̱a̱ nda̱wa̱á niñajunʼ náa Betel. Ndiéjunʼ ejmañuluʼ ga̱jma̱a̱ numuu rígi̱ rá. Rí tséʼniuu tsáa eʼtamíjná gajmiúlú á mu a̱ngiu̱lú, bi̱ kuʼñúún o xa̱bu̱ bi̱ tseniʼnuʼ, rí muʼthá gíʼmaa maʼni má ‹xúʼko̱ ga̱jma̱a̱ idú›. Xóo muʼthá, gíʼmaa muʼthá má xúʼko̱ ga̱jma̱a̱ gamajkhu (Col. 4:6).

18. Xú káʼnii gándoo gúʼyaridáá Jesús rá.

¹⁸ Nindxu̱u̱ mbá regalo ndrígóo Jeobá rí nandoo nuʼthúún eʼwíínʼ rí nundxa̱ʼwáá edxu̱lúʼ ga̱jma̱a̱ rí naku̱mu̱lú. Ikha jngó, guʼyaridáá má xúʼko̱ Jesús ga̱jma̱a̱ guraʼwíí májánʼ nguáná gúʼthá, ndiéjunʼ gúʼthá ga̱jma̱a̱ xú káʼnii gúʼthá. Ganindxu̱lú má xúʼko̱ xa̱bu̱ májáánʼ ga̱jma̱a̱ gajmulú ajngáa mu muxnún tsiakii eʼwíínʼ ma̱ngaa rí muʼni maxtáa gagi Jeobá.