Nákha sábado 1 ñajunʼ gu̱nʼ marzo tsiguʼ 2014, mbá grupo rí 823 Testigos bi̱ kuwa gagi nigimbíin náa Guʼwá dí narígá Asambleas náa xuajen Benín (Nigeria) mu muniriyaaʼ mbá rí gíʼdoo wéñuʼ numuu. Asndu nákha nigi̱ʼi̱ awan rí maguma guʼwá náa magimbíin náa xuajen rí nda̱a̱ mbújkha̱a̱ nákha tsiguʼ 1999, niguma má mbá 3,000 guʼwá dí marigá reunión náa xuajen rúʼko̱.

Náa nigimbíin rígi̱, nijuiʼthá xúgíʼ ñajunʼ rí niguma náa Nigeria asndu nákha 20 tsiguʼ mu congregación magiʼdoo náa mbuyamajkuíí Jeobá. Nákha ginii nigimbíin náa mbá guʼwá lájuíin o náa mbá guʼwá katiʼñaa. Xó má najuiʼthá dí nirígá, timbá guʼwá rí nijmaa mu maguma i̱ndó reunión ninindxu̱u̱ mbá salón rí niguma náa xuajen Ilesha nákha tsiguʼ 1935. Nákha tsiguʼ 1938 ga̱jma̱a̱ 1990, ndijoo wéñuʼ guʼwá náa nagimbíi̱n: Ndijoo 14 asndu 2,681. Mbaʼin dí ikhiin niʼniún mingíjyúuʼ muxkamaa mbá náa ma̱ndoo magimbíin. Náa tikhuu guʼwá rí nagimbíi̱n naguáʼdáá reunión asndu mbá majun congregación. Náa i̱ʼwáʼ xuajen, salón nindxu̱u̱ lájuíin wéñuʼ mu magimbíin mbaʼin xa̱bu̱, asndu tikhun naguáju̱n rexa̱a̱ ga̱jma̱a̱ naguáju̱n náa ventana mu mudxawíín rí najuiʼthá. Eʼwáʼ congregación nagimbúun náa guʼwá ndrígóo mbá xa̱bu̱ o náa escuela.

Nákha tsiguʼ 1990, sucursal ndrígu̱ún bi̱ nutaraʼa numuu Jeobá nigíʼdu̱u̱ nixná tíʼña náa congregación mbújkha̱a̱ rí nixtiéxi mu mayambáá náa maguma guʼwá rí magimbíin. Dí maʼni tsiguʼ 1997, Comités bi̱ ndaʼyoo rí maguma guʼwá náa xúgíʼ xuajen rí kaʼyoo niyambáá náa mbá 105 congregación mu maguma o miʼni̱i̱la náa guʼwá rí nagimbíi̱n. Nákha tsiguʼ 1997 asndu 1999, niguma 13 guʼwá náa magimbíin. Rí naguma guʼwá ndajyúuʼ 7 ga̱jma̱a̱15 mbiʼi.

Ndijoo rí xú káʼnii maguma guʼwá náa magimbíin, mú maski ajndu xúʼko̱ na̱nguá eʼngo̱o̱ majtiin xa̱bu̱ náa guʼwá rí naguma numuu rí naʼni itháan mbaʼin bi̱ nutaraʼa numuu Jeobá náa xuajen Nigeria. Nákha abril tsiguʼ 1998, sucursal niʼthí rí ndayóoʼ 1,114 guʼwá náa magimbíin náa xúgíʼ xuajen.

Náa reunión kiejunʼ dí nirígá náa xuajen Benín, Don Trost, bi̱ kayá edxu̱u̱ náa Sucursal dí rígá náa Nigeria, niʼthí: “¡Nindxu̱u̱ mbá ñajunʼ mitsaan wéñuʼ! Ga̱jma̱a̱ nindxa̱ʼwa̱míjna̱xu: ‘Xú káʼnii gáʼngulú muʼni rá.’” Graxe̱ rígi̱ nixtiʼña̱a̱ nákha tsiguʼ 1999, índo̱ grupo bi̱ nuyambáá mu maguma guʼwá náa magimbáanʼ náa kuwa majun ga̱jma̱a̱ migiñuʼ xa̱bu̱ bi̱ nigi̱ʼdi̱i̱ niyambáá náa congregación dí rígá xuajen rúʼko̱. Numuu rí ra̱mingíjyúuʼ maguma salón, niguma itháan rí 17 guʼwá rí mbá gu̱nʼ rí naʼni má mbá gu̱wa̱ʼ i̱jkhu̱ tsiguʼ.

Nda̱wa̱á rí nijuiʼthún bi̱ kuwa ikhí dí ra̱ʼkhá tháán májánʼ ñajunʼ rí niʼngu̱u̱n nini, Don Trost niʼthí rí xóó rígá wéñuʼ ñajunʼ rí ndayóoʼ maguma. Nákha tsiguʼ 2013, itháan rí 8,000 xa̱bu̱ niwi̱i̱n náa mbaʼin wéñuʼ Testigos bi̱ kuwa náa xuajen Nigeria. “Mu marigá náa magimbíin nda̱wa̱á, ndayóoʼ maguma itháan rí 100 guʼwá náa magimbíin mámbá tsiguʼ”, niʼthí Don Trost. Nákha tsiguʼ 2013 nikuwa itháan rí 351,000 Testigos, ga̱jma̱a̱ nirígá itháan rí 5,700 guʼwá náa magimbíin.