1. a) Xú káʼnii ñajunʼ nixnúu Jeobá maʼni Adán rá. b) Bi̱ ni̱ndxu̱lú xa̱bi̱i̱ Dios, xú káʼnii ejmulú rí nandoo nuʼthá rá.

JEOBÁ niʼniáanʼ dí ma̱ndoo muʼtámíjná. Náa ixi̱ ri̱ʼi̱ Edén ikhaa niʼthúu̱n Adán dí maxná mbiʼñún xúgínʼ xujkhúʼ. Ga̱jma̱a̱ Adán nijmuu dí nandoo naʼthí mú maraʼwíí mbiʼñún xujkhúʼ xó má kaʼyoo mámbáa (Gén. 2:19, 20). Asndu má nákha ikhú, xa̱bi̱i̱ Dios najmulú dí nandoo nuʼthá mú muʼni mba̱a̱ Jeobá ma̱ngaa muʼthúún eʼwíínʼ ga̱jma̱a̱ numuu ikhaa. Rí mbiʼi xúgi̱ najmulú mú muʼtájuíi Biblia ga̱jma̱a̱ numbañún xa̱bu̱ muniʼnííʼ Jeobá.

2. a) Ndiéjunʼ nindúún munimbánii a̱ngiu̱lú bi̱ nini Traducción del Nuevo Mundo rá. b) Ndiéjunʼ gúʼyáá náa artículo rígi̱ rá.

² Rígá mbaʼa wéñuʼ Biblia rí nijuiʼtajuíi, tikhuu nitajuíi mbájmbu ki xóo i̱ʼwáʼ. A̱ngiu̱lú bi̱ nini Traducción del Nuevo Mundo nindúún mutajuíi mbájmbu. Ikha jngó ninimbaníí ajtsú numuu. Timbá, mbuyamajkuíí mbiʼyuu Dios ga̱jma̱a̱ rí mudima mbiʼyuu mbaʼa nuthu xó má kiʼniraʼmáʼ ginii kayuʼ (atraxnuu Mateo 6:9). * Raga̱jma̱, á mu nandoo, mutajuíi mámbá ajngáa xó má kama. Á mu xándoo, mutajuíi rí nandoo gáʼthi. Ga̱jma̱a̱ ragajtsú, rí majmúún ajngáa dí xáʼni mingíjyúuʼ  magixnuu ga̱jma̱a̱ makru̱ʼu̱u̱n * (atraxnuu Nehemías 8:8, 12). * Bi̱ nutaráʼaxu numuu Jeobá nunimbániixu ajtsú numuu rígi̱ índo̱ nutájuíixu Biblia náa itháan rí mbá 130 ajngáa. Náa artículo rígi̱ gúʼyáá xú káʼnii ninimbániixu índo̱ niniratááxu Traducción del Nuevo Mundo dí nigájnuu tsiguʼ 2013 náa ajngáa inglés. Ga̱jma̱a̱ mbuʼyáá rí xúʼko̱ má nini iʼwíínʼ bi̱ nutajuíi náa i̱ʼwáʼ ajngáa.

3, 4. a) Náa ekujmaa mbiʼyuu Dios náa ajngáa hebreo rá. b) Ndiéjunʼ nini mbaʼin índo̱ nitajuíi Biblia rá.

³ Bi̱ najmañún nunigajmaa rí kiʼniraʼmáʼ ajngáa hebreo ndrígóo Biblia, xóo I̱yi̱i̱ʼ dí Kambúxi̱ dí nikujma̱a̱ náa mar Muerto, naguanún tsiánguá índo̱ nduyáá rí mbiʼyuu Dios na̱ʼkha̱ mbaʼa nuthu ga̱jma̱a̱ a̱jkhu̱ tsinaʼ (Tetragrámaton). Ma̱ngaa nakujmaa náa tikhuu rí niniriyaʼ náa Septuaginta rí naraʼnuu nini tsiguʼ 200 nákha xóo tséʼkha̱ Cristo ga̱jma̱a̱ tsiguʼ 100 nda̱wa̱á rí ni̱ʼkha̱ Cristo. Mbaʼin xa̱bu̱ naguanún tsiánguá índo̱ nduyáá rí mbiʼyuu Dios na̱ʼkha̱ mbaʼa nuthu náa phú rí nigumaraʼmáʼ nákha ginii.

