Ibrupipol 1:1-14
1 God i bin spik prapa longtaim de pas, tru dem spesilmesizman, plentitaim lo diprenwei po ol ate blo yumpla.
2 Nau lo dem lasdei, God i tok po yumpla tru Boi blo em. Ane em i bin promis ebriting po Boi blo em. Em i bos blo ebriting. Ane tru Boi blo em, God i bin meke da wold ane ebriting wea i stap insaid.
3 Da Boi i sain prom dat seim sainilait, da truglori blo God, ane ebriting baut da Boi i seimkain wase God. Dem prapa nadakain strongwod blo em meke da wold ran stret. Dem strongwod blo em i kipe ebriting tugeda. Apta wen em bin ded po meke yumpla pri prom sin, em bin go antap eben ane em sidaun lo da raitansaid blo da prapa nadakain big God blo eben.
4 Diswan i soem da Boi blo God, em i mo mina big den dem einzel. Seimkain po da neim wea God i bin gibem, i mo mina big den dem neim blo dempla.
Kraist i mobig den dem einzel
5 God i no bin spik dem tok po dem einzel wanem em bin spik po Zizas diskain:
‘Yu Boi blo mi.Tidei ai PapaGod blo yu.’Ane God i kip tok da seim tok gen:‘Ai gobi PapaGod blo em,ane em i gobi Boi blo mi.’
6 God i bin soe da pasbon Boi blo em uda kare lo. Den em bin sanem kamdaun po da wold ane em bin spik:
‘Lete ebridem einzel blo God wosip em.’
7 God i bin singaut ol einzel blo em ane spik po dempla:‘Yupla i gobi ol mesinza blo mi,yupla gobi wase da win i blouane yupla gobi wase pleim blo paia.’
8 Bat po da Boi blo em, God i spik diskain:
‘Yu God, ane yu gobi king poeba ane eba,ane yu gobi bos blo ebribodi,ane go zaze ebribodi lo da raitwei.
9 Yu no labe samting wea i rong, bat wea imata rait,daswai God i God blo yu,ane em i bin anoint yu, kapsaid plentioil antap lo yu,oil blo glad, moglad den eni nada manbin gedem.’
10 Ane God i kip spik:‘BosLod, de prapa longtaim pas, yu binmeke da ert.Wea oun an blo yu,yu bin meke da skai ane ebriting de.
11 Demting i go pinis, bat BosLod, yu nogopinis. Yu go mata stap poeba.Demting i go kam wase oul klos wea ibrok ane sakwei.
12 Yu go rolemap demting wase mat.Demting i go wase klos wea i luze kalablo em. Ol go sakwei.Bat yu go mata stap da seim.Yu nogo kam oulman.’
13 God i no bin tok demkain po ol einzel wase em bin tok diskain po da Boi blo em:
‘Sidaun ya lo raitansaid blo mi, da ples blo ona,antil ai go bite ol enami blo yu,ane meke dempla leidaun plat prantwea put blo yu.’
14 Bat dem einzel i mata ol sebant blo God. Dempla i ol spirit wea God i sanem po lugaut dem pipol uda God i go seibem.
