LESEN 04
Uda i Tru God?
Prom mina bipotaim, wen laip blo man bin stat, ol bin wosip plenti god. Bat, Baibol tokbaut wan God, uda moantap den ol nada god. (2 Kronikal 2:5) Uda datwan? Ane wanem meke em moantap, den ol nada god pipol i wosip? Lo dis lesen, lan wanem dis God wande yu po sabebaut em.
1. Wanem neim blo God, ane wiskain yumi ken meikso em wande yumi po sabe dis neim?
Lo Baibol, God tokbaut emselp po mipla. Em spik: “Ai Zeoba. Diswan neim blo mi.” (Rid Aizaia 42:5, 8.) Lo Ibru langus, da neim “Zeoba” i min samting wase “Em Mekem Sole I Apen.” a Zeoba wande yumpla po sabe neim blo em. (Eksodis 3:15) Wanem prube em wande yumpla po sabe? Lo Baibol, em gad neim blo em moden 7,000 taim! Zeoba, i da neim blo “da tru God blo eben de antap ane blo ert andanit.”—Dutaronami 4:39.
2. Wanem Baibol spikbaut Zeoba?
Baibol spik nomata man i wosip ol nada god, mata Zeoba i da tru God. Aukam? I gad sam dipren rizan. Zeoba ruloba mina ebriting, ane mata em “da Mina AntapGod oba ert.” (Rid Song blo Sam 83:18.) Baibol kolem da “Strong AntapGod.” I min dat em gad da paua po meke eniting em wandem. Em bin “meke ebriting”—dem sta ane speis, ane ol laip lo ert. (Rebaleisan 4:8, 11) Nobodi i wase Zeoba, bikoz mata em bin oltaim laip, ane laip blo em go mata kipgo poeba.—Song blo Sam 90:2.
TINGBAUT MO NAU
Lan mo baut wanem i meke dem taitol blo God dipren prom em impotant neim. Den, lan aukam ane wiskain em bin soe em neim po yu.
3. God gad plenti taitol, bat mata wan neim
Po luk wiskain dem taitol blo pipol i dipren prom dempla neim, plei da BIDYO, ane tokbaut dem kwestin ya.
-
Wanem meke ol taitol, wase “Lod,” dipren prom ol neim?
Da Baibol spik dat pipol wosip plenti god ane lod. Rid Song blo Sam 136:1-3, ane tokbaut dis kwestin ya:
-
Uda “da God blo ol god” ane “da Lod blo ol lod”?
4. Zeoba wande yu po sabe ane yuze em neim
Wanem soe yu, Zeoba wande yu po sabe neim blo em? Plei da BIDYO, ane tokbaut dem kwestin ya.
-
Wiswei yu tingk, Zeoba wande pipol po sabe neim blo em? Aukam?
Zeoba wande pipol po yuze neim blo em. Rid Rom 10:13, ane tokbaut dem kwestin ya:
-
Aukam i impotant po yuze neim blo God, Zeoba?
-
Wiskain yu pil wen samwan rimemba ane kole neim blo yu?
-
Wiskain yu tingk Zeoba mas pil wen yu yuze ane kole neim blo em?
5. Zeoba wande yu po go moklostu po em
Wan oman prom Cambodia, neim blo em Soten, spik wen em bin lan neim blo God, i bi meke em nadakain api ane em no bin pil diskain api bipo. Plei da BIDYO, ane tokbaut dis kwestin ya.
-
Lo da bidyo, wiskain laip blo Soten bin seinz, wen em bin lane neim blo God?
Wen yu kam pren blo samwan, yu go lane neim blo dempla pas. Rid Zemes 4:8a, ane tokbaut dem kwestin ya:
-
Wanem Zeoba aske yu po mekem?
-
Wen yu sabe ane yuze neim blo God, wiskain i go elpe yu po pil moklostu po em?
SAM PIPOL SPIK: “I gad mata wan God ane em no woribaut wanem yumi kolem.”
-
Yu bilib dat Zeoba i neim blo God a?
-
Wiskain yu go eksplein dat God wande yumi po yuze neim blo em?
WANEM YU BI LAN
Zeoba i neim blo da tru God. Em wande yumi po sabe ane yuze neim blo em, sole yumi ken go moklostu po em.
Wiskain Yu Go Spik
-
Wanem meke Zeoba dipren prom ol nada god pipol i wosip?
-
Aukam yumi mas yuze neim blo God?
-
Wiskain yu sabe Zeoba wande yu po go moklostu po em?
PAINDAUT MO
Stadi 5 rizan i prubem i gad God.
Tingbaut aukam i meke sens dat God i bin da paswan bipo ebri samting.
Lan aukam yumi mas yuze neim blo God, nomata mipla no prapa sabe wiskain pipol bin kolem bipotaim.
Wiswei, i impotant wanem yumi kole God a? Luk aukam yumi ken spik dat em gad mata wan neim.
a Po paindaut mo, baut mining blo neim blo God, ane aukam sam Baibol bin tekemaut dis neim, gopo Appendix A4 lo da New World Translation of the Holy Scriptures.
Yu Mait Laik Dem Samting Ya Tu
OL KWESTIN PIPOL ASKEM
Wanem dem Baibol Stadi Lesen ol Zeoba Witnis i Gibem po Pipol?
Wea dis niu wei po stadi Baibol dat ol Zeoba Witnis i mekem, i pri, ane yu ken yuze eni Baibol yu wandem. Yu welkam po inbait pamle blo yu ane eni pren po stadi tu.
