Xa̱bu̱ bi̱ kúwi̱i̱n náa xúgíʼ numbaaʼ nambáñun ináa ndrígóo Internet jw.org. Mbuʼyáá xú káʼnii tikhun exna̱a̱ núma̱aʼ dí ni̱jkha̱nú náa guʼwá náa nuxnún ikha xúgínʼ bi̱ nutaraʼa numuu Jeobá nákha gu̱nʼ mayo.

“Índo̱ a̱ʼdióoʼ na̱ʼkha̱a̱ náa guardería nanguéʼkha̱a̱ mbaʼa lápiz, juguetes ga̱jma̱a̱ lente dí raʼkáyoo magiʼdoo ikhaa. Mbaʼa nutu ninixu makro̱ʼo̱o̱ dí ikhaa xtáa raʼni kúwáʼ ga̱jma̱a̱ rí miʼni kuʼwáʼ ra̱májánʼ ñajunʼ. Mbóo mbiʼi nirígúxu video náa jw.org rí nagumbiʼyuu Ra̱májánʼ rí matani kuʼwáʼ. ¡Nayambáá wéñuʼ! Ikhaa rúʼko̱ rí phú ndiyóoʼ mbaʼyoo aʼdiuxu. Nda̱wa̱á rí ndiʼyoo video, niʼthí rí nandoo maʼga̱a̱ kagu̱u̱ xúgíʼ rí kagueʼkha̱a̱ náa guʼwúxu, rí xúgi̱ ndaʼyoo kaʼwu rí Dios tsínigu̱ʼ rí xa̱bu̱ muni kuʼwáʼ. ¡Ra̱ʼkhá tháán nimbáyuxu ináa ndrígóo Internet!” (D. N., África.)

“E̱ji̱n nanigu̱nʼ ináa ndrígóo Internet. Nundrigú videos ndrígóo dibujos rí nambáñun mu mugíʼ muni ikha rí na̱ʼkha̱ náa Biblia ga̱jma̱a̱ numuu rí xúni̱ kuʼwáʼ. Ma̱ngaa najmañún eʼwáʼ rí gíʼdoo numuu rí mambáñun nda̱wa̱á ga̱jma̱a̱ naʼni rí mani̱ndxu̱ún xa̱bu̱ bi̱ guaʼdáá numún.” (O. W., las Antillas.)

“Ra̱ʼkhá tháán mingíjyúuʼ eʼniuʼ manigajmaa, ga̱jma̱a̱ nindoʼ maniʼñúʼ escuela. Mú mbóo mbiʼi nigúxnuu náa ináa jw.org mbá artículo ‹¿Debería dejar de estudiar?›. Asndu ikhú nindxa̱ʼwa̱mínáʼ májánʼ ga̱jma̱a̱ numuu escuela. Artículo rúʼko̱ niʼsngóóʼ rí escuela naʼni rathúún dí mani nda̱wa̱á ga̱jma̱a̱ nambáyuʼ manimbánuu rí kaʼyoʼ mani.” (N. F., África.)

“Ajngámaʼan rí na̱ʼkha̱ raʼthún jiáma ga̱jma̱a̱ e̱jín gu̱ʼu̱ náa ináa ndrígóo Internet nambáyuʼ mani rí májánʼ náa escuela. Nambáyuʼ maʼgíʼ májánʼ edxu̱ʼ náa enigajmaa.” (G., África.)

“Mbáa a̱ʼgu̱ bi̱ xtáa náa eñajunʼ niʼthún rí a̱ʼdióo nini dí raʼkhí náa escuela, mú xtáa mbáa ndxáʼgú bi̱ itháan naʼniu. Ra̱ʼkhá tháán míñuu a̱ʼdióo rí asndu niniñuʼ rajkha̱a̱ escuela nguáthá mbiʼi. Ni̱thu̱u̱n bi̱ nañejunʼ gajmuʼ tikhuu rí na̱ʼkha̱ raʼthí náa video Xú gátambáyuminaʼ rí asndu xátanigawíínʼ nimbáa, dí na̱ʼkha̱ náa ináa jw.org ‹Dibujo dí naʼsngáa›. Ninigu̱u̱ʼ wéñuʼ xtágabu rí matani xnduʼwá mambáyaʼ wéñuʼ. Nda̱wa̱á niʼthúu̱n wáxioo ndiéjunʼ gándoo maʼni mu ní xúni̱i̱ dí raʼkhí, xúʼko̱ nánguá emíñuu ndxáʼgú índo̱ e̱jkha̱a̱ escuela. Nda̱wa̱á ndxáʼgú nánguá niʼniuu dí raʼkhí asndu ni̱jkha̱nú nimbáxu̱u̱ ga̱jma̱a̱.” (V. K., Europa oriental.)

