Nákha diciembre tsiguʼ 2012, bi̱ nutaraʼa numuu Jeobá náa Tailandia nijngruigu̱u̱n náa mbóo campaña kiejunʼ mu mumbañún e̱ji̱n mú mugíʼ itháan edxu̱ún náa escuela. Mbá skiñúʼ Testigos nigún náa escuela dí rígá náa Bangkok, niwi̱i̱n gajmiún directores ma̱ngaa nixnúún maestros xó má bi̱ nunigajmaa náa escuela nindrigú revista ¡Despertad! dí octubre tsiguʼ 2012 dí kayá edxu̱u̱ “Cómo aprovechar al máximo la escuela”.

Ra̱ʼkha̱ tháán májánʼ dí niguma rígi̱ numuu rí nda̱wa̱á nitaraʼa náa xúgíʼ xuajen. Rí mbá tsiguʼ tikhu, bi̱ Testigos nigún náa mbá 830 escuelas. Ninigu̱nʼ wéñuʼ maestros ga̱jma̱a̱ bi̱ nunigajmaa náa escuela dí asndu ndiyóoʼ magumaa imprimir mu makhánun xóó bi̱ ninda̱ʼa̱. Ginii niguma imprimir mbá 30,000 revistas, mú ninigu̱nʼ wéñuʼ dí asndu nda̱wa̱á nixnaraʼa itháan dí 650,000.

Directores gajmiún maestros niguánu ndiyáá dí ra̱ʼkha̱ tháán májánʼ dí na̱ʼkha̱ raʼthí náa ¡Despertad! Dí asndu mbáa maestra niʼthí: “Revista mambáñun bi̱ nunigajmaa náa escuela dí mambaxúún itháan gajmiún anu̱ún ma̱ngaa dí munimijna munimbánii dí gúgíʼ muni”. Náa tikhuu escuela nijmún mu musngáa, eʼwíínʼ nijmún mu majmañún muraxnuu itháan. Bi̱ nunigajmaa náa mbóo escuela, nijmún revista rígi̱ mu muxnaxi̱i̱ tarea ndrígu̱ún, bi̱ nini itháan májánʼ nikhánún premio.

Mbáa bi̱ naʼnigajmaa̱ náa escuela nixnáa núma̱aʼ ga̱jma̱a̱ numuu artículo náa naʼthí “Cómo ganarle la batalla a la obesidad infantil y juvenil”, rí na̱ʼkha̱ raʼthí náa revista má rúʼko̱. Niʼthí ga̱jma̱a̱ numún bi̱ naʼni mbaʼwi̱i̱n nindxu̱u̱ mbá nandii dí na̱jkha̱ raguáʼdáá itháán mbaʼin mú bi̱ nambáxuʼ gajmíi̱n naʼniún mingíjyúuʼ muthi ga̱jma̱a̱ numuu rúʼko̱. Ma̱ngaa niʼthí xóó: “Numala numuu dí nixnuxu xtágabu dí na̱nguá mingíjyúuʼ wéñuʼ matanimbánii”.

Ma̱ngaa bi̱ guáʼdiin e̱ji̱n ni̱xna̱a̱ núma̱aʼ ga̱jma̱a̱ numuu revistas dí nigájnuu. Mbá a̱ʼgu̱ bi̱ gíʼdiin e̱ji̱n niʼthún a̱jmi̱i̱n gu̱ʼu̱ bi̱ ni̱ndxu̱ún Testigos bi̱ nigún gúyáá náa goʼwóo niʼthí dí xtágabu dí na̱ʼkha̱ náa revista nimbáyúu a̱ʼdióo mu magíʼ itháan edxu̱u̱ náa escuela.

Mbáa bi̱ naʼthí ga̱jma̱a̱ numún bi̱ nutaraʼa numuu Jeobá náa Tailandia bi̱ mbiʼyuu Pichai Petratyotin, niʼthí: “Revista ¡Despertad! nasngájma dí náa Biblia na̱ʼkha̱ ku̱ma̱ dí magiʼdoo má xúʼko̱ numuu. Bi̱ nutaraʼa numuu Jeobá nakumuxu dí miʼsngulúʼ gíʼdoo wéñuʼ numuu, ikha jngó nidxuxuʼ wéñuʼ dí muxnaráʼaxuʼ i̱yi̱i̱ʼ rígi̱”.