1, 2. a) Ndiéjunʼ niʼni Jeobá nákha wajyúúʼ rá. b) Ndiéjunʼ eraximíjna̱ tikhun xa̱bu̱ rí mbiʼi xúgi̱ rá.

XÚGIÁANʼ nandulúʼ makuwáanʼ májánʼ rí xáʼniulú nandii. Á mu mbá miʼtsú niraʼdáá mbá nandii mbiiʼ, mbáa ni̱dxu̱ʼnú nitraximinaʼ á mu maʼga̱nú maʼniʼ. O mbáa ikháá má traximinaʼ á mu xtaʼdaa mbáa bi̱ nambáxaʼ májánʼ ga̱jma̱ʼ o mbáa bi̱ xtayáá bi̱ naʼniuu wéñuʼ nandii. Náa Biblia naʼthí ga̱jma̱a̱ numuu mbaʼin xa̱bu̱ bi̱ niraximi̱jna̱ á mu maʼga̱nú mbá mbiʼi rí maʼni̱i̱ a̱jkiu̱ún. Mbáa dí ikhiin ninindxu̱u̱ rey Ocozías, a̱ʼdióo Acab ga̱jma̱a̱ Jezabel. Ikhaa nixpátriguíi ga̱jma̱a̱ niraxi á mu maʼni̱i̱ náa nigawúnʼ. Nda̱wa̱á, ma̱ngaa rey Ben-hadad bi̱ nixtáa náa Siria nindoo mbaʼyoo á mu maʼni̱i̱ (2 Rey. 1:2; 8:7, 8).

² Nákha wajyúúʼ, Jeobá nijmuu mbaʼa nuthu tsiakii ndrígóo mu maʼni thanún tikhun xa̱bu̱. Asndu nixnún tsiakii tikhun gaʼyee mu munigabi̱ín xa̱bu̱ bi̱ nikháñun (1 Rey. 17:17-24; 2 Rey. 4:17-20, 32-35). Ikha jngó, tikhun xa̱bu̱ bi̱ naʼniún nandii, nuraximíjna̱ á mu rí mbiʼi xúgi̱ Dios ma̱ngaa majmuu tsiakii ndrígóo mu maʼni thanún.

3-5. a) Ndiéjunʼ gándoo maʼni Jeobá ga̱jma̱a̱ Jesús rá. b) Ndiéjunʼ graxe̱ rí guriʼña̱a̱lu rá.

 ³ Jeobá ma̱ndoo majmuu tsiakii ndrígóo mu maʼni rí tikhun xa̱bu̱ maʼniún nandii. Mbá xkri̱da, ikhaa niʼni magiʼdoo mbá nandii rey bi̱ nixtáa náa Egipto ga̱jma̱a̱ ndxájuu Moisés (Gén. 12:17; Núm. 12:9, 10; 2 Sam. 24:15). Ga̱jma̱a̱ índo̱ israelitas túnimbu̱ún kuyáá, Dios nixnún gamiéjunʼ ga̱jma̱a̱ nandii (Deut. 28:58-61). Mú ma̱ngaa Jeobá ma̱ndoo majmuu tsiakii ndrígóo mu mañewu̱u̱n xa̱bi̱i̱ ga̱jma̱a̱ maʼni rí xáguaʼdáá nandii (Éx. 23:25; Deut. 7:15). Nguáná asndu niʼni thanún tikhun. Mbá xkri̱da, niʼni thanuu Job índo̱ niʼniuu nandii rí asndu itháan makhañúu (Job 2:7; 3:11-13; 42:10, 16).

