1-3. a) Xú káʼnii eʼyáá rí xóo eʼtamíjná Jeobá nindxu̱u̱ itháan mitsidanʼ ki xóo rí ikháanʼlu rá. b) Ndiéjunʼ gúʼyáá náa artículo rígi̱ rá.

NÁA numuu rí Jeobá niʼnii ángeles ga̱jma̱a̱ xa̱bu̱ rá. Numuu rí nindoo dí eʼwíínʼ mangiin makuwá gagi (Sal. 36:9; 1 Tim. 1:11). Timbáa bi̱ niʼnii nindxu̱u̱ Jesús, bi̱ Juan naxná mbiʼyuu “Ajnga” (Juan 1:1; Rev. 3:14). Jeobá niʼtámijna ga̱jma̱a̱ Jesús ma̱ngaa niʼthúu̱n rí endxa̱ʼóo edxu̱u̱ ga̱jma̱a̱ rí nikumu̱u̱ (Juan 1:14, 17; Col. 1:15). Pablo naʼthí rí ángeles ma̱ngaa nutamijná ga̱jma̱a̱ nuthi mbá ajngáa. Mú mixtiʼkhu wéñuʼ xóo rí nuthi xa̱bu̱ numbaaʼ (1 Cor. 13:1).

² Jeobá naninúnʼ májánʼ wéñuʼ xúgínʼ ángeles ga̱jma̱a̱ xa̱bu̱ numbaaʼ bi̱ niʼnii. Ikhaa naʼdxaun xúgíʼ rí nutajkháan xa̱bu̱. Ma̱ngaa nakro̱ʼo̱o̱ rí nuʼtájkáan asndu xú káʼnii má ajngáa rí gúʼtháán. Índo̱ ikhaa xtáa raʼdxaun rí nuʼtháán, ikhú má ma̱ngaa xtáa raxnún ikha ga̱jma̱a̱ naʼtámijna gajmíi̱n ángeles. Dios nandoo naʼni xúgíʼ rígi̱ numuu rí xóo endxa̱ʼwáminaʼ ga̱jma̱a̱ rí xóo naʼthí ikhaa nindxu̱u̱ itháan mitsidanʼ ki xóo rí ikháanʼ (atraxnuu Isaías 55:8, 9). * Mu ma̱ndoo makru̱ʼu̱lú, ikhaa naʼthúlúʼ ga̱jma̱a̱ ajngáa dí ra̱mingíjyúuʼ.

 ³ Náa artículo rígi̱ gúʼyáá rí Jeobá naʼthúlúʼ má xúʼko̱ rí xóo ikháanʼ ma̱ndoo makru̱ʼu̱lú kaʼwu. Ma̱ngaa mbuʼyáá rí ikhaa nariʼkhu̱u̱ xóo eʼthúlúʼ índo̱ ndayóoʼ.

4. a) Náa ajngáa niʼtámijna Jeobá ga̱jma̱a̱ Moisés, Samuel ma̱ngaa David rá. b) Ndiéjunʼ eʼthí náa Biblia rá.

⁴ Mbáa Jeobá niʼtámijna ga̱jma̱a̱ Adán náa ajngáa hebreo rí nijuiʼthá nákha ginii. Nda̱wa̱á ma̱ngaa niʼtámijna gajmíi̱n eʼwíínʼ xa̱bekha, xóo Moisés, Samuel ga̱jma̱a̱ David náa ajngáa má rúʼko̱. Ikhaa niʼthún rí endxa̱ʼóo edxu̱u̱ ga̱jma̱a̱ ikhiin niniraʼmáʼ xó má nikru̱ʼu̱u̱n ga̱jma̱a̱ xó má eguʼwún muthi ikhiin. Ma̱ngaa niniraʼmáʼ ajngáa rí Jeobá niʼthún ga̱jma̱a̱ niniraʼmáʼ historia ndrígóo xuajñu Dios. Mbá xkri̱da, náa Biblia naʼthí ga̱jma̱a̱ numuu fe rí niguáʼdáá xa̱bi̱i̱, rí nindúún kuyáá Dios, dí raʼkhí rí nini ga̱jma̱a̱ aʼkhá rí nixudami̱jná. Xúgíʼ rígi̱ nigumaraʼmáʼ mu mambáyulúʼ (Rom. 15:4).

