Zeoba wande yumi po lanbaut pamle blo em de lo eben. I gad ol einzel wea dis pamle tu, ane dempla i “olgeda pikinini blo God.” (Zob 38:7) Wanem da Baibol spikbaut ol einzel? Wanem ol einzel mekem po pipol? Wiswei, ebridem einzel pamle blo God a?

1. Uda dem einzel?

Zeoba bin meke ol einzel pas bipo em bin meke ert. Nobodi ken luk dempla bikoz ol i spirit uda stap lo eben, wase God. (Ibrupipol 1:14) I gad plenti milion ol einzel, ane ebridem einzel gad ol dipren wei prom wananada. (Rebaleisan 5:11) Dempla “lisen oda blo [Zeoba] po mekem, ol i obei bois blo em.” (Song blo Sam 103:20) Prom bipotaim, samtaim Zeoba sane ol einzel po kare ol mesiz, po elpe pipol blo em ane seibe dempla tu. Tidei, ol einzel lide ol Kristian gopo pipol uda wande lanbaut God.

2. Uda Satana ane ol debolspirit blo em?

Sam einzel bin gense ane tanewei prom Zeoba. Da Baibol kole da pas einzel uda bin stronged, “debol o Satana, em da wan uda trike ebri pipol blo dis ert po meke ol nugudting.” (Rebaleisan 12:9) Satana bin wande ruloba ebriwan. So em trike Adam ane Ib, da pas pipol God bin mekem, ane apta, em gede ol nada einzel po zoinem wea stronged wei blo em tu. Debolspirit i nada neim blo dem nugudeinzel. Zeoba bin sakwei dempla prom eben po ert, ane dempla gobi distroi bambai.​—Rid Rebaleisan 12:9, 12.

3. Wiskain Satana ane ol debolspirit trai po trike yumi?

Satana ane dem debolspirit yuze ol wok blo dempla, wase ol maidsamting, po trike pipol. I mina nugud po trai tok po, o gede mesiz prom ol spirit. Sam wei pipol i mekem, i wen ol i gopo samwan uda stadi sta sain, o ride an blo sambodi, po paindaut wanem go apen bambai, o luk ol maidman. Nada pipol gopo mersinman po ile dempla, bat ol no sabe i wok blo dem debolspirit. Satana ane ol debolspirit trike pipol sole ol bilib ol ken tok lo ded pipol tu. Bat Zeoba gibe yumi woning: “Yu mas no go luk demwan uda tok po ol nugudspirit, ane yu mas no gopo demwan uda yuze maid po paindaut wanem go apen bambai.” (Labitikas 19:31) Em gibe yumi woning po lugaut yumi prom Satana ane dem debolspirit. Dempla i enami blo God, ane ol wande erte yumpla.

 TINGBAUT MO NAU

6. Stanap strong ane bite Satana ane ol debolspirit blo em

Satana i da rula blo dem debolspirit. Bat dem gud einzel gad Maikol, da bos einzel, po lide dempla. Maikol i wan nada neim blo Zizas. Wiskain strong paua Maikol i gad? Rid Rebaleisan 12:7-9, ane tokbaut dem kwestin ya:

• Uda gad mo paua? Maikol ane ol einzel blo em, o Satana ane ol debolspirit blo em?

• Yu tingk demwan uda pole Zizas nid po prait prom Satana ane ol debolspirit blo em?

Yu ken stanap strong gense Satana ane ol debolspirit blo em ane bite dempla. Rid Zemes 4:7, ane tokbaut dis kwestin ya:

• Wiskain yu ken lugaut yuselp prom Satana ane ol debolspirit?

 WANEM YU BI LAN

Dem gud einzel elpe mipla. Satana ane ol debolspirit blo em i enami blo Zeoba, ane dempla yuze ol nugud kastam wase maid po trike pipol.

Wiskain Yu Go Spik

• Wiskain ol einzel blo Zeoba i elpe pipol po lanbaut em?

• Uda i Satana ane dem debolspirit blo em?

• Aukam yu wande stap longwei prom eniting wea i wok blo ol debolspirit?