Na̱nguá. Testigos de Jeobá tséthi dí ra̱májánʼ nindxu̱u̱ vacunas. Numuu rí nduyáá dí mambáa cristiano kaʼyoo maraʼwíí á mu mbayá vacuna o na̱nguá. Ga̱jma̱a̱ mbaʼin testigos de Jeobá nuraʼwi̱i̱ dí muda̱ vacuna.

 Nduʼyaxu náa maguma thanuxu itháán májánʼ ga̱jma̱a̱ ndu̱ya̱a̱xu rí gíʼdoo wéñuʼ numuu xúgíʼ rí naʼngo̱o̱ naʼni ciencia ga̱jma̱a̱ numuu thana, mu xúʼko̱ nánguá marigá wéñuʼ nandii mbi̱i̱ʼ. Nuxníinxu wéñuʼ núma̱aʼ xúgíinʼ xa̱bu̱ bi̱ najmañún ga̱jma̱a̱ numuu thana numuu rí kúwá ruñajunʼ gakhii wéñuʼ, itháán náa mbiʼi mingíjyúuʼ.

 Testigos de Jeobá numbañún xa̱bu̱ bi̱ nuñajunʼ gajmiún gobierno bi̱ najmañún ga̱jma̱a̱ numuu thana. Mbá xkri̱da asndu nákha nigi̱ʼdu̱u̱ nandii COVID-19, testigos de Jeobá nirawíi mbaʼa i̱yi̱i̱ʼ náa mixtiʼkhu ajngáa dí rígá náa ináa ndrígóo internet má rígi̱, náa nuthúún xa̱bu̱ rí gíʼmaa munimbánii ikha rí nuthi Xa̱bu̱ Ñajunʼ bi̱ kúwi̱i̱n náa xuajñún. Ga̱jma̱a̱ nijuiʼthúún xú káʼnii gíʼmaa muni índo̱ gágún náa kúwá mbaʼin xa̱bu̱ ma̱ngaa rí xagajnún náa guʼún ga̱jma̱a̱ nijuiʼthúún rí gíʼdoo wéñuʼ numuu rí xáguajun mijngii náa eʼwíin xa̱bu̱, rí mujña̱a̱ ñawúúnʼ, majmúún cubrebocas ma̱ngaa i̱ʼwáʼ ikha rí nuthi Xa̱bu̱ Ñajunʼ bi̱ kúwá ikhí (Romanos 13:1, 2).

 Mba̱yu̱u̱ʼ má tsiguʼ testigos de Jeobá naguwáʼ rurawii i̱yi̱i̱ʼ náa na̱ʼkha̱ ikha rígi̱:

•   Mambáa kaʼyoo maraʼwíí á mu rí maʼni thanaminaʼ (Gálatas 6:5)

   “[I̱yi̱i̱ rígi̱] tséʼthi ga̱jma̱a̱ numuu thana rí itháán májánʼ ki xóo dí nuxna médico. Nigájnuu iyi̱i̱ʼ rígi̱ mu maʼthí ga̱jma̱a̱ numuu dí narígá ga̱jma̱a̱ mu xa̱bu̱ muraʼwi̱i̱ dí muni” (¡Awaxunʼ!, 8 ñajunʼ gu̱nʼ febrero tsiguʼ 1987).

   “Á mu ikháán gajmiáanʼ ejña̱a̱n nandala muda̱ vacunas, rúʼko̱ dí gíʼmaa má muraʼwi̱i̱ ikháanʼ” (¡Awaxunʼ!, 8 ñajunʼ gu̱nʼ diciembre tsiguʼ 1965).

•   Ndu̱ya̱a̱xu rí vida gíʼdoo wéñuʼ numuu, ikha jngóo nduʼyaxu rí maguma thanuxu (Hechos 17:28).

   “Bi̱ ni̱ndxu̱ún testigos de Jeobá nunimbu̱ún ga̱jma̱a̱ xúgíʼ a̱jkiu̱ún rí nuthi médicos ga̱jma̱a̱ thana rí nuxná mu xúʼko̱ xáʼniún nandii. Numuu rí nandún kuyáá wéñuʼ vida ma̱ngaa rí naʼthí náa Biblia mu makuwá mba̱yu̱u̱ʼ” (Bi̱ Nayejngoo, 1 ñajunʼ gu̱nʼ mayo tsiguʼ 1976).

   “Májánʼ wéñuʼ nindxu̱u̱ rí mi̱dxu̱ʼ náa xa̱bu̱ bi̱ najmañún thana mu xúʼko̱ xáʼniaʼ nandii ga̱jma̱a̱ maraxtaa mba̱yu̱u̱ʼ. Testigos de Jeobá tséthi dí raʼkhí ga̱jma̱a̱ numuu thana. Rí asndu mbáa cristiano bi̱ nixtáa nákha wajyúuʼ bi̱ nigumbiʼyuu Lucas ninindxu̱u̱ médicos ga̱jma̱a̱ tikhuun testigos de Jeobá bi̱ kúwá rí mbiʼi xúgi̱ nunigajma̱a̱ ga̱jma̱a̱ numuu thana. Ikha jngóo testigos de Jeobá nduyáá rí gíʼdoo wéñuʼ numuu rí nuthún bi̱ najmañún thana ma̱ngaa nuxníín wéñuʼ núma̱aʼ ga̱jma̱a̱ numuu gakhii ñajunʼ dí kúwá runi” (Bi̱ Nayejngoo, 1 ñajunʼ gu̱nʼ febrero tsiguʼ 2011).