Nákha gu̱nʼ agosto tsiguʼ 2014, bi̱ nutaraʼa numuu Jeobá bi̱ kuwa náa xúgíʼ numbaaʼ nixnáraʼa mbóo tratado mu majmaʼnuʼ ináa jw.org náa Internet. Rígi̱ niʼni dí itháán maʼni 65 millones xa̱bu̱ nitu̱ʼu̱u̱n náa ináa rúʼko̱ gu̱nʼ agosto, mbá 20% itháan ki xóó nákha ginii. Mbá 10,000 xa̱bu̱ bi̱ kuwa náa xúgíʼ numbaaʼ ninda̱ʼa̱ náa ináa ndrígóo Internet dí miʼsngúún ga̱jma̱a̱ numuu Biblia, mbá 67% itháán ki xóó gu̱nʼ julio. Campaña rígi̱ nimbáñun xúgínʼ enii xa̱bu̱.

Mbáa bi̱ naʼtaraʼa numuu Jeobá bi̱ na̱ʼkha̱ náa Canadá niraxi̱i̱ mbáa a̱ʼgu̱ mbiʼyuu Madeline náa mbóo ascensor ga̱jma̱a̱ nisngájmuu mbó tratado dí nuxnaraʼa gu̱nʼ rúʼko̱, dí mbiʼyuu Náa gándoo gáxti̱ʼña̱a̱, graxe̱ dí gíʼdoo wéñuʼ numuu dí nuʼnilú rá. Madeline niʼthí dí nákha wakhííʼ náa rexo̱o̱ goʼwóo niʼthún Dios dí mambáyúu maxkamaa xóo gáxti̱ʼña̱a̱ graxe̱ rúʼko̱. Niʼtáraʼa náa mixtiʼkhu guʼwá ndxájkun dí musngáá ga̱jma̱a̱ numuu Biblia, mú nimbáa na̱nguá niʼthúu̱n. Mbá nacha̱ má niʼnigajmaa̱ gajmíi̱n bi̱ Testigos.

Náa Filipinas, Rowena niʼtámíjná ga̱jma̱a̱ mbáa xa̱bu̱ bi̱ naʼthí chino náa inu mbóo restaurante, niʼthúu̱n dí nandoo maxnúu mbóo tratado ga̱jma̱a̱ niʼthúu̱n dí bi̱ nutaraʼa numuu Jeobá na̱nguá erumá índo̱ nusngáa ga̱jma̱a̱ numuu Biblia.

Xa̱bu̱ niʼthí dí nimbáa miʼtsu táʼyoo mbóo Biblia. Dí nitamíjná niʼni dí maʼga̱ náa asamblea ndrígu̱ún Testigos. Ma̱ngaa niʼthí dí nandoo majmañuu xóo itháan dí naʼsngáa náa Biblia ga̱jma̱a̱ magruigú i̱yi̱i̱ʼ náa ináa ndrígóo Internet.

Guillermo, mbáa bi̱ naʼtaraʼa numuu Jeobá bi̱ tséʼdxuun, nixkamaa Jorge, mbáa bi̱ niʼnigajmaa̱ náa escuela ma̱ngaa na̱nguá eʼdxawun. Jorge niʼthúu̱n dí ru̱dúu̱ nikháñu ga̱jma̱a̱ dí gíʼdoo wéñuʼ graxe̱ maʼni. Ikhú Guillermo nixnúu tratado ga̱jma̱a̱ niʼthúu̱n dí náa jw.org maxkamaa i̱yi̱i̱ʼ náa ajngáa señas dí mariʼña̱a̱ mbaʼa graxe̱ dí gíʼdoo. Ma̱ngaa niʼthúu̱n dí maʼga̱ náa guʼwá dí nagimbáanʼ. Jorge ni̱jkha̱, asndu nákha ikhú nditháan na̱nguá endáti̱go̱o̱ nimbáa reunión maski ajndu xtáá 60 kilómetros (37 millas) náa salón.

A̱jmi̱i̱n xa̱bu̱ nidamijná bi̱ nutaraʼa numuu Jeobá nininumáa náa magún mbá majun hora náa mbá barco chíʼgíʼ mu maguánu náa mbóo xuajen dí mbiʼyuu Groenlandia náa kúwi̱i̱n 280 xa̱bu̱. Ikhí nitaruʼun xa̱bu̱, nixnúún tratado ga̱jma̱a̱ nisngájmun mbóo video dí na̱ʼkha̱ náa jw.org náa ajngáa groenlandés. Nigi̱ʼdi̱i̱ nisngáá ga̱jma̱a̱ numuu Biblia mbáa xa̱bu̱ ga̱jma̱a̱ a̱ʼgiu̱u̱, dí xúgi̱ nunigajmaa a̱jma̱ nuthu náa teléfono mámbá xmáná.

Mú, raʼkháa i̱ndó ikhí nirígá xúʼko̱ káʼnii. Testigos bi̱ kúwi̱i̱n náa Nicaragua ma̱ngaa niriyaʼ awan dí muxnarúʼun tratado xa̱bu̱ bi̱ nuthi mayangna bi̱ kúwi̱i̱n náa xaxi ndrígóo Caribe. Nda̱wa̱á dí nigún ga̱jma̱a̱ autobús mbá 20 horas dí asndu nditháan na̱nguá niguájun ga̱jma̱a̱ dí nichúu numuu dí xkawiʼ kamba̱a̱, nigún ga̱jma̱a̱ rajkúún imbá 11 horas —nguáná náa kamba̱a̱ rígá wéñuʼ ngachaʼ— mu maguánu náa xuajen. Náa mbá xúgíʼ xuajen nixnaraʼa tratados ga̱jma̱a̱ nisngajma video náa ajngáa mayangna, mbá dí niʼni maguanún tsiánguá ga̱jma̱a̱ dí ninigu̱nʼ wéñuʼ xa̱bu̱ bi̱ kuwa ikhí.

Naa Brasil, Estela nixnúu tratado mbá xa̱bu̱ bi̱ nanújngoo náa xuajen chíʼgíʼ dí rígá náa xaxi ndrígóo amazona. Xa̱bu̱ nigruígú, mú na̱nguá niniguʼ wéñuʼ ikha jngó niyéxi náa xtabuxóo. Índo̱ na̱jkha̱ náa goʼwóoʼ, bote ndrígóo nichúu ga̱jma̱a̱ niguanúu náa rawunʼ iyaʼ. Índo̱ xtáa ragiʼthu̱u̱n mu mixtambáyii, niguxnuu tratado. Nijmuu teléfono ndrígóo mu mato̱ʼo̱o̱ náa jw.org, niguxnuu mbaʼa i̱yi̱i̱ʼ ga̱jma̱a̱ nigruigú tikhuu video. Nda̱wa̱á, nininiʼ ajmbio̱o̱ Estela niʼthúu̱n dí maxnáa núma̱aʼ ga̱jma̱a̱ numuu tratado. “I̱yi̱i̱ʼ dí niguxnuu nimbáyúu mu xaxmiéjunʼ wéñuʼ índo̱ nigúʼthu̱u̱n náa mañu —niʼthí—. E̱ji̱nʼ nanigu̱nʼ mbuyáá wéñuʼ video ndrígóo Caleb. Xániʼñúʼ ratoʼoʼ náa jw.org.”