Nákha domingo 5 ñajunʼ gu̱nʼ enero tsiguʼ 2014, Serge Gerardin xtáa ra̱jkha̱ ga̱jma̱a̱ autobús náa mbá asamblea ndrígu̱ún bi̱ nutaraʼa numuu Jeobá mijngii náa xuajen París (Francia) índo̱ nirígá mbóo gamiéjunʼ. Serge Gerardin naʼthí: “Carro ninújngoo rayáá barda dí nañewu̱u̱n mbóo puente, ni̱jkha̱ inuu giñánʼ. Nda̱wa̱á nijpátuma náa puente, edxu̱u̱ niguanúu agoo ga̱jma̱a̱ nikatiyooʼ”.

Serge, nindxu̱u̱ bi̱ naʼtáñajúnʼ bomberos ga̱jma̱a̱ niñajunʼ xúʼko̱ káʼnii itháán dí ajma̱ʼ skiñúʼ tsiguʼ, mbá nacha̱ ndiʼyoo xú káʼnii maʼni. “Maski ajndu imbo̱o̱ kamba̱a̱ náa ejkuáxu —eʼthí—, ni̱thu̱u̱n chofer dí mawiji̱, ikhú nigájnuu náa autobús mu maʼga̱ náa carro dí xtáa rakha.” Serge niʼdxaun mbáa aʼwá: “¡Gumbáyuʼ!”. Ikhaa naʼthí xóó: “Kaguʼúnʼ traje ga̱jma̱a̱ corbata ga̱jma̱a̱ na̱nguá kagu̱ dí majmuʼ mú mandijuiʼ aguʼ. Mú índo̱ nidxawun dí mbáa nindxaʼwáá, ndi̱yo̱o̱ dí kaʼnííʼ xóó ma̱ndoo mani kríyaaʼ mbáa”.

Índo̱ ni̱jkha̱nú náa carro, Serge ndiʼyoo kaʼwaan mbá xa̱bu̱ bi̱ nánguá eʼyoo dí maʼni ikhú ikhaa niʼni kríyaaʼ. “Niʼthúunʼ dí kajchún xóó imbá gijmiin xa̱bu̱ náa carro —eʼthí Serge—. Ikhú mbaʼin má xa̱bu̱ niguájun, nandún muñambáá mú riʼyu̱u̱ aguʼ ga̱jma̱a̱ dí mijkha narikhún.”

Tikhun xa̱bu̱ bi̱ nagún ku̱ñu̱u̱n camión niguwáʼ kudúún extintores, mbá nácháa má nindijuiʼ aguʼ nda̱wa̱á dí Serge niʼthún xóo gúní. Chofer niguanúu agoo carro ikha jngó Serge ga̱jma̱a̱ eʼwíínʼ xa̱bu̱ nixuxi carro mú muriyaʼ xa̱bu̱, nda̱wa̱á nigún ku̱ya̱a̱ náa ma̱ndoo mbayáa xu̱ʼ.

“Ikhú —eʼthí Serge—, nigájnuu mbu̱júu̱ aguʼ náa carro.” Mú kaʼwaan xóó i̱mba̱ xa̱bu̱ bi̱ kaxtuʼwájmaa ga̱jma̱a̱ cinturón ndrígóo carro. Mbáa bi̱ na̱jkha̱ kayóo moto kagúwunʼ xtíin dí xtá ma̱ngaa nindxu̱u̱ bombero ni̱ʼkha̱ mú mayambáá. Serge niʼthún dí nánguá mba̱yu̱ʼ eyóoʼ dí carro majmidá, ikha jngó i̱ndó nirajtun ñawun xa̱bu̱ mú muriyaʼ. Ní tséʼni mbá minuto nda̱wa̱á dí niriyaʼ xa̱bu̱, nijmída carro.

Índo̱ niguáʼnu bombero ga̱jma̱a̱ bi̱ numbañún xa̱bu̱ bi̱ nakámbiñunʼ, ikhiin nini thanún xa̱bu̱ ga̱jma̱a̱ nindijuiʼ aguʼ. Serge ma̱ngaa nini thanáá numuu dí nithii ga̱jma̱a̱ nikha ñawúunʼ. Índo̱ nitanga̱a̱ mú matsima̱a̱ náa autobús, tikhun xa̱bu̱ nigúun guxnáá numaʼ numuu dí niñambá.

Serge nadxuu numuu dí niʼni xó má eʼngo̱o̱. Ikhaa naʼthí: “Nikumuʼ dí kaʼyoʼ mani xúʼko̱ náa inuu Jeobá Dios ndrígóʼ. Ra̱ʼkhá tháán gagi xtáá numuu dí niñambá mu makáwíin xa̱bu̱ buʼko̱”.