Bi̱ nutaraʼa numuu Jeobá guáʼdáá náa xúgíʼ numbaaʼ mbá 15 sucursal náa nagumaa imprimir i̱yi̱i̱ʼ. Rígá mbóo náa Europa central, náa estado ndrígóo Alemania rí mbiʼyuu Selters, náa xuajen rí mbiʼyuu Steinfels, dí nandoo gáʼthi “la Roca”.

Nákha niʼni 23 asndu 25 ñajunʼ gu̱nʼ mayo tsiguʼ 2014 nimbaʼtoo xkrugoo sucursal rígi̱ mu ma̱ndoo magún gúniʼnuuʼ xa̱bu̱ bi̱ kuwa mijngii ikhí, Xa̱bu̱ Ñajunʼ ga̱jma̱a̱ eʼwíínʼ bi̱ nandún magún. Dí ndiyáá nigumbiʼyuu “Ajtsú skiñúʼ tsiguʼ náa Selters” numuu dí asndu nákha 21 ñajunʼ gu̱nʼ abril tsiguʼ 1984 dí phú nigumaa inaugurar sucursal rígi̱.

Itháán rí 3,000 xa̱bu̱ nigún. “Dí mi̱dxu̱ʼ gáta̱ya̱a̱ sucursal ndrígu̱ún bi̱ nutaraʼa numuu Jeobá nindxu̱u̱ kiejunʼ –niʼthí alcalde bi̱ xtáa náa xuajen rúʼko̱, bi̱ nañajunʼ náa ayuntamiento itháán maʼni 30 tsiguʼ–. Xóó nakumuʼ dí ra̱ʼkhá tháán nacha̱ niguma sucursal rígi̱ náa Steinfels nákha tsiguʼ 1979 ga̱jma̱a̱ 1984.”

Nákha ikhú, ma̱ngaa niguma májáánʼ mbóo exposición rí nigumbiʼyuu “Xuajñu Jeobá náa Europa central”, niʼthí ga̱jma̱a̱ numuu historia ndrígu̱ún bi̱ nutaraʼa numuu Jeobá bi̱ kuwa ikhí asndu nákha 120 tsiguʼ. Xóó rígá náa sucursal exposición dí nirígá ikhú.

Bi̱ nigún ma̱ngaa ndiyáá mbaʼa Biblia rí gíʼdoo wéñuʼ numuu. Ikhí nirígá ma̱ngaa Biblia kañiʼ dí nigájnuu nákha tsiguʼ 1534 náa ajngáa alemán ga̱jma̱a̱ mbá níʼkhóo Biblia Políglota ndrígóo Elias Hutter rí kiʼniraʼmáʼ náa mbá 12 ajngáa dí niguma nákha 1599. Ma̱ngaa nirígá mbaʼa i̱yi̱i̱ʼ ga̱jma̱a̱ videos náa naʼthí rí nambáyulúʼ wéñuʼ rí mbiʼi xúgi̱ ikha dí na̱ʼkha̱ náa Biblia.

Xa̱bu̱ bi̱ nigún nindoo niguáʼdáá a̱jma̱ recorrido i̱ndó ikhiin, rígi̱ nimbáñun mu mbuyáá ndiéjunʼ eni mámbá gajtsi bi̱ itháán rí mil xa̱bu̱ bi̱ kuwa ga̱jma̱a̱ nuñajunʼ náa sucursal rígi̱. Rí timbá nigumbiʼyuu “Xú káʼnii kuwáanʼxu”, bi̱ niguáʼdáá recorrido rígi̱ nindoo ndiyáá cuarto ndrígu̱ún tikhun bi̱ kuwa ikhí, nipiʼtsu náa comedor ga̱jma̱a̱ nindoo nigún náa jardín. Mbáa bi̱ ni̱jkha̱ niʼthí: “Ra̱ʼkhá tháán mitsaan ge̱jyooʼ”.

I̱mba̱ recorrido nigumbiʼyuu “Producción”, ikhí nindoo ndiyáá náa nagumaa imprimir, náa nawa̱a̱ i̱yi̱i̱ʼ mu maʼni libros ga̱jma̱a̱ náa rígá Departamento ndrígóo Envíos. Xa̱bu̱ bi̱ nigún, ndiyáá xú káʼnii guma̱a̱ imprimir i̱yi̱i̱ʼ rí naʼthí ga̱jma̱a̱ numuu Biblia ma̱ngaa na̱jkha̱ náa mbá 50 xuajen mba̱ʼu̱. Mbáa xa̱bu̱ niʼthí: “Na̱nguá nikumuʼ rí bi̱ nutaraʼa numuu Jeobá kuwa náa xúgíʼ numbaaʼ. Libros ndrígu̱ún na̱jkha̱ náa xúgíʼ numbaaʼ. Rí tsédaʼ xa̱bu̱ bi̱ nuni rígi̱ nindxu̱u̱ mbá milagro”.

Mbá dí ninigu̱nʼ wéñuʼ ninindxu̱u̱ jw.org, ináa phú kiejunʼ ndrígu̱ún bi̱ nutaraʼa numuu Jeobá. Jiáma ga̱jma̱a̱ xa̱bu̱ wanuu nindoo ndiyáá presentación ga̱jma̱a̱ videos ga̱jma̱a̱ nixtiʼña̱a̱ mbaʼa graxe̱ dí nini.

Índo̱ niguánu ndiyáá xú káʼnii nindxu̱u̱ ñajunʼ dí nuni Testigos náa xúgíʼ numbaaʼ, mbaʼin nikuwa gagi nda̱wa̱á dí niguámbu̱u̱n ndiyáá ma̱ngaa nisngajma dí niguanún tsiánguá ga̱jma̱a̱ numuu ñajunʼ dí naguma náa sucursal. Mbáa bi̱ ni̱ʼkha̱ niʼthí: “¡Raʼkhí nindxa̱ʼo̱o̱ edxu̱ʼ nákha ginii! Niriʼkhuu xóo endxa̱ʼo̱o̱ edxu̱ʼ ga̱jma̱a̱ numún Testigos”. Ga̱jma̱a̱ mbáa a̱ʼgu̱ na̱nguá eniñu̱nʼ raʼthí: “Dí natadxuun ge̱jyooʼ nambáyaʼ rí xátraʼwi̱i̱n xa̱bu̱”.