TINGBAUT DIS STORI: Yu wagbaut lo wan bilding wea i lugaut plenti ol spesil bipotaim ston. Plenti dem ston i oul, i damiz ane rek prom sidaun ausaid. Sam nadawan i gad ol big pat i brok prom em tu. Bat, wan ston i luk dipren. I gad nating rong wea em bikoz ebridem smolsmol pat blo em i mina nais ane klia. Yu aske da man uda teke yu, “Dis ston i mo niu den dem nadawan a?” Em spik, “No. I mo oul den dem nada ston. Nobobi bin seinzem.” Yu ask gobaigen, “I bin sidaun insaid wan keib a?” Da man spik, “No. Diswan bin sidaun ausaid gense ol nadakain strong win ane rein. Plenti rabisman bi trai po spoilem tu.” Mait yu smol atzamp nau ane tingk, ‘Wiskain ston diswan?’

Baibol i seimkain wase dis spesil ston. I buk prom mina bipotaim ane i mo oul den plenti nada buk. I tru, i gad plenti oul buk. Bat, dem oul buk bin spoil bikoz taim i kese dempla, wase dem oul ston wea i spoil ane damiz. Nada samting tu, wanem Saiens sabe tidei, i nomo gri wea dem oul buk. Bipotaim, wen i tokbaut mersin po ile pipol, sam dem tok erte pipol, i no elpe dempla. Ane, plenti pat prom dem oul raiting i lus ane sam pis i damiz.

Bat, Baibol i mina dipren. Nomata raiting blo da Baibol bin stat 3,500 iya bipo taim blo yumi, i stil stap mina gud. Ane gen ane gen, po mina longtaim, man bin trai moke Baibol, stapem ane banem, bat dem raiting stil stanap strong. Pipol mait tingk Baibol i oulpasin bikoz man sabe plenti ol niu ting nau. Bat, wanem i bin pinis sabe prom mina bipotaim, soe i gad waiztok dat ken mina meke yumi atzamp.

Mait yu ask yuselp, ‘Ken tising blo Baibol elpe laip tidei?’ Po gede ansa, ask yuselp: ‘Wanem nadakain nugud problem i gad wea wold tidei? Wanem problem meke yu mina prait?’ Mait yu tingk i woa, o wiskain man spoile ert, o wiskain man i trite nadaman nugudwei ane no wande pole lo. Nau, teke taim po tingbaut dem waiztok Baibol i gad. Den, ask yuselp, ‘Ip pipol i lisen ane pole dem waiztok, ken wold kam mobeta?

MEKE PIS

“God i blese demwan uda i mata meke pis midel wea ol pipol, bikoz God i gobi papa blo dempla.” (Matiu 5:9) “Yupla mas kipe da pis midel wea ebribodi.”​—Rom 12:18.

POGIB PROM AT

“God i blese ol pipol uda i soe sorewei po ol nada pipol, bikoz God i go soe sorewei po dempla.” (Matiu 5:7) “Bat truwan, yupla i mas soe gudpasinwei po wananada. Yupla i mas gad biglab, gasu wananada ane pogib wananada seimkain wanem God i bin soem tru dat laip blo Kraist wea em bin sore ane no wail po yupla.”​—Episis 4:32.

OLKAIN KANTRIMAN GAD PIS WEA WANANADA

God “i bin meke ol dipren neisin ane i bin kamaut prom wan man, ebri pipol uda i stap wea dis ert.” (Pas Misnare Wok 17:26) “God i trite ebribodi seimwei. God em i api wea enibodi uda meke raitwei ane wosip em nomata wanem kantri dempla i kam prom.”​—Pas Misnare Wok 10:34, 35.

RISPEKT PO ERT

“Da AntapGod i bin teke dat man go ane pute em insaid lo da gadan blo Iden po digemap graun, plante gadan kaikai po kaikai, ane po lugaut dat gadan.” (Zenasis 2:15) God “go damiz ol dem pipol uda i bin damiz da ert.”​—Rebaleisan 11:18.