“Núma̱aʼla wéñuʼ numuu rí nigíʼma náa jw. org artículo rí nagumbiʼyuu ‹¿Por qué siento el impulso de cortarme?›. Mba̱yu̱ʼ tsiguʼ má gúʼdoo xkujndu rígi̱. Nikumuʼ rí nimbáa na̱nguá eʼni rúʼko̱ ga̱jma̱a̱ rí á mu na̱thu̱u̱n imba̱a̱, xákro̱ʼo̱o̱ xkujndu rúʼko̱. Rí nijuiʼthá náa artículo nimbáyuʼ wéñuʼ. ¡Asndu ndiʼkhún nikumuʼ rí xtáa bi̱ nakro̱ʼo̱o̱ rí egíʼnuʼ!” (Mbáa ndxáʼgú bi̱ xtáa náa Australia.)

“Náa ináa jw.org nimbáyuʼ mu maxkamaa itháan nacha̱ tema rí naʼthí ga̱jma̱a̱ numuu xkujndu dí nuraʼníí jiáma ga̱jma̱a̱ wa̱ʼxa̱ʼ. Mbóo artículo ndrígála nimbáyuʼ makroʼoʼ itháan májánʼ ndiéjunʼ nindxu̱u̱ acoso sexual, ma̱ngaa nimbáyuʼ mba̱yo̱o̱ rí ikhúúnʼ nigíʼnuʼ xúʼko̱ ga̱jma̱a̱ mba̱yo̱o̱ xú káʼnii gíʼmaa mañeumínáʼ.” (T. W., las Antillas.)

“A̱ʼdióoʼ na̱nguá giʼi wíí. Asndu ndiéjunʼ má eʼni, rúʼko̱ naʼni makiʼnún. Ikha jngó mingíjyúuʼ matamíjná gajmuʼ. Mbá míʼtsú, nitoʼoʼ náa jw.org náa naʼthí ga̱jma̱a̱ numún bi̱ nidamijná ga̱jma̱a̱ bi̱ guáʼdiin e̱ji̱n, ikhí nixkamaa mbaʼa artículo dí naʼthí ga̱jma̱a̱ numuu xkujndu rí gúʼdoo. Nimbáyuʼ matamíjná itháan májánʼ gajmuʼ a̱ʼdióoʼ. Ikhaa ma̱ngaa nimbáyúu ináa ndrígóo Internet rígi̱. Rí xúgi̱ naʼthúnʼ rí gajkhun ga̱jma̱a̱ naʼthúnʼ rí naʼni maxmiéjunʼ ma̱ngaa dí májánʼ rí nagíʼnuu.” (C. B., África.)

“Ináa jw.org nambáñun xa̱bu̱ bi̱ guáʼdiin e̱jñún mu musngúún xó rí manigu̱ʼ. Mbá xkri̱da, video náa naʼthí xú káʼnii gúxkamiin bi̱ mambaxúlúʼ gajmiúlú náa sección ndrígóo ‹Dibujo dí naʼsngáa› nimbáñun e̱jñu̱xu mu muraʼwíin májánʼ bi̱ mambaxúún gajmiún ga̱jma̱a̱ mu mbuñíinʼ bi̱ muniu̱u̱n muni rí májánʼ. Índo̱ e̱jñu̱xu nugíʼnii mbóo xkujndu, nagájnuu mbá artículo rí na̱ʼkha̱ raʼthí ga̱jma̱a̱ numuu tema rúʼko̱ náa ináa ndrígóo Internet. Na̱ʼkha̱ mbaʼa xtágabu dí ra̱ʼkhá tháán májánʼ.” (E. L., Europa.)

“Niʼni má majun tsiguʼ rí ndi̱ya̱a̱ a̱ʼgiu̱ʼ. Xó má xúgínʼ bi̱ nidamijná, ndiyóoʼ maguʼunxu xú káʼnii nindxuxuʼ, xú endxa̱ʼwa̱a̱ edxu̱xuʼ ga̱jma̱a̱ xú etamijnáxu. Ikha jngó niniguʼ artículo rí na̱ʼkha̱ náa jw.org náa naʼthí ‹Aprenda a escuchar›. Naxná xtágabu rí májánʼ wéñuʼ rí mambáyaʼ matadxawíín rí naʼthí mámbáa. Nigúxnuu xúgíʼ ga̱jma̱a̱ nda̱wa̱á ni̱xnu̱u̱ a̱ʼgiu̱ʼ maguxnuu. Nuʼgíʼ muni tsiakimijna mu munimbánixu rí na̱ʼkha̱ raʼthí ikhí.” (B. B., las Antillas.)

“Naʼni má mbá tsiguʼ rí natamíjná gajmíi̱nʼ bi̱ nutaraʼa numuu Jeobá, ga̱jma̱a̱ nandoʼ maxna̱a̱la núma̱aʼ numuu ináa jw.org. Ra̱ʼkhá tháán mbaʼa nijmañuʼ... asndu rí xú káʼnii gáni mu xákiʼnún ga̱jma̱a̱ xú káʼnii gánindxu̱ʼ mbáa xa̱bu̱ bi̱ nandoo kaʼñúún itháan e̱ji̱i̱n ga̱jma̱a̱ maʼndo̱ʼ ka̱yo̱o̱ itháan a̱ʼgiu̱ʼ. Gajkhun rí ináa ndrígóo Internet rígi̱ niʼni rí xániʼñáanʼ agiuʼ.” (L. G., las Antillas.)