⁴ Maski ajndu rígá mbaʼa náa nasngájma rí mbiʼyuu Dios gíʼmaa marigá náa Biblia, mbaʼin bi̱ nutajuíi táʼnduun gájmun. Mbá xkri̱da, nákha tsiguʼ 1901 nigájnuu American Standard Version. Versión rígi̱ nigiʼdoo mbiʼyuu Dios. Nákha tsiguʼ 1950 nigájnuu Traducción del Nuevo Mundo de las Escrituras Griegas Cristianas náa ajngáa inglés, ma̱ngaa na̱ʼkha̱ mbiʼyuu Dios. Nákha 1952 nigájnuu imbo̱ʼ rí American Standard Version. Náa Biblia rígi̱ nánguá na̱ʼkha̱ mbiʼyuu Dios. Náa numuu rá. Numuu rí bi̱ nitajuíi nikumu̱u̱n dí ragíʼmaa majmaa. Mbaʼa rí nitajuíi náa ajngáa inglés ga̱jma̱a̱ náa i̱ʼwáʼ ajngáa ma̱ngaa nirigúu mbiʼyuu Dios.

5. Ndíjkha rí gíʼdoo wéñuʼ numuu rí mbiʼyuu Dios maʼga̱ náa Biblia rá.

⁵ Índo̱ mbáa naʼtájuíi mbóo libro, gíʼmaa mbaʼyoo ndiéjunʼ eyoo bi̱ phú niʼni libro rúʼko̱ mu xúʼko̱ mbaʼyoo xóo gaʼtajuíi. Bi̱ Niʼni Biblia nindxu̱u̱ Jeobá. Náa mbaʼa tsinaʼ ma̱jkha̱ʼ nasngájma dí ikhaa ndaʼyoo rí mbiʼyuu gíʼdoo wéñuʼ numuu ga̱jma̱a̱ nandoo rí xa̱bu̱ muniʼniiʼ ga̱jma̱a̱ mbuyamajkuíí mbiʼyuu (Éx. 3:15; Sal. 83:18; 148:13; Is. 42:8; 43:10; Juan 17:6, 26; Hech. 15:14). Ikha jngó gíʼdoo wéñuʼ numuu rí mbiʼyuu Dios maʼga̱ índo̱ nutajuíi Biblia. Jeobá  niʼni rí mbiʼyuu ma̱ʼkha̱ mbaʼa wéñuʼ nuthu náa kiʼniraʼmáʼ wajyúúʼ (atraxnuu Ezequiel 38:23). * Índo̱ mbáa naʼni gaʼduunʼ majmuu, na̱nguá eʼyamajkuu Jeobá.

6. Náa numuu rí mbiʼyuu Dios na̱ʼkha̱ majun nuthu itháan náa Biblia rí nigájnuu tsiguʼ 2013 náa ajngáa inglés rá.

⁶ Rí xúgi̱ kuaʼdáá xóó itháan náa nasngájma dí mbiʼyuu Dios gíʼmaa maʼga̱ náa Biblia. Náa Traducción del Nuevo Mundo dí nigájnuu tsiguʼ 2013 náa ajngáa inglés na̱ʼkha̱ mbá 7,216 nuthu, xóo muʼthá, majun nuthu itháan ki xóo rí nigájnuu ginii. Witsu dí náa majun rígi̱ nigumaraʼmáʼ náa libro ndrígóo 1 Samuel. Náa numuu rá. Numuu rí mbiʼyuu Dios nakujmaa náa tsinaʼ ma̱jkha̱ʼ rúʼko̱ náa I̱yi̱i̱ʼ dí Kambúxi̱ dí nikujma̱a̱ náa mar Muerto rí xíkhoo nini rí mbuyáá xa̱bu̱. * Rí maʼni majun nuthu náa nigumaraʼmáʼ mbiʼyuu Dios nindxu̱u̱ libro ndrígóo Jueces. Nigumaraʼmáʼ nda̱wa̱á dí ninigajmaa májánʼ wéñuʼ náa mbaʼa rí kiʼniraʼmáʼ wajyúúʼ. *

7, 8. Ndiéjunʼ eyoo gáʼthúu̱n mbiʼyuu Jeobá rá.

