Nutha̱a̱nʼxu mi̱dxu̱ʼ gátatsiʼnuuʼ guʼwá náa nuxna ikha dí rígá Estados Unidos náa kuwa bi̱ nutaraʼa numuu Jeobá
“¡Ra̱ʼkhá tháán májánʼ rí ermáʼáan a̱jkiu̱xuʼ nákha nijkhuáxu gúniʼnúʼ náa Betel! ¡Nditháan xámbumuxu!” Ikhaa rúʼko̱ rí nithi a̱jmi̱i̱n xa̱bu̱ nda̱wa̱á rí nigún gúya náa Betel dí rígá Estados Unidos náa kuwa bi̱ nutaraʼa numuu Jeobá bi̱ xuajñún náa Vanuatu. Xúʼko̱ má eku̱mún itháan rí 70,000 xa̱bu̱ bi̱ nagún gúya mámbá tsiguʼ.
Lá ni̱dxu̱ʼ má mbá miʼtsu náa ajtsú Betel rí nuxna ikha dí rígá náa Estados Unidos ráʼ. Á mu xóó tséʼdxuʼ, nutha̱a̱nʼxu rí mi̱dxu̱ʼ.
Mú ndiéjunʼ gándoo gáta̱ya̱a̱ náa mámbá Betel rígi̱ rá.
Guʼwá náa nuxnún ikha xúgínʼ bi̱ nutaraʼa numuu Jeobá dí rígá Brooklyn (Nueva York). Á mu ikháánʼ na̱dxu̱ʼ gátaya majmañaaʼ itháan xúgíʼ awan rí nagájnuu gi̱jyooʼ mu ma̱ndoo miʼtáraʼa náa xúgíʼ numbaaʼ ajngáa rí májánʼ. Ma̱ngaa ma̱ndoo ma̱ta̱ya̱a̱ a̱jma̱ exposición. Mbá rí nagumbiʼyuu “Un pueblo para el nombre de Jehová”, ga̱jma̱a̱ imbo̱o̱, “La Biblia y el nombre divino”. Náa timbá naʼthí ga̱jma̱a̱ numún xa̱bi̱i̱ Jeobá bi̱ nikuwa nákha timbá siglo asndu bi̱ kuwa rí mbiʼi xúgi̱. Náa raga̱jma̱ ma̱ndoo ma̱ta̱ya̱a̱ mbaʼa Biblia dí nirawíi má ajngáa náa na̱ʼkha̱ mbiʼyuu Dios: Jeobá.
Guʼwá náa najuiʼsngáa dí rígá náa Patterson (Nueva York). Atatsiʼnuʼ mixtiʼkhu escuela dí narígá ikhí, xó má náa Galaad ndrígóo Watchtower náa nawaʼsngúún ga̱jma̱a̱ numuu Biblia ga̱jma̱a̱ nawaʼsngúún bi̱ kuya̱ edxu̱u̱ náa Betel gajmiún Guʼñún. Ma̱ngaa manigua̱ʼ exposición ga̱jma̱a̱ video náa naʼthí i̱ʼwáʼ ñajunʼ rí naguma, xó má náa naguma xtiʼkhu Departamento ndrígóo Arte, Departamento ndrígóo Asuntos Legales, náa Departamento ndrígóo Servicio ga̱jma̱a̱ Servicios ndrígóo Audio ga̱jma̱a̱ Video.
Imprenta ga̱jma̱a̱ Departamento ndrígóo Envíos dí rígá náa Wallkill (Nueva York). Ayuʼ gátaya mu ma̱ta̱ya̱a̱ xú káʼnii egumaa imprimir, nuruwa̱a̱ inúu libros ga̱jma̱a̱ nuxuʼma biblia ga̱jma̱a̱ i̱ʼwáʼ i̱yi̱i̱ʼ rí nagájnuu náa Biblia mu maʼga̱ náa guʼwá nagimbíi̱n dí rígá náa Estados Unidos, náa Caribe ga̱jma̱a̱ náa i̱ʼwáʼ xuajen dí rígá náa xúgíʼ numbaaʼ.
Nguáthá ejyúuʼ mu ma̱ta̱ya̱a̱ náa mámbá Betel rá.