5. Náa numuu rí Jeobá táʼtamijna má xúʼko̱ gajmíi̱n xa̱bu̱ náa ajngáa hebreo rá.

⁵ Jeobá taʼtamijna gajmíi̱n má xúʼko̱ xa̱bu̱ náa ajngáa hebreo. Náa numuu rá. Numuu rí mbiʼi naxtiʼkhuu. Mbá xkri̱da, índo̱ rí israelitas bi̱ nikuwa náa Babilonia nikáwíin, mbaʼin nithi ajngáa arameo. Mbáa, ikha jngó Daniel, Jeremías ga̱jma̱a̱ Esdras nuniraʼmáʼ tikhu i̱yi̱i̱ʼ ndrígóo Biblia náa ajngáa rúʼko̱ (atayáá nota ndrígóo Esdras 4:8 ga̱jma̱a̱ 7:12, Jeremías 10:11 ma̱ngaa Daniel 2:4).

6. Náa numuu rí nitajuíi Escrituras Hebreas náa ajngáa griego xá.

⁶ Tsiguʼ nda̱wa̱á, mbáa rey griego bi̱ nigumbiʼyuu Alejandro Magno niʼtáñajunʼ náa mbaʼa xuajen. Rí nirígá, xa̱bu̱ náa xuajen rúʼko̱ nigi̱ʼdi̱i̱ nithi ajngáa griego rí nakru̱ʼu̱u̱n xúgínʼ xa̱bu̱ náa xúgíʼ numbaaʼ. Mbaʼin judíos mangiin nigi̱ʼdi̱i̱ nijmún ajngáa griego rígi̱ dí ra̱mingíjyúuʼ makruaʼaʼ. Ikha jngó, rí Escrituras Hebreas nijuiʼtajuíi náa ajngáa griego. Ikhaa dí nijuiʼtájuíi rígi̱ nagumbiʼyuu xóo Septuaginta. Ninindxu̱u̱ timbá Biblia rí nijuiʼtájuíi, ga̱jma̱a̱ ikhaa nindxu̱u̱ rí itháan gíʼdoo numuu. Nuthi xa̱bu̱ bi̱ nduyáá dí libro rígi̱ nitajuíi mbá 72 xa̱bu̱. * Tikhun bi̱ nini nitajuíi mámbá ajngáa xó má kama, mú iʼwíínʼ na̱nguá. Maski ajndu xúʼko̱, judíos bi̱ nuthi griego ga̱jma̱a̱ cristianos ndiyáá rí Septuaginta nindxu̱u̱ ajngáa rawunʼ Dios.

7. Náa ajngáa nijmuu Jesús mu maʼtamijna gajmíi̱n xa̱bi̱i̱ rá.

⁷ Índo̱ Jesús nixtáa náa tsu̱du̱u̱ Ku̱ba̱ʼ, mbáa ikhaa niʼthí ajngáa hebreo (Juan 19:20; 20:16; Hech. 26:14). Mbáa ma̱ngaa nijmuu ajngáa arameo rí najmaʼnuʼ. Ga̱jma̱a̱, naninuʼ ajngáa hebreo rí niʼthí Moisés gajmíi̱n gaʼyee, numuu rí bi̱ judíos niraxnuu Ajngá rawunʼ Dios mámbá xmáná náa nagímbíin (Luc. 4:17-19; 24:44, 45; Hech. 15:21). Nákha mbiʼi rúʼko̱ ma̱ngaa nuthi ajngáa griego ga̱jma̱a̱ latín, mú náa Biblia tséʼthi á mu Jesús niʼthí ajngáa rúʼko̱.

8, 9. a) Náa numuu rí tikhu i̱yi̱i̱ʼ ndrígóo Biblia nigumaraʼmáʼ náa ajngáa griego rá. b) Ndiéjunʼ eʼsngúlúʼ xúgíʼ rígi̱ ga̱jma̱a̱ numuu Jeobá rá.