⁷ Bi̱ ni̱ndxu̱ún cristianos gajkhun nduyáá rí gíʼdoo wéñuʼ numuu makru̱ʼu̱u̱n májánʼ ndiéjunʼ eyoo gáʼthúu̱n mbiʼyuu Dios. Mbiʼyuu Dios nandoo gáʼthúu̱n “Ikhaa Naʼni dí Marigá”. * Nákha ginii, i̱yu̱lúʼ najmuu Éxodo 3:14 mu maʼthí káʼnii eyoo gáʼthúu̱n mbiʼyuu Dios, náa nota rí na̱ʼkha̱ agoo naʼthí: “Ikhúúnʼ maʼgánú mani̱ndxu̱ʼ xó má eyoʼ ikhúúnʼ”. Náa Traducción del Nuevo Mundo dí nigájnuu nákha tsiguʼ 1984 náa ajngáa inglés niʼthí rí Jeobá na̱jkha̱nú nanindxu̱u̱ asndu ndiéjunʼ má eyoo ikhaa mu maʼnimbánuu rí nikudaminaʼ. * Mú náa Biblia rí niguma májáánʼ rí nigájnuu nákha tsiguʼ 2013 naʼthí: “Mbiʼyuu Jeobá raʼkháa mbóó nandoo gáʼthúu̱n, dí ikhaa mínaʼ na̱jkha̱nú nanindxu̱u̱ asndu ndiéjunʼ má mu maʼnimbánuu dí naʼthí maʼni. Ma̱ngaa nandoo gáʼthi dí najmuu rí niʼni mu maʼni asndu ndiéjunʼ má eyóoʼ mu maʼnimbánuu dí naʼthí”. (Atayáá ma̱ngaa folleto Mambáyulúʼ muʼnigajmaa Ajngá rawunʼ Dios, ináa 5.)

⁸ Xú káʼnii eʼni Jeobá mu xúgíʼ rí niʼni mani̱ndxu̱u̱ rí eyoo ikhaa rá. Mbá xkri̱da, Dios niʼni rí Noé maʼni mbá arca ga̱jma̱a̱ Bezalel mani̱ndxu̱u̱ mbáa artesano. Ma̱ngaa niʼni dí Gedeón mani̱ndxu̱u̱ mbáa bi̱ naxmínaʼ májánʼ wéñuʼ ga̱jma̱a̱ rí Pablo mani̱ndxu̱u̱ mbáa bi̱ xámiñuu maʼtáraʼa. Mbiʼyuu Dios nandoo  gáʼthúu̱n mbá rí gíʼdoo wéñuʼ numuu náa xa̱bi̱i̱. Ikha jngó, a̱ngiu̱lú bi̱ nini Traducción del Nuevo Mundo niniraʼmáʼ mbiʼyuu Dios náa gíʼmaa maʼga̱.

9. Náa numuu rí Cuerpo Gobernante nandoo rí Biblia miʼtájuíi náa mbaʼa ajngáa rá.

⁹ Mámbá mbiʼi rígá itháan Biblia náa nurigúu mbiʼyuu Dios. Ikhí nuni̱i̱ xóo “Señor” o i̱mba̱ mbiʼyuu dios bi̱ najmaʼniiʼ náa kúwi̱i̱n. Rígi̱ nindxu̱u̱ timbá numuu rí Cuerpo Gobernante nandún rí xúgínʼ xa̱bu̱ bi̱ nuthi mbá ajngáa maguaʼdáá mbá Biblia rí mbaʼyámajkuu mbiʼyuu Dios (atraxnuu Malaquías 3:16). * Asndu rí mbiʼi xúgi̱, Traducción del Nuevo Mundo ndaʼyamajkuu mbiʼyuu Dios náa itháan rí 130 ajngáa.

10, 11. Náa numuu niʼni mingíjyúuʼ majuitájuíi Traducción del Nuevo Mundo rí inglés náa i̱ʼwáʼ ajngáa rá.

¹⁰ Rí miʼtájuíi Traducción del Nuevo Mundo rí inglés náa i̱ʼwáʼ ajngáa niʼni mingíjyúuʼ. Mbá xkri̱da, náa Eclesiastés 9:10 ga̱jma̱a̱ náa i̱ʼwáʼ versículos, náa Biblia rí nigájnuu nákha tsiguʼ 1984 náa ajngáa inglés nijmuu ajngáa hebreo Seol. I̱ʼwáʼ Biblias rí inglés ma̱ngaa najmuu ajngá rúʼko̱. Mu náa mbaʼa ajngáa, ajngáa Seol na̱nguá e̱ʼkha̱ náa diccionario ga̱jma̱a̱ tséjmaʼnuʼ. Mbaʼin xa̱bu̱ asndu nakumún rí Seol nindxu̱u̱ mbá dí rígá gajkhun. Ga̱jma̱a̱ numuu xúgíʼ rígi̱, xíkhoo nijuiʼthá rí ma̱ndoo mutajuíi ajngáa hebreo Seol ma̱ngaa ajngáa griega Hades xóo “Iñá wa̱jinʼ”. Rígi̱ nindxu̱u̱ jmbu ga̱jma̱a̱ ra̱mingíjyúuʼ makruaʼaʼ.