⁴ Xó má Jeobá, Jesús ma̱ndoo maʼni thanún xa̱bu̱. Índo̱ nixtáa náa tsu̱du̱u̱ Ku̱ba̱ʼ, niʼni thanún xa̱bu̱ bi̱ niguáʼdáá lepra, bi̱ najnga̱a̱ edxu̱ún, bi̱ tsiyexi, bi̱ niʼni xinʼ ga̱jma̱a̱ i̱ʼwáʼ nandii dí guáʼdáá xa̱bu̱ (atraxuu Mateo 4:23, 24; Juan 9:1-7). Milagros rí niʼni Jesús naʼni mundxaʼwáá edxu̱lúʼ xúgíʼ rí gáʼni ikhaa náa Ku̱ba̱ʼ mitsaan. Índo̱ gakuwáanʼ ikhí, nimbáa xáʼthi: “Nandoo káñúʼ” (Is. 33:24).

⁵ Á mu naʼniulú wéñuʼ nandii, lá ma̱ndoo muguaʼthi̱i̱n rí Jeobá ga̱jma̱a̱ Jesús majmúún tsiakii ndrígu̱ún mu muni thanulú rí mbiʼi xúgi̱ ráʼ. Ndiéjunʼ gíʼmaa mbuʼyáá á mu muraʼwíí mbá thana rá.

6. Ndiéjunʼ eʼthí náa Biblia ga̱jma̱a̱ numuu milagros rí nini timbíi̱n cristianos rá.

⁶ Jeobá nixnúún xi̱ʼ kaʼwu ndrígóo timbíi̱n cristianos ga̱jma̱a̱ tikhun nindoo nini milagros (Hech. 3:2-7; 9:36-42). Mbá xkri̱da, tikhun nini thanún bi̱ niʼniún nandii ga̱jma̱a̱ iʼwíínʼ nithi imbo̱o̱ ajngáa dí raʼkháa ajngún (1 Cor. 12:4-11). Mú náa Biblia niʼthí rí milagro rúʼko̱ ní xákujmaa, ga̱jma̱a̱ xúʼko̱ má nimbánuu (1 Cor. 13:8). Ikha jngó, rí mbiʼi xúgi̱ tseguaʼthi̱i̱n rí Dios maʼni mbá milagro mu maʼni thanulú o bi̱ kuʼñúún.

7. Xú káʼnii exnúlú tsiakii Salmo 41:3 rá.

⁷ Mú á mu naʼniulú wéñuʼ nandii, Jeobá maxnúlú tsiakii ga̱jma̱a̱ mambáyulúʼ. Rúʼko̱ niʼni gajmíi̱n xa̱bi̱i̱ nákha wajyúúʼ. Rey David niʼnirámáʼ: “Gagi xtáa xa̱bu̱ bi̱ naʼniu rí májánʼ xa̱bu̱ gínáa; mbiʼi rí gáʼkha̱nú gamiéjunʼ Jeobá gáʼnikríyaʼ. Jeobá gañewu̱u̱n ga̱jma̱a̱ maʼni rí maxtáa má xúʼko̱” (Sal. 41:1, 2). Lá nindoo gáʼthi David rí á mu mbiʼi rúʼko̱ mbáa xa̱bu̱ nambáyúu mbáa xa̱bu̱ gínáa, xa̱bu̱ xakháñu nimbá miʼtsú ráʼ. Na̱nguá. Rí phú nindoo gáʼthi rí á mu xa̱bu̱ buʼko̱ naʼniuu nandii, Dios gámbáyúu ga̱jma̱a̱ mañewu̱u̱n (Sal. 41:3). Naxnúlú tsiakii índo̱ nduʼyáá rí Jeobá ndaʼyoo rí xtáa ragíʼnulú ga̱jma̱a̱ tsegumuu kaʼyulúʼ. Ikhaa naxnúlú tsiakii ga̱jma̱a̱ mbá ku̱ma̱ májánʼ mu muraʼníí mbá nandii. Ga̱jma̱a̱ ma̱ngaa rí xuyulúʼ naʼni̱i̱ ikháá índo̱ naʼniulú tikhuu nandii.