⁸ Timbíi̱n xa̱bi̱i̱ Jesús nithi ajngáa hebreo. Mú nda̱wa̱á rí ikhaa nikháñu, mbaʼin bi̱ nuthi i̱ʼwáʼ ajngáa nigi̱ʼdi̱i̱ ninindxu̱ún xa̱bi̱i̱ (atraxnuu Hechos 6:1). Nda̱wa̱á mbaʼin cristianos nuthi ajngáa griego raʼkháa hebreo. Numuu rí ajngáa griego itháan najmaʼnuʼ, libros ndrígóo Mateo, Marcos, Lucas ga̱jma̱a̱ Juan nigumaraʼmáʼ náa ajngáa rúʼko̱. * Cartas ndrígóo Pablo ga̱jma̱a̱ i̱ʼwáʼ libros ndrígóo Biblia nigumaraʼmáʼ náa ajngáa griego.

⁹ Índo̱ bi̱ niniraʼmáʼ Escrituras Griegas nindúún majmúún ajngáa rí naʼthí náa  Escrituras Hebreas, ikhiin niriyaʼ má xúʼko̱ rí naʼthí náa Septuaginta, numuu rí ikhí najuiʼtájuíi má náa ajngáa griego. Nguáná xóó kiʼniraʼmáʼ náa Septuaginta nindxu̱u̱ wáa kayuʼ mixtiʼkhu rí xóo kiʼniraʼmáʼ náa Escrituras Hebreas rí phú nigumaraʼmáʼ ginii. Maski ajndu xúʼko̱, i̱yi̱i̱ʼ rí nitajuíi xa̱bu̱ aʼkhá nindxu̱u̱ Biblia rí kuaʼdáá asndu xúgi̱. Ndiéjunʼ eʼsngúlúʼ xúgíʼ rígi̱ rá. Rí Jeobá tsendxa̱ʼwáminaʼ rí mbá ajngáa gíʼdoo itháan numuu ki xóo i̱ʼwáʼ (atraxnuu Hechos 10:34).

10. Ndiéjunʼ ejmañulú rí xóo eʼni Jeobá mu maʼtamijna ga̱jma̱a̱ ni̱ndxu̱lú rá.

¹⁰ Asndu xúgi̱ ndiʼyáá xú káʼnii Jeobá nariʼkhuu xóo eʼtámíjná ga̱jma̱á ni̱ndxu̱lú. Tséʼtulu dí gíʼmaa majmañulúʼ mbá ajngáa mú ma̱ndoo muniʼnííʼ o mu majmañulúʼ rí maʼni nda̱wa̱á (atraxnuu Zacarías 8:23 * ga̱jma̱a̱ Revelación 7:9, 10). * Ma̱ngaa ndiʼyáá rí Jeobá niʼni rí tikhun xa̱bu̱ numbaaʼ muniraʼmáʼ xóo endxa̱ʼóo edxu̱u̱, mú niniñúúnʼ muni xó má ajngún ikhiin.

11. Maski ajndu bi̱ ni̱ndxu̱lú xa̱bu̱ numbaaʼ nuʼthá mbaʼa ajngáa, náa numuu dí rúʼko̱ tsírikhoo Jeobá mu maʼtamijna ga̱jma̱á ni̱ndxu̱lú rá.

¹¹ Bi̱ ni̱ndxu̱lú xa̱bu̱ numbaaʼ nuʼthá mbaʼa wéñuʼ ajngáa. Mú raʼkháa rúʼko̱ erikhoo Jeobá mu maʼtamijna ga̱jma̱á ni̱ndxu̱lú. Náa numuu rá. Numuu rí ikhaa má eʼni dí miʼtájuíi ajngá rawunʼ náa mbaʼa wéñuʼ ajngáa. Mbá xkri̱da, náa Biblia kiʼniraʼmáʼ nguéjma̱ ajngáa ndrígóo Jesús náa ajngáa rí phú niʼthí ikhaa (Mat. 27:46; Mar. 5:41; 7:34; 14:36). Mú Jeobá niʼni dí ajngóo Jesús magumaraʼmáʼ ma̱ngaa rí nda̱wa̱á miʼtájuíi náa ajngáa griego ga̱jma̱a̱ náa i̱ʼwáʼ ajngáa. Ma̱ngaa, Ajngá rawunʼ Dios ndijyúuʼ mba̱yu̱ʼ numuu dí ikhaa niʼni rí bi̱ judíos ga̱jma̱a̱ cristianos muniriyaaʼ mbaʼa Biblia. Ga̱jma̱a̱ i̱yi̱i̱ʼ rúʼko̱ nitajuíi náa mbaʼa wéñuʼ ajngáa. Mbáa naʼni 400 tsiguʼ nda̱wa̱á rí ni̱ʼkha̱ Cristo, mbáa bi̱ naʼnirámáʼ ga̱jma̱a̱ numuu religión niʼthí rí kiʼsngáa ndrígóo Jesús nijuiʼtájuíi má náa mbaʼa ajngáa náa mixtiʼkhu xuajen, xóo Siria, Egipto, India, Persia ga̱jma̱a̱ Etiopía.