¹¹ I̱mba̱ rí naʼni mingíjyúuʼ náa tikhu ajngáa nindxu̱u̱ rí xú káʼnii miʼtájuíi ajngáa “alma” xó má etajuii náa xtílóo ajngáa hebreo ga̱jma̱a̱ griego. Náa ajngáa rígi̱, alma naʼni makru̱ʼu̱u̱n dí nindxu̱u̱ mbá rí nagájnuu náa xuyulúʼ nda̱wa̱á rí nikháñulú o asndu rí nindxu̱u̱ mbáa tsiʼyoo. Mu xárígá rígi̱, bi̱ nutajuíi ajngáa ma̱ndoo mbuyáá xú káʼnii ajngáa gándoo majmúún ga̱jma̱a̱ mutajuíi “alma” xó má kaʼyoʼ. Mbá xkri̱da, ma̱ndoo muthi xóo xa̱bu̱, xujkhúʼ o vida raʼkháa ajngáa “alma”. Náa apéndice 4A ndrígóo Biblia con referencias naʼthí mbaʼa enii xóo ejmaa ajngáa alma náa Biblia. Mu versículos xáʼni mingíjyúuʼ makruaʼaʼ, náa naʼthí ga̱jma̱a̱ numuu ajngáa hebreas ga̱jma̱a̱ griegas nigumaraʼmáʼ náa notas rí na̱ʼkha̱ agoo náa Biblia rí niguma májáánʼ náa ajngáa inglés.

12. Ndiéjunʼ i̱ʼwáʼ nixtiʼkhuu náa Biblia nuxi̱ʼ rí niguma májáánʼ rí nigájnuu tsiguʼ 2013 rá. (Atayáá ma̱ngaa artículo “Traducción del Nuevo Mundo rí nigájnuu tsiguʼ 2013 náa inglés” náa revista rígi̱.)

¹² Graxe̱ rí nuni bi̱ nutajuíi Biblia náa i̱ʼwáʼ ajngáa nisngájma dí na̱ʼkha̱ i̱ʼwáʼ ajngáa náa Biblia inglés rí ma̱ndoo makru̱ʼu̱u̱n raʼkhí. Ikha jngó Cuerpo Gobernante niʼthí nákha septiembre tsiguʼ 2007 rí maguma májáánʼ Traducción del Nuevo Mundo náa ajngá inglés. A̱ngiu̱lú bi̱ nini májáánʼ ninigajmaa mbaʼa wéñuʼ graxe̱ rí nixuʼma bi̱ nutajuíi Biblia náa xúgíʼ numbaaʼ. Ikhiin niriʼkhuíí ajngáa rí nánguá ejmaʼnuʼ. Nigímijna rí mani̱ndxu̱u̱ jmbu xóo nákha ginii ga̱jma̱a̱ itháan ra̱mingíjyúuʼ. Xó má gúʼyáá, ñajunʼ rí nini bi̱ nutajuíi náa i̱ʼwáʼ ajngáa tsiguʼ rí ejkha̱ ranújngoo niyambáá mu maguma májáánʼ Biblia inglés (Prov. 27:17).

13. Ndiéjunʼ e̱ndxa̱ʼwa̱míjna̱ bi̱ nuraxnuu Biblia rí niguma májáánʼ rí nigájnuu tsiguʼ 2013 náa ajngáa inglés rá.

¹³ Ndiéjunʼ e̱ndxa̱ʼwa̱míjna̱ bi̱ nuraxnuu Biblia rí niguma májáánʼ rí nigájnuu tsiguʼ 2013 náa ajngáa inglés rá. Mbaʼin nixuʼma carta rí nuxnáa núma̱aʼ náa guʼwá rí nuxna ikha náa xúgíʼ numbaaʼ dí rígá náa Brooklyn (Nueva York). Mbáa ndxájulú a̱ʼgu̱ niʼthí rí Biblia nindxu̱u̱ xóo mbá caja náa kajthi itsí rí nagui̱i̱ wéñuʼ, rí nindxu̱u̱ ajngáa rawunʼ Dios. Ikhaa ndaʼyoo rí Biblia rígi̱ ra̱mingíjyúuʼ matraxnuu  ga̱jma̱a̱ rí makruaʼaʼ. Índo̱ xtáá raguxnuu, naku̱mu̱ʼ rí xóó xtáá ra̱yo̱o̱ itsí rí nagui̱i̱ wéñuʼ ga̱jma̱a̱ rí nda̱yo̱o̱ xú káʼnii phú nindxu̱u̱, xóo mixngiyaʼ, color ndrígóo ga̱jma̱a̱ rí mitsaan. Dí ramiʼskoo makruaʼaʼ Biblia rígi̱ nimbáyúu mu maniniiʼ itháan Dios. Índo̱ na̱jkha̱ raguxnuu, ndaʼyoo Jeobá xóo anu̱u̱ bi̱ ndayáraʼaa ma̱ngaa rí naʼthúu̱n ga̱jma̱a̱ májánʼ.

