Bikoz da pas man ane oman, Adam ane Ib, no bin lisen po God, yumpla gad sin, sapa ane ded. a Bat, i gad wei po kamaut prom dis trabol. Zeoba bin sane Boi blo em, Zizas Kraist, kam po ert po pri mipla prom sin ane ded. Da Baibol i tis dat Zizas bin gibe laip blo em lo wan sakripais. Diskain sakripais i wase da prais samwan mas pei po pri sambodi prom trabol. So, Zizas, uda gad no sin, bin pei dis prais wea laip blo em. (Rid Matiu 20:28.) Zizas bin wiling po gibap em rait po stap laip poeba lo ert, sole ebriting Adam ane Ib bin luzem, go kambaigen po yumpla. Zizas mina soe wiskain em ane Zeoba i labe yumi. Dis lesen go elpe yumi prapa sabe wiskain yumi mas eso demtu po ded blo Zizas.

1. Wiskain ded blo Zizas elpe yumi nau?

Bikoz yumpla ebriwan gad sin, wi go meke plenti rong samting dat go erte Zeoba. Bat, ip yumi pil prapa sore po meke dem sin, wi ken prea po Zeoba, wea neim blo Zizas Kraist, po pogibe yumi. Den, ip wi traiad po no meke dem seim rongting, wi gobi klostupren wea God. (1 Zon 2:1) Da Baibol spik: “Kraist . . . bin ded wantaim po ol dem rongting wea ol pipol i bin mekem. Em no bin meke no wan sin, bat em bin ded po ebribodi solong em ken teke yupla kam seipwan po God.”​—1 Pita 3:18.

2. Wanem go apen bambai bikoz Zizas bin ded po yumi?

Zeoba bin sane Zizas, uda gad no sin, po sakripais laip blo em “solong ebriwan uda i mata bilib wea [Zizas] nogo mata stap ded, bat go gad longlaip poeba.” (Zon 3:16) I no long nau, Zeoba go tekemaut ebridem nugudting yumi gad prom sin blo Adam bikoz Zizas bin meke dis impotant samting. Dasmin, ip yumi soe strong bilib lo sakripais blo Zizas, mipla go gad sans po kese apilaip poeba lo paradais ert!​—Aizaia 65:21-23.

 TINGBAUT MO NAU

3. Ded blo Zizas pri yumi prom sin ane ded

1. 1. Adam bin gad nating rong wea main ane bodi antil em bi sin gense God ane lide pipol po da rod blo sin ane ded

2. 2. Zizas bin gad nating rong wea main ane bodi, em bi mata obei God ane lide pipol po da rod wea ol nogo gad sin enimo ane ken stap laip poeba

4. Ded blo Zizas ken elpe ol pipol

 5. Sakripais blo Zizas i gipt prom Zeoba po yu

Ol pren blo Zeoba pil da sakripais blo Zizas i wan spesil gipt po dempla. Po luk samwan uda pil demkain, rid Galasia 2:20 NWT, ane tokbaut dis kwestin ya:

• Wanem misnareman Pol bin spik po soe da sakripais blo Zizas i wan spesil gipt, po em?

Wen Adam bin sin, em ane ebri pikinini blo em mas sabe ded. Bat, Zeoba sane Boi blo em po ded sole yu go gad sans po kese apilaip poeba.

Wen yu ride dem skripsa ya tingbaut wiskain Zeoba masbi pil wen Boi blo em bi sapa. Rid Zon 19:1-7, 16-18 NWT, ane tokbaut dis kwestin ya:

• Wiskain yu pil baut wanem Zeoba ane Zizas bin mekem po yu?

 WANEM YU BI LAN

Bikoz Zizas bin sakripais laip blo em, Zeoba ken pogibe sin blo yumi, ane yumi gad sans po kese apilaip poeba.

Wiskain Yu Go Spik

• Aukam Zizas bin ded?

• Aukam Zizas i da raitwan po seibe mipla prom sin ane ded?

• Wiskain ded blo Zizas go elpe yu?