Wen yumi midel wea ol amenpamle, mipla pil seimkain wase King Deibid bin pil: “I prapa gud ane prapa swit po ol bala po kam tugeda wase wan pipol!” (Song blo Sam 133:1) Mipla amenpamle miks ane wok tugeda lo pis, bat, i no kasa apen. Yumi ebribodi mas sabe wiskain po elp, po kipem laidat.

1. Wanem meke yu atzamp baut pipol blo God?

Ip yu gopo wan amenmiting lo nada kantri, mait yu nogo sabe langus blo dempla, bat yu go pil mina rait ane welkam de wea dempla. Aukam? Bikoz, oloba da wold, mipla yuze dem seim buk ane magazin po stadi Baibol. Ane, mipla traiad po soe lab po wananada tu. Nomata wea wi stap, mipla ebribodi “go kole neim blo Zeoba, po serbe em solda po solda.”—Zepanaia 3:9.

2. Wanem yu ken mekem po elpe amenpamle wok tugeda lo pis?

“Yupla mas soem dat yupla prapa lab wananada wea pul at blo yupla.” (1 Pita 1:22) Wiskain yumi ken pole dis adbais? Wel, no mata tingbaut da badpasin blo sambodi, bat luk po da gudpasin ol gad. Ane, trai kam po sabe mobeta dem bala ane sisi prom ol dipren kaltia o langus, no mata spene taim wea demwan uda laik dem seimkainting wase yu. Ip yumi kare eni nugudpiling baut pipol uda i dipren prom mipla, den wok ad po tekemaut demkain piling.—Rid 1 Pita 2:17. a

3. Wanem yu go mekem wen yu ane nada Kristian i smol rong?

Nomata mipla i wan amenpamle uda miks ane wok tugeda, mipla stil meke misteik. Samtaim wi ken meke samwan apset o iben erte wananada. So Wod blo God spik yumi, “yupla mas pogibe dempla,” bikoz yumi rimemba wad, “[Zeoba] i bin pogibe yupla, so yupla mas pogibe dempla.” (Rid Kolosi 3:13.) Yumi oltaim meke plenti misteik po erte Zeoba, bat em stil pogibe yumi. So, i meke sens em wande yumi po pogibe yumi bala ane sisi. Ip yu rilaiz yu bin rong sambodi, yu ken soe gudpasin ane go luk dempla pas po meke pis ane strete wanem bin apen.—Rid Matiu 5:23, 24. b

 TINGBAUT MO NAU

4. Sakwei ol nugudpiling baut pipol

Yumi wande soe lab po ebri bala ane sisi. Bat mait wi stragal po laik samwan uda i dipren prom mipla. Wanem ken elpe yumi? Rid Pas Misnare Wok 10:34, 35, ane tokbaut dem kwestin ya:

• Zeoba wande ol diprenkain pipol po kam Witnis blo em. So nau, ip samwan gad dipren kaltia o langus prom yu, wanem prapa tingking yu mas gad baut dempla?

• Wea yu stap, wanem nugud tritment pipol soem po nada pipol de? Aukam yumi no soe demkain pasin?

Rid 2 Korint 6:11-13, ane tokbaut dis kwestin ya:

• Wiskain yu ken lan po soe mo ane mo lab po ebridem bala ane sisi blo yumi?

5. Bi redi po pogib ane strete problem po kipe pis

Zeoba no meke eni rong, so em neba nid po spik sore po mipla, bat em wiling po pogibe yumi wen wi meke rong samting. Rid Aizaia 55:7, ane tokbaut dem kwestin ya:

• Wanem yu lanbaut da wei Zeoba pogibe yumi?

• Aukam i meke yu pilgud po sabe Zeoba pogibe yu?

• Wanem ken mekem ad po kipe pis ane stape yu prom wande angraun samwan?

Wiskain yumi ken pole seimkain pasin wase Zeoba sole wi kipe pis ane wok longsaid yumi bala ane sisi? Rid Proberb 19:11, ane tokbaut dis kwestin ya:

• Wotip samwan meke yu wail o apset yu, wanem yu ken mekem po trai strete da problem?

 Samtaim mipla ken meke samwan wail. Ip diskainting apen, wanem yu go mekem? Plei da BIDYO, den tokbaut dis kwestin ya.

• Lo da bidyo, wanem da sisi bin mekem po strete da problem ane meke pis?

 WANEM YU BI LAN

Yu ken elpe da kongrigeisin po wok tugeda wase wan pipol lo pis, wen yu pogibe ane soe lab po olgeda amenbala ane sisi blo yu.

Wiskain Yu Go Spik

• Wiskain yu ken tekemaut eni nugud tingking yu karem, baut pipol uda yu pil i dipren prom yu?

• Wanem yu go mekem ip yu gad smol rong wea nada bala o sisi?

• Wiswei, yu wande pole da wei Zeoba pogibe pipol a?