8. Xó má eʼthí náa Salmo 41:4, ndiéjunʼ niʼthúu̱n David Jeobá índo̱ niʼniuu wéñuʼ nandii rá.

⁸ Náa Salmo 41 naʼthí ga̱jma̱a̱ numuu rey David índo̱ niʼniuu wéñuʼ nandii. Nakujmaa rí nixmiéjunʼ wéñuʼ numuu rí a̱ʼdióo Absalón nindoo maríya kaʼyúʼ ñajunʼ. Mú David niʼniuu wéñuʼ nandii rí táʼngo̱o̱ gáʼni nditháan mu marikhoo. Ikhaa ndiʼyoo rí xkujndu rí gíʼdoo náa goʼwóo ni̱ʼkha̱ numuu rí ikhaa nikudaminaʼ aʼkhá ga̱jma̱a̱ Bat-seba (2 Sam. 12:7-14). Ndiéjunʼ niʼni xá. Niʼthúu̱n Jeobá: “Agáwiinʼ a̱jkia̱nʼ xta̱yo̱ʼ. Atanithanuʼ, numuu rí nikuʼdáminaʼ aʼkhá náa ikháánʼ” (Sal. 41:4). David ndiʼyoo má rí Jeobá niʼni mba̱a̱ a̱jkiu̱u̱n kaʼyoo ga̱jma̱a̱ nindo̱ʼo̱o̱ mambáyúu índo̱ ikhaa niʼniuu nandii. Mú, lá nigi̱ʼthu̱u̱n rí Jeobá maʼni mbá milagro ga̱jma̱a̱ maʼni thanuu xáʼ.

9. a) Xú káʼnii Jeobá nimbáyúu Ezequías rá. b) Xú káʼnii nigi̱ʼthu̱u̱n David rí Jeobá mambáyúu rá.

⁹ Nákha wajyúúʼ, Jeobá nijmuu tsiakii  ndrígóo mu maʼni thanún tikhun xa̱bu̱. Mbá xkri̱da, índo̱ rey Ezequías itháan makhañúu, Jeobá niʼni rí maguma thanáá ga̱jma̱a̱ maxtáa xóó mbá gu̱wa̱ʼ nitsu tsiguʼ (2 Rey. 20:1-6). Lá ma̱ngaa David nigi̱ʼthu̱u̱n rí Jeobá maʼni mbá milagro ga̱jma̱a̱ numuu xáʼ. Na̱nguá. Ikhaa nigi̱ʼthu̱u̱n rí Dios mambáyúu xó má mbáa xa̱bu̱ bi̱ májánʼ a̱jkiu̱u̱n gámbáyúu “xa̱bu̱ gínáa”. David nimbáxu̱u̱ májánʼ ga̱jma̱a̱ Jeobá, ikha jngó nindoo nindo̱ʼo̱o̱ rí maxnúu tsiakii ga̱jma̱a̱ mañewu̱u̱n índo̱ niʼniuu nandii. Ma̱ngaa nindo̱ʼo̱o̱ rí mambáyúu mu maʼni̱i̱. Mangáanʼ ma̱ndoo munda̱ʼa̱ ikháá má rí ninda̱ʼa̱ David (Sal. 103:3).

