Nakujmaa lago Sterling Forest (Blue Lake) rí nakujmaa xígií norte índo̱ natiexi asndu náa suroeste. Náa timbá plano, nduʼyáá ñajunʼ rí naguma náa sótano ndrígóo edificio D náa makuwá. Dí rígá náa mijngii iyaʼ, kuwa runi májáánʼ rí xú káʼnii maguajún concreto (hormigón) ndrígóo edificio C náa makuwá.

Tikhun nuñajunʼ mu muni májáánʼ baño mu majmaa náa guʼwá rí makuwá. Náa baño na̱ʼkha̱ xúgíʼ, tubo náa mato̱ʼo̱o̱ giñánʼ, náa ma̱ndoo mi̱na̱, náa maʼga̱ tubo ga̱jma̱a̱ cable ndrígóo aguʼ. Cuarto ndrígóo baño ma̱mbá índo̱ gárígá náa edificio.

Tikhun plomeros (fontaneros) kuwa ruñajunʼ náa sótano. Índo̱ gúni guʼwá, gi̱jyooʼ muphiʼtsu mbá 500 xa̱bu̱ bi̱ gúñajunʼ. Náa má awúu̱n edificio rígi̱ maguma májáánʼ mu ma̱ndoo muphiʼtsu xóó itháan rí 300 xa̱bu̱. Índo̱ gámbá ñajunʼ, ní xúpiʼtsu gi̱jyooʼ, edificio rígi̱ maʼga̱nú majmaa taller náa nuni̱i̱la carro.

Mbá grupo xa̱bu̱ kuwa ruñajunʼ mu mugrigu mbá ku̱ba̱ʼ májánʼ náa xúgíʼ tsu̱du̱u̱ guʼwá mu ikhí gúdu planta mu xáʼni gachúu dí mijkha, miguwan, nieve ga̱jma̱a̱ mu xájmaa wéñuʼ aguʼ. Plantas naʼga̱a̱n iyaʼ rí nagajtaa ga̱jma̱a̱ naʼgañu̱u̱n xúgíʼ dí mitsaga rí na̱ʼkha̱ ga̱jma̱a̱ ruʼwa.

Edificio rígi̱, gíʼdoo ajtsú enii, dí ma̱ja̱nʼ nindxu̱u̱ 42,000 metros cuadrados (450,000 pies cuadrados). Náa xtiʼkhu, nakujmiin tikhun xa̱bu̱ bi̱ naguwáʼ náa empresa dí rígá kaníí, ikhiin kuwa rutsiajun varilla ndrígóo acero mu ma̱ndoo muwajún xa̱ʼ columna.

Tikhun bi̱ nuñajunʼ najmún máquina mu mutsikaʼma mbá tela náa tsu̱du̱u̱ guʼwá nákha xóó tsígrigu cemento. Ga̱jma̱a̱ najmún arnés mu mambáñun rí xágadríguíin.

Ma̱ngaa nixuda̱ʼ tubo ga̱jma̱a̱ rí xú káʼnii maʼni mijkha, rí mada̱ʼ giñánʼ wéñuʼ ga̱jma̱a̱ dí marigá ajua̱nʼ dí maʼni gueʼtsi. Mbá 35% xa̱bu̱ bi̱ nuñajunʼ náa Warwick ni̱ndxu̱ún gu̱ʼu̱.

Guʼwá rígi̱ rí nitsi nákha gu̱nʼ febrero tsiguʼ 2014, najmaa xóo bodega ga̱jma̱a̱ edificio náa nagumaa piezas nákha xóó tséjmún náa edificio. Dí ma̱ja̱nʼ gíʼdoo 20,000 metros cuadrados (220,000 pies cuadrados). Rí miʼxá rí nakujmaa asndu itháan awúu̱n nindxu̱u̱ baño rí niguma nákha ginii dí rígá má xawii mu muxuʼma.

Náa timbá plano, nduʼyáá xú káʼnii ejkha̱ raguanúu edificio C náa makuwá. Gi̱jyooʼ makuwá mbá 200 betelitas. Dí mba̱a̱ mámbá guʼwá maʼni 30 ga̱jma̱a̱ 55 metros cuadrado (350 ga̱jma̱a̱ 600 pies cuadrados). Marigá mbá cocina chíʼgíʼ, mbá baño ga̱jma̱a̱ mbáa balcón.

