Ol klostupren mina meke laip blo yumi moapi, bikoz ol de tru ol gud taim ane gibe yumi strong tru dem adtaim. Bat da Baibol wone yumi, ebriwan no gobi gudpren. So wiskain yu ken suze ol gudpren? Tingbaut dem kwestin ya daun.

1. Wiskain ol pren yu suzem ken lide o slu yu?

Yumi go tingk ane akt wase dem pipol wi angraun. I ken bi gud o bad po yumi—wa, nomata wi spene taim tugeda wea dempla, o tok onlain. Da Baibol spik, “demwan uda wagbaut wea waiz pipol gobi waiz tu, bat, trabol go kese demwan uda pole dem stupitwan [demwan uda no labe Zeoba].” (Proberb 13:20) Ol pren uda lab ane wosip Zeoba ken elpe yu po stap klostu po em ane elpe yu suz po pole da raitwei. Bat, wen wi gad klostupren ausaid da kongrigeisin, uda no labe Zeoba, ol ken lide yumi go longwei prom em. Daswai Baibol inkariz yumi po prapa tingbaut uda wi wandem po bi pren blo yumi! Wen ol pren blo yumi labe God, i gobi mina gud po yu ane dempla tu. Yumi ken “tok gudwei po wananada. Meke bilib blo wananada po kam mostrong.”—1 Tesalonika 5:11.

2. Wiskain Zeoba go pil baut dem pren yu suzem?

Zeoba suze uda em wandem po bi pren blo em. “Em klostupren i demwan uda i gad raitwei.” (Proberb 3:32) Wiskain Zeoba go pil ip yumi suze ol pren uda no labe em? Em go pil nadakain apset a! (Rid Zemes 4:4.) Bat, Zeoba gobi api ane suz mipla po bi pren blo em, solong wi tanewei prom ol bad pren, ane em luk mipla trai po go klostu po em ane demwan uda labe em.—Song blo Sam 15:1-4.

 TINGBAUT MO NAU

4. Olkain dipren pipol ken bi gudpren blo yumi

Da Baibol tokbaut Deibid ane Zonatan, tu man uda bin stap lo Izrael bipotaim. Zonatan bin mo oul den Deibid ane em bin boi blo da king, bat demtu stil bin mina klostupren. Rid 1 Samuel 18:1, ane tokbaut dis kwestin ya:

• Aukam pren blo yumi ken kam prom ol dipren eiz, o kaltia, o ken bi risman o poaman?

Rid Rom 1:11, 12, ane tokbaut dis kwestin ya:

• Wiskain ol pren uda labe Zeoba, i go inkariz wananada?

Lo dis bidyo, luk wiskain i bin sapraize wan yangbala, wea em bin gede pren. Plei da BIDYO, den tokbaut dem kwestin ya.

• Lo da bidyo, aukam mam ane dad blo Akil bin woribaut uda em angraun lo skul?

• Aukam em bin laik po angraun demkain pren pas?

• Wanem bin elpe em po nomo pil slaik bikoz em mata emselp?

 5. Wiskain po paine ane kipe ol gudpren

 WANEM YU BI LAN

Wen yumi prapa tingbaut uda wi suz po bi klostupren, wi meke Zeoba api ane i gobi gud po yumi tu.

Wiskain Yu Go Spik

• Aukam dem pren wi suzem i impotant po Zeoba?

• Wiskain pipol wi nogo suzem po bi pren blo yumi?

• Wiskain yu ken kam prapa klostupren wea pipol uda labe Zeoba?