Rí mi̱dxu̱ʼ gátaya Brooklyn ndajyúuʼ xóo mbá hora; náa Patterson, ndajyúuʼ xóo a̱jma̱ hora, ga̱jma̱a̱ náa Wallkill, ndajyúuʼ xóo mbáa hora tikhu.
Tsíin ni̱ndxu̱ún bi̱ magún ku̱ña̱a̱n matatsiʼnuʼ rá.
Bi̱ kuwa ruñajunʼ náa mámbá departamento ndrígóo Betel gágun ku̱ña̱a̱n mataya. Ikhiin nduyáá rí ñajunʼ rígi̱ nindxu̱u̱ imbo̱o̱ rí xú káʼnii muruguambá ñajunʼ rí najuiʼsngáa ga̱jma̱a̱ numuu Biblia rí nunixu bi̱ ni̱ndxu̱xu̱ʼ Testigos. Nákha mayo tsiguʼ 2014, nirígá itháan rí 5,000 xa̱bu̱ bi̱ niñejunʼ náa ajtsú edificio, ga̱jma̱a̱ itháan dí 3,600 nijuaʼsngúún xú káʼnii gágun kudiin a̱ngiu̱lú mu mbu̱ya̱. Ma̱ndoo magún mu muniʼnuʼ itháan rí 40 ajngáa.
Lá mataninumáá á mu nandaʼ mataya ráʼ.
Na̱nguá, ikháánʼ xátaninumáá nditháan á mu nandaʼ mataya.
Lá ndayóoʼ manindxa̱ʼ mbáa bi̱ naʼtáraʼa numuu Jeobá mu ma̱ndoo gídxu̱ʼ gátaya ráʼ.
Na̱nguá. Mbaʼin bi̱ nagún gúya náa Sucursal na̱nguá ni̱ndxu̱ún Testigos. Á mu ni̱ndxa̱ʼ Testigo o na̱nguá, rí mi̱dxu̱ʼ gátaya mambáyaʼ makruaʼaʼ itháan ñajunʼ rí naguma náa mámbá Betel mu mayambáá xúgíʼ ñajunʼ rí nuni bi̱ nutaraʼa numuu Jeobá.
Mbáa a̱ʼgú musulmana bi̱ xuajñu náa India ni̱jkha̱ gáʼya Patterson ikhaa niʼthí nda̱wa̱á rí nininuʼ xúgíʼ: “Nanigu̱ʼ maxtáá gi̱jyooʼ. Númala dí niguaʼdáá wéñuʼ gamajkhuala náa ikhúúnʼ”.
Lá ma̱ndoo magún e̱ji̱n ráʼ.
¡Ma̱ndoo! Rí mi̱dxu̱ʼ gátaya Betel gajmiáanʼ e̱ji̱n maʼni rí asndu maguanún tsiánguá. John, bi̱ ni̱ʼkha̱ gáʼya bi̱ xuajñu náa Estados Unidos, niʼnirámáʼ: “Índo̱ nitangáanʼxu náa guʼuxu, e̱ji̱n bi̱ ni̱jkuá gajmiúxu̱ na̱nguá eniñanʼ ruthi xúgíʼ rí ndiyáá. Nákha xóó tséjkuaxu gúniʼnúʼ, i̱ndó má nundxa̱ʼwa̱a̱ edxu̱ún ñajunʼ rí naguma Betel. Rí xúgi̱ e̱ji̱n nandún magún gúñajunʼ náa Betel índo̱ gáʼnii”.
Lá ma̱ndoo magún gúniʼnuuʼ sucursal ndrígu̱ún bi̱ nutaraʼa numuu Jeobá dí rígá náa i̱ʼwáʼ xuajen mba̱ʼu̱ ráʼ.
Ma̱ndoo. Magún gúniʼnuuʼ náa mbaʼa sucursal dí rígá náa i̱ʼwáʼ xuajen mba̱ʼu̱. Á mu nandaʼ ma̱ta̱ya̱a̱ náa rígá mbaʼa sucursal, ayuʼ náa naʼthí “Oficinas ma̱ngaa aye̱ gátaya”. Nutha̱a̱nʼxu mi̱dxu̱ʼ asndu náa má guaʼyaa sucursal.
