Mbaʼin wéñuʼ xa̱bu̱ bi̱ nigún gúyáá Feria Internacional 2014 náa xuajen Ruán (xuajen rí naguanúu xígií náa norte ndrígóo Francia) nindoo ndiyáá mbá exposición dí ra̱ʼkhá tháán mitsaan rí nagumbiʼyuu: “Biblia: nákha wajyúúʼ, rí mbiʼi xúgi̱ ga̱jma̱a̱ nda̱wa̱á”.

Náa inu dí narígá exposición rígá mbá televisión náa nagrigu̱u̱ mbá video náa naʼthí ga̱jma̱a̱ numuu Biblia dí nigumaraʼmáʼ nákha wajyúúʼ. Bi̱ nigún kanuu náa exposición ga̱jma̱a̱ numuu video, ma̱ngaa nijmañún rí náa Biblia na̱ʼkha̱ mbaʼa ajngáma̱ʼa̱ rí májánʼ wéñuʼ, naʼthí mbájmbu índo̱ naʼthí xúgíʼ dí nirígá nákha wajyúúʼ, ga̱jma̱a̱ nambánii rí nagún ruyáá científicos ga̱jma̱a̱ najuixnáá mbaʼa wéñuʼ.

Ma̱ngaa exposición nasngájma xú káʼnii Biblia na̱jkha̱ rakriyaʼ nimbáa tséʼngo̱o̱ gáʼni gámbáa asndu mbiʼi rí kuwáanʼ ga̱jma̱a̱ rígá mu muraxnuu mbaʼin wéñuʼ xa̱bu̱ náa mbaʼa formato, xó má dí nagumaa imprimir o rígá náa ináa ndrígóo Internet. Bi̱ nagún gúniʼnuʼ najuixnún mbá Traducción del Nuevo Mundo, dí nuni bi̱ nutaraʼa numuu Jeobá náa itháan rí 120 ajngáa.

Bi̱ nagún gúniʼnuʼ ni̱xna̱a̱ núma̱aʼ numuu rí Testigos nuni mbá tsiakii mu marigá Biblia náa xúgínʼ xa̱bu̱. Mbáa a̱ʼgu̱ bi̱ nambáñun xa̱bu̱ ni̱jkha̱ náa feria gajmíi̱n mbá nguéjmi̱i̱n jiáma ga̱jma̱a̱ wa̱ʼxa̱ʼ niʼthí: “Biblia nindxu̱u̱ xóo mbá herencia dí gíʼdoo wéñuʼ numuu náa ikháanʼlu. Nindxu̱u̱ mbá libro rí ndaʼya. Mámbá rí nagúxnuu, nambáyuʼ maraʼnuu xkujndu”.

Mbáa a̱ʼgu̱ bi̱ gíʼdoo 60 tsiguʼ niguanúu tsiánguá índo̱ ndiʼyoo rí ma̱ndoo magiʼdoo Biblia rí asndu xáʼni numuu ga̱jma̱a̱ niʼthí: “Xúgiáanʼ gíʼmaa dí muraxnuu; ndayúlú wéñuʼ”.