LESEN 55
Elpe Kongrigeisin Blo Yu
Oloba da wold, i gad plenti milion pipol uda wosip Zeoba apiwan lo plenti tauzen kongrigeisin. Dempla mina api po gede gudtising ane adbais de, so, tru ol diprenwei, ol soe ol redi po gibe sapot wea da kongrigeisin gobaigen. Wiswei, yu pil demkain baut kongrigeisin blo yu tu a?
1. Wanem sam wei yu ken yuze taim ane strong blo yu, po elpe da kongrigeisin?
Yumi ebribodi ken elp insaid da kongrigeisin. So, trai tingbaut ip i gad sam oul o sikpipol wea kongrigeisin blo yu? Ken yu elp pikemap dempla go amenmiting? O ken yu elpe dempla kate gras, teke dempla go sop, o elp kline aus o eniting wase laidat? (Rid Zemes 1:27.) Mipla ken go ane elp klinap po kipe Kingdom Aus nais ane piksemapem tu. Nobodi pose yumi po meke demting. I lab po God ane ol amenpamle blo mipla dat mube yumi po tok diskain, “I gad mi ya! Sane mi!”—Aizaia 6:8.
Ol Zeoba Witnis uda baptaiz ken sapot da kongrigeisin lo nadawei tu. Amenbala uda pole Baibol skripsa po kam ministerial servant ane bambai elda, ken elp da kongrigeisin. Ol bala ane sisi mait laik po pute ekstra taim po meke amenwok, wase pioneer. Sam Zeoba Witnis ken elp po bilde ol Kingdom Aus o mub gopo nada ples wea ol ken elp dem kongrigeisin lo nadawei.
2. Wiskain mipla ken yuze mani o samting wi gad, po elpe da kongrigeisin?
Yumi ken “ona Zeoba wea dem gudsamting blo [mipla].” (Proberb 3:9) Yumi pil api po gibe mani ane ol nada samting po sapot da kongrigeisin ane da woldwaid amenwok. (Rid 2 Korint 9:7.) Dem doneisin yumi gibem ken elp yumi amenpamle wen ertseik, pladwata, buspaia o bigwin damiz sam ples. Plenti amenbala ane sisi suz po “pute sam mani wansaid” po gibem wen ol ken. (Rid 1 Korint 16:2.) Yumi ken pute doneisin insaid mani boks wea Kingdom Aus o mekem onlain wea donate.pr418.com. Zeoba gibe yumi sans po soe lab blo yumi po em, wen wi tingbaut wiskain wi wande yuze samting blo mipla.
TINGBAUT MO NAU
Tingbaut sam wei yu ken elpe da kongrigeisin.
3. Yumi ken gibe ol samting wi gad
Zeoba labe dempla uda gibe samting prom gudat ane Zizas pile da seimwei tu. Wase dat taim, Zizas tekenotis wan poa widooman uda bin gad lelbet mani bat stil bin gibe samting po Zeoba. Rid Luk 21:1-4, ane tokbaut dem kwestin ya:
-
Wiswei, yumi nid po gibe plenti mani po plize Zeoba?
-
Wiskain Zeoba ane Zizas pil wen wi wande gibe samting prom at blo mipla?
Po lan wiskain ol Zeoba Witnis yuze da mani wi gibem, plei da BIDYO. Den tokbaut dis kwestin ya.
-
Wiskain ol Zeoba Witnis yuze dem doneisin po elpe ol kongrigeisin raun da wold?
4. Redi yuselp po gibe elp
Bipotaim, demwan uda wosip Zeoba wok ad po lugaut da ples wea ol i wosip. Bat i bin nide moden mani po lugaut em. Rid 2 Kronikal 34:9-11, ane tokbaut dis kwestin ya:
-
Wanem ebribodi wea Izrael bin mekem po elp lugaut aus blo Zeoba, wea ol wosip?
Po luk wiskain ol Zeoba Witnis pole dat seimwei wase dempla prom bipotaim, plei da BIDYO. Den tokbaut dem kwestin ya.
-
Aukam i impotant po meikso Kingdom Aus blo mipla i nais ane klin ane stap seip?
-
Wanem sam wei yu ken elp?
5. Ol bala ken meke ekstra wok lo kongrigeisin
Da Baibol inkariz ol Kristian bala po traiad po meke ekstra wok po sapot ane elpe da kongrigeisin. Po luk wan wei ol ken mekem, plei da BIDYO. Den tokbaut dis kwestin ya.
-
Lo da bidyo, wiskain Ryan bin traiad po wok mo po elpe da kongrigeison mo?
Da Baibol eksplein wanem ol bala mas mekem pas po lainap po kam ministerial servant o elda. Rid 1 Timoti 3:1-13, ane tokbaut dem kwestin ya:
-
Ol bala uda wande bi ministerial servant o elda spostu soe wanem wei o pasin?
-
Wanem pasin pamle blo dempla spostu soem tu?—Rid 1 Timoti 3:4 ane 11.
-
Wen ol bala wok ad po pole wanem Baibol spik ol mas mekem, wiskain i gud po ebribodi wea kongrigeisin?
SAMWAN MAIT ASKE YU: “Wiskain ol Zeoba Witnis gede mani po meke wok blo dempla?”
-
Wiskain yu go ansa?
WANEM YU BI LAN
Zeoba i mina api wen wi elpe da kongrigeisin wea taim wi gibem, strong wi gad o yuze ol samting blo mipla tu.
Wiskain Yu Go Spik
-
Wiskain wi ken yuze taim ane strong blo mipla po elpe da kongrigeisin?
-
Wiskain wi ken yuze mani o samting blo mipla po elpe da kongrigeisin?
-
Wiskain wei yu wande elp ane sapot da kongrigeisin?
PAINDAUT MO
Paindaut aukam God nomo aske ol pipol blo em po gibe tithe wase taksmani po em.
Baibol soe sam wok lo da kongrigeisin i po baptaiz bala po mekem. Bat wiswei, wotip wan baptaiz sisi nid po meke dat wok?
“Understanding Headship in the Congregation” (The Watchtower, February 2021)
Mite sam amenbala uda no prait prom deinza wen ol teke ol Baibol buk po dempla amenpamle.
Paindaut wiskain da wei mipla gede doneisin mani i mina dipren prom ol nada rilizan.
“How Is the Work of Jehovahʼs Witnesses Financed?” (Web article)
Yu Mait Laik Dem Samting Ya Tu
OL KWESTIN PIPOL ASKEM
Wanem dem Baibol Stadi Lesen ol Zeoba Witnis i Gibem po Pipol?
Wea dis niu wei po stadi Baibol dat ol Zeoba Witnis i mekem, i pri, ane yu ken yuze eni Baibol yu wandem. Yu welkam po inbait pamle blo yu ane eni pren po stadi tu.
