Nomata yu mina labe Zeoba ane yu traiad po stap longwei prom eniting dat ken erte em, yu samtaim ken meke rong samting. Bat, i gad sam sin wea i mina bad, moden nada sin. (1 Korint 6:9, 10) Ip yu meke mina bad sin, trai rimemba dat Zeoba stil labe yu, em no tane baik blo em, wa, em redi po pogibe yu ane elpe yu.

1. Wanem yumi mas mekem sole Zeoba ken pogibe yumi?

Demwan uda rilaiz ol bin meke bad sin, pil mina sore bikoz ol lab Zeoba. Bat dempla ken pilgud po sabe dis promis blo Zeoba: “Nomata ol sin blo yupla i wase brait red kala, i go kam wait wase sno.” (Aizaia 1:18) Ip yumi pil mina sore, Zeoba go prapa pogibe yumi. Wanem yu go mekem po soe yu pil nadakain sore? Wel, dat nadakain sore wi pil go stape yumi prom meke dem rongting gen, ane wi prea po Zeoba po pogibe mipla. Den, mipla mas seinze da rong tingking o pasin dat bin slu yumi po sin, ane wi trai po pole dem klinwei blo Zeoba wea laip tu.—Rid Aizaia 55:6, 7.

2. Wiskain Zeoba yuze ol elda po elpe yumi wen wi sin?

Ip mipla meke bad sin, Zeoba spik mipla po “singaut dem elda blo da kongrigeisin.” (Rid Zemes 5:14, 15 NWT.) Dem elda labe Zeoba ane labe demwan uda serbe em tu. Zeoba bin tise dem elda wanem po mekem po elpe mipla wen wi sin, sole wi ken strete dat rong ane kam rait gen wea Zeoba.—Galasia 6:1.

Wiskain dem elda ken elpe mipla ip wi bin meke bad sin? Tu o tri elda ken yuze skripsa prom Baibol po soe yumi aukam wanem mipla bin mekem i rong. Dempla ken gibe yumi gud adbais sole wi no meke dat bad sin gen. Demwan uda meke bad sin ane kipgo ane no pil sore po dat rongting ol mekem, dem elda go spik ol kan bi pat blo da kongrigeisin. I go kipe da kongrigeisin seip prom eniting dat ken spoile mipla amenpamle.

 TINGBAUT MO NAU

3. Tok gar, no aide sin, po kam orait wea Zeoba gen

Eni sin wea yumi mekem i erte Zeoba, so i meke sens po konpes o tok po em ane no kipem sikret. Rid Song blo Sam 32:1-5, ane tokbaut dis kwestin ya:

• Aukam i gud po tokbaut dem sin blo yumi po Zeoba, ane no trai aidem prom em?

 4. Zeoba soe sorepasin po ol sina

Ip samwan meke bad sin, ane ol no wande seinz ane pole raitwei blo Zeoba, em kan bi pat blo da kongrigeisin, ane mipla no angraun dempla. Rid 1 Korint 5:​6, 11, ane tokbaut dis kwestin ya:

• Wase lelbet yis ken meke bred dou swelap, wanem go apen po mipla amenpamle ip wi laue samwan uda no wande seinz, po stap insaid da kongrigeisin?

Wen yumi tingbaut da wei Zeoba trite ol sina, wiskain i soe em gad peawei, em soe lab ane sorepasin?

 WANEM YU BI LAN

Ip yumi meke bad sin, bat pil prapa sorewan ane wande stap prom meke dis nugud samting, Zeoba go pogibe yumi.

Wiskain Yu Go Spik

• Aukam i gud po tok po Zeoba baut sin blo yumi?

• Wanem yumi mas mekem sole Zeoba go pogibe sin blo yumi?

• Ip wi meke bad sin, aukam yumi mas gopo dem elda po gede elp?