Zeoba wande yu po sabe em mobeta. Aukam? Em mina wande yu po sabe pasin blo em, da wei em trite pipol, ane wanem em promis po yumpla, so i go mube yu po mina wande bi pren blo em. Wiswei, ken yu bi pren blo God a? (Rid Zemes 2:23.) Wanem yu mas mekem po kam pren blo em? Baibol i ansa dem kwestin, ane soe aukam Zeoba i wan impotant pren yu ken gad.

1. Wanem inbait Zeoba gibe yu?

“Yupla mas mata go klostu po God, ane wen yupla mekem diskain, God i go kam klostu po yupla.” (Zemes 4:8) Wanem diswan min? Zeoba aske yu po kam pren blo em. Sam pipol mait tingk i gobi ad po kam pren wea God bikoz ol kan luk em. Bat, lo Wod blo em, Zeoba spik yumi ebriting po sabebaut pasin blo em, sole yumi ken kam klostu po em. Wen yumi ride mesiz blo God prom Baibol, yumi go kam mo klostupren wea Zeoba, nomata yumi kan luk em.

2. Aukam Zeoba i da bes Pren yu go gad?

Zeoba labe yu moden enibodi. Em wande yu po bi api, ane prea po em wen yu nide elp. Yu ken “gibe ebridem wori blo yupla po God, bikoz em lugaut yupla.” (1 Pita 5:7) Zeoba i ebritaim redi po meke yu strong, gibe yu kampot, ane lisen po ol pren blo em.​—Rid Song blo Sam 94:18, 19.

3. Wanem Zeoba wande em pren po mekem?

Zeoba gad lab po ol pipol, “bat em klostupren i demwan uda i gad raitwei.” (Proberb 3:32) Zeoba wande ol pren blo em po trai po meke demting em spik i gud, ane po stap prom meke demting em spik i bad. Sam tingk i prapa ad po pole wanem Zeoba i spik i gud ane bad. Bat, Zeoba i gad labing at. Em api wea enibodi uda labe em, ane traiad po meke em api.​—Song blo Sam 147:11; Pas Misnare Wok 10:34, 35.

 TINGBAUT MO NAU

4. Eibram i bin pren blo Zeoba

Baibol stori blo Eibram (nada neim i Abram) go soe yumi wanem i min po bi pren blo God. Ridbaut Eibram lo Zenasis 12:1-4. Den tokbaut dem kwestin ya:

• Wanem Zeoba bin aske Eibram po mekem?

• Wanem promis Zeoba bin gibe em?

• Wanem Eibram bin mekem, wen Zeoba bin tok po em?

5. Wanem Zeoba ask prom em pren

Wi go wande ol pren blo yumi po trite yumi gudwei.

• Wanem sam ting yu wande pren blo yu, po mekem po yu?

Rid 1 Zon 5:3, ane tokbaut dis kwestin ya:

• Wanem Zeoba wande ol pren blo em po mekem?

Wi mait go nid po seinze wei ane pasin blo yumi, sole yumi ken obei Zeoba. Rid Aizaia 48:17, 18, ane tokbaut dis kwestin ya:

• Aukam Zeoba aske em pren po seinze wei blo dempla?

 6. Wanem Zeoba mekem po elpe em pren

 WANEM YU BI LAN

Zeoba wande bi Pren blo yu, ane em go elpe yu po kam klostu po em.

Wiskain Yu Go Spik

• Wiskain Zeoba elpe ol pren blo em?

• Aukam Zeoba spik ol pren blo em po seinze wei blo dempla?

• Wiswei, yu tingk Zeoba wande tumas prom ol pren blo em a? Aukam?