EITE NUGUD GRIDIWEI

“Yupla mas lugaut nau prom olkain gridiwei. Em ken kese yupla ane yupla go wande mo ane mo samting. Nomata yupla gad plenti samting, i nogo meke laip blo yupla gud.” (Luk 12:15)  “Yupla mas no meke dem nugudwei blo slipraun wea enibodi meke ol dem nugud sekssin. Yupla mas libe dem nugudtot wea yupla i tingbaut ane da gridiwei wea mata wande samting po yuplaselp. Demkain ting i nogad no ples midel wea ol pipol blo God.”​—Episis 5:3.

NO SOE TUPES PASIN ANE WOK AD

“Mipla i mata wande meke ebriting wea da raitwei.” (Ibrupipol 13:18) “Dem pipol uda stile ol samting, mas nomo stil nau. Dempla i mas wok ad po lugaut demplaselp solong dempla i ken elpe dem pipol uda i nogad ol samting.”​—Episis 4:28.

I IMPOTANT PO ELPE PIPOL UDA NIDE ELP

“Meke demwan uda i prait, meke dempla strong. Elpe demwan uda nide elp, ane no wail kuikwan. Lisen po ebriwan.” (1​Tesalonika 5:​14) “Yupla mas lugaut ol pikinini uda nogad mama ane papa, ane lugaut ol oman wea man blo dempla i bin lus.”​—Zemes 1:​27.

Baibol no kasa soe list blo dem waiztok. Bat, i soe yumi wanem po mekem ane wiskain i ken wok lo ebridei laip blo yumi. Ip pipol pole dem tok blo da peiz ya, mait yu gri, i ken elp yumi wea dem mina nugud problem, wold i gad. I mina soe yumi dat waiztok blo Baibol i mina impotant ane i pit po yuzem wea taim blo yumi nau! Bat, lo wiskain wei ken dem tising blo Baibol elpe yu nau?

Wan man uda mo waiz den enibodi bi spik: “Yupla sabe waizwei blo God em i raitwei bikoz wen yupla luk dempla uda pole ubi blo God, dempla gad gudlaip.” (Luk 7:35) So, trai po yuze dem waiztok pas, apta nau, yu go sabe ip dem tok i wok prapa. Yu mait tingk den: ‘Ip Baibol ken elpe mi, laip blo mi go kam mobeta a? Bat, ip ai gad problem nau, wiskain i go wok?’ Trai tingbaut dis stori ya.

Wan oman, neim blo em Delpin, * bin bizi wea em wok ane api wea em laip. Bat, wan ting apta nada samting bin apen po meke em sapa. Yang gel blo em bin pasawei. Maretlaip blo em bin pinis. Em no gad mani. Em spik: “Ai nomo sabe uda mi no pikinini, no man, no aus po stap. Laip blo mi i nating strong blo mi bin go ane ai nomo gad eni oup.”

Delpin bin prapa gri wea mining blo dem wod ya: “Laip blo mipla ken kese 70 iya, o 80 iya ip mipla i strong. Bat dem iya i mata ol trabol ane wori, i go kwikwan, ane mipla i lus.”​—Song blo Sam 90:10.

Delpin bin gede elp prom Baibol tru dis adtaim. I bin mina elpe em. Plenti pipol go gri,  Baibol i wase dat spesil ston dis stori bi tokbaut de pas. Baibol no wase dem plenti buk wea i kam oul ane oulpasin. Wanem meke Baibol dipren? Mait i gad wod blo God ane no tingking blo man?​—1 Tesalonika 2:13.

Mait yu gri dat laip i sot ane gad ol problem. Wen problem i kam po meke yu stres, wea yu ken gede kampot ane waiztok po elpe yu paine da raitwei?

Baibol ken elpe yu sabe wiskain po

1. stap longwei prom ol problem bipo i kam.

2. sabe wanem po mekem ip ol problem kam.

3. no gibap ane go tru dem problem yu kan seinz.