“Nimbáyuʼ ináa jw.org mu mba̱yo̱o̱ rí gúʼdoo numuʼ. Videos dí rígá náa ajngáa señas americano nimbáyuʼ mani rí eʼwíínʼ makru̱ʼu̱u̱n rí eyoʼ mata. Rí nákha ginii naku̱mu̱ʼ rí na̱nguá xú magúʼdoo meta rí gíʼdoo numuu, mú video rí nagumbiʼyuu Ahora veo la Biblia en mi idioma ni̱jkha̱nú asndu náa a̱jkiu̱nʼ ga̱jma̱a̱ nimbáyuʼ mandxa̱ʼwa̱mínáʼ rí májánʼ.” (J. N., África.)

“Ra̱ʼkhá tháán májánʼ ináa rígi̱. Ikhúúnʼ nañambá náa numbañún xa̱bu̱ bi̱ tsédxawíín, mú itháan numbáñunxu jiáma ga̱jma̱a̱ wa̱ʼxa̱ʼ. Nambáyuʼ wéñuʼ dí rígá mbaʼa video dí señas numuu rí xúʼko̱ najmañuʼ itháan. Ma̱ngaa nandoo nambáñun eʼwíínʼ xa̱bu̱ mu mutamijná májánʼ gajmiún bi̱ nambáxu̱u̱n ga̱jma̱a̱ bi̱ kuwa náa guʼwún.” (K. J., las Antillas.)

“Ikhúúnʼ tsíkruigoʼ ga̱jma̱a̱ nimbáyuʼ wéñuʼ ináa jw.org. Dí najmañuʼ ikhí mbajyúuʼ á mu na̱ʼkha̱nú ga̱jma̱a̱ correo. Rí nijmañuʼ náa ináa rígi̱ nimbáyuʼ maxtáá májánʼ gajmíi̱nʼ bi̱ kuwa náa goʼwóoʼ ga̱jma̱a̱ nandoo nambáyúu xuajñunʼ. Ikhúúnʼ nadxuun rí nuraxnuu bi̱ nambáxuʼ gajmíi̱nʼ ikháá má mbiʼi.” (C. A., Sudamérica.)

“Bi̱ tsíjmañún gúraxnuu braille o na̱nguá xóo mutsi libro dí kiʼniraʼmáʼ braille, jw.org mambáñun wéñuʼ. Aʼwá rí na̱ʼkha̱ ikhí nambáñun bi̱ tsíkruigu̱u̱n mu majmañún itháan mámbá mbiʼi. Ináa rígi̱ kiʼni mu mambáñun xúgínʼ xa̱bu̱. Naʼni maguaʼdáá numuxu ikháanʼ bi̱ tsíkruiguxu náa xúgínʼ xa̱bu̱.” (R. D., África.)

“Ináa ndrígóo Internet ndrígála nindxu̱u̱ mixtiʼkhu ki xóo ináa ndrígu̱ún i̱ʼwáʼ religión numuu rí najmún mbaʼa ajngáa rí i̱ndó ikhiin ekru̱ʼu̱u̱n. Ma̱ngaa na̱nguá eʼni maʼskhaʼ rí etraxnuu ikhí. Nindxu̱u̱ mbá ináa dí ra̱mingíjyúuʼ ga̱jma̱a̱ naʼthí mbájmbu. Naʼthí rí phú na̱ʼkha̱ náa Biblia, raʼkháa rí endxaʼwamíjna̱ ga̱jma̱a̱ rí nuthi xa̱bu̱ ma̱ngaa ra̱mingíjyúuʼ migixnuu. Na̱nguá e̱ʼkha̱ raʼthí i̱ʼwáʼ ajngáa rí nda̱a̱ numuu. Ma̱ngaa tséʼthi rí mingíjyúuʼ maraʼdáá fe.” (A. G., Asia.)

“Nákha xóó tsírígá Internet mbóo ináa ndrígu̱ún testigos, xtáa gíná. Nixtáá xó náa mbá cuarto rí mikrina ga̱jma̱a̱ nda̱a̱ rí e̱yo̱o̱ kayuʼ. Xúgíʼ dí rígá náa Internet niʼni rí mayexi májánʼ. Rí xúgi̱ nandoo nagúxnuu ga̱jma̱a̱ nadxuun aʼwá ndrígóo i̱yi̱i̱ʼ rí nagájnuu náa Biblia náa naʼthí xú káʼnii endxa̱ʼwa̱mínáʼ Dios ga̱jma̱a̱ naxtiʼña̱a̱ graxe̱ ndrígóʼ.”(J. C., las Antillas.)

“Númala wéñuʼ numuu rí numbáyuʼ makroʼoʼ rí naʼthí náa Biblia náa Sudamérica, náa awúu̱n xaxi. Á mu nda̱a̱ ináa ndrígóo Internet rígi̱, xáxtáá májánʼ.” (M. F., Sudamérica.)