Dios niʼtámíjná gajmíi̱n xa̱bu̱ numbaaʼ ga̱jma̱a̱ xi̱ʼ kaʼwu ndrígóo, nigíwanʼ náa edxu̱ún xa̱bu̱ bi̱ niniraʼmáʼ Biblia rí endxa̱ʼwáminaʼ ikhaa (2 Pedro 1:20, 21). Ikha jngó ma̱ndoo muniʼnííʼ májánʼ Dios índo̱ nuraxnuu Ajngáa rawunʼ. (Atraxnuu Juan 17:17 ga̱jma̱a̱ 2 Timoteo 3:16.)

Náa Biblia, Dios naʼthúlúʼ mbaʼa wéñuʼ xú káʼnii nindxu̱u̱ ikhaa. Naʼthí náa numuu rí niʼnii xa̱bu̱ numbaaʼ, ndiéjunʼ gáʼni ga̱jma̱a̱ numbaaʼ ma̱ngaa xú káʼnii gíʼmaa manindxu̱lúʼ ikháanʼ (Hechos 17:24-27). Jeobá nandoo mbuʼyáá rí gajkhun ga̱jma̱a̱ numuu ikhaa. (Atraxnuu 1 Timoteo 2:3, 4.)

Jeobá nindxu̱u̱ Dios gajkhun ga̱jma̱a̱ nikuʼmaa A̱ʼdióo, Jesucristo, mú maʼsngúlú. Ikha jngó bi̱ nduyáaʼ rí gajkhun nunimbu̱ún rí niʼsngáa Jesús (Juan 18:37). Xa̱bu̱ bugi̱ bi̱ Dios nandoo rí mbuyamajkuíí. (Atraxnuu Juan 4:23, 24.)

Satanás narikhoo rí mbaʼin xa̱bu̱ muniʼniiʼ Dios índo̱ naʼthí rí minduwaʼ ga̱jma̱a̱ numuu ikhaa (2 Corintios 4:3, 4). Bi̱ tsixmiéjunʼ majmañún rí gajkhun nduyáá rí májánʼ makuwá náa kiʼsngáa dí ragájkhun (Romanos 1:25). Rí mbiʼi xúgi̱, mbaʼin wéñuʼ xa̱bu̱ nuxkamaa rí gajkhun ga̱jma̱a̱ numuu Dios índo̱ nunigajmaa Biblia. (Atraxnuu Hechos 17:11.)