Rí nuthi: Xa̱bi̱i̱ Jeobá tséniriyaaʼ Navidad numuu rí tsekumún kuyáá Jesús.

 Rí gajkhun: Ni̱ndxu̱xu̱ʼ cristianos ga̱jma̱a̱ ndu̱ya̱a̱xu gajkhun rí i̱ndó náa Cristo ma̱ndoo makáwáanʼ (Hechos 4:12).

 Rí nuthi: Nurkuájinʼ bi̱ kuwa náa mbá guʼwíin índo̱ nusngúún a̱ngia̱la dí ragíʼmaa muniriyaaʼ Navidad ga̱jma̱a̱ rí nusngáa.

 Rí gajkhun: Naxmiéjunxu wéñuʼ ga̱jma̱a̱ numún bi̱ kuwa náa mbá guʼwíin, ga̱jma̱a̱ najmuxu Biblia mu mumbáñuun mu makuwá itháan májánʼ.

 Rí nuthi: Tsenigagimijná ga̱jma̱a̱ Navidad xóo rí muxnamíjná regalos, rí makuwá tsímáá ga̱jma̱a̱ rí makuwá mbá kambáxala.

 Rí gajkhun: Nuʼgími̱jna̱ mani̱ndxu̱xuʼ májánʼ a̱jkiu̱xuʼ ga̱jma̱a̱ nuxná rí kuaʼdáá xúgíʼ tsiguʼ (Proverbios 11:25; Romanos 12:18). Mbá xkri̱da, tsenda̱ʼa̱xu mbújkha̱a̱ náa nagimbáanʼxu ni má tsíruma náa na̱jkuá gútaraʼa, numuu rí nunimbuxu rí niʼtáñajunʼ Jesús: “Ri nijanaʼla, guxna manganʼla” (Mateo 10:8). Ma̱ngaa nutaxu ga̱jma̱a̱ numuu Reino ndrígóo Dios numuu rí i̱ndó náa ikhaa ma̱ndoo makuwáanʼ tsímáá (Mateo 10:7).

•   Jesus niʼtáñajunʼ rí magumariyaʼ rí nikháñu, raʼkháa índo̱ nigumaa (Lucas 22:19, 20).

•   Ní má xa̱bi̱i̱ Jesús ni má timbíi̱n cristianos túniriyaʼ Navidad. Xó má eʼthí náa Diccionario ndrígóo cristianismo, ndxa̱a̱ rígi̱ “nigi̱ʼdu̱u̱ niguma náa Roma nákha 330”, tsiguʼ rí nirígá nda̱wa̱á, itháan rí a̱jma̱ siglo nda̱wa̱á rí nikháñu iwáá apóstol.

•   Nda̱a̱ rí nasngájma rí Jesús nixtáa 25 ñajunʼ gu̱nʼ diciembre; náa Biblia tséʼkha̱ náa mbi̱ʼi̱i̱ nigumaa.

•   Nakru̱ʼu̱lú rí Dios tsínigu̱ʼ Navidad, numuu rí na̱ʼkha̱ náa costumbres rí nuni xa̱bu̱ (2 Corintios 6:17).

 Maski ajndu nduyáá rí Navidad tsembánii ga̱jma̱a̱ Biblia ga̱jma̱a̱ rí na̱ʼkha̱ náa costumbres rí nuni xa̱bu̱, mbaʼin nuniriyaʼ numuu rí nakumu̱ún dí ragíʼdoo numuu ga̱jma̱a̱ nuni numuu rí xúʼko̱ eni eʼwíínʼ.

 Biblia nambáyulúʼ mu mundxaʼwáá májánʼ edxu̱lúʼ índo̱ guraʼwíí rí muʼni (Romanos 12:1, 2). Ma̱ngaa naʼsngúlúʼ mangaju̱lú rí gajkhun (Juan 4:23, 24). Raʼkháa numuu rí tsixmiéjunlú rí nakumu̱ún eʼwíínʼ ga̱jma̱a̱ numulúʼ, mú, maski ajndu xúʼko̱ muʼnimbánii rí naʼthí náa Biblia mu xúnixu xóo eni eʼwíínʼ.

 Maski ajndu ikháanʼ niraʼwíí rí xuniriyaʼxu Navidad, mámbáa kaʼyoo rí maraʼwíí maʼni ga̱jma̱a̱ numuu rígi̱. Ikháanʼ na̱nguá erikhááxu nimbáa xa̱bu̱ rí maʼni rígi̱.