Naguma májáánʼ mba̱a̱ mu maguma guʼwá. Asndu itháan ñuʼún nakujmaa mbá máquina rí narujkhu itsí rí majmaa náa miʼni guʼwá. Índo̱ gámbá ñajunʼ, nijuiʼndii má mbá 260,000 metros cúbicos (340,000 yardas cúbicas) ku̱ba̱ʼ. Mámbá mbiʼi najmaa 23 volteo (dumpers).

Nudu iná náa azotea.

Náa suroeste nigájnuu foto náa ñawun mbá grua rí mba̱a̱ wéñuʼ rí wíji̱ náa edificio rí maʼni oficinas. Náa xígií ñawúunʼ xtiyaʼ nakujmaa estacionamiento náa maguajún carro ndrígu̱ún xa̱bu̱ bi̱ naguwáʼ gúya, xúgíʼ mbiʼi naguáju̱n mbaʼa carro ndrígu̱ún bi̱ naguwáʼ gúñajunʼ. Tikhun dí ikhiin nuni 12 horas mu magún asndu ikhí mu muñajunʼ i̱ndó ajtsú mbiʼi o a̱jkhu̱ mbiʼi.

Ñajunʼ rí naguma náa comedor rí najmaa niʼcho̱o̱ itháán ma̱mbá ñajunʼ. Májánʼ dí rígá televisión (rí xóó tsémbu̱u̱n runi májáánʼ) ga̱jma̱a̱ rí nawáán gakhi̱i̱, rígi̱ naʼni rí xa̱bu̱ bi̱ nuñajunʼ ikhí ma̱ndoo mbuyáá ga̱jma̱a̱ mudxawíín rí nuraxnuu texto mámbá miʼcha̱ ga̱jma̱a̱ eʼwáʼ ganitsu rí na̱ʼkha̱ náa Dios rí nduyáá náa Betel dí rígá náa Estados Unidos.

Nugíʼ piso (hormigón) náa magi̱ʼdu̱u̱ guʼwá. Náa ñawúunʼ mujunlu xtáa mbáa rajmuu máquina rí naʼni mbáti̱ga̱ xúgíʼ giñánʼ dí rígá náa cemento ga̱jma̱a̱ naʼni rí magujtuminaʼ májánʼ wéñuʼ.

Náa maʼga̱ cable dí marigá náa tikuapoo edificio dí miʼdu náa agoo sótano.

Náa timbá piso itháan ma̱mbá. Niguma má 540 metros cúbicos (700 yardas cúbicas) dí concreto (hormigón), asndu xúgi̱ náa ñajunʼ rígi̱ dí itháan mba̱a̱ ejmaa. Cemento niguma májáánʼ náa mijngii má kuwa runi guʼwá ga̱jma̱a̱ nijmaa migiñuʼ camión mu mugiʼngáʼ ga̱jma̱a̱ a̱jma̱ bomba mu magún ku̱ñu̱u̱n asndu náa edificio. Xúgíʼ niguma witsu hora tikhu. Náa centro ndrígóo foto nakujmaa mbá torre náa rígá escalera.

Tikhun xa̱bu̱ bi̱ nuñajunʼ nuni náa azotea mbá muro lájuíin mu xajngutíguíin. Dí itháan ñuʼún naguma sótano ndrígóo edificio A náa makuwá.

Najmaa mbá grúa mu muxudanʼ mbá baño náa ragajtsú piso rí nixuʼma maguma. Mbaʼa rí ejmaa náa ñajunʼ rí naguma náa Warwick nuxuʼma maguma. Rígi̱ nañambá mu xákúwi̱i̱n wéñuʼ xa̱bu̱ náa naguma guʼwá. Ma̱ngaa naʼni rí muñajunʼ nacha̱.

Tikhun bi̱ nuñajunʼ naguwáʼ náa mbá empresa kaníí bi̱ nutsiejun xu̱nʼ dí niguma ga̱jma̱a̱ cemento dí nañambá mu xájmaa wéñuʼ aguʼ. Cemento rígi̱ tséyóoʼ rí maxtiewa̱a̱n wéñuʼ ga̱jma̱a̱ na̱nguá eyóoʼ rí miʼxnííʼ numuu niguma má ga̱jma̱a̱ color. Tséjyúuʼ tsiejun xu̱nʼ rígi̱, ga̱jma̱a̱ nayambáá rí xájyúuʼ gámbá ñajunʼ.

Rí nakujmaa asndu náa suroeste. Náa timbá plano, nakujmaa xú eguma májáánʼ guʼwá D náa makuwá. Náa ki̱dxu̱ʼ edificio rígi̱, rígá edificio C ndrígóo guʼwá, dí niguámbá má.