Zeoba wande yumi po enzoi laip ane po meke taim po kam tugeda po ol nais pati tu. Bat wiswei, ebridem pati, pisting, o pestabol plize em a? Wiskain yumi ken soe yu labe Zeoba, wen i kam po demkainting?

1. Aukam sam pati o pestabol no plize Zeoba?

Mait yu go atzamp po sabe, i gad plenti pestabol o bigpati wea i kam prom laia rilizan o ol dipren aidia wea Baibol spik i rong. Sam pestabol o bigpati pole wok blo ol debolspirit. Den, sam nadawan, i pole kastam po lugaut samwan apta ol i pasawei​—dem kastam i kam prom da rong tising dat laip i kipgo wea spirit ples. Wea ailan, sam pipol meke pisting bikoz ol i prait samting nugud go apen po dempla, ip ol no pole dat kastam. (Aizaia 65:11) Zeoba wone demwan uda wosip em: “Stap longwei prom dempla. No tase eni dem nugudting blo dempla.”​—2 Korint 6:17. a

2. Wiskain Zeoba pil baut ol pati o pestabol wea i gibe obamak ona po samwan?

Zeoba wone yumi po no laue tingking po trape yumi po “soe tras wea geman man.” (Rid Zeramaia 17:5.) I gad sam spesil dei o holiday, wea i gibe ona, po rimemba ol rula o man uda bi gopo woa. Sam nada dei o pestabol, pipol mekem spesil, bikoz ol praud baut uda dempla ane wosip flag blo kantri blo dempla. (1 Zon 5:21) Pipol mak sam nada dei, po ona wan man o grup wea ol pait po rait blo dempla o po samting ol bilib. Wiskain yu tingk Zeoba go pil, ip yumi gibe ona wea i obamak, po samwan o wan grup, ane ol i sapot aidia wea i go gense tingking blo Em?

3. Wanem pasin i kamaut wea sam pati o pestabol wea i rong?

Da Baibol soe i eite “tumas big pati, drongk, [ane] meke wail pati.” (1 Pita 4:3) Wea sam pestabol o bigpati, pipol go sili, ane ol no stape demplaselp prom pole ubi blo dempla, ane ol meke dati samting wase bane ai ane deilait. Po stap pren wea Zeoba, yumi mas stap longwei prom demkain nugudwei wea i no klin.

 TINGBAUT MO NAU

 5. Elpe nada pipol po rispekt wanem yu bilib

6. Zeoba wande yumi po bi api

Zeoba wande yumi po enzoi nais taim wea pamle ane pren blo yumi. Rid Iklaziastis 3:12, 13, ane tokbaut dis kwestin ya:

• Wiskain dis skripsa soe Zeoba wande yumi po bi api?

Zeoba wande pipol blo em po plei ane sabe pan, ane enzoi ol nais taim tugeda. Plei da BIDYO po luk pipol prom ol dipren kantri mina enzoi demplaselp, wen ol kam tugeda po dem big amenmiting blo mipla.

Rid Galasia 6:10, ane tokbaut dem kwestin ya:

• Wiswei, mas yumi zoin ol pati ane dei wea i impotant po pipol, po soe wi “elpe” dempla?

• Wanem go meke yu moapi: Ip yu pil yu mas gibe samting bikoz i kastam blo dat dei, o, ip i ubi blo yu po wande gibe samting?

• Plenti ol Witnis samtaim meke nais pati po pikinini blo dempla ane samtaim sapraiz dempla wea ol gipt. Ip yu gad pikinini, wanem sam spesil samting yu ken mekem po dempla?

 WANEM YU BI LAN

Zeoba wande yumi po enzoi nais taim wea ol pamle ane pren. Bat, em wande yumi po stap longwei prom dem pati o pisting wea em no laik tu.

Wiskain Yu Go Spik

• Wanem kwestin mait wi aske miplaselp, po paindaut ip Zeoba no laik wan pati o pisting o pestabol?

• Wen i kam po dem dipren dei, wiskain yumi ken elpe ol pamle ane pren, po sabe wanem wi suzem?

• Wiskain yu sabe Zeoba wande yumi po plei ane sabe pan, ane bi api?