Ol prapa Kristian no laue eniwan o eniting po kam midel wea dempla wosip po Zeoba. Wi sabe yu pil diskain tu. Zeoba mina tekenotis wiskain yu no wande libe em. (Rid 1 Kronikal 28:9.) Wanem ting ken kamap, po mekem ad po yu po stap longsaid Zeoba, ane wanem ken elpe yu?

1. Wanem sam pipol go mekem, sole wi mait tanewei prom Zeoba?

Sam pipol go traiad po stape yu prom serbe Zeoba. Uda ken meke demkain badting? Sam pipol uda bin tanewei prom wosip Zeoba wande mesap bilib yumi gad, so dempla tise lai baut da pipol God i yuzem po meke amensamting blo em. Demkain pipol i apostate, ol libe Zeoba ane meke demplaselp enami blo em. Ane, sam lida blo rilizan sprede laistori baut ol Zeoba Witnis po kese demwan uda no rilaiz i trap, po stape pipol prom serbe Zeoba. I no seip po trai agiu wea demkain nugudpipol o ride buk o onlain mesiz blo dempla, o gopo websait o bidyo ol mekem. Zizas bin tokbaut demkain pipol uda trai teke yumi prom serbe Zeoba, ane em spik diskain baut dempla: “No lisen po dempla. Dempla blain ane uda dem pipol i go pole dempla i blain tu. Yupla sabe ip wan blainman i go lide nada blainman, demtu tu i go poldaun insaid lo oll.”—Matiu 15:14.

2. Wanem yu go suzem, po soe yu mata wande stap longsaid Zeoba?

Lab po Zeoba go mube yumi po no meke eniting tugeda wea laia rilizan. So eniting wi mekem, wase wok o grup wi zoinem, kan miks wea laia rilizan tu. Zeoba wone mipla: “Mai pipol, yupla kamaut prom [Big Siti Babilon].”—Rebaleisan 18:2, 4.

 TINGBAUT MO NAU

3. Lugaut prom laitisa

Wanem yu go mekem ip yu lisen ol nugudtok baut pipol blo Zeoba? Rid Proberb 14:15, ane tokbaut dis kwestin ya:

• Aukam wi mas meikso wi no bilib ebriting wi lisen?

Rid 2 Zon 9-11, ane tokbaut dem kwestin ya:

• Wiskain wi mas trite dem apostate uda gense God ane pipol blo em?

• Nomata wi no tok po demkain nugudpipol, wanem sam nadawei ol aidia blo dempla ken kam insaid laip blo mipla?

• Wiswei yu tingk Zeoba go pil ip yumi stat po lisen eni nugudtok baut em o pipol blo em?

4. Stap longsaid God wen Kristian i sin

Ip wi paindaut sambodi lo kongrigeisin bin meke bad sin, wanem yumi mas mekem den? Baibol soe tingking blo God wea da Lo em gibem po dem pipol blo Izrael. Rid Labitikas 5:1.

Wase dis skripsa i spik, ip wi paindaut samwan bin meke bad sin wi mas spik dem elda wanem wi sabe. Bat, bipo yu tok po dem elda, i gud po gopo da samwan uda bin meke da rongting pas ane trai gede em po spik dem elda baut da sin ol bin mekem. Ip em no mekem emselp, lab po Zeoba go mube mipla po tok po dem elda baut wanem wi sabe. Wiskain dis wei po strete disting, soe wi labe . . .

• Zeoba God?

• datwan uda bin sin?

• ol amenpamle lo da kongrigeisin?

 5. No zoine Big Siti Babilon

 WANEM YU BI LAN

Yumi mas tekesaid blo Zeoba ane stap longwei prom eniwan uda trai po trape yumi.

Wiskain Yu Go Spik

• Aukam yumi mas no lisen po eni tising blo demwan uda libe Zeoba?

• Ip yumi paindaut samwan meke bad sin, wanem yumi mas mekem?

• Wiskain wi ken obei da woning po gedaut prom eni laia rilizan?