10. Ndiéjunʼ ejmañulú ga̱jma̱a̱ numuu rí nigíʼnuu Trófimo ga̱jma̱a̱ Epafrodito rá.

¹⁰ Apóstol Pablo ga̱jma̱a̱ eʼwíínʼ cristianos niguáʼdáá tsiakii mu muni thanún bi̱ niʼniún nandii (atraxnuu Hechos 14:8-10). Mbá xkri̱da, Pablo mbá miʼtsú niʼni thanuu mbáa xa̱bu̱ bi̱ niʼniuu mijkha ga̱jma̱a̱ mbá nandii mbiiʼ wéñuʼ. Hechos 28:8 naʼthí rí niʼtájkháan ga̱jma̱a̱ “nixkramaʼ [ma̱ngaa] neʼnemanda”. Mú Pablo na̱nguá niʼni thanún xúgínʼ xa̱bu̱ bi̱ ikhaa nininuʼ. Mbá xkri̱da, ikhaa nimbáxu̱u̱ májánʼ ga̱jma̱a̱ Trófimo, bi̱ ni̱jkha̱ ga̱jma̱a̱ náa niʼtáraʼa (Hech. 20:3-5, 22; 21:29). Índo̱ kuwa ragún kamba̱a̱, Trófimo niʼniuu nandii. Mú Pablo táʼni thanuu, ikha jngó Trófimo nánguá niʼngo̱o̱ gáʼga ga̱jma̱a̱ (2 Tim. 4:20). Pablo nimbáxu̱u̱ májánʼ ga̱jma̱a̱ imba̱a̱ bi̱ nigumbiʼyuu Epafrodito. Náa Biblia naʼthí rí niʼniuu nandii ga̱jma̱a̱ itháan makhañúu, mu tséʼthi á mu apóstol niʼni thanuu (Filip. 2:25-27, 30). Xó má eʼyáá rí Pablo gajmíi̱n cristianos túni thanún xúgínʼ cristianos bi̱ nikuwa nákha ikhú.

11, 12. a) Xú káʼnii Lucas nimbáyúu Pablo rá. b) Ndiéjunʼ eʼyáá ga̱jma̱a̱ numuu Lucas rá.

¹¹ Lucas ninindxu̱u̱ mbáa xa̱bu̱ bi̱ naʼni thana ma̱ngaa ni̱jkha̱ gáʼtaraʼa ga̱jma̱a̱ Pablo (Hech. 16:10-12; 20:5, 6; Col. 4:14). Mbáa nimbáyúu Pablo gajmíi̱n eʼwíínʼ cristianos índo̱ niʼniún nandii náa nigún gutaraʼa (Gál. 4:13). Xóo niʼthí Jesús, bi̱ naʼniún nandii ndayóoʼ mambáñun mbáa xa̱bu̱ thana (Luc. 5:31).

¹² Lucas tanindxu̱u̱ mbáa xa̱bu̱ bi̱ i̱ndó niniguʼ maʼthúún eʼwíínʼ káʼnii thana guwa̱a̱n mu makuwa májánʼ. Ikhaa gajkhun ninindxu̱u̱ mbáa xa̱bu̱ bi̱ naʼni thana. Ikha jngó índo̱ niʼnirámáʼ libro ndrígóo Lucas ga̱jma̱a̱ Hechos, nijmuu tikhuu ajngáa rí najmún xa̱bu̱ thana ga̱jma̱a̱ niʼnirámáʼ rí xú káʼnii Jesús niʼni thanún tikhun xa̱bu̱. Náa o nguáná nijmañuu maʼni thana xá. Náa Biblia tséʼthi. Mú, mbáa ikhaa ni̱jkha̱ náa Laodicea náa nijuiʼsngáá maʼni thana, mijngii náa xuajen Colosas. Mbáa ikha jngó Pablo niʼthí ga̱jma̱a̱ numuu Lucas náa carta rí nikuʼma náa Colosas ga̱jma̱a̱ niʼthún rí naraxiín.

