Lá guáʼdáá mbá Biblia kiejunʼ testigos de Jeobá ráʼ.
Testigos de Jeobá nijmún mbaʼa enii Biblia mu munigajma̱a̱. Mú dí itháan nanigu̱u̱nʼ ikhaa nindxu̱u̱ Traducción del Nuevo Mundo —dí rígá náa mbaʼa enii ajngáa—, na̱ʼkha̱ mbiʼyuu Dios ma̱ngaa naʼthí jmbu ga̱jma̱a̱ kaʼwu.
Na̱ʼkha̱ mbiʼyuu Dios. Raʼkháa xúgíʼ Biblia rí niguma naxnúu gamajkhu bi̱ phú niʼthí xóo maguma Biblia. Mbá xkri̱da, mbá Biblia rí nijuiʼtájuíi naʼthí itháan dí setenta mbiʼñún xa̱bu̱ bi̱ niyambáá mu maguma Biblia rúʼko̱, mú nditháan na̱nguá e̱ʼkha̱ mbiʼyuu bi̱ phú niʼthí xóo maguma Biblia: Jeobá.
Náa Traducción del Nuevo Mundo, na̱ʼkha̱ má xúʼko̱ mbiʼyuu Dios mbaʼa aʼphu̱ xó má e̱ʼkha̱ náa texto dí phú nigumaraʼmáʼ ginii ga̱jma̱a̱ na̱nguá e̱ʼkha̱ mbiʼñún bi̱ kuya̱ edxuu náa najuiʼtájuíi Biblia.
Naʼthí mbájmbu. Rígá tikhuʼ Biblia rí na̱nguá eʼthí mbájmbu xó má eʼthí náa ajngáa dí nigumaraʼmáʼ ginii. Mbá xkri̱da, Mateo 7:13 nijuiʼtájuíi xígi̱ kaʼnii: “Ata̱ʼa̱la náa xkrugua rí chíma̱ja̱nʼ, numuu rí xkrugua ga̱jma̱a̱ kamba̱a̱ rí na̱jkha̱ kagui̱i̱n náa infierno nindxu̱u̱ ma̱ja̱nʼ”. Mú náa ajngáa dí nigumaraʼmáʼ ginii na̱nguá eʼthí “infierno”, ikhí naʼthí “mandáti̱gi̱i̱n”. Xa̱bu̱ bi̱ nitajuíi nikumu̱ún dí xa̱bu̱ bi̱ ra̱míjínʼ naguma gíníin kámuu náa infierno. Mú náa Biblia na̱nguá eʼthí xúʼko̱. Ikha jngóo náa Traducción del Nuevo Mundo naʼthí “mandáti̱gi̱i̱n”, xó má eʼthí náa Biblia dí nigumaraʼmáʼ nákha ginii.
Naʼthí kaʼwu. Mbá Biblia gíʼmaa maʼthí mbájmbu ma̱ngaa gíʼmaa maʼthí kaʼwu. Gúʼthá mbá xkri̱da. Mbaʼa Biblia naʼtájuíi Mateo 5:3 xó má kama, ikhí naʼthí ajngáa rígi̱: “Gagi kúwá xa̱bu̱ gíníin náa espíritu”. Mú xa̱bu̱ na̱nguá ekru̱ʼu̱u̱n ndiéjunʼ eyoo gáʼthúún rí mbiʼi xúgi̱. Ikha jngóo, náa Traducción del Nuevo Mundo náa versículo rígi̱ naʼtájuíi xígi̱ káʼnii: “Gagi kúwá bi̱ nduyáá rí nda̱ñúnʼ mbuyáaʼ Dios”.
Na̱ʼkha̱ mbiʼyuu Dios ga̱jma̱a̱ naʼthí mbájmbu ma̱ngaa naʼthí kaʼwu ajngáa rí kiʼniraʼmáʼ, mú rígá imbo̱o̱ʼ rí naʼni mani̱ndxu̱u̱ mixtiʼkhu Traducción del Nuevo Mundo: Na̱nguá xtango̱jo̱o̱ ga̱jma̱a̱ najuixnáraʼa xúʼkhiín. Rúʼko̱ naʼni rí mbaʼin wéñuʼ xa̱bu̱ ma̱ndoo muraxnuu Biblia náa ajngún maski má na̱nguá guáʼdáá mbújkha̱a̱ mu mutsi̱ mbá Biblia.