Zeoba i God blo meke ebriting mata prapawei. (1 Korint 14:33) So, i meke sens dat em go lide ol pipol blo em wea prapawei tu. So, wiskain Zeoba yuze Zizas po lide da Kristian kongrigeisin? Ane, wanem yumi ken mekem, sole da Kristian kongrigeisin go ran prapa?

1. Uda lide da Kristian kongrigeisin?

“Kraist i lida blo da kongrigeisin.” (Episis 5:23) Prom eben, em lide da woldwaid amenwok blo ol pipol blo Zeoba. Zizas bin suze wan “waiz sleib wea i prapa trasem”​—mipla kole dis smol grup da Governing Body. Dempla i da smol Kristian elda grup uda lide dat woldwaid wok. (Rid Matiu 24:45-47 NWT.) Dis Governing Body pole wei blo dem misnareman ane elda prom bipotaim lo Zarusalem, ane lide mipla Kristian kongrigeisin woldwaid. (Pas Misnare Wok 15:2) Bat, dem man no da mein bos blo da woldwaid Zeoba Witnis grup. I Zeoba ane Wod blo em, da Baibol, dat lide dempla, ane ol redi po pole wiskain Zizas lide dempla tu.

2. Wanem da wok blo ol elda?

Ol elda i Kristian man uda i serbe Zeoba po longtaim. Dem elda tise ol pipol blo Zeoba prom Baibol, ane elp ane inkariz dempla. Ol elda no gede pei po dempla amenwok. Bat, dempla serbe God “lo gudat”, ol “no mekem po gede mani”, ol mekem bikoz dempla wande mekem. (1 Pita 5:1, 2) I gad ol ministerial servant​—sam nada amenbala, uda elpe dem elda insaid da kongrigeisin. Bambai, sam dem ministerial servant, ken kam elda tu.

Da Governing Body uda lide woldwaid wok, suze sam elda po kam circuit overseer. Demkain elda goraun po bizit ol dipren kongrigeisin lo wan eria, ane sere impotant mesiz po inkariz ol amenbala ane sisi. Dempla pole ol Baibol skripsa, po suze dem bala uda i pit po kam elda o ministerial servant.​—1 Timoti 3:1-10, 12; Taitas 1:5-9.

3. Wanem ebri Witnis mas mekem?

Ebribodi wea da kongrigeisin “preize da neim blo Zeoba.” (Rid Song blo Sam 148:12, 13.) Dasmin ol i teke pat, wen ol gibe Baibol tok, gibe ansa, sing lo da miting, ane ol gibe aumas taim ol i ken, po meke amenwok.

 TINGBAUT MO NAU

4. Zizas i wan lida uda i prapa kea

Zizas inkariz yumi po pole em. Rid Matiu 11:28-30, ane tokbaut dem kwestin ya:

• Wiskain lida i Zizas, ane wiskain em wande yumi po pil baut da wei em i lide yumi?

5. Ol elda tise yumi prom wei blo dempla

1. Ol elda lugaut demplaselp ane pamle blo dempla sole ol ken stap strong lo ol amensamting

2. Ol elda i kea po ebribodi lo da kongrigeisin

3.   Ol elda ebritaim meke amenwok

4. Ol elda i tisa. Dempla elp po klinap ane meke ol nada wok tu

6. Mipla lisen ane obei ol elda

Da Baibol gibe yumi impotant rizan po lisen po ol elda. Rid Ibrupipol 13:17, ane tokbaut dem kwestin ya:

• Aukam Baibol i spik yumi masbi redi po obei ane lisen po demwan uda lide kongrigeisin? Wanem yu tingk baut dis?

Rid Luk 16:10, ane tokbaut dis kwestin ya:

• Aukam yumi mas ebritaim obei ol elda, iben ip mipla i tingk i kasa smol samting?

 WANEM YU BI LAN

Zizas lide da kongrigeisin. Yumi api po obei ane lisen po ol elda, uda pole Zizas, bikoz ol i kea baut mipla ane tise yumi prom wei blo dempla.

Wiskain Yu Go Spik

• Uda i lida blo da kongrigeisin?

• Wiskain ol elda elpe da kongrigeisin?

• Ebribodi uda wosip Zeoba mas meke wanem?