Na̱nguá. Bi̱ nutaráʼaxu numuu Jeobá ni̱ndxu̱xu̱ʼ cristianos bi̱ nunimbuxu xóo eʼthí náa Biblia. Maski ajndu tikhuu religión nakumu̱ún rí tikhu rí naʼtáriyaʼ náa Biblia nindxu̱u̱ rí magimbíin judíos náa Palestina, bi̱ nutaráʼaxu numuu Jeobá na̱nguá enimbuxu rúʼko̱. Tsenimbuxu rí náa Biblia naʼtáriyaʼ dí narígá náa política rí mbiʼi xúgi̱. Náa Biblia tsembáyúu nimbáa Xa̱bu̱ Ñajunʼ ga̱jma̱a̱ nimbá grupo ndrígu̱ún xa̱bu̱. Bi̱ Nayejngoo revista ndrígu̱ún bi̱ nutaraʼa numuu Jeobá, niʼthí kaʼwu rí “sionismo político tséʼkha̱ náa Biblia”.

 Náa Encyclopædia Britannica naʼthí rí sionismo ni̱ndxu̱ún “mbaʼin xa̱bu̱ judios ga̱jma̱a̱ nandún rí ikhiin mutañajunʼ náa Palestina”. Rígi̱ nikumu̱u̱ náa religión ga̱jma̱a̱ náa política. Bi̱ ni̱ndxu̱lú xa̱bi̱i̱ Jeobá tseyambááxu náa sionismo ga̱jma̱a̱ tsendawamíjna̱xu náa política.

 Organización ndrígu̱ún bi̱ nutaraʼa numuu Jeobá i̱ndó na̱ʼkha̱ náa religión ga̱jma̱a̱ tsembáyúu política, asndu ma̱ngaa sionismo. Najmaʼnáanʼlú numuu rí tsendawamíjna̱ náa política ikha jngó xa̱bu̱ tsíñún gúyulu ga̱jma̱a̱ nuni gínáaʼ náa tikhu xuajen. Ndu̱ya̱a̱xu rí nimbáa Xa̱bu̱ Ñajunʼ o rí nuni xa̱bu̱ maʼngo̱o̱ maʼni rí marigá tsímáá kámuu náa tsu̱du̱u̱ Ku̱ba̱ʼ. I̱ndó bi̱ maʼngo̱o̱ maʼni rígi̱ nindxu̱u̱ Reino ndrígóo Dios bi̱ xtáa mekhuíí.

 Mbá ikha rí nambáñun xúgínʼ bi̱ nutaraʼa numuu Jeobá nindxu̱u̱ rí munimbu̱ún xtángoo ndrígu̱ún Xa̱bu̱ Ñajunʼ tséʼniuu asndu náa má kuwa. Ikhiin nunimbu̱ún kuñún Xa̱bu̱ Ñajunʼ ga̱jma̱a̱ tsegun náa guerra.