LESEN 16
Wanem Zizas Bin Mekem Ya Lo Ert?
Plenti pipol stil tingbaut Zizas i wan beibi insaid meinza o wan man i aing po ded, ane sam nada pipol tingk em bin kasa gudman. Bat, ken yumi lan mo baut em ip yumi stadi baut laip blo em lo ert? Lo dis lesen, yumi go tokbaut sam dem impotant samting wea Zizas bin mekem ane wiskain i ken elpe yu.
1. Wanem da mein wok blo Zizas?
Zizas mein wok i bin po “teke da Gudniuz blo da Kingdom blo God.” (Rid Luk 4:43.) Em bin pris da gudniuz dat God go setemap wan kingdom, o gabman, wea i go strete ol problem blo wold. a Po 31⁄2 iya, Zizas bin wok mina ad po sere dis mesiz po inkariz pipol.—Matiu 9:35.
2. Aukam Zizas bin meke dem mirikal?
Da Baibol eksplein plenti “dem mirikal, ol spesil gudsamting ane gudsain po soe yumpla God i wok tru [Zizas].” (Pas Misnare Wok 2:22) God bin gibe Zizas paua po kuaiat da strongwin ane bigsi, pide nadakain plenti pipol, ile demwan uda sik, ane meke demwan uda bin ded kamlaipgen. (Matiu 8:23-27; 14:15-21; Mak 6:56; Luk 7:11-17) Dem mirikal blo Zizas bin soe kliawan dat God bin sane em. Ane i soe, Zeoba i da wan, uda gad da paua po strete olgeda problem blo yumpla tu.
3. Wanem yumi ken lan prom demting Zizas bin mekem?
Zizas bin ebritaim obei Zeoba. (Rid Zon 8:29.) Nomata plenti pipol trai po stape em, Zizas stil bin meke ebriting em Papa aske em po mekem, rait tru laip blo em lo ert. Em bin prubem dat yumpla ken serbe God, nomata laip i ad. So, Zizas bin soe wanem po mekem, sole yumi ken “pole wei blo em.”—1 Pita 2:21.
TINGBAUT MO NAU
Lanbaut wiskain Zizas bin sere da gudniuz ane meke ol mirikal.
4. Zizas sere gudniuz
Zizas bin wagbaut mina longwei wea da drai rod, po sere gudniuz po plenti pipol ebriwea. Rid Luk 8:1, ane tokbaut dem kwestin ya:
-
Wiswei, Zizas bin pris mata po demwan, uda bin kam po lisen em a?
-
Wanem Zizas bin mekem po trai po paine pipol?
God pinis spik da Masaia go sere gudniuz. Rid Luk 4:17-19, ane tokbaut dem kwestin ya:
-
Wiskain dis spesilmesiz bin kam tru wea Zizas?
-
Wiswei, yu tingk pipol tidei nid po lisen dis gudniuz?
5. Zizas bin tise ol impotant lesen po elpe yumi
Zizas bin prisbaut da gudniuz blo da Kingdom blo God, ane em bin tise ol lesen yumi ken yuzem wea laip. Tingbaut sam dem lesen Zizas bin tisem prom antap Maunt Olibtri. Rid Matiu 6:14, 34 ane 7:12, ane tokbaut dem kwestin ya:
-
Wanem waiztok Zizas bin tisem lo dem skripsa?
-
Wiswei, yu tingk dis waiztok ken stil elpe yumi wea laip nau?
6. Zizas meke ol mirikal
Zeoba bin gibe Zizas paua sole em ken meke plenti ol mirikal. Po luk wan mirikal, rid Mak 5:25-34 o plei da BIDYO. Den tokbaut dem kwestin ya.
-
Lo da bidyo, wanem da sik oman bin prapa bilib?
-
Wanem yu bin laik baut dis mirikal?
Rid Zon 5:36, ane tokbaut dis kwestin ya:
-
Wanem dem mirikal Zizas bin mekem, prubem baut em?
Yu bin sabe a?
Plenti ol ting yumi sabebaut Zizas kam prom 4 Baibol buk, ol i kolem Gospel—Matiu, Mak, Luk, ane Zon. Ebridem raita blo dem 4 buk bin raite olkain dipren samting baut Zizas. Wen yumi ride dem 4 buk, yumi kam po luk wan spesil piksa baut laip blo Zizas.
-
MATIU
bin raite buk blo em pas. I tokbaut ol tising blo Zizas, ane da impotant mesiz em bin tis, baut da Kingdom blo God.
-
MAK
bin raite dis smol buk. I tokbaut plenti ol dedli stori wea i ken meke yu atzamp.
-
LUK
soe yumi wiskain prea bin mina impotant po Zizas ane wiskain Zizas bin trite ol oman.
-
ZON
soe ol plenti samting baut Zizas gudpasinwei, bikoz i tokbaut dem taim Zizas bin yan po ol klostupren blo em ane ol nadaman.
SAM PIPOL SPIK: “Zizas i da AntapGod.”
-
Wiswei yu tingk?
WANEM YU BI LAN
Zizas bin prisbaut da Kingdom blo God, meke ol mirikal, ane ebritaim obei Zeoba.
Wiskain Yu Go Spik
-
Wanem da mein wok blo Zizas wen em bin ya wea ert?
-
Wanem ol mirikal blo Zizas i prubem?
-
Wanem lesen Zizas bin tise yumi po yuzem wea laip?
PAINDAUT MO
Wanem da mein samting Zizas bin oltaim spikbaut?
“Godʼs Kingdom —What It Means to Jesus” (The Watchtower, October 1, 2014)
Paindaut aukam yumi ken bilib dem mirikal blo Zizas bin apen.
“The Miracles of Jesus—What Can You Learn?” (The Watchtower, July 15, 2004)
Rid wiskain laip blo wan man bin seinz, wen em bin lan wiskain Zizas bin kea baut ol nada pipol.
“My Life Was All About Me” (The Watchtower, October 1, 2014)
Luk dem mein samting Zizas bin mekem wea em amenwok, prom stat gopo pinis.
“Main Events of Jesus’ Earthly Life” (New World Translation of the Holy Scriptures, Appendix A7)
a Lesen 31-33 go tok mo baut Kingdom blo God.
Yu Mait Laik Dem Samting Ya Tu
OL KWESTIN PIPOL ASKEM
Wanem dem Baibol Stadi Lesen ol Zeoba Witnis i Gibem po Pipol?
Wea dis niu wei po stadi Baibol dat ol Zeoba Witnis i mekem, i pri, ane yu ken yuze eni Baibol yu wandem. Yu welkam po inbait pamle blo yu ane eni pren po stadi tu.
