LESEN 09
Prea Po Kam Klostu Po God
Prea ken elpe yu wea plenti wei. Wase diskain ya, i ken elpe yu wen yu nid po sabe wiswei po go wea laip, ane wen yu wande elp po strete ol problem. Prea i elpe yu wen yu nid kampot o po meke yu strong. Diswan i ken elpe yu kam klostu po Zeoba tu. Bat yu tingbaut nau, ‘Wanem da raitwei po prea? God go lisen prea blo ebribodi a? Wanem ai go mekem po meikso em go lisen prea blo mi?’ Yumi go paindaut ya.
1. Uda yumi mas prea po, ane wanem yumi ken prea baut?
Zizas bin tis, yumi mas prea po PapaGod wea eben. Zizas emselp bin prea po Zeoba. Em spik: “Prea diskain: PapaGod blo yumpla de antap lo eben . . .” (Matiu 6:9) Wen yumi prea po Zeoba, wi ken kam strong klostupren wea em.
Yumi ken prea baut olkainting. Bat, po God po ansa prea blo yumi, i mas lainap wea wanem em wandem. Ip wi prea diskainwei, “em i go lisen po yumpla.” (1 Zon 5:14) Zizas bin eksplein wanem ol rait samting po prea baut. (Rid Matiu 6:9-13.) Wi ken prea baut demting yumi woribaut, bat yumi mas no piged po eso God po ebriting em bin mekem po yumi, ane aske em po elpe ol nada pipol tu.
2. Wiskain wei yumi mas prea?
Baibol inkariz yumi po “lego ebriting insaid at blo yu prant lo [God].” (Song blo Sam 62:8) Wen wi prea, yumi ken tok stret wea em, ane no aide eniting prom em. Wen yumi prea, tok po em wase yu tok po sambodi o tok insaid at. Yu ken mekem wen yu stanap, sidaun o eniwei wea i soe rispekt. Wi ken prea lo enitaim ane lo eni ples.
3. Wiskain God i ansa prea blo yumi?
Em ansa dem prea wea plenti diprenwei. Zeoba bin gibe Wod blo em, da Baibol, sole yumi paine ansa po ol kwestin blo yumi. Wen yu ride Wod blo God, i ken “meke dempla uda gad mo po lan, kam waiz.” (Song blo Sam 19:7; rid Zemes 1:5.) Em gibe yumi pis lo tingking wen yumi go tru ol adtaim. Ane em ken mube sebant blo em, po elpe yumi wen wi prapa nidem.
TINGBAUT MO NAU
Lan wiskain yu ken prea prom at, sole yu ken meke God api, ane paindaut wiskain prea ken elpe yu.
4. God spik yumi wiskain po prea po em
Wanem samting yumi mas mekem, lo prea blo yumi, sole God go lisen? Plei da BIDYO.
Zeoba wande yumi po prea po em. Rid Song blo Sam 65:2, ane tokbaut dis kwestin ya:
-
Yu tingk da ‘Wan uda lisen ol prea’ wande yu po prea po em? Aukam?
Yumi mas traiad po meke wanem i raitwei blo God wea laip, ip wi wande em po lisen prea blo yumi. Rid Maika 3:4 ane 1 Pita 3:12, ane tokbaut dis kwestin ya:
-
Wiskain yumi ken meikso Zeoba go lisen prea blo yumi?
Wen i woa taim, dem tu said prea po win. Yu tingk God go ansa prea blo dem tu said a?
5. Prea blo yumi mas kam prom at
Sam pipol bin lan ol mas yuze seimkain wod, gen ane gen, wen dempla prea. Bat, yu tingk God wande yumi po prea po em diskain a? Rid Matiu 6:7, ane tokbaut dis kwestin ya:
-
Wiskain yu ken prea wea yu “no kip ripit yuplaselp”?
Ebridei, trai tingbaut wan blesing wea laip blo yu, ane eso Zeoba po dat blesing. Trai mekem diskain ebridei po 1 wik. Den yu go prea baut 7 dipren niu samting, ane yu nogo spik dem seim wod, gen ane gen.
Wan gud papa wande pikinini blo em po tok prom at blo em. Seimkainwei, Zeoba wande yumi po prea po em, prom at blo yumi
6. Prea i gipt prom God
Wiskain prea ken elpe yu bi strong, wea gud taim ane adtaim? Plei da BIDYO.
Da Baibol promis prea ken elpe yumi paine prapa pis wea tingking. Rid Pilipi 4:6, 7, ane tokbaut dem kwestin ya:
-
Nomata prea nogo tekemaut dem problem blo yumi, wiskain i ken stil elp?
-
Wanem sam ting yu wande prea baut?
Yu bin sabe a?
Da wod “amen” i min yu “gri”. Prom Baibol taim, ol prea i pinis wea “amen”.—1 Kronikal 16:36.
7. Meke taim po prea
Samtaim yumi kam tu bizi, so wi mait piged po prea. Wiskain Zizas bin soe prea bin impotant po em? Rid Matiu 14:23 ane Mak 1:35, ane tokbaut dem kwestin ya:
-
Wanem Zizas bin mekem sole em gad taim po prea?
-
Wen ken yu meke taim po prea?
SAM PIPOL SPIK: “Prea no elp. God no ansa mai prea.”
-
Wanem yu go spik?
WANEM YU BI LAN
Wen yumi prea prom at, wi ken kam moklostu po God, i go gibe yumi pis wea tingking, ane gibe yumi strong po meke Zeoba api.
Wiskain Yu Go Spik
-
Uda yumi mas prea po?
-
Wiskain yumi mas prea?
-
Wanem sam wei prea elpe yumi?
PAINDAUT MO
Paine ansa po ol kwestin yu mait gad baut prea.
“Seven Things You Need to Know About Prayer” (The Watchtower, October 1, 2010)
Lan aukam i impotant po prea ane wiskain yu ken meke prea blo yu mobeta.
Ridbaut wanem Baibol i tis uda yumi mas prea po.
Lo dis miusik bidyo, tekenotis ip i impotant wen o wea yumi prea.
Yu Mait Laik Dem Samting Ya Tu
OL KWESTIN PIPOL ASKEM
Wanem dem Baibol Stadi Lesen ol Zeoba Witnis i Gibem po Pipol?
Wea dis niu wei po stadi Baibol dat ol Zeoba Witnis i mekem, i pri, ane yu ken yuze eni Baibol yu wandem. Yu welkam po inbait pamle blo yu ane eni pren po stadi tu.