12. Xú káʼnii nigíʼ muni gámbáa Biblia xá.

¹² Xó má ejkha̱ ranújngoo tsiguʼ mbaʼa nuthu nigíiʼ muni gámbáa Biblia ga̱jma̱a̱ muni gámbíin xa̱bu̱ bi̱ nitajuíi o bi̱ nixnaraʼa. Mbá xkri̱da, mbáa naʼni 300 tsiguʼ nda̱wa̱á rí ni̱ʼkha̱ Cristo, mbáa Xa̱bu̱ Ñajunʼ romano nikuʼma maguma gámbáa xúgíʼ Biblia. Mbá 1,200 tsiguʼ nda̱wa̱á, mbáa xa̱bu̱ bi̱ nigumbiʼyuu William Tyndale nigíʼdu̱u̱ niʼtájuíi Biblia náa ajngáa inglés. Ikhaa niʼthí rí á mu Dios naniñuʼ  maxtáa mba̱yu̱ʼ, maʼni rí asndu dxámá bi̱ naʼdu makro̱ʼo̱o̱ itháan májánʼ Biblia ki xó mbáa ndxajkun. Índo̱ xa̱bu̱ ede̱ nigi̱ʼdi̱i̱ nixkháá, Tyndale ndiyóoʼ magajnúu náa Inglaterra mú ma̱ndoo maʼtájuíi ga̱jma̱a̱ mu maʼni imprimir. Maski ajndu xa̱bu̱ ede̱ nigíiʼ mutsikha xúgíʼ i̱yi̱i̱ʼ rí nixkamaa, mu Biblia rí niʼtájuíi ni̱jkha̱nú inún mbaʼin xa̱bu̱. Nda̱wa̱á, Tyndale nixiyáa ga̱jma̱a̱ nitsikha̱a̱. Mú ñajunʼ ndrígóo táguma gámbáa ga̱jma̱a̱ nijmún mu mutajuíi náa ajngáa inglés rí nagumbiʼyuu King James Version (Versión del Rey Jacobo) (atraxnuu 2 Timoteo 2:9). *

13. Ndiéjunʼ nixkamaa xa̱bu̱ bi̱ nduyáá índo̱ ninigajmaa májánʼ wéñuʼ manuscritos wayuu ndrígóo Biblia rá.

¹³ Gajkhun má rí tikhuu Biblia rí itháan wayuu rígá náa mixtiʼkhu ga̱jma̱a̱ náa nijngawi̱i̱n. Mú mbaʼin xa̱bu̱ bi̱ nduyáá ninigajmaa májánʼ wéñuʼ mbaʼa manuscritos ga̱jma̱a̱ rí nitajuíi nákha wajyúúʼ. Mú, ndiéjunʼ nixkamaa xá. Rí i̱ndó nguéjma̱ versículos rí naxtiʼkhuu ga̱jma̱a̱ rí tsériʼkhuu ajngáa rí na̱ʼkha̱ raʼthí náa Biblia. Bi̱ ninigajmaa Biblia ndiyáá gajkhun rí guáʼdáá Ajngá rawunʼ Dios (Is. 40:8). *

