LESEN 37
Wanem Baibol Spikbaut Wok ane Mani
Wiswei, yu samtaim woribaut wok o gede mani a? I ken bi nadakain ad po gede wanem yu nid po lukapta yuselp ane pamle, den seimtaim gibe prapa wosip po Zeoba, no kasawan. Da Baibol gibe plenti waiztok po elpe yumi.
1. Wanem Baibol spikbaut wok?
God wande yumi po enzoi da wok yumi ken mekem. Da Baibol spik that “i gad nating beta po man uda go . . . pilgud insaid prom adwok em mekem.” (Iklaziastis 2:24) Zeoba wok ad. Wen wi pole wei blo em ane pute main wea wok, yumi go plize em ane pilgud insaid tu.
Wok i impotant. Bat yumi mas no meke wok mo impotant den wosip blo Zeoba. (Zon 6:27) Wen yumi pute Zeoba pas, em promis po gibe yumi wanem wi nidem, wase kaikai ane klos.
2. Wiskain Baibol tokbaut mani?
I tru, dat da Baibol i spik “mani ken lukapta man,” bat Baibol gibe yumi woning tu, dat i no mata mani wi nidem po bi api. (Iklaziastis 7:12) Baibol inkariz yumi no po labe mani, bat po “mata pilgud po wanem yupla i gad nau.” (Rid Ibrupipol 13:5.) Wen yumi pilgud, o api baut wanem wi gad nau, i stape yumi prom obamak wori po wande mo ane mo samting, tingking wi nogad nap. Yumi trai no po owe mani po enibodi, wase det. (Proberb 22:7) Ane yumi no gambol po mani, bambai i go trape mipla, o lisen po ol geman tok po meke bigmani kuikwan po kam ris.
3. Wiskain yumi ken yuze mani po elpe nada pipol?
Zeoba i God uda soe obamak gudpasin, ane yumi pole wei blo em, wen yumi “ebritaim redi po sere ol samting wea ol nada pipol.” (1 Timoti 6:18) Yumi ken sere mani wi gad lo gudat, po sapot da kongrigeisin. Yumi ken elpe dempla uda nide samting, ane meikso ol amenpamle i gad nap samting tu. Zeoba no woribaut aumas wi serem, bat em tekenotis wanem ubi yumi gad po gibe samting. Wen wi gibe samting po sambodi prom gudat, yumi gobi api ane Zeoba gobi api wea yumi tu.—Rid Pas Misnare Wok 20:35.
TINGBAUT MO NAU
Luk wiskain i gud po yumi po tingbaut wok da prapawei ane wanem yu gad i nap po stap api.
4. Da wei yu wok go gibe ona po Zeoba
Bikoz yumi pren lo Zeoba, wi go wande pole tingking blo em, wen yumi wok. Plei da BIDYO, ane tokbaut dem kwestin ya.
-
Lo da bidyo, wanem yu tekenotis baut tingking blo Jason wea wok blo em, ane wiskain pasin em bin soem?
-
Wanem Jason bin mekem, sole em tingbaut wok da prapawei?
Rid Kolosi 3:23, 24 NWT, ane tokbaut dis kwestin ya:
-
Aukam da wei yumi pil baut wok, i impotant?
Wok i impotant. Bat yumi mas no meke wok mo impotant den wosip blo Zeoba
5. I gud po yumi po bi api wea wanem wi gad
Plenti pipol trai po gede tumas mani. Bat da Baibol tise samting dipren. Rid 1 Timoti 6:6-8, ane tokbaut dis kwestin ya:
-
Wanem Baibol inkariz yumi po mekem?
Nomata mipla mait gad mina lelbet mani, wi ken stil bi api. Plei da BIDYO, ane tokbaut dis kwestin ya.
-
Wanem bin meke dem pamle api, nomata ol gad lelbet mani?
Bat wotip yumi gad plenti samting, bat stil gridi po wande mo? Zizas bin tokbaut wan stori wea i soe diskain tingking ken erte mipla. Rid Luk 12:15-21, ane tokbaut dis kwestin ya:
-
Wanem dis stori blo Zizas lane yu?—Rid Luk 12:15.
Rid ane tingbaut wanem yu lan prom Proberb 10:22 ane 1 Timoti 6:10. Den tokbaut dem kwestin ya:
-
Wanem yu tingk i mo impotant? Yu wande bi klostupren blo Zeoba o wande plenti mani? Aukam?
-
Wanem problem yu go gad ip yu mata wande mo ane mo mani?
6. Zeoba go gibe wanem yumi nidem
Wen wi gad ol problem wea wok o ip mipla nogad nap mani, i ken elpe yumi sabe ip wi prapa trase Zeoba. Plei da BIDYO po luk wanem po mekem wen demkain problem kamap. Den tokbaut dem kwestin ya.
-
Lo da bidyo, wanem problem dis bala bin gad?
-
Wanem em bin mekem sole em ken kipgo nomata dem problem bin ad?
Rid Matiu 6:25-34, ane tokbaut dis kwestin ya:
-
Wanem Zeoba promis em go mekem, po demwan uda meke wok blo em nambawan samting wea laip?
SAM PIPOL SPIK: “Ai mas wok ad po lugaut pamle blo mi. Ai kan gopo ebri amenmiting ebri wik.”
-
Wanem skripsa elpe yu po prapa sabe, Zeoba mas gibe yu wanem yu nidem, wen mipla meke wosip blo em nambawan?
WANEM YU BI LAN
Wok ane mani i impotant, bat demting mas neba teke yumi longwei prom Zeoba.
Wiskain Yu Go Spik
-
Wanem ken elpe yu po tingbaut wok da prapawei?
-
Aukam i elpe yu po bi api wea wanem yu gad nau?
-
Wiskain yu ken soe yu trase Zeoba, wen em promis yu, em go gibe yu wanem yu nid?
PAINDAUT MO
Lan ip Baibol spik mani i nugud.
Lan wiskain wi ken gibe mani blo yumi po plize God.
Wiswei, i orait po gambol a?
Paindaut wanem bin meke wan man seinze laip blo em, sole em nomo stil ane stap prom gambol.
“I Was Passionate About Racehorses” (The Watchtower, November 1, 2011)
Yu Mait Laik Dem Samting Ya Tu
OL KWESTIN PIPOL ASKEM
Wanem dem Baibol Stadi Lesen ol Zeoba Witnis i Gibem po Pipol?
Wea dis niu wei po stadi Baibol dat ol Zeoba Witnis i mekem, i pri, ane yu ken yuze eni Baibol yu wandem. Yu welkam po inbait pamle blo yu ane eni pren po stadi tu.
