Bi̱ nutaraʼa numuu Jeobá na̱nguá eniriyaaʼ tsiguúnʼ numuu rí ndu̱ya̱a̱xu májánʼ rí Dios tsínigu̱ʼ munixu. Maski ajndu náa Biblia tséʼthi mbájmbu ga̱jma̱a̱ numuu ndxa̱a̱ rígi̱, mú naxnúlú tikhuu ikha rí ma̱ndoo mambáyulúʼ mu makru̱ʼu̱lú xú káʼnii eʼyoo Dios dí muniriyaaʼ tsiguúnʼ. Guʼyáá a̱jkhu̱ eni rígi̱ ma̱ngaa rí e̱ʼkha̱ raʼthí náa Biblia rí nambánii ga̱jma̱a̱.

1.   Rí narámáʼ tsiguúnʼ na̱ʼkha̱ náa religión náa naʼsngáa dí ragájkhun. Xóo eʼthí náa diccionario enciclopédico, ndxa̱a̱ rígi̱ na̱ʼkha̱ náa creencia rí índo̱ narámáʼ tsiguúnʼ, “espíritus ga̱jma̱a̱ tsiakii dí ra̱májánʼ nuni dí raʼkhí náa xa̱bu̱ bi̱ nuniriyaʼ tsiguúnʼ” mú índo̱ “nakuwa bi̱ nambáxu̱u̱n gajmiún ga̱jma̱a̱ rí nuthúún ajngáa rí májánʼ ma̱ndoo mañewu̱u̱n” (Funk & Wagnalls Standard Dictionary of Folklore, Mythology, and Legend). Imbo̱o̱ libro naʼthí rí nákha wajyúúʼ nuniraʼmáʼ mbiʼi rí nagumiin xa̱bu̱, numuu rí “ndayóoʼ mu maguma horóscopos ndrígu̱ún”, rí nigájnuu náa “astrología”. Ga̱jma̱a̱ libro má rígi̱ na̱ʼkha̱ raʼthí: “Creencia dí itháan najmaʼnuʼ nindxu̱u̱ rí ndélá rí najmaa náa ndxa̱a̱ dí narámáʼ tsiguúnʼ gíʼdoo magia kiejunʼ rí ma̱ndoo maxnún asndu ndiéjunʼ má rí gúnda̱ʼa̱” (The Lore of Birthdays).

    Mú, Biblia naʼthí dí ra̱májánʼ nindxu̱u̱ magia, dí nuraxi rí gárígá nda̱wa̱á, espiritismo, ocultismo o asndu ndiéjunʼ má rí nambánii ga̱jma̱a̱ rígi̱ (Deuteronomio 18:14; Gálatas 5:19-21). Dios niʼni gámbáa xuajen Babilonia dí nirígá nákha wajyúúʼ numuu rí xa̱bu̱ bi̱ nikuwa ikhí nijmañún ndiyáá astrología, mbá dí najmún mu muraxi dí gárígá nda̱wa̱á (Isaías 47:11-15). Maski ajndu bi̱ nutaráʼaxu numuu Jeobá na̱nguá eya̱a̱xu dí gíʼdoo wéñuʼ numuu mbuʼyááʼxu náa phú e̱ʼkha̱ mámbá costumbre o ndxa̱a̱, xándoo munigaʼdunʼxu ikha rí na̱ʼkha̱ náa Biblia náa naʼthí ga̱jma̱a̱ numuu ocultismo.

2.   Timbíi̱n cristianos na̱nguá niniriyaʼ rí narámáʼ tsiguúnʼ. Náa mbá enciclopedia, timbíi̱n cristianos “ndiyáá rí asndu káʼnii má ndxa̱a̱ rí nuniriyaʼ dí narámáʼ tsiguúnʼ nindxu̱u̱ mbá costumbre rí nuni xa̱bu̱ bi̱ tseniʼniiʼ Dios”, o na̱ʼkha̱ náa religión rí tséʼsngáa dí gajkhun (The World Book Encyclopedia). Náa Biblia naʼthí rí apóstoles ga̱jma̱a̱ eʼwíínʼ bi̱ niʼsngúún Jesús índo̱ nixtáa náa tsu̱du̱u̱ Ku̱ba̱ʼ nigíʼ mbóo xkri̱da rí gíʼmaa muni xúgínʼ bi̱ ni̱ndxu̱ún cristianos (2 Tesalonicenses 3:6).

3.   I̱ndó ndxa̱a̱ rí nijuiʼthún muniriyaaʼ cristianos nindxu̱u̱ rí índo̱ nikháñu Jesús raʼkháa índo̱ nigumaa (Lucas 22:17-20). Numuu rí náa Biblia naʼthí mbájmbu “itháan májánʼ [...] mbiʼi rí nakháñaʼ ki xóo mbiʼi rí nagumáanʼ” (Eclesiastés 7:1). Índo̱ nikháñu Jesús náa tsu̱du̱u̱ Ku̱ba̱ʼ, Jesús nixtáa májánʼ náa inuu Dios, ikha jngó índo̱ ikhaa nikháñu nigiʼdoo itháan numuu ki xóo índo̱ rí nigumaa (Hebreos 1:4).

4.   Náa Biblia nditháan tséʼthi rí mbáa xa̱bi̱i̱ Dios niʼniriyaʼ rí narámáʼ tsiguʼ. Gajkhun má rí náa Biblia na̱ʼkha̱ raʼthí a̱jmi̱i̱n xa̱bu̱ bi̱ niniriyaʼ tsiguúnʼ bi̱ na̱nguá eni ñajunʼ Dios. Náa Biblia na̱ʼkha̱ raʼthí dí tárígá dí májánʼ náa a̱jma̱ ndxa̱a̱ rígi̱ dí narámáʼ tsiguúnʼ (Génesis 40:20-22; Marcos 6:21-29).

 Xó má mbáa xa̱bu̱ bi̱ májánʼ a̱jkiu̱u̱n, bi̱ nutaraʼa numuu Jeobá nandún kuñún e̱jñún. Ikha jngó, nuxnún regalos asndu náa má mbi̱ʼi̱i̱ ga̱jma̱a̱ nuriyaʼ májánʼ awan mu muni mbá kambáxu̱u̱n ñajunʼ ga̱jma̱a̱ ndxa̱a̱ rí maʼni makuwá gagi. Nugíʼ nuni xkri̱da ndrígóo Dios, bi̱ naxnún rí májánʼ xa̱bi̱i̱ asndu náa má mbi̱ʼi̱i̱ (Mateo 7:11). Ikha jngó, e̱jñún Testigos na̱nguá kumún rí kuwa runi mbáti̱ga̱ mbá rí májánʼ. Xúʼko̱ ethi tikhun e̱ji̱i̱n:

•   “Itháan májánʼ matrigú mbá regalo índo̱ na̱nguá xtaʼti̱i̱n muxnaʼ.” (Tammy, bi̱ 12 tsiguʼ.)

•   “Anu̱ʼ ga̱jma̱a̱ ru̱dúʼ na̱nguá exnuʼ regalo índo̱ narámáʼ tsiguʼ, mu nuxnuʼ eʼwáʼ mbiʼi. Naniguʼ índo̱ nuni xúʼko̱.” (Gregory, bi̱ 11 tsiguʼ.)

•   “E̱ji̱n i̱ndó naʼphu̱ pastel ga̱jma̱a̱ nuni ajmúú. Tsénigu̱ʼ ndxa̱a̱ rúʼko̱, itháan májánʼ rí nunixu náa goʼwóoʼ.” (Eric, bi̱ 6 tsiguʼ.)