14, 15. Xú káʼnii eku̱mún a̱ngiu̱lú bi̱ guáʼdáá Traducción del Nuevo Mundo náa ajngún rá.

¹⁴ A̱ngiu̱lú bi̱ na̱nguá ethi inglés mangiin nuxna̱a̱ núma̱aʼ numuu dí guáʼdáá Traducción del Nuevo Mundo náa ajngún. Mbáa xa̱bu̱ nikhi̱i̱ bi̱ xtáa náa Bulgaria niʼthí dí niguxnuu mba̱yu̱ʼ tsiguʼ Biblia, mú nditháan taguxnuu mbá Biblia dí kiʼtájuíi ramiʼskoo kayuʼ ga̱jma̱a̱ rí na̱jkha̱nú asndu náa a̱jkiu̱u̱n. Mbáa ndxájulú a̱ʼgu̱ bi̱ na̱ʼkha̱ náa Albania niʼthí dí Biblia dí kiʼtájuíi náa ajngáa albanés nawan mitsaan wéñuʼ. Ga̱jma̱a̱ niʼthí xóó: “¡Ra̱ʼkhá tháán mitsaan rí matadxawíín maʼtháanʼ Jeobá náa ajngáaʼ!”.

¹⁵ Náa mbaʼa xuajen mba̱ʼu̱, nguéjmi̱i̱n xa̱bu̱ nandoo naguáʼdáá mbá Biblia numuu rí minumuu o rí mingíjyúuʼ muxkamaa. Mbá xkri̱da, náa Ruanda, mbaʼin xa̱bu̱ bi̱ nunigajmaa gajmiún bi̱ nutaraʼa numuu Jeobá na̱nguá riʼkumijnáa numuu dí raguáʼdáá mbá Biblia. Rí nagujua̱ náa guʼwá ndxajkun minumuu wéñuʼ ga̱jma̱a̱ mingíjyúuʼ makruaʼaʼ. Índo̱ nigájnuu Traducción del Nuevo Mundo náa ajngún, mbá guʼwíin náa kuwa a̱jkhu̱u̱n e̱ji̱n nixnáa núma̱aʼ Jeobá ga̱jma̱a̱ náa ñumbáá. Nákha ginii tséʼngu̱u̱n gutsi Biblia mu majmúún mámbáa, mú rí xúgi̱ mámbáa gíʼdoo Biblia ndrígóo. Mú musngájma rí nuxnáa núma̱aʼ Jeobá, nuraxnuu Biblia xúgínʼ mbá nduʼ xúgíʼ mbiʼi.

16, 17. a) Ndiéjunʼ eyoo Jeobá rí muni xúgínʼ xa̱bi̱i̱ ráʼ. b) Ndiéjunʼ eyulú muʼni rá.

¹⁶ Nda̱wa̱á maguma májáánʼ Traducción del Nuevo Mundo náa i̱ʼwáʼ ajngáa. Satanás nandoo marikhoo, mú Jeobá nandoo rí xúgínʼ xa̱bi̱i̱ muraxnuu ajngóo náa mbá ajngáa dí ra̱mingíjyúuʼ ga̱jma̱a̱ kaʼwu (atraxnuu Isaías 30:21). * Inuu má, “náa ku̱ba̱ʼ marigá wéñuʼ ku̱ma̱ ndrígóo Jeobá” (Is. 11:9).

¹⁷ Gajmulú májánʼ xúgíʼ rí nixnúlú Jeobá, xó má Biblia rígi̱ rí naʼni mba̱a̱ mbiʼyuu. Guʼdxawíínʼ xúgíʼ mbiʼi rí naʼthúlú ikhaa náa Biblia. Ga̱jma̱a̱ ikhaa maʼdxawun má xúʼko̱ rí nuʼtájkáan. Á mu nuʼtámijna gajmiúlú ikhaa, muniʼníiʼlu itháan májánʼ ga̱jma̱a̱ maʼndulú kuʼyáá itháan (Juan 17:3).