Xa̱bu̱ numbaaʼ xáʼngu̱u̱n muni i̱ndó ikhiin dí marigá tsímáá náa xúgííʼ numbaaʼ. Ndíjkha rá.

•   ‹Asndu má rakaʼyoo xa̱bu̱ maʼthí xú káʼnii maxtáa.› (Jeremías 10:23.) Na̱nguá nigumii xa̱bu̱ mu mutañajunmijná ní má mutañajúúnʼ eʼwíinʼ, ikha jngóo tséʼngu̱u̱n gúni dí marígá mbayuuʼ rí tsímáá.

•   “Xátagiwanʼ a̱jkia̱nʼ náa xa̱bu̱ bi̱ guáʼdáá numún, ni má náa a̱ʼdióo xa̱bu̱ numbaaʼ, bi̱ xáʼngo̱o̱ gáʼni kríyaminaʼ. Espíritu ndrígóo nagájnuu, ikhaa nata̱nga̱a̱ náa ku̱ba̱ʼ; mbiʼi rúʼko̱ naguamba rí nandxaʼwáminaʼ.” (Salmos 146:3, 4.) Ní má xa̱bu̱ ñajunʼ bi̱ nandún mutañajunʼ májánʼ maʼngu̱u̱n munigámbáa dí naʼni marígá guerra.

•   “Gíʼmaa ma̱ta̱ya̱a̱ rí índo̱ gáʼni iwáá mbiʼi, maʼni gakhi̱i̱ ga̱jma̱a̱ maʼni mingíjyúuʼ rí maʼngulú. Numuu rí xa̱bu̱ [...] mani̱ndxu̱u̱n xóo xujkhú xáná bi̱ najmangu̱u̱nʼ, xáʼndúún kuyáá rí májánʼ, muniu̱u̱n dí ra̱májánʼ bi̱ nambájxu̱u̱n gajmiún, xúdxun dí marathu̱u̱n, ra̱ʼkhá tháán gúni̱ mbaʼumíjna̱.” (2 Timoteo 3:1-4.) Kuwáanʼlu náa “iwáá mbiʼi” náa numbaaʼ xkawiʼ rígi̱, náa ga̱jma̱a̱ xóo nindxu̱ún xa̱bu̱ naʼni dí xárígá dí tsímáá.

•   “¡Gínáaʼla ku̱ba̱ʼ ga̱jma̱a̱ lamáa! Numuu rí Gixa̱a̱ nigajtaa náa ikháanʼla, nakiʼnáa wéñuuʼ numuu rí ndaʼyoo rí i̱mbá chíʼgíiʼ mbiʼi guanúu maxtáa.” (Apocalipsis 12:12.) Gixa̱a̱ nindxu̱u̱ xa̱bu̱ sia̱nʼ ndrígóo Dios, ikhaa xtáa náa tsu̱du̱u̱ ku̱ba̱ʼ ikha jngóo naxkaxi̱i̱n xa̱bu̱ muni dí xkawiʼ. Nditháan xákuwáanʼ tsímáá índo̱ ikhaa xtáa ‹raʼtáñajunʼ náa numbaaʼ› rígi̱ (Juan 12:31).

•   “[Reino ndrígóo Dios] maʼni̱i̱ yujndaʼ xúgínʼ reino buʼko̱ [bi̱ tsíñún gúyáá Dios], ga̱jma̱a̱ i̱ndó ikhaa maxtáa asndu kámuu mbiʼi.” (Daniel 2:44.) Reino ndrígóo Dios maʼngo̱o̱ maʼni dí makuwáánʼ tsímáá kámuu mbiʼi raʼkháa xa̱bu̱ ñajunʼ bi̱ kúwá náa numbaaʼ (Salmo 145:16).