14. Nguáthá ajngáa gándoo magixnuu Biblia rí mbiʼi xúgi̱ rá.

¹⁴ Maski ajndu nigíʼ muni gámbáa, rí mbiʼi xúgi̱ Biblia ma̱ndoo muraxnuu náa itháan rí mbá 2,800 ajngáa. Nda̱a̱ i̱mba̱ libro rí nijuiʼtájuíi náa mbaʼa wéñuʼ ajngáa. Maski ajndu mbaʼin xa̱bu̱ na̱nguá enimbu̱ún náa Dios, Biblia xóó nindxu̱u̱ mbá libro rí najuixnáraʼa itháan asndu rí mbiʼi xúgi̱. Gajkhun má rí tikhuu rí nijuiʼtájuíi na̱nguá nindxu̱u̱ jmbu o nindxu̱u̱ mingíjyúuʼ wéñuʼ matraxnuu. Mú náa mbaʼa Biblia naʼthí ga̱jma̱a̱ numuu rí marigá nda̱wa̱á ga̱jma̱a̱ rí makuwáanʼ kámuu.

15. a) Ndiéjunʼ rí nixtiʼkhuu nákha tsiguʼ 1919 asndu rí mbiʼi xúgi̱ rá. b) Náa numuu rí nagájnuu ginii náa ajngáa inglés i̱yi̱i̱ʼ ndrígúlú rá.

¹⁵ Nákha tsiguʼ 1919, mbá chímbaʼin xa̱bu̱ bi̱ ninigajmaa Biblia nigumbiʼñún “ñumba tsi jmbi, tsi majanʼ indxaʼhuaminaʼ” (Mat. 24:45). Nákha ikhú, ñumbáá naʼtámijna ga̱jma̱a̱ xuajñu Dios náa ajngáa inglés. Mú rí mbiʼi xúgi̱, i̱yi̱i̱ʼ rí naguwíi ñumbáá rígá náa itháan rí 700 ajngáa. Xó má nirígá ga̱jma̱a̱ ajngáa griego nákha wajyúúʼ, rí mbiʼi xúgi̱ inglés nindxu̱u̱ mbá ajngáa rí itháan najmaa náa najuiʼsngáa ma̱ngaa náa naxtango̱jo̱o̱. Ikha jngó ginii naguma i̱yi̱i̱ʼ ndrígúlú náa ajngáa inglés nda̱wa̱á nuʼtájuíi náa i̱ʼwáʼ ajngáa.

16, 17. a) Ndiéjunʼ ndiñúnʼ xuajñu Dios rá. b) Ndiéjunʼ niguma mu xuajñu Dios magiʼdoo rí ndiyóoʼ rá. c) Ndiéjunʼ rí itháan nindoo ndxájulú Knorr rá.

¹⁶ Xuajñu Dios naʼniwíi i̱yi̱i̱ʼ xó má e̱ʼkha̱ raʼthí náa Biblia. Naʼni itháan rí 60 tsiguʼ, Biblia rí itháan nijmaa náa ajngáa inglés ninindxu̱u̱ King James Version (Versión del Rey Jacobo).  Mú Biblia rígi̱ nijuiʼtájuíi nákha tsiguʼ 1611, ikha jngó najmuu ajngáa wayuu ga̱jma̱a̱ mingíjyúuʼ makruaʼaʼ. Náa manuscritos rí wayuu na̱ʼkha̱ mbiʼyuu Dios mbaʼa wéñuʼ nuthu, mú Biblia rígi̱ na̱ʼkha̱ nguéjma̱. Ma̱ngaa, rígá mbaʼa náa rí nijngawi̱i̱n xóo nitajuíi ga̱jma̱a̱ na̱ʼkha̱ versículo rí tséʼkha̱ náa manuscrito rí wayuu. I̱ʼwáʼ Biblia rí nitajuíi náa ajngáa inglés xúʼko̱ má káʼnii ma̱ngaa.

