Zizas bin tis ol Kristian mas gede baptaiz. (Rid Matiu 28:19, 20.) Wanem baptaiz i min? Ane wanem samwan mas mekem, sole ol ken gede baptaiz?

1. Wanem i min po baptaiz?

Da wod “baptaiz” kam prom Grik langus ane i min po go andanit wata. Wen Zon bin baptaiz Zizas wea da Zodan Riba, em bin go andanit wata, den em bin “kamap prom da wata.” (Matiu 3:13, 16) Seimkain wase Zizas, wen ol prapa Kristian gede baptaiz, olgeda bodi blo dempla mas go andanit wata tu.

2. Wanem i soe pipol wen samwan i baptaiz?

Wen samwan gede baptaiz, dempla soe ol i redi po gibe laip blo dempla po serbe Zeoba God. Wanem em go mekem pas, wen em redi po gibe em laip po God? Bipo em baptaiz, em meke wan spesil prea mata emselp po Zeoba, ane spik po em, dat em wande serbe Em poeba. Em promis Zeoba dat em go wosip mata Em, ane po meke wanem God i wandem, i mina prant wea laip blo em. Em meke main po “libe ebridem samting wea em i prapa laik . . . ane kip pole” tising ane wei blo Zizas. (Matiu 16:24) Wen em meke dat spesil prea po Zeoba ane baptaiz, i min em ken kam klostupren blo Zeoba ane ol amenpamle uda wosip em tu.

3. Wanem samwan mas mekem bipo em baptaiz?

Bipo yu gede baptaiz, i impotant po lanbaut Zeoba ane bilde strong bilib lo em. (Rid Ibrupipol 11:6.) Da mo yu lan ane luk bilib blo yu gro, yu go labe Zeoba mo tu. Den yu go mina wande prisbaut em ane lainap laip blo yu wea wod blo em. (2 Timoti 4:2; 1 Zon 5:3) Wen laip blo samwan “i go mata stap stret po wiskain” Zeoba i wandem, mait em go pil redi den po gibe laip blo em po God ane gede baptaiz.​—Kolosi 1:9, 10. a

 TINGBAUT MO NAU

4. Wanem yumi ken lan wen Zizas bin baptaiz

Rid Matiu 3:13-17 po lan mo baut wanem bi apen wen Zizas bin baptaiz. Den tokbaut dem kwestin ya:

• Zizas bin beibi wen em bin baptaiz a?

• Wiskain em bin baptaiz? Zon bin springkel lelbet wata wea em a?

Apta em bin baptaiz, Zizas bin stat po meke dat spesil wok God bin gibe em po mekem wea ert. Rid Luk 3:21-23 ane Zon 6:38, ane tokbaut dis kwestin ya:

• Apta Zizas bin baptaiz, wanem wok em bin putem pas wea laip blo em?

5. Yu ken gede baptaiz

Sam mait stat po woribaut wiskain ol ken gibe laip blo dempla po Zeoba ane gede baptaiz. Bat, ip yu kipgo ane lanbaut Zeoba ane sabe em mobeta, i go tekemaut da wori yu bin gad, po meke dis impotant samting wea laip blo yu. Po luk sam pipol uda bin mekem diskain, plei da BIDYO.

Rid Zon 17:3 ane Zemes 1:5, ane tokbaut dis kwestin ya:

• Wanem ken elpe samwan po bi redi po baptaiz?

1. Yumi meke wan spesil prea po Zeoba and spik em wi wande serbe em poeba

2. Wen yumi gede baptaiz, wi soe ebribodi dat wi wande serbe God poeba

 6. Wen yumi baptaiz wi gobi pat blo amenpamle blo Zeoba

Wen yumi gede baptaiz, wi gobi pat blo wan big woldwaid amenpamle uda wosip Zeoba tugeda. Nomata mipla kam prom ol dipren kantri ane ol kaltia, mipla gad seim bilib ane pole seim wod blo God wea laip blo mipla. Rid Zemes 2:23 ane 1 Pita 2:17, ane tokbaut dem kwestin ya:

• Apta samwan i baptaiz, wiskain yu tingk Zeoba go pil baut dempla? Wiskain ol amenpamle go pil baut demwan tu?

 WANEM YU BI LAN

Zizas bin tis ol Kristian mas gede baptaiz. Bipo samwan i baptaiz, dempla mas bilde strong bilib wea Zeoba, meke wanem Em wod i spik, ane gibe laip blo dempla po serbe Em.

Wiskain Yu Go Spik

• Wanem i min po baptaiz, ane aukam i impotant?

• Wanem ebribodi go sabe wen wi baptaiz?

• Wanem samwan mas mekem bipo em gibe laip blo em po Zeoba ane gede baptaiz?