13. Káʼnii gíʼmaa marmáʼáan a̱jkiu̱lú índo̱ guthulu dí gíʼmaa muʼnilú mu xáʼniulu nandii rá.

¹³ Rí mbiʼi xúgi̱ nimbáa ndxájulú xándoo maʼni milagros mu maʼni thanulú. Mú mbáa tikhun maʼndún mumbayulu mu xáʼniulu nandii, mbáa asndu muthulú káʼnii gíʼmaa muʼwanlu, maski ajndu ikháanʼ tsiraxu̱u̱n. Gajkhun má rí marigá rí mambáyulúʼ. Mbá xkri̱da, Pablo ndiʼyoo rí Timoteo na̱ʼkhu̱ awúu̱n. Ikha jngó niʼthúu̱n rí maga̱a̱n mbá chíʼgíʼ vino * (atraxnuu 1 Timoteo 5:23). * Mú gíʼmaa muñewumíjna̱ ga̱jma̱a̱ rí gúthulú muʼwa̱a̱n. Mbáa maxtáa mbáa ndxájulú bi̱ maʼthúlú rí guʼwa̱a̱n mbá thana kiʼtsi o thana xáná. O mbáa maʼthúlú rí gíʼmáanʼ o ragíʼmáanʼ mu̱ʼphu̱ tikhuu ganitsu. Mbáa maʼthúlú rí ikhaa nimbáyúu mbáa bi̱ kaʼyoo bi̱ nigiʼdoo ikháá má nandii. Mú rúʼko̱ tsíyoo gáʼthi rí mambáyulúʼ mangáanʼ. Mbá thana ma̱ndoo  mambáñun mbaʼin xa̱bu̱, mu tikhun maʼni gachíin (atraxnuu Proverbios 27:12). *

14, 15. a) Náa numuu rí gíʼmaa mundxaʼwamíjna̱ májánʼ rí muʼni rá. b) Ndiéjunʼ eʼsngúlúʼ Proverbios 14:15 rá.

¹⁴ Xúgiáanʼ tsíyulú maʼniulú nandii mu xúʼko̱ ma̱ndoo muʼni ñajunʼ Jeobá. Mú numuu rí ni̱ndxu̱lú xa̱bu̱ aʼkhá naʼniulú nandii. Mbáa mbaʼyóoʼ muraʼwíí náa mbaʼa thana, ga̱jma̱a̱ ikháanʼ má kaʼyulúʼ mbuʼyáá káʼnii thana rí guʼwa̱a̱nlú. Mú gíʼmaa mundxaʼwáá edxu̱lúʼ. Mbáa tikhun xa̱bu̱ o compañías mutulú dí rígá mbá thana rí ma̱ndoo mambáyulúʼ. Mú mbáa i̱ndó nuni numuu rí nandún mudaʼ mbújkha̱a̱. Mbáa muthulú rí mbaʼin xa̱bu̱ najmún ga̱jma̱a̱ nambáñun. Mú ragíʼmaa muʼwan asndu káʼnii mu makuwáanʼ májánʼ ga̱jma̱a̱ makuwáanʼ itháan mbiʼi. Proverbios 14:15 naʼthí rí xa̱bu̱ bi̱ nandxa̱ʼwáminaʼ májánʼ tséʼnimbo̱o̱ xúgíʼ rí nutháán, ikhaa nandxa̱ʼwáminaʼ ginii rí maʼni.

¹⁵ Á mu nundxaʼwamíjná májánʼ rí muʼni, muñeumíjna̱ rí guthulú, itháan ga̱jma̱a̱ numuu bi̱ na̱nguá ejmañún numuu thana. Gíʼmaa muraximíjna̱: Lá nda̱yo̱o̱ gajkhun rí vitamina rúʼko̱, dieta o mbá thana xáná nimbáñun eʼwíínʼ xa̱bu̱ ráʼ. Maski ajndu tikhun nimbáñun, xú káʼnii e̱yo̱o̱ rí mambáyuʼ ikhúúnʼ rá. Lá mbaʼyóoʼ maraxu̱u̱ mbáa bi̱ najmañuu ga̱jma̱a̱ numuu thana ráʼ.” (Deut. 17:6.)

16. Índo̱ guraʼwíí rí muʼni ga̱jma̱a̱ numuu mbá nandii, ndiéjunʼ rí gáʼyóoʼ muʼni rá.

