LESEN 12
Wanem Go Elpe Yu po Kipgo wea Baibol Stadi?
Baibol stadi gad mina plenti gudsamting po elpe yu. Bat, yu mait painem ad po stadi. Samtaim, yu mait tingk yu wande stape Baibol stadi blo yu. Aukam i impotant po mata mekem? Wanem go elpe yu po kipgo ane no gibap, nomata i ad?
1. Aukam Baibol stadi i impotant?
“Da wod blo God i gad obamak stronglaip ane paua wea i wok insaid laip blo yumpla.” (Ibrupipol 4:12) Da Baibol i mina spesil bikoz i soe tingking blo God ane wiskain em labe yu. Yu go lan po sabe plenti dipren samting, ane yu go kese mobeta laip ane lukpowad po wanem go apen bambai. Bat, da mein rizan i impotant, Baibol i elpe yu po kam pren blo Zeoba. Wen yu stadi, yu go laue da paua blo da Baibol po wok insaid laip blo yu, ane mekem mobeta.
2. Aukam i impotant po prapa tingbaut wiskain trutok blo Baibol i mina spesil?
Trutok blo Baibol i mina spesil wase perl ane gold. Daswai Baibol inkariz yumpla po “baie trutok ane no selem.” (Proberb 23:23) Wen yumi tingbaut wiskain trutok blo Baibol i mospesil den eniting, yumi go wok ad po kipgo po stadi em—ane no laue eniting po bloke yumi.—Rid Proberb 2:4, 5.
3. Wiskain Zeoba ken elpe yu kipgo wea stadi?
Bikoz Zeoba bin Meke yumi, ane em Pren blo yumi, em wande elpe yu po lanbaut em. Em ken gibe yu “da piling po prapa lisen em ane da strong” po stadi Baibol. (Rid Pilipi 2:13.) Em ken elpe yu ip yu pil slaik po stadi o po meke demting yu lanem. Wen trabol kam o pamle ane pren gense yu, em ken gibe yu da strong yu nidem. Ebritaim aske Zeoba lo prea po elpe yu sole yu ken kipgo wea Baibol stadi blo yu.—1 Tesalonika 5:17.
TINGBAUT MO NAU
Lan wiskain yu ken stadi Baibol nomata yu bizi o pamle ane pren gense yu. Den tingbaut wiskain Zeoba go elpe yu po kipgo ane no gibap wea Baibol stadi blo yu.
4. Meke Baibol stadi blo yu mina impotant
Samtaim laip i mina bizi ane i nogad taim po stadi Baibol. Wanem ken elpe yumi? Rid Pilipi 1:10, ane tokbaut dem kwestin ya:
-
Wanem yu tingk i “prapa impotant” samting wea laip?
-
Wanem yu go mekem po soe Baibol stadi i impotant po yu?
-
Ip yu go pilemap wan baket wea san pas, ane den trai po pute ston insaid tu, dem ston nogo pit
-
Ip yu pute dem ston insaid pas, yu go gad rum po pute plenti san. Seimkainwei, ip yu pute dem “prapa impotant” ting pas wea laip blo yu, yu ken meke demting, ane stil gad taim po meke ol nada samting apta
Yumi nide God, ane yumi pil rait insaid wen wi stadi Baibol—bikoz God bin meke yumi diswei po sabe ane wosip em. Rid Matiu 4:4, ane tokbaut dis kwestin ya:
-
Wen yu meke Baibol stadi impotant wea laip, wiskain i go elpe yu?
5. Kipgo ane no gibap wen pipol gense yu
I go gad taim wen pipol i go trai stape yu prom stadi Baibol. Tekenotis wanem bin apen po Francesco. Plei da BIDYO, ane tokbaut dem kwestin ya.
-
Lo da bidyo, wanem ol pren ane pamle blo Francesco bin tingk wen em spik dempla baut wanem em bin lan?
-
Wanem gudsamting bin apen bikoz em bin kipgo ane no gibap?
Rid 2 Timoti 2:24, 25, ane tokbaut dem kwestin ya:
-
Wanem ol pamle ane pren spikbaut wanem yu lanem?
-
Prom dem skripsa lo Baibol, wiskain wei yu go ansa wen samwan no api po luk yu stadi Baibol? Aukam?
6. Oltaim trase Zeoba po elpe yu
Wen yumi kam moklostu po Zeoba, da mo wi go mina wande plize em. Bat, samtaim i stil ad po seinze samting wea laip blo yumi, wen wi wande pole wei blo Zeoba. Ip yu pil demkain, no gibap. Zeoba go elpe yu. Plei da BIDYO, ane tokbaut dem kwestin ya.
-
Lo da bidyo, wanem Jim bin mekem po seinz po plize Zeoba?
-
Wanem yu laik baut Jim?
Rid Ibrupipol 11:6, ane tokbaut dem kwestin ya:
-
Wanem Zeoba go mekem po demwan uda “lukraun po em”—po demwan uda wande traiad po sabe em ane plize em?
-
Prom dis skripsa, yu tingk i meke Zeoba api, po luk yu traiad po stadi Baibol? Aukam yu tingk demkain?
SAMWAN MAIT ASKE YU: “Aukam yu stadi Baibol wea dem Zeoba Witnis?”
-
Wanem yu go spik?
WANEM YU BI LAN
Samtaim i no izi, bat Baibol stadi go elpe yu po kese apilaip poeba. Oltaim kip trase Zeoba ane em go blese yu.
Wiskain Yu Go Spik
-
Aukam trutok blo Baibol i spesil po yu?
-
Wanem yu go mekem po soe Baibol stadi i “prapa impotant” po yu?
-
Aukam yu mas aske Zeoba po elpe yu kipgo wea Baibol stadi blo yu?
PAINDAUT MO
Luk 4 diprenting wea i elpe pipol yuze taim blo dempla waizwei.
Tekenotis wiskain Zeoba bin elpe wan oman, wen man blo em bin trai po stapem prom plize God.
Luk wanem bin elpe wan man, wen oman blo em bin kipgo ane no gibap.
Samtaim pipol spik ol Zeoba Witnis splitap ol pamle. Wiswei, i tru a?
“Do Jehovahʼs Witnesses Break Up Families or Build Them Up?” (Web article)
Yu Mait Laik Dem Samting Ya Tu
OL KWESTIN PIPOL ASKEM
Wanem dem Baibol Stadi Lesen ol Zeoba Witnis i Gibem po Pipol?
Wea dis niu wei po stadi Baibol dat ol Zeoba Witnis i mekem, i pri, ane yu ken yuze eni Baibol yu wandem. Yu welkam po inbait pamle blo yu ane eni pren po stadi tu.