¹⁷ Nakujmaa kaʼwu dí xuajñu Dios ndiñúnʼ mbá rí kiʼtájuíi mbájmbu ga̱jma̱a̱ dí ra̱mingíjyúuʼ makruaʼaʼ. Ikha jngó nindrigi̱i̱n mbá nguéjmi̱i̱n a̱ngiu̱lú mú mutajuíi Biblia. Grupo rígi̱ nigumbiʼyuu Mbá Nguáthi̱i̱n bi̱ nuyambáá xóo miʼtájuíi Biblia. Ikhiin nirawíi dí nitajuíi náa mbá majun tomos, nákha tsiguʼ 1950 asndu 1960. Timbá tomo nigájnuu náa mbá asamblea nákha raga̱jma̱ ñajunʼ gu̱nʼ agosto tsiguʼ 1950. Mbiʼi rúʼko̱, ndxájulú Knorr niʼthí rí xa̱bi̱i̱ Dios ndayóoʼ maguaʼdáá mbá Biblia rí miʼtájuíi xóo rí nuʼthá xúgi̱, rí naʼthí mbájmbu ga̱jma̱a̱ dí ra̱mingíjyúuʼ. Mú xúʼko̱ xáʼniun ra̱mingíjyúuʼ majmañún dí gajkhun ga̱jma̱a̱ numuu Dios. Biblia rúʼko̱ na̱nguá niʼni mingíjyúuʼ rí matraxnuu ga̱jma̱a̱ dí makruaʼaʼ, xó má ninindxu̱u̱ texto rí phú nini xa̱bi̱i̱ Cristo. Rí itháan nindoo ndxájulú Knorr ninindxu̱u̱ rí Traducción del Nuevo Mundo mambáñún mbaʼin xa̱bu̱ muniʼniiʼ Jeobá.

18. Ndiéjunʼ niyambáá mú miʼtájuíi Biblia náa mbaʼa ajngáa rá.

¹⁸ Rí nindoo ndxájulú Knorr nimbánuu nákha tsiguʼ 1963. Tsiguʼ rúʼko̱, Traducción del Nuevo Mundo de las Escrituras Griegas Cristianas rígá má náa ajngáa alemán, xtílóo, francés, holandés, italiano ga̱jma̱a̱ portugués. Nákha tsiguʼ 1989, Cuerpo Gobernante niʼni rí náa guʼwá dí nuxna ikha xúgíʼ numbaaʼ marigá mbóo departamento mu mambáñun bi̱ nutajuíi Biblia. Ga̱jma̱a̱ nákha tsiguʼ 2005 nithi rí ma̱ndoo mutajuíi Biblia náa xúgíʼ ajngáa bi̱ guáʼdáá má i̱yi̱i̱ʼ Bi̱ Nayejngoo. Ga̱jma̱a̱ numuu rúʼko̱, rí mbiʼi xúgi̱ Traducción del Nuevo Mundo rígá mbá tapha o káxi̱ náa itháan rí 130 ajngáa.

19. a) Ndiéjunʼ nirígá nákha tsiguʼ 2013 rá. b) Ndiéjunʼ gúʼthá náa imbo̱ʼ artículo rá.

¹⁹ Naʼni itháan rí 60 tsiguʼ rí nigájnuu náa ajngáa inglés Traducción del Nuevo Mundo. Asndu nákha ikhú, ajngáa inglés ni̱jkha̱ raxtiʼkhuu. Ikha jngó ndiyóoʼ maxtiʼkhu̱u̱ Biblia rígi̱. Nákha mbiʼi witsu ga̱jma̱a̱ majun ñajunʼ gu̱nʼ octubre tsiguʼ 2013 nirígá reunión dí narígá mámbá tsiguʼ, número 129. Nikuwa 1,413,676 xa̱bu̱ bi̱ kúwi̱i̱n náa mbá 31 xuajen mba̱ʼu̱ nikuwa náa reunión rígi̱ o ndiyáá náa Internet. Ikhí, mbáa bi̱ Cuerpo Gobernante nixnáxi̱ imbo̱ʼ nuxi̱ʼ Traducción del Nuevo Mundo náa ajngáa inglés. Xúgínʼ nidxún wéñuʼ, ga̱jma̱a̱ mbaʼin nimbiyaʼ índo̱ nindrigú. Náa reunión rígi̱ bi̱ nanújngun guxna discurso nuraxnuu versículos ndrígóo Biblia rígi̱, ga̱jma̱a̱ xúgínʼ ndiyáa dí ra̱mingíjyúuʼ makruaʼaʼ. Náa imbo̱ʼ artículo gúʼthá ga̱jma̱a̱ numuu Biblia rí nuxi̱ʼ rígi̱ ga̱jma̱a̱ xú káʼnii etajuíi náa i̱ʼwáʼ ajngáa.