 ¹⁶ Ma̱ngaa gíʼmaa mundxaʼwáá májánʼ edxu̱lúʼ índo̱ gúraʼwíí káʼnii estudio gagumáanʼ o káʼnii thana guʼwa̱a̱n (Tito 2:12). Gíʼdoo wéñuʼ numuu muñeumíjna̱ itháan índo̱ estudio o thana rí naxnáruʼulú mbáa na̱nguá kru̱ʼu̱lú májánʼ xú phú nindxu̱u̱. Lá naʼthúlú kaʼwu xú káʼnii ejmaa ráʼ. Lá tseʼthúlú mbájmbu índo̱ naʼthí xú káʼnii majmulúʼ ráʼ. Lá ikháá má ethi mbaʼin médicos ráʼ. (Prov. 22:29.) Mbáa maxtáa mbáa bi̱ gaʼtháanʼ dí rígá mbá thana náa mbá xuajin mitsínguánʼ ga̱jma̱a̱ rí mbaʼin médicos xóó tsiniʼnuʼ. Mú lá mbaʼin nduyáá dí rígá má thana rúʼko̱ ráʼ. O mbáa asndu maxnáruʼulú mbá thana rí gíʼdoo mbá rí ikháánʼ “na̱nguá xóo ma̱ta̱ya̱a̱” o magia. Rígi̱ migamíi wéñuʼ. Jeobá tsíyoo rí majmulúʼ magia ní má iʼwáʼ rí kagujtuminaʼ ga̱jma̱a̱ xawan (Deut. 18:10-12; Is. 1:13).

17. Ndiéjunʼ rí tsíyulú xúgiáanʼ rá.

¹⁷ Nákha timbíi̱n cristianos, a̱ngiu̱lú bi̱ nixna ikha náa nijuiʼtáraʼa nixuʼma mbá carta mu mutún cristianos dí rígá tikhuu rí ndayóoʼ muni gaʼduunʼ. Carta niguámbóo ga̱jma̱a̱ ajngáa rígi̱: “¡Xáʼniala nandii!” (Hech. 15:29). Maski ajndu ajngáa rígi̱ nijmaa mu mutangaumijna̱. Mú naʼni marmáʼáan a̱jkiu̱lú rí xúgiáanʼ tsíyulú maʼniulú nandii.

18, 19. Ndiéjunʼ gáxnulú Jeobá náa Ku̱ba̱ʼ mitsaan rá.

¹⁸ Numuu rí xúgiáanʼ ni̱ndxu̱lú xa̱bu̱ aʼkhá, xándoo muʼni rí xáʼniulu nandii. Ga̱jma̱a̱ ndiʼyáá rí xándoo muguaʼthi̱i̱n rí mbiʼi xúgi̱ rí Jeobá maʼni mbá milagro mu maʼni thanulú. Mú nduʼyáá rí nda̱wa̱á Dios maʼni rí xáʼniulu nandii. Ápóstol Juan niʼthí ga̱jma̱a̱ numuu mbá “iyaʼ rí ndaʼya” ga̱jma̱a̱ “ixi̱ rí naxná vida” rí maʼni thanún xúgínʼ xa̱bu̱ (Rev. 22:1, 2). Lá niʼthí ga̱jma̱a̱ numuu mbá thana xáná rí ma̱ndoo muʼwa̱a̱n xúgi̱ o náa Ku̱ba̱ʼ mitsaan ráʼ. Na̱nguá. Nindoo gáʼthúu̱n xúgíʼ rí Jeobá ga̱jma̱a̱ Jesús guni mu ma̱ndoo makuwáanʼ kámuu mbiʼi (Is. 35:5, 6).

¹⁹ Nuguaʼthi̱i̱n ga̱jma̱a̱ xúgíʼ a̱jkiu̱lú rí makuwáanʼ náa Ku̱ba̱ʼ mitsaan. Mú rí xúgi̱ naʼni̱i̱ a̱jkiu̱lú índo̱ nduʼyáá rí Jeobá nandoo kaʼyulú ga̱jma̱a̱ ndaʼyoo rí numíniʼ índo̱ naʼniulú mbá nandii. Xóo David, nduʼyáá rí Jeobá xaniñulú. Á mu nuʼni rí jmbu, mañewu̱nlú má xúʼko̱ (Sal. 41:12).