LESEN 25
Wanem God Wandem Po Yumi?
Baibol i rait wen i spikbaut pipol, dat ‘laip i sot ane i gad tumas trabol.’ (Zob 14:1) Wiswei, God wande diskain sot laip po yumi a? O wiswei? Wiskain laip em prapa wandem po mipla? Yu tingk i go apen a? Trai po tingbaut da ansa Baibol i gad.
1. Wiskain laip Zeoba wandem po yumi?
Zeoba wande yumi po gad prapagud laip. Wen em bin meke da pas pipol, Adam ane Ib, em pute demtu wea wan mina nais paradais, gadan blo Iden. Den “God i bin blese dempla ane God i bin spik po dempla, ‘Yupla go kam plenti ane yupla go gad plenti pikinini ebriwea lo da lan ya daun. Yupla gobi bos blo da lan ane yupla mas lugaut da lan.’” (Zenasis 1:28) Zeoba bin wande demtu po gad pikinini, po meke ert wan big paradais, ane po lugaut ol animal. Em bin prapa wande pipol po stap elti ane po gad laip poeba.
Nomata mipla nogad diskain laip tidei, a wanem God prapa wandem po yumi, no bin seinz. (Aizaia 46:10, 11) Em stil wande pipol, uda lisen ane obei em, po kese apilaip poeba wea ert.—Rid Rebaleisan 21:3, 4.
2. Wiskain yumi ken enzoi apilaip nau?
Zeoba bin meke pipol sole ol “ken lisen da mesiz blo God ane pole em,” dasmin pipol go wande sabebaut em ane wosip em. (Rid Luk 11:28; Matiu 4:4.) Em wande yumi po kam klostupren wea em, “po wagbaut wea olgeda wei blo em, po labe em,” po serbe em “wea olgeda at blo yu.” (Dutaronami 10:12; Zemes 2:23) Wen yumi mekem diskainwei, yumi ken bi prapa api nomata laip i ad. Wen yumi wosip Zeoba, em gibe yumi gud rizan po enzoi laip, ane wi pil mina rait insaid bikoz wi sabe wanem po mekem wea laip.
TINGBAUT MO NAU
Lanbaut wiskain Zeoba soe biglab wen em bin redi ert po mipla, ane wanem Baibol i tisem baut aukam yumpla ya lo ert.
3. Zeoba wande pipol po gad prapa nais laip
Plei da BIDYO, ane tokbaut dis kwestin ya.
-
Aukam God bin meke dis mina nais ert?
Rid Iklaziastis 3:11, ane tokbaut dis kwestin ya:
-
Wanem dis skripsa lane yu baut wanem Zeoba wandem po yumi?
4. Wanem Zeoba wandem po yumpla no bin seinz
Rid Song blo Sam 37:11, 29; Aizaia 55:11 ane 1 Zon 2:17, ane tokbaut dis kwestin ya:
-
Aukam yumi sabe wanem Zeoba wandem po yumpla no bin seinz?
Wan aus bin rek, bat ol ken piksemap po kamgudgen. Seimkainwei, pipol no lugaut da ert prapa, bat God go piksemap po kamgudgen, po demwan uda labem
5. Yumi go gad apilaip wen wi wosip Zeoba
Bikoz yumi sabe aukam God bin meke yumpla, wi go gad apilaip. Plei da BIDYO, ane tokbaut dis kwestin ya.
-
Wiskain i bin elpe Terumi wea laip blo em, po lan aukam God bin meke mipla?
Rid 1 Zon 5:3, ane tokbaut dis kwestin ya:
-
Bikoz Zeoba bin pinis meke plenti ol gudsamting po mipla, wanem mas mipla mekem gobaigen po eso em?
SAMWAN MAIT ASKE YU: “Aukam God bin gibe mipla laip ip mipla go ded eniwei?”
-
Wiskain yu go ansa dempla?
WANEM YU BI LAN
Zeoba wande yumi po enzoi laip poeba ya lo ert wea ebriting gobi mina nais. Wen yumi wosip em prom at, yumi pil rait insaid bikoz wi sabe wanem po mekem wea laip nau.
Wiskain Yu Go Spik
-
Aukam God bin meke Adam ane Ib?
-
Aukam yumi sabe wanem God i wandem po pipol no bin seinz?
-
Wiskain yumi ken enzoi apilaip nau?
PAINDAUT MO
Lan wanem i prubem dat da gadan blo Iden, bin wan prapa ples.
“The Garden of Eden—Myth or Fact?” (The Watchtower, January 1, 2011)
Lan aukam yumi ken sabe ert go stap ya poeba.
Paindaut wanem da Baibol spikbaut da rizan mipla i ya.
Luk wiskain wan man bin tingk em gad ebriting, bat em paindaut samting i mising wea laip blo em.
a Lo da neks lesen, yu go lan wanem rong bin apen.
Yu Mait Laik Dem Samting Ya Tu
OL KWESTIN PIPOL ASKEM
Wanem dem Baibol Stadi Lesen ol Zeoba Witnis i Gibem po Pipol?
Wea dis niu wei po stadi Baibol dat ol Zeoba Witnis i mekem, i pri, ane yu ken yuze eni Baibol yu wandem. Yu welkam po inbait pamle blo yu ane eni pren po stadi tu.
