Episis 1:1-23
1 Ai Pol, wan misnareman blo Kraist Zizas bikoz God i bin suze mi. Ai raite dis leta ya po dem pipol blo God, dem amenpamle uda i pole Kraist de lo da siti blo Episis.
2 Ai prea po PapaGod blo yumpla ane Zizas Kraist, BosLod blo yumpla, po soe yupla spesilpeiba ane gibe yupla kuaiatwei.
Yumpla mas eso God
3 Yumpla mas preize God ane gibe eso po God, uda i papa blo BosLod blo yumpla, Zizas Kraist. God i bin blese yumpla wea ebri spesilblesing wea i kam prom eben bikoz yumpla i blo Kraist.
4 God i bin labe yumpla ane suze yumpla pas bipo em bin meke da wold. Bikoz yumpla i blo Kraist, em bin suze yumpla solong yumpla mata stap stret wea em, ane em kan paine polt lo yumpla.
5 God bin meke plan de pas bipo em bin meke da wold po adopte yumpla kam ol prapa pikinini blo em, tru da laip blo Zizas Kraist. God i bin meke diswan prom da prapa glad blo em wiswei em bin wandem.
6 So yumpla preize God po da spesilpeiba blo em wea em bin gibem po yumpla bikoz yumpla i blo dat Boi nau.
7 Bikoz yumpla i blo Kraist, God i bin meke yumpla pri prom sin bikoz prom blad blo Kraist ane nau God i sore ane no wail gense dem rongting wea yumpla i mekem. God i bin mekem diskain prom da gudpasinwei ane da spesilpeiba blo em.
8 God i bin kapsaid ausaid dat gudpasinwei blo em, ane prapa gudsens, ane sabe blo em antap yumpla po sabe ol samting.
9 God i bin soem prapa kliawan po yumpla po sabe da sikret trutok baut wanem em i wandem. So em bin meke da plan wanem em bin wandem wea laip blo Zizas Kraist. Ane em i bin glad em bin mekem diskain.
10 Dis plan blo God i diskain. Wea da raittaim, em i go teke ebridem samting de antap wea eben ane ebridem samting ya andanit lo ert po kam andanit lo wan bos ane dat bos i Zizas Kraist.
11 Bikoz yumpla blo Kraist, God i bin suze yumpla po bi pipol blo em de pas. Ane em bin meke ebriting kamaut stret po wiswei em bin tingbaut po mekem.
12 God i bin mekem demkain bikoz yumpla i bin dem pas pipol po bilib wea Kraist ane diswan i go gibe ona po God.
13 Bikoz yupla i blo Kraist, yupla i bin lisen da mesiz blo da trutok baut Kraist, da Gudniuz blo seibe yupla. Wen yupla bin mata bilib wea Zizas, God i bin wantaim prubem dat yupla i blo em, wea em bin sane da OliSpirit blo em po stap wea laip blo yupla wea em bin promis.
14 Pas ting wanem God i mekem po soem dat yupla i blo em, em sane da Spirit blo em kam. Em i go meke diswan go raitap antil em go meke yupla po kam ol pipol blo em ane diswan i go gibe ona po God.
Pol prea po gudsens blo da Spirit
15 Prom wen ai bin pastaim lisen yupla i bin bilib wea da BosLod Zizas ane wiswei yupla labe ol pipol blo God ebriwea,
16 ai mata prea ebritaim, eso God po yupla. Ai ebritaim tingbaut po yupla wea ol prea blo mi.
17 Ai prea po God po gibe yupla da Spirit blo em. God i gad prapa truglori ane paua, ane em i PapaGod blo da BosLod blo yumpla Zizas Kraist. God i go gibe yupla gudsens wiswei po meke ol samting ane em go gibe yupla sens solong yupla i go sabe mo baut em.
18 Ai prea po God dat em go sane lait blo em po meke at blo yupla po sabe ol dem samting wea i go kam, solong dat yupla i go prapa sabe wanem God i spik i go apen po yupla. Yupla i demwan uda God bin singaut po kam ol oli pipol blo em. Ane yupla go prapa sabe wanem dem prapa tumas gudsamting wea em bin gibem po ol pipol blo em.
19 1:19-20
20 —Ai prea po yupla solong yupla go stat po sabe dat nadakain big strongpaua blo God, wanem em i gad po gibe yumpla uda i mata bilib. Dis seim nadakain big strongpaua blo God i bin meke Zizas Kraist kamlaipgen prom ded. Ane God bin meke Kraist po sidaun wea ples blo ona, wea da raitansaid blo God de antap wea eben.
21 Nau Zizas Kraist i kare lo oba ebribodi ane ebriting. God i bin meke Kraist po bos antap ebriting, ol dem einzel, ol dem spirit, ol dem olkain paua ane ol dem bos wea i gad paua. Dis rait blo Kraist po kare lo i no mata blo dis taim ya nau blo dis wold, bat i go bi po dat taim tu blo dat nada laip ane wold wea i go kamaut apta.
22 Wa, God i bin meke ebridem samting po kam andanit dem lo ane paua blo Kraist. Ane God i bin meke Kraist po bos antap ebridem samting wea God i bin gibem po da sos.
23 Da sos i da bodi blo Kraist. Ane da sos i prapa pulap wea laip blo Kraist ane da laip blo Kraist i prapa pilemap ebridem samting wea God bin mekem.
